San Marcos 3
3
Ruúnëꞌ Jesús bönniꞌ narequiꞌ nëꞌë
1Leyúbl gyaziëꞌ Jesús tu lu yuꞌu ga tuꞌdubëꞌ tuꞌsëdëꞌ queëꞌ Dios bönniꞌ judío, atiꞌ zoëꞌ caꞌ niꞌ bönniꞌ narequiꞌ nëꞌë. 2Tuꞌyúëꞌ Jesús bönniꞌ gdauꞌ niꞌ chquiꞌ unëꞌ bönniꞌ naꞌ dza laꞌy, le tëꞌnnëꞌ luquíëꞌ Lëꞌ. 3Niꞌr gudxëꞌ bönniꞌ naꞌ narequiꞌ nëꞌë Jesús, rnëꞌ:
―Gyas len gzui laugac bunách ni.
4Gnabnëꞌ bunách niꞌ Jesús, rnëꞌ:
―¿Naruꞌ dë latj gunruꞌ le nac dxiꞌa catiꞌ nac dza laꞌy o gunruꞌ le cunác? ¿Naruꞌ dë latj gunruꞌ ga laꞌdel‑liꞌ yöl‑laꞌ naꞌbán bunách o usnitruꞌ lei?
Gulacuáꞌ dxiz bunách niꞌ. 5Niꞌr len yöl‑laꞌ rley queëꞌ, buyúëꞌ Jesús bunách naꞌ nacuáꞌ gdu cuitiëꞌ, ruhuiꞌnnëꞌ le nacquëꞌ zid ladxiꞌ. Gudxëꞌ bönniꞌ naꞌ narequiꞌ nëꞌë, rnëꞌ:
―Bli naꞌu.
Niꞌr bulí nëꞌë bönniꞌ naꞌ atiꞌ böactë dxíꞌadauꞌ nëꞌë. 6Niꞌr gulurujëꞌ bönniꞌ gdauꞌ fariseo atiꞌ laꞌ gluntëꞌ tsazxö́n didzaꞌ len bönniꞌ daꞌquëꞌ Herodes bi lunëꞌ queëꞌ Jesús, quië ludöddëꞌ Lëꞌ.
Tuꞌdúb raꞌ nis zxön bunách zian
7Buzë́ꞌë niꞌ Jesús tsazxö́n len bönniꞌ daꞌquëꞌ Lëꞌ, bdxinëꞌ raꞌ nis zxön, atiꞌ zjaclen Lëꞌ bunách zian narujgac luyú Galilea len luyú Judea. 8Guladxín caꞌ ga zoëꞌ Jesús bunách zian narujgac Jerusalén len luyú Idumea len yetsláꞌa yegu Jordán len yödz nacuáꞌ gdu zbiꞌil ga nacuáꞌ yödz Tiro len yödz Sidón. Cni glunëꞌ, le gulayönnëꞌ ca nac yuguꞌ le zxön runëꞌ Jesús. 9Qui lë ni naꞌ Jesús gna béꞌinëꞌ bönniꞌ daꞌquëꞌ Lëꞌ lucö́zteczëꞌ tu bárcodauꞌ ga gac cuenëꞌ, cui luquí lutsútsj Lëꞌ bunách zian naꞌ. 10Cni guc, le chbunëꞌ zian nup teꞌi, atiꞌ gulaguír ga zoëꞌ bunách zian naꞌ quië laꞌgán Lëꞌ. 11Catiꞌ gulaleꞌi Jesús böꞌ xöhuiꞌ yuꞌugac bunách, guludxigaꞌ xniꞌë Jesús bunách naꞌ yuꞌugac, len gulabödxyaꞌa, taꞌná:
―Nacuꞌ Liꞌ Zxiꞌnëꞌ Dios.
12Buzeynëꞌ ba nadx böꞌ xöhuiꞌ naꞌ Jesús, cui laꞌguixjöꞌ nu naquëꞌ Lëꞌ.
Rböëꞌ Jesús chinnu bönniꞌ lacquëꞌ gbaz queëꞌ
13Niꞌr grenëꞌ Jesús tu lu guíꞌadauꞌ, atiꞌ niꞌ bulidzëꞌ nup rëꞌnnëꞌ. Gulabiguëꞌë gdu cuitiëꞌ bönniꞌ ni. 14Bucuꞌë chinnuëꞌ bönniꞌ ni Jesús, quië laꞌcuáꞌlenëꞌ Lëꞌ len quië gsölëꞌë lequëꞌ tsjenquëꞌ lban. 15Budödëꞌ lu naꞌquëꞌ yöl‑laꞌ huac luúnëꞌ nup teꞌi len lubijëꞌ böꞌ xöhuiꞌ yuꞌugac bunách. 16Cni nacgac laquëꞌ:
Simón, (nuzóëꞌ Jesús yetú lëꞌ, Pedro),
17Jacobo,
Juan, (bönniꞌ böchëꞌë Jacobo, atiꞌ nacquëꞌ zxiꞌnëꞌ Zebedeo. Chopëꞌ ni, Jesús buzóëꞌ yetú laquëꞌ, Boanerges, le rna lu didzaꞌ xidzaꞌ: “Bönniꞌ sniaꞌ ca gziuꞌ”),
18Andrés,
Felipe,
Bartolomé,
Mateo,
Tomás,
Jacobo, (zxiꞌnëꞌ Alfeo),
Tadeo,
Simón, (bönniꞌ ruiꞌ ladxëꞌë yödz queëꞌ),
19Judas Iscariote, (bönniꞌ udödëꞌ Jesús lu naꞌquëꞌ bönniꞌ ludöddëꞌ Lëꞌ).
Taꞌnë́ꞌ: dzag Jesús tuꞌ xöhuiꞌ
Gdöd niꞌ guludxinëꞌ tu lu yuꞌu Jesús len bönniꞌ daꞌquëꞌ Lëꞌ. 20Leyúbl gulaguír ga zoëꞌ Jesús bunách zian, atiꞌ cutur gutaꞌ latj lahuëꞌ yöt Jesús len bönniꞌ naꞌ daꞌquëꞌ Lëꞌ. 21Catiꞌ gulayönnëꞌ ca rac queëꞌ Jesús diꞌa dza queëꞌ, guladxinëꞌ niꞌ quië luchë́ꞌë Lëꞌ, taꞌnë́ꞌ: “Rchixi icjëꞌ.”
22Lëzcaꞌ cni gulanë́ꞌ queëꞌ bönniꞌ gdauꞌ usëdi, narujquëꞌ Jerusalén, taꞌnë́ꞌ:
―Dzag Lëꞌ Beelzebú, xangac böꞌ xöhuiꞌ, atiꞌ len yöl‑laꞌ uná bëꞌ qui rubijëꞌ yuguꞌ böꞌ xöhuiꞌ.
23Niꞌr bulidzëꞌ bönniꞌ gdauꞌ tuꞌsëdi naꞌ Jesús, len benëꞌ lsaquiꞌ, rnëꞌ:
―¿Naruꞌ ubijtsa laꞌ cuinzi Satanás tuꞌ xöhuiꞌ? 24Chquiꞌ laꞌrúj chopl bunách tu yödz, len laꞌdil‑len lzaꞌgac, cutu gac gdiaꞌ yödz naꞌ. 25Lëzcaꞌ cni chquiꞌ laꞌrúj chopl bunách nacuáꞌ tu yuꞌu, len laꞌdil‑len lzaꞌgac, cutu gac laꞌdíaꞌ bunách nacuáꞌ yuꞌu naꞌ. 26Qui lë ni naꞌ, chquiꞌ táꞌbagaꞌ lzëꞌi Satanás tuꞌ xöhuiꞌ, narujgac chopl böꞌ xöhuiꞌ atiꞌ cutu gac gdiaꞌ yöl‑laꞌ uná bëꞌ qui, san chzoa udx qui.
27’Nutu nu gac tsaz lidxëꞌ tu bönniꞌ nal len cuiaj yöl‑laꞌ tsahuiꞌ queëꞌ chquiꞌ cutu gáguëꞌë ziꞌal bönniꞌ nal naꞌ, atiꞌ niꞌr sáquiꞌnëꞌ cuijëꞌ le dzöꞌ lidxëꞌ.
28’Le nactë rëpaꞌ lbiꞌiliꞌ: Dios gac unít lahuëꞌ bunách ca nac yúguꞌtë dul‑laꞌ nabágaꞌgac len ca nac yúguꞌtë didzaꞌ xöhuiꞌ taꞌná, 29san nútiꞌtëz nu gnë xöhuiꞌ queëꞌ Dios Böꞌ Laꞌy, gatga unít lahuëꞌ nu naꞌ Dios. Tsaz nabagaꞌ zxguiaꞌ nu naꞌ.
30Cni gnëꞌ Jesús le taꞌnë́ꞌ queëꞌ bönniꞌ gdauꞌ usëdi naꞌ, taꞌnë́ꞌ: “Dzag Lëꞌ tuꞌ xöhuiꞌ.”
Nu nac xnëꞌë Jesús len bönniꞌ böchëꞌë
31Niꞌr guladxinëꞌ ga zoëꞌ Jesús yuguꞌ bönniꞌ böchëꞌë lencaꞌ xnëꞌë. Gulacuꞌë löꞌal len gulasölëꞌë nu tsajlídz Jesús. 32Glë Jesús bunách zian naꞌ röꞌgac cuitiëꞌ, taꞌnë́ꞌ:
―Nacuꞌë löꞌal yuguꞌ bönniꞌ böchuꞌu lencaꞌ xnaꞌu, tuꞌlidzëꞌ Liꞌ.
33Bubiꞌë didzaꞌ Jesús, gudxëꞌ lequëꞌ:
―¿Nuzxa caz naꞌ xnaꞌa, len nupxcz bönniꞌ böchaꞌa?
34Niꞌr buyúëꞌ nup naꞌ röꞌgac gdu cuitiëꞌ, rnëꞌ:
―Gul‑yutscaꞌ. Nup ni nacgac ca xnaꞌa len yuguꞌ bönniꞌ böchaꞌa. 35Nu run ca rëꞌnnëꞌ Dios, nu ni nac ca biꞌi böchaꞌa len biꞌi zanaꞌ lencaꞌ xnaꞌa.
Currently Selected:
San Marcos 3: zsr
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
