San Lucas 17

Bitw cheyaḻa' goncho cont gon beṉe' da' xiṉj

(Mt. 18:6-7, 21-22; Mr. 9:42)

1Na' gož Jesúsen' beṉe' ca' zjanaque' ḻe' txen:

―Decze da' gonen cont lažo' beṉe' yesone' da' xiṉj, perw nyaše'chguaze gac c̱he beṉe' chone' cont beṉe' yoble yesone' da' xiṉj. 2Yejṉi'a šaca' yosoc̱heje' yene' to yiše na' šjasezaḻe' ḻe' ḻo' nisdao' clel ca soe' gone' cont to beṉe' za' gwzolagüe' chejnilaže' neda' lažoe' gone' da' xiṉj. 3Da'nan' ḻe gwsaca' cont bi gonḻe ga lažo' beṉe' gone' da' xiṉj.

’Na' še to beṉe' ḻježle gonde' le'e mal, ḻe tiḻe' na' še gwše'e xbab na' ṉe' bich gone' ca', ḻe yezi'xen c̱he'. 4Ḻa'czḻa' gaž ṉi'a lao tža gone' da' mal contr beṉe' ḻježen', še gaž ṉi'ate ṉe': “Ba betiṉjda' c̱he dan' benan', bezi'xen c̱hia'”, na' cheyaḻa' yezi'xene' c̱he'.

Gosaclaže' yesejḻe'che' c̱he Diosen'

5Na' gose' postlw ca' X̱ancho Jesúsen':

―Gaclenšco' neto' cont šejḻe'chto' c̱he Diosen'.

6Nach gož X̱anchon' ḻegaque':

―Xsa yag xomdas naquen da' dao' riz, na' ḻa'czḻa' dan' chejnilaže'le Diosen' naquen ca to xsa xomdas lagüe dan' bi chejnilaže'teclne', še šejnilaže'lne', guaque ye'le yag nga: “Gwcuase nga na' jayzoa ḻo' nisdaon'”, na' guaccze can' nalna'.

Dan' cheyaḻa' yeson mos ca'

7’Le'e še mos c̱helen' chgua'aṉe' go'ṉ, o še chyoe' xila', cate' chele'e güeyeban' bitw che'lne': “Beyo'o ngale, gwche'edo' gaguo' xše'.” 8San che'lne': “Bsiṉi'a da' ye'ej gagua' na' goṉon'. Te yedaguan' nach gago'.” 9Na' bitw cho'elne' yeḻa' chox̱clen cate' ba bene' dan' gožlene'. 10Na' ḻecz ca' le'e, cate' ba benḻe yogo'ḻoḻ dan' ža Diosen' gonḻe, cheyaḻa' ṉale: “Bitw zaca'to' no goṉ yeḻa' chox̱clen c̱heto' ca dan' ba bento', ḻe bento' con da' cheyaḻa'cze gonton'.”

Jesúsen' beyone' ši beṉe' chese'ede' yižgüe' da' nzi' lepra

11Na' zej Jesúsen' Jerusalénṉa' len beṉe' ca' zjanaque' ḻe' txen na' gwdie' gan' ndiḻ distritw Samaria len distritw Galilean'. 12Na' besežine' to cho'a yež dao' na' besechoj ši beṉe' chese'e yižgüe' da' nzi' lepra jasešague' Jesúsen'. Na' gosezie' zito' 13na' goseṉe' zižje gosene':

―Maestrw Jesús, beyaše'laže' neto'.

14Na' Jesúsen' cate' ble'ede' ḻegaque' na' gože'ne':

―Ḻe šjaya'ac lao bx̱oz ca' cont yeseṉe'e le'e še ba beyacle.

Na' goquen' ḻo neza' besyeyacde'. 15Nach toe' cate' gocbe'ede' bac̱h beyaque', na' bebi'e na' gwṉie' zižje benxene' Diosen', 16na' bzoa xibe' lao Jesúsen' bi'e ḻe' yeḻa' chox̱clen. Ben' ben ca' naque' to beṉe' Samaria. 17Nach gwna Jesúsen':

―Beyona' ši beṉe'. ¿Gaṉxe beṉe' ca' yega? 18¿Toz beṉe' zito' nga bebi'e chonxene' Diosen'?

19Nach gož Jesúsen' bena':

―Bezoža' beyej to šagüe' to güen. Ba beyacdo' da' chejnilažo' neda'.

Yeḻa' chnabia' c̱he Diosen'

(Mt. 24:23-28, 36-41)

20Na' beṉe' fariseo ca' goseṉabde' ḻe' batxen' yid ben' seḻa' Diosen' ṉabi'e nación Israelen'. Nach boži'i Jesúsen' xtiža'gaquen' gwne':

―Ca nac yeḻa' gwnabia' c̱he Diosen', bi naquen da' le'echo. 21Nono cheyaḻa' güe' diža' ṉe': “Gwṉa' nga chnabi'e”, o “Gwṉa' na' chnabi'e.” Ḻe ba zoe' len le'e ṉa'a chnabi'e.

22Nach gože' beṉe' ca' zjanaque' ḻe' txen:

―Gwžin ža cate' ṉale: “Šaca' ṉa'a ba chnabia' ben' gwseḻa' Diosen'”, perw bitw gac can' ṉablaže'len'. 23Yesenita' beṉe' yesi'e le'e: “Gwṉa'šc nga zoa ben' gwseḻa' Diosen'”, o “Gwṉa'šc na' zoa ben' gwseḻa' Diosen'.” Perw bitw ga'ole ben' yesi'e le'e ca'. 24Can' chac cate' chep yes, chseṉin' doxen ḻe'e yaban' zejzenez, ḻecze can' gac cate' žin ža yida' da' yoble, neda' naca' ben' gwseḻa' Diosen' golja' beṉac̱h. Yida' zejzenez na' yogo'ḻoḻ beṉe' yesele'ede' neda'. 25Zgua'tec de da' zan da' cheyaḻa' saca'zi'a na' beṉe' ca' že' ṉa'a bitw yesejḻe'e c̱hia'. 26Ḻecz ca' goc ca tiemp c̱he da' Noé, ḻecze ca' gac cate' ba zoa žin ža yida' da' yoble, neda' naca' ben' gwseḻa' Diosen' golja' beṉac̱h. 27Beṉe' gwnita' ca tiemp c̱he da' Noén' gosaše' gose'ej gosagüe' goso'elaže' bosošagne'e na' bosošague' na' no xi'iṉ c̱he' cate' bžin ža gwyo'o Noén' ḻo' barcon'. Nach goc to yejwsio' juisyw. Na' gosebiayi' yogo' beṉe' ca' bi goso'o ḻo' barcon'. 28Ḻecz ca' goc ca tiemp c̱he da' Lot, beṉe' Sodoman' gose'ej gosagüe' gosote' bi da' de c̱hegaque', na' gosezi'e bi da' beseyažjde', na' gosaz gosa'aṉe', na' goson liže'. 29Perw na' žan' beza' Loten' Sodoman', Diosen' bene' cont byiṉj yi' na' azufre yaba na' gosebiayi' yogo'ḻoḻe'. 30Can' gac cate' yida' da' yoble, neda' naca' ben' gwseḻa' Diosen' golja' beṉac̱h, na' yogo'ḻoḻ beṉe' yesele'ede' neda'.

31’Na' ža caten' yida' še chda to beṉe' do yic̱hjo'o c̱he liže', na' xšinḻaze' žen' ḻo' yo'o c̱he', bi yeyetje' cont yotoben', con yoxoṉje'. Na' ḻecze ca' beṉe' chda do yix̱e', bitw gacde' yeyej liže'. 32Ḻe šjayza'laže' can' goc c̱he no'ol c̱he Loten'. 33Note'tez beṉe' chacde' gone' cont cbi saca'zie' o cont nono yesot ḻe', bena' cuiayi'. Na' note'tez beṉe' chzanḻaže' cuine' saca'zie' o gate' ṉe c̱hia' neda', ba de yeḻa' mban c̱he' toḻi tocaṉe.

34’Chnia' le'e, quinga gac caten' yida' da' yoble. C̱hope beṉe' zjadie' chesetase' toz cam. Toe' yeca'a Diosen' na' yetoe' yega'aṉ. 35Na' c̱hop no'ole nite' txen chesote', toe' yeca'a Diosen' na' yetoe' yega'aṉ. 36Na' c̱hope beṉe' nite' do yix̱e', toe' yeca'a Diosen' na' ḻecze yega'aṉ yetoe'.

37Cate' gosende' diža' nga gose'e ḻe':

―¿Gan' gac da' qui, X̱anto'?

Nach Jesúsen' gože' ḻegaque':

―Nga chonen c̱he ben' že': “Gan' de be guat nan' chesežag šod ca'.”

Currently Selected:

San Lucas 17: zpq

Highlight

Copy