SALMOS 14
14
Se huihuiyotl catli quichihuaj tlajtlacolchijca masehualme
1Nelía huihuitic nopa masehuali catli moilhuía amo aqui Dios.
Nochi catli quej nopa quiijtohuaj mocuapolojtoque huan amo cuajcualme.
Nochi inijuanti monenpolojtoque huan ayacmo quichihuaj catli cuali.
2TOTECO hualtlachixtoc tlen ilhuicac para quiitas sintla huelis quipantis se masehuali catli nelía tlalnamiqui,
se catli quitemohua huan quichihuasnequi ipaquilis.
3Pero amo aqui.
Nochi masehualme mocuapolojtoque ipan se ojtli catli amo cuali.
Nochi monenpolojtoque.
Amo aqui quichihua catli cuali.
¡Niyon se!
4Nopa tlajtlacolchijca masehualme amo quema tlamachilise,
pampa amo quema quielnamiquij TOTECO.
San quintzontlamiltíaj nomasehualhua quen se masehuali quitlamicua se pantzi.
5Pero teipa nochi nopa tlajtlacolchijca masehualme huihuipicase ica majmajtli,
pampa Toteco Dios amo itztoc ininhuaya.
San itztoc ininhuaya catli itztoque xitlahuaque iixpa.
6TOTECO quinmanahuía teicneltzitzi pampa motemachíaj ipan ya quema tlajtlacolchijca masehualme quintlaijiyohuiltíaj.
7Tojuanti tinelpaquisquíaj sintla ya ajsisquía nopa tonali,
quema Totemaquixtijca hualas tlen tepetl Sion para quinmaquixtis israelitame.
Ma huala nopa tonali quema TOTECO quinhualicas imasehualhua tlen campa hueli inincualancaitacahua quinhuicatoque para tetequipanose.
Ipan nopa tonali mopaquilismacase nochi israelitame.
Quena, inijuanti catli iteipan ixhuihua Jacob tlahuel paquise.
Currently Selected:
SALMOS 14: nhwW
Highlight
Share
Copy

Want to have your highlights saved across all your devices? Sign up or sign in
© 2005, Wycliffe Bible Translators, Inc. All rights reserved