GALATAS 4

Zha ne nac xpëëd Dios

1Goḻgona gaṉle, nligaa tib mëëdwin lëë, niicle guiaaṉnie win ncuaaṉe rap pxoz win, per lega nacse win zig tib nguṉdziin win ne ruṉ xtsiiṉ pxoz win. Niicle cheṉ win grë ncuaaṉ co, per grieelod win gnabey wina. 2Laa win riaaṉ ladznia zha ne raṉ win, zha ne rseed win dieṉ pe nac ncuaaṉe guṉ win, laga gdziṉ dze ne laa win zacle ycaania ncuaaṉe psaṉ pxoz win.

3Scadaa nagoṉ bzhiaac ne glo zeeṉe gard guiaad Jesús, rrieequia masaque ngadoo ne lo grë ley co, ni lo grëraa ncuaaṉe rac lo guidzliu rii. 4Laa zeeṉe bdziṉ dze ne laa Dios pxeeḻ Xpëëd me Jesús lo guidzliu (tib wnaa bded por xniaa me, bzoob me diidz beeṉ me grëse zigne rnabey xley zha Israel), 5laa me biaadsilaa ne, biadbee me ne ladznia ley co, bdiizh me grë xtoḻ ne, zeeṉa ycaania Dios ne gac ne mëëd lo Dios. 6Ni parne glu gaṉle ne nli xpëëdle Dios nac ne, pxeeḻ Dios zhiEspíritu Xpëëd me blëz zdoo ne; gacxe waa niina laa ne rieṉ rnee ne lo me: “¡Papá yeeṉ!” Espíritu co rnee ne Pxoz ne nac me.

7Ga nagoṉ, led yedraa niina nac ne zig choḻze cho nguṉdziin, sinque xpëëdle Dios nac ne, ible ye ne ygaa grë guieḻnzaac ne rap Dios.

Rnee Pabl rnabeydraa ley

8Bets, bzian, goḻsoladz gaṉle, zeeṉe bii gard guṉbey to meṉ ne nacpaa Dios, masaque rrieequia ngadoo to lo ncuaaṉe nac zhimdio to hor co, rdib rdzag to ruṉ to grë miṉe rzac to rdziladz grë mdio co. 9Nana, laa to ruṉbeyle Dios, mazd gni naa gaṉle ledaa Dios ruṉbeyle to, ¿pe nac dzigo racladz to gbiire tsiegaṉ to, tsiequiitsgzhib to lo grë mdio co, gbiire guiab to ladznia grë ncuaaṉe paat rquiind co, gnabeya to? 10Rquia to goṉ ruṉ to grë lni, dieṉ pa mëë ndzonraa, dieṉ pa dze nac dze ndaraa, pa iz nac iz ne ndaraa, dieṉ pa dze zac pe gow to, pa dzeegaa gacda. 11¡Rdziebnie naa to goṉ! ¡Pe nlipaa zhlëse biaḻseed naa to, ne squi laa to racladz csaan miṉe biaḻne naa lo to!

12Bets, bzian, laa naa rnab lo to goḻban zigne mban naa, teḻ naa niicle ne zha Israel nac naa per zanaḻdraa naa miṉe nac xley zha Israel. Ngadoodraa naa lo ley, gane rne naa: Goḻban zigne mban naa. Ni guiabde to togo bod nend no pe falt ne beeṉ to lo naa. 13Led rsoladz to gaṉle, rzacnë naa leṉ dze ne psilo pseed naa to zha laa to lo doḻ; miṉ co nacne nzianlaa dze blëz naa lo to i. 14Niicle ne sca rzacnë naa, goṉdze to naa; laa ne mbix zdoo to niaṉ to xquieḻguidz naa, znu pquia zdoo to naa, rley to blëzlo to naa pale cho xanjl Dios o Jesúsgaa, teḻ niaca miṉe mezhal niaadseed to. 15¡Ne nlipagaa rleydox to leṉ dze co! Teḻ niaca miṉe niac mbee to bziaalo to, zootle zig mbee tow ngad tow lo naa. ¿Yo grë guieḻbley co na? ¿Yo ne scataa rleynie to naa leṉ dze co? 16Nana, pe rëb to rlëë naa lo to ne znu rne naa miṉe nacpaa diidzli. ¡Lëda goṉ!

17Goḻquiaadiaga gaṉle, grë zha ne goṉ squi ziadseed to i niina, nli laa zho noxco to per zhaa ncuaaṉe no guic zho. Laa zho racladz tebaa zha guiaaṉladz to naa, csaan to grë miṉe biaḻseed naa to, zeeṉa gbig to lo zho. 18Rtsidiḻd naa pe nacne cho gacnie to, totsaque zha ne nli nquialadz tow. Zig nac naa tibaque noxco naa to, led loxaque zeeṉe zodse naa lo to i. 19¡Xin, ne nlipagaa goṉ rdednë naa raṉ naa squi rac to! Masaque nac guieḻnë rii lo naa niina, zig tib yoob ne rquia grë meṉ wnaa ne gap mëëd. Ni lëë nole naa guieḻnë rii nu nagoṉ, haxta gdziṉ dze ne gaṉ naa laa to wbiire wbig lo Jesús stib. 20Tebaa niaca miṉe grieelo guiaḻzhaal naa lo to i niina, zeeṉa gaṉ naa zha no to, dzigo dieṉ zha gnegaa naa lo to; per na ne znu zit zo naa, naṉd naa dieṉ pe nacraa ncuaaṉe noyuṉ to.

21Zha ne racladz gnabey xley zha Israel zho, racladz naa gnë zho dieṉ, ¿pe ib rieṉd zho zha zhobnee lo guits ne ziaad Xtiidz Dios 22zaatne raquiet xingan Abraham? Rneew: Chop xingan Abraham, tib mëëd co gop wnaa ne nac nguṉdziin lidz me, laa stib mëëd gop wnaa ne nacpaa tsieel me. 23Xpëëd wnaa ne nac nguṉdziin ga, laa win goc mëëd zig grëraa xpëëd miech; saṉgue mëëd ne gop tsieel me ga, laa win gol porne ib Dios rëb ne laa me yquianie win.

24Lo grop wnaa co, tibga me rlu gaṉle zha nac grop trat ne beeṉ Dios: Miṉe bzhaac Agar, ga rlu gaṉle zha nac trat ne beeṉ Dios guic gui Sinaí. Grëse zha ne zienaḻ trat co, nac zho zig goc xpëëd Agar, ladznia trat co no zho. 25Gzoob ne Agar nac Gui Sinaí, gui ne riaaṉ nëz Arab; me nac guiedz Jerusalén ne ndxie leṉ dze rii, sac teḻ grë meṉguiedz Jerusalén, masaque nguṉdziin nac zho lo ley. 26Saṉgue wnaa ne gocpaa tsieel Abraham ga, rrieequia me nac Jerusalén ne no gbaa, zaatne ngab grë zha ne no xnëz Jesús, sac led yedraa grë zha co ngadoo lo ley; ye ne ngab ga, ni gzoob ne lëë xniaa ne ga nac wnaa co. 27Lëë Jerusalén co ga raquiet lo Xtiidz Dios, zaatne znu rnee:

Luu, ne nac luu wnaa ne brieelod niap mëëd, bley niina;

nguieeḻ goc, nguiedz broptsie lo guieḻbley qui,

luu ne bdziṉd dze niacnaṉ luu zha nac yoob mëëd.

Sac goṉ ndalraa xpëëd wnaa ne brieelod niap mëëd,

lëdle grë xpëëd wnaa ne gop mëëd.

28Bets, bzian, goḻgacnaṉ sca gaṉle, laa ne nacle niina zig Isaac, xpëëd tsieelpaa Abraham, wnaa ne gacd yquianie mëëd ga; sac teḻ Isaac, ib Dios psaṉ diidz ne laa Isaac gac mëëd lo Abraham. 29Ni zigne sca blëënie xpëëd wnaa nguṉdziin co Isaac, mëëd ne Dioszhal psaṉ diidz gal ga; scasaque niina, no zha ne rlëë raṉ zho zionaḻd ne miṉe rnabey ley, sinque laa ne zionaḻ dib zdoo ne rliladz ne Jesús. 30Ni nana, led lo Xtiidzaque Dios zhobnee gaṉle zha rëb Dios lo Abraham, rëb me: “Wnaa ne nac nguṉdziin lo luu i, bzonëz me grop xpëëd me, nonguieḻd ne ye mëëd qui guiaaṉnie ncuaaṉe csaṉ luu lo xpëëd tsieel luu.” 31Gacxe nagoṉ waa, teḻ ne nacd ne zig xpëëd wnaa nguṉdziin co, sinque laa ne nac zig xpëëd tsieelpaa Abraham.

Currently Selected:

GALATAS 4: zpm

Highlight

Copy