San Lucas 12

Ne caꞌve̱j rá Jesús quiꞌya̱j nij síí tucuꞌyón snana̱ soꞌ nda̱a vaa quiꞌyaj nij síí fariseo a

1Dan me se cunuu chre̱ꞌ queꞌe̱e̱ míj yuvii̱ rej va̱j Jesús, ne̱ uxrá chru̱j mán nij soꞌ, ne̱ nda̱a tiguíj tuviꞌ maꞌa̱n nij soꞌ a.

Ga̱a ne̱ guun cheꞌe̱ Jesús caꞌmii soꞌ asino ya̱a̱n ga̱ nij síí tucuꞌyón snana̱ soꞌ, cataj soꞌ a:

―Tu̱mé soj man soj se̱ gaa na̱nj quira̱nꞌ soj sayuun, quiꞌya̱j nana̱ nucuiꞌ rá aꞌmii nij síí fariseo á. ꞌO̱ se ase ꞌyaj se cuꞌna̱j levadura se ꞌyaj naraa nana̱ rque rachrúún ꞌyaj snana̱ nij soꞌ ado̱nj. 2ꞌO̱ se nu̱ꞌ nana̱ caꞌmii yuve̱ nij yuvii̱ do̱ꞌ, nu̱ꞌ rasu̱u̱n ꞌyaj yuve̱ nij yuvii̱ do̱ꞌ, nu̱ꞌ yoꞌ roꞌ, nu̱riha̱nj queneꞌe̱n cunuda̱nj yuvii̱ vaa güii ado̱nj. 3Cheꞌé dan nu̱ꞌ nana̱ caꞌmii soj rej rmi̱ꞌ roꞌ, vaa güii nu̱riha̱nj yoꞌ rej chuguu̱n, ne̱ nu̱ꞌ nana̱ caꞌmii soj xréé tuviꞌ soj rej rá veꞌ roꞌ, cagua̱j nii caꞌmi̱i̱ natáj nii nana̱ yoꞌ xráá veꞌ vaa güii na̱nj á ―taj Jesús rihaan nij soꞌ a.

Cataj Jesús se vaa se̱ cuchuꞌviꞌ níꞌ queneꞌe̱n níꞌ yuvii̱ maꞌ

4Ga̱a ne̱ cataj uún Jesús a:

―Dan me se tuvíꞌ ꞌu̱nj me soj, ne̱ cheꞌé dan cata̱j xnaꞌanj ꞌu̱nj rihaan soj se vaa se̱ cuchuꞌviꞌ soj ni̱ꞌyaj soj nij síí ticavi̱ꞌ nee̱ man soj maꞌ. ꞌO̱ se asa̱ꞌ quiꞌyaj nij soꞌ da̱nj, ga̱a ne̱ taj va̱j doj se chiꞌi̱i̱ quiꞌya̱j uún nij soꞌ man soj a̱ maꞌ. 5Tza̱j ne̱ nihánj me se ti̱haán ꞌu̱nj rihaan soj me síí cuchuꞌvi̱ꞌ soj ni̱ꞌyaj soj man a. ꞌO̱ se vaa cheꞌé cuchuꞌvi̱ꞌ soj ni̱ꞌyaj soj Yaꞌanj ado̱nj. Asa̱ꞌ quisíj ticaviꞌ nii man soj, ga̱a ne̱ soꞌ me síí uun nucua̱j caꞌne̱j man soj rihaan yaꞌan caca̱a̱ soj ado̱nj. Cheꞌé dan taj ꞌu̱nj rihaan soj se vaa vaa cheꞌé cuchuꞌvi̱ꞌ soj ni̱ꞌyaj soj man soꞌ ado̱nj.

6’Neꞌen soj da̱j vaa nij xtâj chri̱nꞌ se vaa ꞌu̱nꞌ ya̱ xoꞌ nó vi̱j saꞌanj aga̱ꞌ no̱ do̱j tzínꞌ a. Tza̱j ne̱ taj yaꞌanj uxrá Yaꞌanj man ꞌo̱ ꞌo̱ nij xoꞌ a. 7Ne̱ Yaꞌanj me se vaa cuentá yuvé raa̱ soj ꞌyaj soꞌ, ne̱ neꞌen soꞌ me daj yuvé raa̱ soj, ne̱ cheꞌé dan se̱ cuchuꞌviꞌ soj cheꞌé sayuun quiꞌya̱j yuvii̱ man soj maꞌ. ꞌO̱ se uxrá vaa yuꞌvee doj nó soj rihaan xtâj chri̱nꞌ yoꞌ, rihaan Yaꞌanj ado̱nj.

8’Ne̱ cata̱j xnaꞌanj ꞌu̱nj rihaan soj cuano̱ se vaa no̱ xcúún soj nata̱ꞌ ya̱ soj rihaan yuvii̱ se vaa me soj síí noco̱ꞌ manj a. Ne̱ nu̱ꞌ síí ꞌyaj da̱nj roꞌ, vaa güii, ne̱ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ roꞌ, nata̱j rihaan nij se‑mo̱zó Yaꞌanj se vaa si̱j noco̱ꞌ manj me soꞌ a. 9Ne̱ síí taj xnaꞌanj rihaan yuvii̱ se vaa né si̱j noco̱ꞌ manj me soꞌ roꞌ, vaa güii, ne̱ cata̱j xnaꞌanj yá ꞌu̱nj rihaan nij se‑mo̱zó Réé ꞌu̱nj se vaa né si̱j noco̱ꞌ manj me soꞌ a̱ maꞌ.

10’Dan me se ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ roꞌ, caꞌve̱e se caꞌmi̱i̱ ꞌo̱ soꞌ nana̱ nij cheꞌej, ne̱ caꞌve̱e navi̱j cacunꞌ xráá soꞌ quiꞌya̱j Yaꞌanj, tza̱j ne̱ sese caꞌmi̱i̱ ꞌo̱ soꞌ nana̱ qui̱j cheꞌé Nimán Yaꞌanj, ne̱ daj chiha̱a̱ míj se̱ tinavij Yaꞌanj cacunꞌ yoꞌ xráá soꞌ a̱ maꞌ.

11’Dan me se asa̱ꞌ tucuatúj nii man soj rá veꞌ tucuꞌyón níꞌ si̱j israelitá stucua̱nj Moisés ne̱ canicu̱nꞌ soj rihaan nij cuese̱ do̱ꞌ, nij síí nica̱j suun do̱ꞌ, ne̱ se̱ nanó rá soj da̱j caꞌmi̱i̱ soj cheꞌé soj rihaan nij soꞌ maꞌ. 12ꞌO̱ se orá yoꞌ roꞌ, maꞌa̱n Nimán Yaꞌanj tu̱cuꞌyón man soj da̱j caꞌmi̱i̱ soj rihaan nij soꞌ ado̱nj ―taj Jesús rihaan nij síí tucuꞌyón snana̱ soꞌ a.

Nanó Jesús cuentó cheꞌé ꞌo̱ síí ruꞌvee caraa sa̱ꞌ queꞌe̱e̱ rasu̱u̱n rihaan chumii̱ nihánj a

13Dan me se cataj ꞌo̱ nij yuvii̱ yoꞌ rihaan Jesús a:

―Cata̱j so̱ꞌ rihaan tinúú ꞌu̱nj se vaa cuxra̱ꞌ taꞌa̱j soꞌ toꞌóó réj do̱ꞌ, rasu̱u̱n siꞌya̱j réj do̱ꞌ, ga̱j, maestro ―taj soꞌ rihaan Jesús a.

14Ga̱a ne̱ cataj Jesús a:

―Me cheꞌé uun rá so̱ꞌ se vaa guún ꞌu̱nj síí aꞌneꞌ cacunꞌ cheꞌé soj ga̱. Me cheꞌé caꞌmi̱i̱ ꞌu̱nj cheꞌé rasu̱u̱n vaa rihaan ro̱j tinu̱j soj, rá so̱ꞌ, ga̱ tinu̱ꞌ ―taj Jesús rihaan soꞌ a.

15Ga̱a ne̱ cataj Jesús rihaan nij yuvii̱ a:

―Tu̱mé uxrá soj man soj rihaan nij rasu̱u̱n xco̱j ruva̱a̱ rá a. Né ra̱su̱u̱n ma̱n rihaan níꞌ quiꞌya̱j cavi̱i̱ sa̱ꞌ nimán níꞌ maꞌ ―taj Jesús rihaan nij yuvii̱ a.

16Ga̱a ne̱ dan me se nanó Jesús ꞌo̱ se‑cuento̱ ꞌo̱ síí ruꞌvee rihaan nij yuvii̱ a:

―ꞌO̱ síí ruꞌvee me ꞌo̱ soꞌ, ne̱ cavii ndoꞌo xnaa̱ soꞌ, ne̱ ma̱n ndoꞌo rasu̱u̱n rihaan soꞌ, 17ne̱ dan me se uun rá soꞌ a: “A̱ me se qui̱ꞌyáj ga̱ rasu̱u̱n ma̱n rihanj ne̱ taj rej cara̱a sa̱j man rasu̱u̱n yoꞌ ga̱”, rá soꞌ a. 18Ga̱a ne̱ guun rá soꞌ a: “A̱j neꞌenj me se qui̱ꞌyáj á. Tu̱cuanee ꞌu̱nj man nij cuchruu̱ nii, ne̱ qui̱ꞌyáj doj veꞌ xi̱j, ne̱ ꞌo̱ cara̱a chre̱ꞌ ꞌu̱nj man nij rasu̱u̱n, ne̱ ti̱navii ꞌu̱nj man nij yoꞌ rá nij veꞌ, 19ga̱a ne̱ cata̱j ꞌu̱nj rihaan nimanj se vaa ma̱n ndoꞌo rasu̱u̱n rihaan níꞌ cha̱ níꞌ, ne̱ se̱ nanó rá níꞌ, ma̱an se veꞌé cha̱ níꞌ do̱ꞌ, veꞌé coꞌo̱ níꞌ do̱ꞌ, veꞌé ca̱yáán níꞌ do̱ꞌ, veꞌé nara̱a̱n rá níꞌ do̱ꞌ a. Da̱nj cata̱j rihaan nimanj cheꞌé nij rasu̱u̱n cuma̱n rihanj a”, guun rá soꞌ a. 20Tza̱j ne̱ Yaꞌanj caꞌmii rihaan soꞌ, cataj Yaꞌanj a: “Síí niꞌyo̱n mé so̱ꞌ ado̱nj. ꞌO̱ se nii̱ corá me se cavi̱ꞌ so̱ꞌ, ne̱ xa̱ꞌ rasu̱u̱n caraa sa̱ꞌ so̱ꞌ, tza̱j ne̱ me se gu̱un yoꞌ rihaan so̱ꞌ, rá so̱ꞌ ga̱”, taj Yaꞌanj rihaan ruꞌvee yoꞌ a. 21Da̱nj quira̱nꞌ síí araa sa̱ꞌ rasu̱u̱n cheꞌé maꞌa̱n, ne̱ taj va̱j a̱ doj rasu̱u̱n sa̱ꞌ nica̱j soꞌ, niꞌya̱j Yaꞌanj a̱ maꞌ ―taj Jesús rihaan nij yuvii̱ a.

Cataj Jesús se vaa se̱ nanó rá níꞌ cheꞌé se cha̱ níꞌ do̱ꞌ, cheꞌé yatzíj cu̱nuû níꞌ do̱ꞌ maꞌ

22Ga̱a ne̱ cataj Jesús rihaan nij síí tucuꞌyón snana̱ soꞌ a:

―Cheꞌé dan cata̱j xnaꞌanj ꞌu̱nj ꞌo̱ nana̱ rihaan soj a: Taj cheꞌé nano̱ ndoꞌo rá soj cheꞌé soj maꞌ. Ne̱ cheꞌé se cha̱ soj do̱ꞌ, ne̱ cheꞌé yan quiri̱ꞌ soj se ca̱ráán xráá soj do̱ꞌ, se̱ nanó rá soj maꞌ. 23Vaa se uun doj se vaa iꞌna̱ꞌ níꞌ rihaan se cha̱ níꞌ, ne̱ vaa se uun doj nee̱ man níꞌ rihaan yatzéj ca̱ráán xráá níꞌ ado̱nj.

24’Xca̱j soj cuentá da̱j ꞌyaj nij xcaa, ne̱ ne unô nij xoꞌ ꞌnúú, ne̱ ne rii nij xoꞌ naa̱, ne̱ taj se‑cuchru̱u̱ nij xoꞌ, tza̱j ne̱ Yaꞌanj roꞌ, rqué se chá nij xoꞌ ado̱nj. Ne̱ ya̱ sa̱ꞌ doj vaa soj rihaan xcaa niꞌya̱j Yaꞌanj ado̱nj. 25Ne̱ nda̱ꞌ se nanó ndoꞌo rá soj, tza̱j ne̱ se̱ caꞌvee nacuta̱ꞌ soj a̱ ꞌó güii ga̱a̱ iꞌna̱ꞌ soj rihaan chumii̱ nihánj maꞌ. 26Dan me se sese se̱ caꞌvee quiꞌya̱j soj rasu̱u̱n leꞌe̱j doj, ne̱ asa̱ꞌ caꞌve̱e quiꞌya̱j soj rasu̱u̱n noco̱o doj, rá soj ga̱. Cheꞌé dan taj cheꞌé nano̱ ndoꞌo rá soj cheꞌé nij rasu̱u̱n noco̱o doj a̱ maꞌ.

27’ ꞌO̱ se xca̱j soj cuentá da̱j achij nij yâj á. Ne ꞌyaj suun nij yâj, ne̱ ne rii nij yâj yuꞌvej, tza̱j ne̱ veꞌé doj vaa yâj rihaan saga̱nꞌ rey cuꞌna̱j Salomón yatzéj tuꞌve̱e̱ ndoꞌo ado̱nj. 28Dan me se sese taj yaꞌanj Yaꞌanj man yâj, ne̱ ꞌyaj soꞌ se vaa veꞌé ndoꞌo vaa yâj, nda̱ꞌ se cuanꞌ ayón yâj tacaan ne̱ aꞌyuj caca̱a̱ yâj yoꞌ rque chrúún, ne̱ táá a̱ soj yuvi̱i̱, ne̱ ta̱j yaꞌanj Yaꞌanj man soj ne̱ rque̱ soꞌ saga̱nꞌ soj ado̱nj. Tza̱j ne̱ ne nucua̱j rá soj niꞌya̱j soj man Yaꞌanj maan ado̱nj.

29’Ne̱ xa̱ꞌ soj, tza̱j ne̱ se̱ nanoꞌ ndoꞌo soj se cha̱ soj do̱ꞌ, se coꞌo̱ soj do̱ꞌ maꞌ. Ne̱ se̱ nanó ndoꞌo rá soj cheꞌé nij yoꞌ maꞌ. 30ꞌO̱ se nij síí ma̱n rihaan chumii̱ nihánj síí ne neꞌen da̱j vaa Yaꞌanj roꞌ, ina̱nj ꞌyaj suun ndoꞌo nij soꞌ cheꞌé rasu̱u̱n ma̱n rihaan chumii̱ nihánj ado̱nj. Tza̱j ne̱ nu̱ꞌ rasu̱u̱n achiin man soj roꞌ, a̱j neꞌen Rej soj Yaꞌanj se vaa achiin rasu̱u̱n yoꞌ man soj ado̱nj. 31Tana̱nj nano̱ꞌ soj rej da̱j quiꞌya̱j soj, ne̱ gu̱un chij Yaꞌanj nimán soj, ga̱a ne̱ rque̱ Yaꞌanj da̱j a̱ rasu̱u̱n yoꞌ rihaan soj ado̱nj.

32’Se̱ cuchuꞌviꞌ soj maꞌ. Ase vaa daán Yaꞌanj matzinj vaa soj, ne̱ Yaꞌanj tumé man soj, ne̱ a̱j guun rá Rej soj Yaꞌanj se vaa gu̱un chij soj ga̱ soꞌ vaa güii a.

33’Cutuꞌve̱e̱ soj siꞌyaj soj, ne̱ caxri̱i̱ soj saꞌanj ston nij síí nique̱ á. Ga̱a ne̱ vaa güii quiri̱ꞌ soj ꞌo̱ nanj caraa nu̱ꞌ saꞌanj rque, ne̱ nanj yoꞌ roꞌ, daj chiha̱a̱ míj se̱ xtuu̱ nanj yoꞌ, ne̱ saꞌanj yoꞌ roꞌ, daj chiha̱a̱ míj se̱ navij saꞌanj yoꞌ maꞌ. Yoꞌ me se quiri̱ꞌ soj rej xta̱ꞌ, ne̱ rej xta̱ꞌ roꞌ, taj va̱j síí itu̱u̱ maꞌ. Ne̱ taj va̱j xlúú chá rasu̱u̱n maꞌ. 34Me rej maꞌa̱n araa sa̱ꞌ soj rasu̱u̱n siꞌyaj soj, ne̱ veé rej da̱nj vaj nimán soj na̱nj ado̱nj ―taj Jesús rihaan nij síí tucuꞌyón snana̱ soꞌ a.

Nanó Jesús cuentó cheꞌé mozó naꞌvi̱j nama̱n ruꞌvee a

35Ne̱ cataj uún Jesús rihaan nij soꞌ a:

―Ase vaa síí ꞌni̱j xraan nuj catuu̱n roꞌ, da̱nj ga̱a̱ soj á. Ase vaa síí nica̱j agaꞌ chuguu̱n acoꞌ yaꞌan roꞌ, da̱nj ga̱a̱ soj á. 36Dan me se quiꞌya̱j soj nda̱a vaa ꞌyaj mozó naꞌvi̱j soꞌ nama̱n se‑ruꞌve̱e̱ soꞌ ga̱a caꞌanj se‑ruꞌve̱e̱ soꞌ chaꞌanj naraꞌa̱a na̱nj á. Dan me se asa̱ꞌ namán ruꞌvee ne̱ nu̱ꞌ ta̱raꞌa soꞌ taꞌyaa, ne̱ nu̱ꞌ caꞌnu̱u̱ mozó yoꞌ taꞌyaa na̱nj ado̱nj. 37Ne̱ cavi̱i̱ sa̱ꞌ uxrá nij mozó ꞌyaj da̱nj, cheꞌé se ne otoj nij soꞌ ga̱a namán se‑ruꞌve̱e̱ nij soꞌ a. Dan me se queneꞌe̱n ya̱ soꞌ se vaa ne otoj nij soꞌ maꞌ. Cata̱j yá ꞌu̱nj rihaan soj cuano̱ se vaa maꞌa̱n ruꞌvee yoꞌ roꞌ, naquiꞌya̱j sa̱ꞌ soꞌ man soꞌ, ne̱ ca̱yáán se‑mo̱zó soꞌ rihaan mesá, quiꞌya̱j soꞌ, ne̱ quiꞌya̱j chuvi̱i maꞌa̱n soꞌ cha̱ nij se‑mo̱zó soꞌ ado̱nj. 38Dan me se caꞌve̱e se rej ya̱nꞌ nama̱n soꞌ niꞌ, caꞌve̱e se rej taxre̱j nama̱n soꞌ niꞌ, tza̱j ne̱ a̱j neꞌen soꞌ se vaa veꞌé ina̱nj naꞌvi̱j nij mozó yoꞌ man soꞌ, ne̱ cavi̱i̱ sa̱ꞌ uxrá nij mozó yoꞌ ado̱nj. 39Dan me se sese ꞌo̱ síí tucua̱ veꞌ roꞌ, a̱j neꞌen soꞌ me orá caꞌna̱ꞌ síí itu̱u̱ ne̱ quiꞌya̱j itu̱u̱ síí itu̱u̱ rasu̱u̱n ma̱n tucuá soꞌ, ne̱ uxrá tu̱mé soꞌ tucuá soꞌ, ne̱ se̱ quiꞌyaj itu̱u̱ síí itu̱u̱ tucuá soꞌ tza̱j maꞌ. 40Dan me se taꞌngaꞌ da̱nj vaa gue̱e̱ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ a. ꞌO̱ se ne neꞌen soj me orá caꞌna̱ꞌ uún ꞌu̱nj maan ado̱nj. Cheꞌé dan ꞌo̱ ni̱ꞌyaj soj á ―taj Jesús rihaan nij síí tucuꞌyón snana̱ soꞌ a.

Cataj Jesús da̱j quira̱nꞌ síí veꞌé ꞌyaj se‑su̱u̱n Yaꞌanj do̱ꞌ, síí ne sa̱ꞌ ꞌyaj se‑su̱u̱n Yaꞌanj do̱ꞌ a

41Ga̱a ne̱ xnáꞌanj síí cuꞌna̱j Pedró man Jesús, cataj soꞌ a:

―Señor, cheꞌé maꞌa̱n núj me nanó so̱ꞌ cuentó yoꞌ naꞌ. Ase cheꞌé cunuda̱nj yuvii̱ xa̱ꞌ ―taj Pedró, xnáꞌanj soꞌ man Jesús a.

42Ga̱a ne̱ cataj Jesús Si̱j ꞌNi̱j Raꞌa man níꞌ a:

―Cheꞌé dan me sese cuneꞌ síí tucua̱ ꞌo̱ veꞌ man ꞌo̱ se‑mo̱zó soꞌ se vaa tu̱mé mozó yoꞌ man tuviꞌ mozó rque̱ soꞌ se chá rihaan nij soꞌ orá chá nij soꞌ, ne̱ da̱j quiꞌya̱j mozó yoꞌ, rá soj ga̱. Sese ya̱ ya̱ si̱j veꞌé ꞌyaj suun me soꞌ do̱ꞌ, sese ya̱ ya̱ si̱j avii raa̱ me soꞌ do̱ꞌ, ne̱ da̱j quiꞌya̱j soꞌ, rá soj ga̱. 43Ga̱a ne̱ güii nama̱n se‑ruꞌve̱e̱ mozó roꞌ, sese queneꞌe̱n se‑ruꞌve̱e̱ soꞌ se vaa veꞌé ꞌyaj suun mozó se‑su̱u̱n ruꞌvee, ne̱ cavi̱i̱ sa̱ꞌ uxrá mozó yoꞌ, quiꞌya̱j ruꞌvee yoꞌ ado̱nj. 44Ya̱ ya̱ cata̱j xnaꞌanj ꞌu̱nj rihaan soj cuano̱ se vaa cune̱ꞌ ruꞌvee yoꞌ man mozó yoꞌ gu̱un soꞌ síí tumé man cunuda̱nj siꞌyaj ruꞌvee yoꞌ a. 45Tza̱j ne̱ sese gu̱un rá mozó yoꞌ se vaa uun ra̱a̱n ndoꞌo se‑ruꞌve̱e̱ soꞌ, ga̱a ne̱ gu̱un cheꞌe̱ soꞌ go̱ꞌ soꞌ man ꞌó nij mozó do̱ꞌ, man nij mozó cha̱na̱ do̱ꞌ, ne̱ cha̱ soꞌ coꞌo̱ soꞌ ne̱ gu̱un xno̱ soꞌ a. 46Dan me se ne neꞌen soꞌ aman nama̱n se‑ruꞌve̱e̱ soꞌ a. Ne naꞌvi̱j soꞌ caꞌna̱ꞌ ruꞌvee a. Tza̱j ne̱ síj güii síj orá síj, ne̱ caꞌna̱ꞌ maꞌa̱n se‑ruꞌve̱e̱ mozó yoꞌ, ga̱a ne̱ quira̱nꞌ uxrá mozó yoꞌ sayuun, quiꞌya̱j se‑ruꞌve̱e̱ soꞌ, ne̱ caꞌne̱j ruꞌvee man soꞌ rej ma̱n nij síí ne amán rá niꞌya̱j man Yaꞌanj a.

47’Dan me se xa̱ꞌ mozó neꞌen da̱j me rá se‑ruꞌve̱e̱ soꞌ quiꞌya̱j soꞌ, tza̱j ne̱ sese se̱ quiꞌyaj soꞌ da̱nj, ne̱ ꞌyaj soꞌ ina̱nj se vaa rii nimán maꞌa̱n soꞌ quiꞌya̱j soꞌ, ne̱ cayu̱u̱n uxrá soꞌ vaa güii ado̱nj. 48Tza̱j ne̱ xa̱ꞌ síí ne neꞌen da̱j me rá se‑ruꞌve̱e̱ soꞌ quiꞌya̱j soꞌ, ne̱ quiꞌyaj soꞌ rasu̱u̱n naꞌvej rá se‑ruꞌve̱e̱ soꞌ quiꞌya̱j soꞌ, tza̱j ne̱ ma̱an cheꞌé se ne neꞌen soꞌ ne̱ quiꞌyaj soꞌ rasu̱u̱n chiꞌi̱i̱ roꞌ, ma̱an cheꞌé dan do̱j cayu̱u̱n soꞌ ado̱nj.

’Ne̱ síí ata̱ suun noco̱o doj ꞌyaj se‑ruꞌve̱e̱ soꞌ roꞌ, doj a̱ gu̱un rá se‑ruꞌve̱e̱ soꞌ quiꞌya̱j suun soꞌ a. Ne̱ síí tumé doj rasu̱u̱n cheꞌé se‑ruꞌve̱e̱ soꞌ roꞌ, doj a̱ ga̱a̱ rasu̱u̱n nachi̱nꞌ se‑ruꞌve̱e̱ soꞌ rihaan soꞌ na̱nj ado̱nj ―taj Jesús rihaan nij síí tucuꞌyón snana̱ soꞌ a.

Xra̱ꞌ taꞌa̱j ndoꞌo yuvii̱ ga̱ tuviꞌ yuvii̱ cheꞌé Jesús a

49Ga̱a ne̱ cataj uún Jesús a:

―Caꞌnáꞌ ꞌu̱nj rihaan chumii̱ nihánj cheꞌé rej ta̱cuacoj yaꞌan nimán yuvii̱, ne̱ gu̱un niha̱ꞌ rá nij yuvii̱ canoco̱ꞌ nij yuvii̱ man Yaꞌanj ado̱nj. Ne̱ me ndoꞌo raj se vaa raꞌya̱nj caco̱ꞌ yaꞌan yoꞌ nimán nij yuvii̱ ado̱nj. 50Tza̱j ne̱ rej rihaan níꞌ me se vaa uxrá sayuun qui̱ránꞌ ꞌu̱nj, se vaa nata̱ꞌ nu̱ꞌ sayuun yoꞌ xráj na̱nj á. 51Dan me se caꞌnáꞌ ꞌu̱nj cheꞌé rej dínj doj ca̱yáán nij yuvii̱ ma̱n rihaan chumii̱ nihánj ga̱ tuviꞌ yuvii̱, rá soj naꞌ. Taj maꞌ. Cuano̱ nihánj me cata̱j ꞌu̱nj rihaan soj se vaa caꞌnáꞌ ꞌu̱nj cheꞌé rej xra̱ꞌ taꞌa̱j yuvii̱ ga̱ tuviꞌ yuvii̱ ado̱nj. 52Dan me se rej rihaan níꞌ me se, sese ca̱yáán ꞌu̱nꞌ yuvii̱ rá ꞌo̱ veꞌ, ne̱ cano̱ tuviꞌ vaꞌnu̱j nij soꞌ ga̱ yavíj nij soꞌ, ne̱ cano̱ tuviꞌ vi̱j nij soꞌ ga̱ yaꞌnúj nij soꞌ ado̱nj. 53Dan me se cano̱ tuviꞌ snóꞌo ga̱ taꞌnij sno̱ꞌo soꞌ, ne̱ cano̱ tuviꞌ taꞌnij sno̱ꞌo soꞌ ga̱ maꞌa̱n soꞌ, ne̱ cano̱ tuviꞌ chana̱ ga̱ taꞌnij cha̱na̱ noꞌ, ne̱ cano̱ tuviꞌ taꞌnij cha̱na̱ noꞌ ga̱ maꞌa̱n noꞌ ado̱nj. Ne̱ cano̱ tuviꞌ chana̱ ga̱ choco̱ꞌ noꞌ, ne̱ cano̱ tuviꞌ choco̱ꞌ noꞌ ga̱ maꞌa̱n noꞌ, cheꞌé snana̱j ado̱nj ―taj Jesús rihaan nij síí tucuꞌyón snana̱ soꞌ a.

Cataj Jesús se vaa ne xca̱j nij yuvii̱ cuentá cheꞌé sayuun quira̱nꞌ nij yuvii̱ maꞌ

54Ga̱a ne̱ cataj Jesús rihaan nij yuvii̱ yoꞌ uún a:

―Dan me se soj me se sa̱ꞌ uxrá neꞌen soj xca̱j soj cuentá ado̱nj. Nu̱ꞌ neꞌen soj se vaa ga̱a avii ngaa rej ataꞌ güii, ne̱ nu̱ꞌ taj soj se vaa cama̱nꞌ uxrá maa̱n, taj soj, ne̱ veé da̱nj ꞌyaj gue̱e̱ xa̱ꞌ maa̱n, ne̱ amanꞌ ndoꞌo yoꞌ na̱nj ado̱nj. 55Ne̱ nu̱ꞌ neꞌen uún soj se vaa avii nana̱ yuva̱a̱ rej rque̱ rej sur, ne̱ nu̱ꞌ taj soj se vaa da̱j doj caꞌna̱ꞌ ndoꞌo cachiꞌ taj soj, ne̱ veé da̱nj ꞌyaj xa̱ꞌ cachiꞌ, ne̱ maan ndoꞌo na̱nj ado̱nj. 56Dan me se xa̱ꞌ soj si̱j nucuiꞌ rá me se síí sa̱ꞌ me soj taj soj, tza̱j ne̱ tuꞌva rmaꞌa̱n soj na̱nj ado̱nj. ꞌO̱ se neꞌen soj xca̱j soj cuentá cheꞌé se vaa rihaan chumii̱ do̱ꞌ, cheꞌé se vaa rej xta̱ꞌ do̱ꞌ, tza̱j ne̱ ne neꞌen soj xca̱j soj cuentá cheꞌé tiempó ma̱n soj cuano̱ maꞌ.

57’Ne̱ me cheꞌé naꞌvee xca̱j maꞌa̱n soj cuentá cheꞌé se vaa no̱ xcúún soj quiꞌya̱j maꞌa̱n soj ga̱. 58Ne̱ so̱ꞌ me se sese vaa síí me rá cuta̱ꞌ cacunꞌ xráá so̱ꞌ rihaan nij síí nica̱j suun, ne̱ ga̱a tiha̱j vaj so̱ꞌ chrej ga̱ soꞌ, ne̱ veꞌé caꞌmi̱i̱ so̱ꞌ ga̱ soꞌ, nda̱a se naꞌmi̱i̱ sa̱ꞌ ro̱j so̱j na̱nj á. Ne̱ sese se̱ quiꞌyáá so̱ꞌ da̱nj, ne̱ ni̱caj soꞌ mán so̱ꞌ caꞌa̱nj soꞌ rihaan cuese̱, ne̱ cuese̱ yoꞌ roꞌ, ta̱cuachén mán so̱ꞌ raꞌa síí tumé tagaꞌ, ne̱ soꞌ me síí caxri̱i̱ tagaꞌ mán so̱ꞌ na̱nj á. 59Ne̱ yoꞌ me se gu̱un ra̱a̱n ndoꞌo so̱ꞌ, ne̱ nda̱a navij na̱ruꞌvee so̱ꞌ nu̱ꞌ cacunꞌ quiꞌyáá so̱ꞌ, ga̱a ne̱ cu̱riha̱nj so̱ꞌ tagaꞌ na̱nj ado̱nj ―taj Jesús rihaan nij yuvii̱ a.

Currently Selected:

San Lucas 12: trc

Highlight

Copy