Apocalípsis 7
7
Markäkuqkunata Teyta Dios señalanqan
1Tsëpitanam chusku angelkuna kë patsapa chuskun kuchunchö shëkäyaqta rikarqä.#Dan. 7.2; Zac. 6.5. Tsë angelkunam vientuta tsaparëkäyarqan kë patsamanpis lamarmanpis y ima montikunamanpis mana vientümunanpaq. 2Pëkunaqa puëdiqmi kayarqan kë patsatapis lamartapis castigayänanpaq.
Tsënöllam rikarqä inti yarqamunan kaqpita wiñëpa kawaq Teyta Diospa sëllun tsarashqa juk ángel shamïkaqta. Tsë angelmi patsapa kuchunkunachö këkaq chusku angelkunaman qaparipa qayakur 3nirqan: <<¡Teyta Diosnintsikpa sirwiqninkunata urkunkunachö manaraq señalaptïqa#Eze. 9.4, 6. ama imanëraqtsu kë patsata, lamarta ni montikunatapis!>>
4Tsëpitanam ëka nunakunata señalashqantapis wiyarqä. Tsë sellashqakuna kayarqan juk pachak chusku chunka chusku waranqa (144,000) nunakunam. Y llapanpis Israel trïbu nunakunapitam kayarqan:
5Judá trïbupita chunka ishkë waranqa (12,000),
Rubén trïbupita chunka ishkë waranqa (12,000),
Gad trïbupita chunka ishkë waranqa (12,000),
6Aser trïbupita chunka ishkë waranqa (12,000),
Neftalí trïbupita chunka ishkë waranqa (12,000),
Manasés trïbupita chunka ishkë waranqa (12,000),
7Simeón trïbupita chunka ishkë waranqa (12,000),
Leví trïbupita chunka ishkë waranqa (12,000),
Isacar trïbupita chunka ishkë waranqa (12,000),
8Zabulón trïbupita chunka ishkë waranqa (12,000),
José trïbupita chunka ishkë waranqa (12,000)
y Benjamín trïbupitana chunka ishkë waranqa (12,000).
Atska nunakuna yulaq ratashllashqa ciëluchö kayanqan
9Tsëpitanam rikarqä Teyta Dios tärashqan trönupa nöpanchö y Achkaspa nöpanchö yupëtapis mana puëdipaq atska nunakuna palmërankuna tsarashqa y yulaq ratashninkuna yakashqa këkäyaqta. Pëkunaqa kayarqan llapan nacionkunapitam, llapan trïbukunapitam, llapan markakunapitam y tukïläya idiöma parlaq nunakunapitam. 10Pëkunam qaparipa kënö niyarqan: <<¡Trönuchö tëkaq Teyta Dios y nöpëkichö këkaq Achkas, qamkunam salvayämarqunki!>>
11Tsëpitanam Teyta Diospa nöpanchö këkaq chusku kawëkaqkuna, ishkë chunka chusku (24) anciänukuna y llapan angelkunapis lätëkur Teyta Diosta alabar 12niyarqan:
<<¡Amén!
¡Teyta Diosnintsik alabashqa këkullätsun!
¡Pë japallanmi llapantapis musyan!
¡Imëyaqpis pëta payllä nikushun!
¡Pë japallanmi llapanpaqpis puëdiq këkan!
¡Wiñëpa pëta alabashun!
¡Tsënö katsun!>>
13Tsëmi Teyta Diospa nöpanchö këkaq ishkë chunka chusku (24) anciänukunapita juknin kënö tapumarqan: <<¿Pikunataq tsë yulaq ratashnin yakashqa nunakuna kayan? ¿Mëpitataq shayämushqa?>>
14Tsënö nimaptinnam nirqä: <<Teyta, qammi tsëtaqa musyanki>>.
Tsënö niptïmi nimarqan: <<Pëkunaqa alläpa jipakïkunata pasaq nunakunam kayan.#Dan. 12.1; Mat. 24.21; Mar. 13.19. Achkas yawarninta ramar wanunqanpitam perdonashqana këkäyan. Achkaspa yawarninwan ratashninkuna taqshakushqa kayaptinmi yulaq këkäyan.#Juan 1.29; 1Juan 1.7. 15Tsë nunakunaqa Teyta Dios tärashqan trönu nöpanchömi këkäyan.
<<Paqaspa y junaqpam templunchö alabëkäyan.
Trönuchö tëkaq Teyta Diosmi pëkunata imëpis rikanqa.
16Pëkunaqa imëpis mananam mallaqäyanqanatsu ni yakunäyanqanatsu.
Intipis pëkunata manam rupanqanatsu.
Achachëpis mananam ajayätsiyanqanatsu.#Sal. 121.6; Isa. 49.10.
17Teyta Dios tärashqan trönu nöpanchö Achkasmi pëkunata mitsinqa.#Sal. 23.1; Eze. 34.23; Juan 10.1-16.
Imëpis mana yakunäyänanpaqmi kawatsikuq yakuman pushanqa.#Sal. 23.2; Isa. 49.10; Juan 4.10; 7.37.
Kikin Teyta Diosmi shoqar weqinkunatapis pitsanqa>>.#Isa. 25.8; Apoc. 21.4.
Currently Selected:
Apocalípsis 7: qwhB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.