Gálatas 4

1-2Jaduhṉds jeꞌe, coo jäyaꞌayhajxy hänajty näjeꞌe yhoꞌogaaṉnä, mänit hajxy miänaꞌañ coo yhuunghajxy yhíjxäxät jaꞌa miäguꞌughajpähajxy. Coo jaꞌa yhuunghajxy miøjjǿøñät, mänit nädeedy hajxy miämähmǿøñät. Pero coo hajxy hänajty miuutsnä, jaduhṉ hajxy yhaneꞌemyii nebiä moonsän, høxtä coonä hajxy hänajty tøø miøjjøøñä. 3Y højtshájtäm, coo jaꞌa Jesús hajxy hänajty ngaꞌa hix̱yhájtämnä, jaduhṉ mäwíinäts hajxy hijty nhíjtäm nebiä haneꞌemybiän coo jaꞌa jecyquiuhdujt hajxy hijty tehṉgajnä nbanǿcxäm. 4Pero coo yhabaaty, mänitä Dios jaꞌa yHuung quiejxy; Jesucristo jeꞌe. Hoy jeꞌe miṉ̃guiaꞌay neby højtshájtämän yaa judíosnaaxooty, maa jaꞌa jecyquiuhdujt tiuṉ̃än. 5Paadiä Jesús quiejxä neby højts jaduhṉ xñähhoꞌtúutämät, jeꞌeguiøxpä coo højts jaꞌa jecyquiuhdujt hijty nbanǿcxäm tehṉgajnä. Coo hajxy xñähhoꞌtúutäm, xyhuunghájtäm jaꞌa Dios hajxy jaduhṉ.

6-7Xmioꞌowáaṉäm hajxy jaduhṉ nebiaty ñägapxy. Cab hajxy nhíjtänä nebiä haneꞌemybiän. Coo jaꞌa Dios hajxy xyhuunghájtäm, paadiä yhEspíritu hajxy xyajnäguéjxäm. Paady hajxy jeꞌe nnämáayyäm: “Teedy” hamuumduꞌjoot.

8Jueꞌe mijts hijty mwiꞌi wyiingudsähgøøby, quepychech naax̱poch. Cahnä jaꞌa Dios hajxy hänajty mhix̱yhatyñä. 9Pero coo jaꞌa Dios hajxy tøø xwyiimbiy, paady hajxy mhix̱yhajnä. Cab jaduhṉ yhahixøꞌøy coo jaꞌa jecyquiuhdujt hajxy jadähooc mbaduꞌubǿjcombät. Cab hajxy nyaghanéhm̱änät maa jaꞌa jecyquiuhdujtän. 10Pero mijts, jeꞌenä xøø hajxy mwiꞌi yagjadyii. Jaduhṉ tyijy hajxy mnähwaꞌadsaꞌañ. 11Nej, xiǿøbøch mijts jaꞌa Diosmädiaꞌagy tøø nja yajwiinhixøꞌøyä. Pø tøyhajt jaduhṉ, njaanc̈h tehm̱ yagjuǿøbiøch jaduhṉ.

12-14Hermanodøjc, nnämáꞌawäbøch mijts cooc̈h mijts xpiahíxät. Najtshixøꞌøw jaꞌa jecyquiuhdujt hajxy nébiøch tøø nnajtshixøꞌøyän. Mänáajøch mijtsä Diosmädiaꞌagy nyajwiingapxøøc̈hooñän, hóyhøch mijts xmiäguꞌugpøjcy. Jadúhṉhøch hajxy xjiøjpøgøøyy nebiä Diosquex̱iän, nebiä Jesucristän. Cábøch hajxy xxiøøghajty, hóyhøc̈hä paꞌam hänajty nja møødä, hóyhøch mijts hoxiøøghajnä hänajty xjia hix̱y. Cooc̈hä paꞌam hänajty nmøødä, páadyhøch jim̱ nmähmøøyy maa mijtsän. 15Pero mijts, cab hajxy jootcujc mhijnä. Pänebiä hajxy tøø mjaty. Mänáajøch jim̱ nhitiän maa mijtsän, høøchcøxpä mijts hänajty mduṉ̃ hoy miädyii mayhajtä. Xmióobiøch mijts hänajty hoy tyiijä. 16Páadyhøch mijtsädaꞌa xquiaꞌa mäguꞌughadaaṉnä cooc̈h mijts tøø nhawáaṉäm jaꞌa tøyhajt.

17Y hänaꞌc‑hajxy høhṉdaacpä, paady mijts hajxy xmiäguꞌughadaꞌañ nébiøch mijts jaduhṉ xquiaꞌa panǿcxnät. Pero caj mijts hajxy hamuumduꞌjoot xmiäguꞌughadaꞌañ. Xñäꞌä wiinhøønaam̱b mijts hajxy jaduhṉ. 18Hoy hit jaduhṉ coo mijts pøṉ hamuumduꞌjoot xmiäguꞌughádät hoy miänaajä, hóyhøch hänajty jim̱ ngaꞌa ja hity maa mijtsän. 19Mäguꞌughajpä, jaanc̈h tehm̱ jiootmayhájpøch jadähooc jaꞌa mijtscøxpä. Jiaanc̈h tehm̱ chójpiøch njoot coo mijts jaꞌa Jesucristo mmøødhídät tuꞌugmädiaꞌagy. 20Cu nnǿcxyhøch jim̱ maa mijtsän. Cu nmøødmädiáacyhøch mijts jaduhṉ yajxóṉ. Cooc̈h mijts hoy ngaꞌa møødmädiaꞌagaꞌañ hajäyaꞌayhaam, cábøch nnajuøꞌøy nébiøch ndaj nmáyät jaꞌa mijtscøxpä.

21Hoorä, pø chojpiä mjoothajxy tehṉgajnä coo jaꞌa jecyquiuhdujt hajxy mbanøcxaꞌañ, huuc mädow̱ hajxy neby jiiby myiṉ̃än maa jaꞌa jecyquiuhdujtän. 22-23Metscä Abraham yhuung hänajty. Tuꞌug hänajty xiøhajty Isaac. Tøø Dios Abraham hänajty jaduhṉ yajwiinwaaṉøꞌøy coo jaꞌa Isaac hänajty myinaꞌañ quiaꞌawaꞌañ. Abraham yhamdsoo huunghajxy jeꞌeduhṉ møødä tioꞌoxiøjc. Jatuꞌugpä, Ismael jeꞌe xiøhajpä. Jaduhyyä jeꞌe ñäꞌä miiṉ̃ ñäꞌä cahy. Moonsä jeꞌe tiajhajt. 24-25Hädaa mädiaꞌagy, nebiä hijxtahṉdän hädaa jaduhṉ. Jaꞌa Ismael tiaj, jaꞌa Agarhajpä, moonsähajp hänajty jeꞌe. Cabä yhamdsoo cuhdujt hänajty yaghity. Hoorä, coo jaꞌa Dios jaꞌa cuhdujt yejcy maa jaꞌa tuṉ hänajty xiøhatiän Sinaí, jim̱ Arabianaaxooty, jaduhṉ mäwíinäts hajxy nhíjtäm nebiä Agar hänajty mioonsähatiän. Cabä nhamdsoo cuhdujt hajxy nyaghíjtäm. Mejtstuꞌu jaꞌa tuṉ hänajty xiøhaty. Xøhajp hänajty Sinaí, møødä hänajty xiøhaty Agar. Jaꞌa cajpt jaduhṉ xøhajpä Jerusalén, jaꞌa hädaa yaabä naax̱wiimbä, jaduhṉ mäwíinäts jeꞌe nebiä Agarän. Hix̱, cabä Jerusalénpä‑jäyaꞌay yhamdsoo cuhdujt hajxy yaghity. 26Jaduhṉ jaꞌa cajpt jim̱ xiøhajpä tsajpootyp Jerusalén. Jim̱ hajxy nxøønájxäm. Cabä jecyquiuhdujt jim̱ tiuuṉnä nebiä Dios yejquiän Sinaí. Jem̱yguiuhdújtäts jim̱ túuṉnäp. 27Jaduhṉ jiiby myiṉ̃ cujaay maa jaꞌa Diosmädiaꞌaguiän:

Huuc xooṉdaꞌag, hoyyä huung mgaꞌa ja paadyñä, Maas may miic̈h huung mbaadaꞌañ.

Cabä mmoonsä may jiaty paadaꞌañ.

28Hoorä, hermanodøjc, tøø jaꞌa Dios hajxy xyajnähdíjjäm coo hajxy xyhuunghadáaṉäm, nebiä Isaac yajnähdijjän. 29Dios jaꞌa yhEspíritu jaꞌa Isaac yajmägunuuꞌxøøyy coo myínät. Cabä Ismael yajmädsojcy coo jaꞌa Abraham jaꞌa Isaac yhuunghádät. Jaduhṉ mäwíinäts højtsä jäyaꞌayhajxy xquiaꞌa yajmädsójcäm coo jaꞌa Dios hajxy xyhuunghájtämät. 30Jaduhṉ jiiby myiim̱bä cujaay maa jaꞌa Diosmädiaꞌaguiän: “Høxquejxpädsøm̱ yøꞌø toꞌoxymoonsä møødä yhuung.” Cabä moonsä yhuung ñäꞌägädä puhmoꞌowaꞌañii ñädeedy. Pero yhamdsoo toꞌoxiøjc yhuung, jeꞌeds jaduhṉ mioꞌowaam̱by. 31Hermanodøjc, coo jaꞌa Diosmädiaꞌagy hajxy hamuumduꞌjoot ndsójcäm, jaduhṉ mäwíinäts hajxy nhíjtäm nebiä Isaac jecy yhijtiän. Pero jaꞌa hajxy caꞌa tsojpä, jaduhṉ mäwíinäts hajxy jeꞌe nebiä Ismaelän, jaꞌa moonsä yhuung.

Currently Selected:

Gálatas 4: mir

Highlight

Copy