Juan 20

Jesús kawarimunqan

Mateo 28.1-10; Marcos 16.1-8; Lucas 24.1-12

1Semäna qallanan junaqnam#20.1 Tsë junaq karqan domingum. María Magdalena qoya qoyalla Jesús pamparashqan sepultüraman ëwarqan. Chärirnam sepultüra tsaparaq rumita wititsishqatana tarirqan. 2Tsëta rikëkurmi ëqillapa kutirqan Simón Pedruta y Jesús kuyashqan discïpuluta willananpaq. Chärirnam kënö willarqan: <<¡Jesúspa ayantam apakuyashqa! ¡Manam musyayätsu mëpa apakuyashqantapis!>>

3Tsënam Jesús kuyashqan discïpuluwan Pedro Jesústa pampayashqan kaqman ëwayarqan. 4Ëqillapa ëwarmi juk kaq discïpulun Pedruta llallirir puntata chärirqan. 5Sepultüra punkullapita qawëkurmi säbanallana qoturëkaqta rikarqan. 6Qepanta Simón Pedro chärirnam ruriman yëkurir säbanallatana pëpis tarirqan. 7Jesúspa peqanta watayashqan tëlatapis shumaq wankushqatam peqan kashqan läduchö churarëkaqta tarirqan. 8Tsë höraran puntata chaq kaq discïpulupis ruriman yëkurqan. Pëpis tsëkunata rikëkurmi creyirirqan. 9Tsënö këkaptinpis manam käyiyarqanraqtsu kawarimunanpaq Teyta Diospa palabran nishqanta. 10Tsëpitanam quedakuyashqan wayiman kutikuyarqan.

María Magdalenata Jesús yuripunqan

Marcos 16.9-11

11Maríanam pamparashqan kaqman kutïkur punkuchö waqar quedakurqan. Waqëkashqanchö sepultürata qawëkurnam 12rikëkurqan ishkë angelkuna yulaq ratashllashqa këkaqta. Juk kaqmi Jesúspa peqan kashqan läduchö tëkarqan y juk kaqnam chakin kashqan läduchö tëkarqan. 13Tsë angelkunam Maríata kënö tapuyarqan: <<¿Imanirtaq waqëkanki?>>

Tsënö tapuyaptinnam nirqan: <<Señornïpa ayantam apakuyashqa. Manam musyätsu mëman churayashqantapis>>.

14Tsënö nikar tumëkushqanchömi Jesústa rikëkurqan. Rikarpis pë kashqantaqa manam musyarqantsu. 15Jesúsnam tapurqan: <<¿Imanirtaq waqëkanki? ¿Pitataq ashikanki?>>

Tsënö tapuptinmi huertachö uryaq nuna kashqanta yarpar kënö nirqan: <<Teyta, mëmanpis Jesúspa ayanta apashqa karqa willëkallämë apakunäpaq>>.

16Jesúsnam nirqan: <<¡María!>>

Tsënö niptinmi María tumëkur kënö nirqan: <<¡Raboni!>>

Hebreo idiömachö raboni ninanqa yachatsikuq ninanmi.

17Jesúsnam nirqan: <<Ama tsarimëtsu. Teytä kaqman manaran ëwashqäraqtsu. Tsëpa rantinqa discïpulükunata willë Teytäman kutikunäpaq kashqanta. Noqapa Teytäqa qamkunapapis Teytëkikunam y Diosnïqa qamkunapapis Diosnikikunam>>.

18Tsënö niptinmi María Magdalena ras ëwarqan Jesús yuripushqanta y imata nishqankunatapis discïpulunkunata willananpaq.

Discïpulunkunata Jesús yuripunqan

Mateo 28.16-20; Marcos 16.14-18; Lucas 24.36-49

19Tsë domingu paqasmi discïpulunkuna juk wayichö ëllukashqa këkäyarqan. Israel nunakunapa autoridäninkunata mantsarmi punkuta trancapukurkur këkäyarqan. Tsëchö këkäyaptinmi Jesús yurirkur nirqan: <<Alli kawakï qamkunachö këkullätsun>>.

20Tsënö nirmi makinta y qasqunta rikätsirqan. Jesústa rikëkurnam discïpulunkuna alläpa kushikuyarqan. 21Jesúsnam yapë kënö nirqan: <<Alli kawakï qamkunachö këkullätsun. Teytä kachamashqannöllam noqapis qamkunata kachayaq>>.

22Tsënö nirmi pëkuna kaqman pükëkur kënö nirqan: <<Espíritu Santuta chaskiyë. 23Pitapis jutsankunapita perdonayaptikiqa Teyta Dios perdonanqam. Mana perdonayaptikiqa Teyta Diospis manam perdonanqatsu>>.#20.23 Kë versïculuqa kënömi nin: Qamkuna poderyuqmi kayanki chaskimaqkunata Teyta Dios perdonashqanta willayänëkipaq y mana chaskimaqkunatana Teyta Dios mana perdonashqanta willayänëkipaq.#Mat. 16.19; 18.18.

Jesúswan Tomás tinkunqan

24Discïpulunkuna juntarëkäyashqanman Jesús chänan höra Millish niyashqan Tomás manam karqantsu. Pëqa Jesúspa apostolninmi karqan. 25Tomáswan tinkurirnam discïpulu mayinkuna kënö willayarqan: <<¡Señor Jesucristum yuripuyämashqa!>>

Tomásnam nirqan: <<Clävu uchkushqan makinta manaraq rikarqa, tsëman dëdüta manaraq yakarqa y tuksiyashqan qasqunman makïta manaraq yakarqa manam creyishaqtsu>>.

26Tsëpita juk semänatanam discïpulunkuna yapë juk wayillachö juntarëkäyarqan. Tsëpinqa tsëchömi Tomáspis këkarqan. Punkuta trancapukurkur këkäyaptinmi Jesús pëkunapa nöpanchö juklla yurirkur napakurirqan: <<¡Alli kawakï qamkunachö këkullätsun!>>

27Tomástanam kënö nirqan: <<Tomás, makïta rikë. Clävu uchkushqanman dëdïkita yakë. Y tuksiyämashqan qasqümanpis makikita yakë. ¿Imanirtaq creyinkitsu?>>

28Tsënam Tomásqa kënö nirqan: <<¡Señorllä y Diosllä!>>

29Jesúsnam nirqan: <<¿Rikäramarraqku creyinki? ¡Mana rikämarpis creyiqkunaqa kushishqam kayanqa!>>

Kë libruta imapaq qellqanqanpis

30Discïpulunkuna rikëkaptin atska milagrukunatam Jesús rurarqan. Tsëkuna manam llapantsu kë libruchö qellqarëkan. 31Kë libruchö qellqarëkaqkunaqa Jesús salvamaqnintsik Cristo kashqanta y Diospa Tsurin kashqanta creyiyänëkipaqmi y creyir wiñë kawëta tariyänëkipaqmi.

Currently Selected:

Juan 20: qwhB

Highlight

Copy