San Lucas 20
20
Cavinenguise xuta cojo Jesucristu yo cavitexa rë me
1Cuitjin camá xu ngu nixtin hya xi tivicuya Jesús xuta hacuaha tisua me jimachaya rë cjuandajyihi rë Nina ngajan ndatsen yungun xi matitjun. Hacuaha camatangun xu nahmi xi matitjun cojo cha xi vicuya cjuachacun cojo xuta changá, 2hane cuitjin xu cavinenguise me Jesús:
―Tinújun cojo niji ne, ¿yo cavitexa nuju xi cuatjin nihñu? ¿Yo casuaxa nuju? ―Cuatjin xu cavinenguise me.
3Hane xi cafayangui Jesús ne, cuitjin xu cachja me:
―Hacuaha cjuinenguësë nuju ngu cjua, hane chjayunngun tsahan: 4¿Yo cavitexa rë Juan xi cuitenda me xuta? ¿Há Nina ne, o há tsajin ne, há xuta? ―Cuatjin xu cachja me.
5Sehe ngajan xi xuta xi cuacun jan ne, cavisiajmicjín me ngajñi rë me, cachja xu me cuitjin:
―Sá xi cuinújan xi Nina cavitexa me cha Juan vë ne, cjuinenguise naja me: “¿Mé má camacjaain naja cha?” 6Hane sá xi cuinújan xi xuta cavitexa rë cha ne, yëjë ni xuta ne, tsiquehen naja me cojo ndyojo ta, tsëhë xi yëjë ni xuta ne, ha macjain rë me xi cha vëhë ne, profeta cha. ―Cuatjin xu cavisiajmicjín me.
7Ngajan xi xuta xi cuacun jan ne, cachja me xi hvíin me. 8Sehe ngajan xi Jesús ne, cuitjin xu cachja me:
―Sá cuatjin ne, ngahan ne, hacuaha cuichjaan cojo nuju yo cavitexa ná xi cuitjin sahme. ―Cuatjin xu cachja Jesús.
Ejemplu tsëhë cha sahmixa xi jemu tsehen cha
9Hya xi camá ne, cavetsihin cachja xu Jesús cojo yëjë ni xuta jan ejemplu vihi:
―Cuejña ne xi ngu me jan matsejen ne, catsitjë me xcun nangui rë me xca rë uva. Sehe casua me ngujo cha sahmixa xi cjuahacuenda cha sehe cjuaha tsë tsë me cojo cha. Hya xi camá ne, sehe cavetju me quiji me ngu nangui jemu tsëë camahani. 10Hane xi cavechú nixtin rë tutjë́ jan matsejen ne, sehe catsingatju me ngu mosu hndixahan rë me xi quiji cachja cha cojo cha xi fahacuenda xitjë jan xi sua cha hitsë tutjë́ xi satë rë me xi casacu rë cha xcun nangui rë me jan. Peru cha xi fahacuenda xitjë jan matsejen ne, tu cavaja cha cha hndixahan jan, sehe catsingatju cha cafe, ndastu mé casua rë cha. 11Hya xi camá ne, cavuya catsingatju nga me ngu hndixahan rë me. Hndixahan vëhë matsejen ne, jemu cavaja rë cha, jemu choho cachja cha cojo, sehe catsingatju cha cafe, ndastu mé casua rë cha. 12Hya xi camá ne, cavuya catsingatju nga me ngu hndixahan xi majyan. Hndixahan vëhë matsejen ne, jemu cavanguihmu rë cha, sehe cavaxëxin cha tsëhë ngajan.
13’Ngajan xi nai rë xitjë jan matsejen ne, cuitjin catsingataha cacun me: “¿Mé xi ndatjin sahme quihndë? Ndatjin rë xi tsingátju quihndi naha xi jemu hmú cácun. Cjuaharcun rë cha, xi quihndi naha.” Cuatjin catsingataha cacun me. 14Peru xi cavëë cha xi fahacuenda xitjë jan cha vëhë matsejen ne, sehe cavisiajmicjín cha cojo xicjin cha cuitjin: “Cha vihi ne, quihndi rë me xi cuahatsja cha xitjë vi. Niquen cha, cojo sa xi tsajan cuma nangui vi.” Cuatjin cavisiajmicjín cha. 15Hane xi cavaxëxin cha cha tsëhë nangui jan matsejen ne, sehe catsiquehen cha.
’Xi má nuju matsejen ne, ¿mé sahmi nai rë xitjë jan cojo cha xi cuacun fahacuenda jan? 16Cjue tsiquehen me cha, sehe sua me xitjë jan cjuahacuenda jingu sa cha sahmixa. ―Cuatjin xu cachja Jesús.
Hane xi cahndë yëjë xuta cjua vëhë ne, cachja xu me cuitjin:
―¡Catamamiji cacun Nina xi cuatjin cuma! ―Cuatjin xu cachja me.
17Ngajan xi xi cavuya vutsejen Jesús xuta jan ne, cuitjin xu cachja me:
―¿Mé vijne xi cuitjin camahindu xcun xujun rë Nina?:
Ndyojo xi catsitjungui chjinevexo ne,
vëhë ndyojo xi cavéjña tjun tjun yuju rë xihndënaña.
Cuatjin camahindu. 18Hya xi ngu xuta cjuinenguisun me xcun ndyojo vëhë matsejen ne, cuatëlanga rë me. Hane hya xi ndyojo vëhë cjuinenguisun rë ngu xuta matsejen ne, ña cuma të me. ―Cuatjin xu cachja Jesús.
19Vëhë xi cha xi vicuya cjuachacun cojo nahmi xi matitjun ne, jemu cavangui xu me chuva rë hacutjin cuma xi cjuaha me Jesús hora vëhë ni, tsëhë xi vëë me xi ejemplu xi cachja Jesús ne, condra rë me chja. Peru tsëhë xi tsacjun xu me xuta ne, vëhë xi cafaain xu me Jesús ngutjen.
Cjuacjintacun tsëhë tujúnsa
20Tu siu xu ni me cuidadu tsëhë cjua rë Jesús, hisca catsingatju xu me ngujo cha xi tsejen sacuaha xuta ndaja, xi cuangui cha chuva rë xi cuaxë rë cha Jesús ngu cjua xi cuaaintjin, cojo sa xi cuma chjahá rë me cjuechani rë me xcun xutaxa rë ndihyavasen. 21Hane cha xi cuacun jan ne, cuitjin xu cachja cha cojo Jesús.
―Maestro, ngayin ne, hyin ta ngayun ne, vicuyun rë xuta cojo cjuaquixi. Hacuaha tangun ni nújun cojo yëjë xuta ta, tsëhë xi ngayun ne, hatuxa vicuyun ndiya rë Nina cojo cjuaquixi. 22Quihndë ne, sacuaha ley rë Moisés ne, ¿há sua cahndë́ xi cuechjen tujúnsa naja cojo César, me xi matitjun, o há suaain cahndë́? ―Cuatjin xu cachja cha.
23Peru Jesús ne, tsëhë xi ha vacun rë me xi jemu ndacha cha ne, cuitjin xu cachja me cojo cha:
24―Ningacun ná ngu tujún. Quihndë ne, ¿yo xcusun rë hacuaha yo ñihi rë xi quitahá xcun tujún vë? ―Cuatjin xu cavinenguise Jesús.
Hane cha xi cuacun vë ne, cuitjin xu cafayangui cha:
―Tsëhë César. ―Chja xu cha.
25Sehe ngajan xi Jesús ne, cuitjin xu cachja me cojo cha:
―Sá xi cuatjin ne, tuhun rë César xi tsëhë me, hane tuhun rë Nina xi tsëhë me. ―Cuatjin xu cachja me.
26Hane camaji cavaxë xu rë cha Jesús ngu cjua xi cuaaintjin xi cuihndë xuta. Hane xi quijircun xu rë cha tsëhë cjua xi cafayangui Jesús ne, tu caviyujujyuu xu ni cha.
Cjuachjinenguise tsëhë xi cuya nima cjuahñu
27Hya xi camá ne, cafehe xu ngujo cha saduceo hiscan tacun Jesús. Cha xi cuicun vi ne, vicuya cha cjuachacun xi chja xi xuta xi cahme ne, cuyaain nga me cjuahñu. Ngajan xi cha xi cuacun cafehe jan ne, cachja xu cha cojo Jesús cuitjin:
28―Maestro, Moisés ne, catsihindu me xcun xujun rë Nina xi sá xi ngu xihin cueya, hane tsajin rë chjuun rë hisca ngu quihndi ne, hntsë nima vëhë ne, meje rë xi cjuaha rë chjuun cahan vëhë, cojo sa xi sacú rë na quihndi xi cuma sacuaha quihndi rë nima vëhë. 29Quihndë ne, cuejña xi ngu ndihya ne, siu yatu cha cojo hntsë cha. Hane cha tjun ne, cafaha cha chjuun. Peru cahme cha, hane chjuun rë cha vëhë ne, casacuiin rë na hisca ngu quihndi cojo cha. 30Hya xi camá ne, hntsë nima vëhë, cha xi majo ne, cafaha cha na cahan vëhë camá chjuun rë cha na, peru hacuaha cahme cha hane casacuiin rë na quihndi. 31Hacuanitjin ni cafaha cha xi majyan jan na hisca xi cafë yëjë xi yatu cha cafaha cha na. Peru yëjë cha xi cuacun vë ne, cafë cha cahme cha chuva ngu chuva ngu cha. Hane na vëhë ne, casacuiin rë na hisca ngu quihndi cojo cha xi cuacun vë. 32Hiscan xi cajnetaha ne, na vëhë ne, hacuaha cahme na. 33Quihndë ne, hya xi cuya yëjë nima cjuahñu ne, ¿jarë cha xi cuacun vë xi chjuun rë cha na xi cjuaquixi ta, tsëhë xi yëjë ni xi yatu cha ne, camá chjuun rë cha na? ―Cuatjin xu cachja cha saduceo cojo Jesús.
34Sehe ngajan xi Jesús ne, cuitjin xu cachja me cojo cha:
―Xuta xi siu me ngasunhndë quihndë ne, tsinguixan me hacuaha vixan me. 35Peru xuta xi vechú chuva rë xi cuya me cjuahñu xi ha cuatju cueya me hacuaha sacú rë me cjuahñu xatsë ne, cuixaain me hacuaha tsinguixaain me hya ta, 36tsëhë xi ha quihndë cueyaain nga me, tsëhë xi tangun cuma me cojo ángel. Hacuaha cuma me quihndi rë Nina, tsëhë xi cuya me cjuahñu. 37Hacuaha hya xi chutayan cjua xi cachja Moisés ngajan hiscan xi catí yanahyá xcuen ne, hya sacu machaya naja tsëhë xi nima ne, cuya cjuahñu ta, tsëhë xi cachja Moisés xi Nina naja ne, Nina rë Abraham, Nina rë Isaac, cojo Nina rë Jacob má me. 38Peru Nina ne, hacuiin nina rë nima ta nina rë xuta xi quicun me ta, tsëhë xi xi cuma rë Nina ne, yëjë ni xuta ne, quicun me, handasa cahme yahnga me. ―Cuatjin xu cachja Jesús.
39Ngajan xi ngujo cha vicuya cjuachacun ne, cuitjin xu cachja cha:
―Maestro, ndatjin cjua xi canújun.
40Cuatjin xu cachja cha ta, tsëhë xi tsacjun xu cha cjuinenguise sa cha me.
¿Yo tjë rë má me xi catsingatju Nina?
41Sehe ngajan xi Jesús ne, cachja nga xu me cuitjin:
―¿Hacutjin má xi cuatjin chja xuta xi me xi tsingatju Nina ne, tjë rë David má me? 42Ta suvá David ne, cachja me cuitjin xcun xujun tsëhë Salmo:
Nina ne, cachja me cojo Nai naha cuitjin:
“Tinechin nguehe ladu quixi naha,
43hisca hya xi yëjë ni xi sahmi ri condra ne, cuiyujú ngahan ngahma gubiernu riji.”
Cuatjin cachja David cjua xi cachja Nina. 44Quihndë ne, sá xi suvá David chja me xi Nai rë me má me xi tsingatju Nina ne, ¿hacutjin má ne xi hacuaha tjë rë me ni? ―Cuatjin xu cachja Jesús.
Cachjajyë Jesucristu cojo xuta ladu rë me tsëhë cha vicuya cjuachacun
45Jinguyëjë rë xi tivisiñuju yëjë xuta jan ne, Jesús ne, cachja xu me cuitjin cojo xuta ladu rë me:
46―Xicaninguisuhunjñuu cojo cha xi vicuya cjuachacun, xi jemu ndama rë cha xi cuatjin vajá cha tsjian nduju, hora xi fi tsujyihiya cha, jemu chuya rë cha xi cuatjin fi chja xuta nina cojo cha ngajan ngajñi ndetsin, hacuaha jemu chuya rë cha xi cuatjin satë rë cha cahndë́ xi matitjun tsëhë cahntsua yungun, o hiscan ngu ndava suhi. 47Cha xi cuacun vë ne, hacuaha jemu cjín tujún vaxë cha yachjin cahan. Hisca xi chjayuma cha ne, hacuaha jemu nduju hora, peru hacuiin nguñaja cacun cha chja cha. Vëhë xi cha xi cuacun vë ne, hitsë sa jyë castigu cuatju cha xi cuma rë jingusa xuta. ―Cuatjin xu cachja Jesús.
Currently Selected:
San Lucas 20: maq
Highlight
Share
Copy
Want to have your highlights saved across all your devices? Sign up or sign in
© 1991, Wycliffe Bible Translators, Inc. All rights reserved.
