Juan 18

Jesústa prësu tsariyanqan

Mateo 26.47-56; Marcos 14.43-50; Lucas 22.47-53

1Teyta Diosta tsënö mañakurirnam Cedrón uranpa wak tsimpanman discïpulunkunawan Jesús ewkurqan. Tsëpitanam huertaman yëkuriyarqan.#Mat. 26.36; Mar. 14.32.

2Tsëman discïpulunkunawan Jesús imëpis ëwashqa kaptinmi Jesústa rantikuq Judas musyarqan tsëman ëwayashqanta. 3Tsëmi Jesústa prësu tsariyänanpaq aktsinkunawan y espädankunawan wardiakunata y atska soldädukunata pusharkur Judasqa ëwarqan. Tsë wardiakunatam y soldädukunatam mandakuq sacerdötikuna y fariseukuna kachayarqan.

4Jesúsqa llapan pasananpaq kaqkunatam musyarqan. Tsëmi prësu tsariyänanpaq ëwayashqakunata toparkur kënö tapurqan: <<¿Pitataq ashikäyanki?>> nir.

5Tsënam kënö niyarqan: <<Nazaretpita Jesústam ashikäyä>>.

Jesúsnam kënö nirqan: <<Noqam Kä>>.#18.5 Noqam Kä nirqa Jesucristo käyitsirqan kikin Dios kashqantam. Tsëpita masta musyanëkipaq leyinki Éxo. 3.14; Juan 10.30-33.

(Jesústa rantikuq Judaspis tsëchömi këkarqan.)

6<<Noqam Kä>> nïkuptinnam qepapëpa ishkiriyarqan. 7Jesúsnam yapë tapurqan: <<¿Pitataq ashiyanki?>>

Pëkunanam yapë niyarqan: <<Ari Nazaretpita Jesústam>>.

8Jesúsnam nirqan: <<Niyarquqnam: <Noqam Kä>. Noqata ashimarqa noqallata prësu tsariyämë. Kë nunakunataqa ama imanayëtsu>>.

9Tsënö kananpaqmi Teyta Diosta mañakur kënö nishqa karqan: <<Makïman churamushqëki kaqkunataqa manam mëqantapis oqrarqütsu>>.#Juan 17.12.

10Tsënam Simón Pedro espädanta jorqurir juk nunapa allawka kaq rinrinta wallurïkurqan. Tsë nunaqa karqan sumo sacerdötipa sirwiqnin Malcum. 11Tsënam Pedruta Jesús nirqan: <<¡Espädëkita kutitsi! Precisanmi tëtä qomashqan cöpata upunä>>.#18.11 Teyta Diospa cöpanqa mana cäsukuq nunakunata castigashqanmi këkan. Tsëmi tsë cöpata upunanpaq Jesús nirqa Diosta mana cäsukuq nunakunapa rantin castigashqa kananpaq kashqanta nirqan.#Sal. 75.8; Isa. 51.17, 22; Jer. 25.15-17; Eze. 23.31-34; Hab. 2.16; Apoc. 14.9-10; 16.19.

Sumo sacerdötipa wayinman Jesústa apayanqan

Mateo 26.57-58; Marcos 14.53-54; Lucas 22.54

12Tsëpitanam comandantina soldädukunawan y templu täpakuq wardiakunawan Jesústa prësu tsarirkur watariyarqan. 13Tsëpitanam Caifáspa suegrun Anáspa wayinman apayarqan. Caifásqa tsë watam sumo sacerdöti karqan. 14Pëmi autoridä mayinkunata nishqa karqan: <<Llapantsik wanunantsikpa rantin mas allim kanman juk nunalla wanuptin>>.#Juan 11.49-50.

Jesústa Pedro neganqan

Mateo 26.69-70; Marcos 14.66-68; Lucas 22.55-57

15Simón Pedrunam juk discïpulu mayinwan Jesúspa qepanta ëwayarqan. Tsë discïpulum sumo sacerdötiwan reqinakur patiuman yëkurirqan. 16Pedrunam punkullachö quedakurqan. Tsëmi ruriman yëkuq discïpuluqa punkuchö täpakuq warmita rowarqan Pedrutapis yëkatsinanpaq.

17Tsë warminam Pedruta kënö tapurqan: <<Qampis taqë nunapa discïpulunmi kanki ¿aw?>>

Pedrunam nirqan: <<Manam>>.

18Alläpa alalaptinnam sirwikuqkuna y templu täpaq wardiakuna ninata tsarirkatsir qoñükïkäyarqan. Pëkunawanmi Pedrupis qoñükïkarqan.

Sumo sacerdöti Anás Jesústa tapunqan

Mateo 26.59-66; Marcos 14.55-64; Lucas 22.66-71

19Tsëpitanam sumo sacerdöti Jesústa tapur nirqan: <<¿Pitaq discïpulïkikuna? ¿Imatataq yachatsinki?>>

20Jesúsnam nirqan: <<Noqaqa manam pakëllapa imatapis yachatsikurqütsu. Sinagögakunachöpis y templuchöpis llapan nunakunam yachatsikunqäta wiyayämashqa. 21¿Imanirtaq noqata tapumanki? Yachatsishqäta wiyamaq nunakunata tapï. Pëkunam imata yachatsishqätapis musyayan>>.

22Tsënö nïkuptinnam Jesústa juk wardia laqyëkur kënö nirqan: <<¿Tsënöku sumo sacerdötita ninki?>>

23Jesúsnam nirqan: <<Mana allita parlashqa kaptïqa mä nimë. Llutanta mana parlëkaptïqa ¿imanirtaq laqyamanki?>>

24Tsëpitanam watashqallata sumo sacerdöti Caifásman Anás apatsirqan.#18.24 Anás sumo sacerdöti kaptinpis Roma nunakunam pëta qarqurir mashan Caifástana churayarqan mas mandakuq kananpaq.

Jesústa Pedro yapë neganqan

Mateo 26.71-75; Marcos 14.69-72; Lucas 22.58-62

25Simón Pedro qoñukïkaptinmi yapë tapuyarqan: <<Qampis taqë nunapa discïpulunmi kanki ¿aw?>>

Pedrunam nirqan: <<Manam>>.

26Ichik unëllantanam sumo sacerdötipa sirwiqninpis nirqan: <<Pëwan këkaqtam qamta huertachö rikarquq>>.

(Tsënö niq nunapa castanpa rinrintam Pedro wallurishqa karqan.)

27Pedrunam yapë negarqan. Tsë höram gällu cantarirqan.

Pilatuman Jesústa prësu apayanqan

Mateo 27.1-2, 11-14; Marcos 15.1-5; Lucas 23.1-5

28Patsa warëkaptinnam Caifáspa wayinpita Roma gobernadorpa despächunmanna Jesústa apayarqan. Tsënö kaptinpis Israel autoridäkunaqa manam tsë despächuman yëkïta munayarqantsu. Pëkuna yarpäyarqan tsëman yëkurqa impüru tikrar Pascua mikïkunata manana mikuyänanpaq kashqantam. 29Tsëmi despächunpita yarqurir Pilato kënö tapurqan: <<¿Ima jutsanpitataq kë nunata apayämurqunki?>>

30Tsënö tapuptinnam niyarqan: <<Jutsayuq kaptinmi apayämü. Mana jutsayuq kaptinqa manam apayämümantsu>>.

31Pilatunam nirqan: <<Leynikikuna nishqannö juzgayänëkipaq apakuyë>>.

Tsënö nïkuptinnam Israel nunakunapa autoridäninkuna kënö niyarqan: <<Noqakunaqa pitapis wanutsiyänäpaq manam mandakïta puëdiyätsu>>.

32Tsënö niyaptinmi cruzchö wanunanpaq Jesús nishqan cumplikärirqan.#Juan 3.14; 12.32.

33Despächunman Pilato kutirirnam Jesústa qayëkur tapurqan: <<¿Rasunpaku Israel nunakunapa reynin kanki?>>

34Jesúsnam nirqan: <<¿Kikikipa yarpënikipitaku o nunakuna niyäshuptikiku tsënö tapumanki?>>

35Pilatunam nirqan: <<Noqaqa manam Israel nunatsu kä tsëkunata musyanäpaq. Marka mayikikunawan mandakuq sacerdötikunam prësu apayämushurqunki. Tsënö apayämushunëkipaq ¿ima jutsatataq rurarqunki?>>

36Jesúsnam nirqan: <<Noqa manam kë patsachö mandakuqtsu kä. Kë patsachö mandakuq kaptïqa prësu mana tsariyämänanpaqmi discïpulükuna pelyayanman karqan>>.

37Pilatunam tapurqan: <<Tsëpinqa ¿rasunpaku rey kanki?>>

Jesúsnam nirqan: <<Rasun kaqtam nikanki. Rasun kaqta willakunäpaqmi kë patsachö yurikurqü y tsëpaqmi kë patsaman shamurqü. Pipis rasun kaqta musyëta munarqa willakushqäkunatam chaskikun>>.

38Tsënö niptinnam Pilato nirqan: <<¡Imaraq tsë rasun kaqqa!>>

Jesústa crucificäyänanpaq Pilato mandanqan

Mateo 27.15-31; Marcos 15.6-20; Lucas 23.13-25

Jesústa tapurirmi despächunpita Pilato yapë yarqurir Israel nunakunata kënö nirqan: <<Noqa manam tarïtsu kë nunapa ima jutsantapis. 39Qamkuna musyayankim Pascua fiestachö cada wata juk prësuta kacharishqäta. ¿Munayankiku Israel nunakunapa reyninta kacharinäta?>>

40Tsënö niptinnam llapan niyarqan: <<¡Jesústaqa ama kachëtsu! ¡Barrabásta kachariqa!>>

Barrabásqa karqan Romachö mas mandakuq reypa contran shäriqmi.

Currently Selected:

Juan 18: qwhB

Highlight

Copy