Hechos 4

Pedrutawan Juanta autoridäkunaman apayanqan

1Pedruwan Juan willakïkäyaptinmi sacerdötikuna, saduceukuna y templu täpaq wardiakunapa capitanninpis chäyarqan. 2Pëkunaqa Jesucristo kawarimushqannö wanuqkuna kawariyämunanpaq kashqanta yachatsiyaptinmi alläpa piñëkuyarqan. 3Prësu tsarïkurmi tardina kaptin waränin qoyayaq carcelman llawiratsiyarqan. 4Tsënö kaptinpis Pedruwan Juan willakuyashqanta wiyëkurmi atskaq creyiyarqan. Tsë creyiqkuna kayarqan pitsqa waranqanömi (5,000).

5Waränin qoyanam Jerusalénchö ëllukäyarqan Israel nunakunapa autoridäninkuna, anciänukuna y ley yachatsikuqkunapis. 6Pëkunawanmi ëllukäyarqan sumo sacerdöti Anaspis, Caifáspis, Juanpis, Alejandrupis y Anaspa wakin castankunapis. 7Tsëpitanam Pedruta y Juanta carcelpita jorqaratsimur tapuyarqan: <<¿Ima podernikikunawantaq y pipa shutinchötaq këkunata rurayarqunki?>>

8Espíritu Santupa poderninwanmi Pedro kënö nirqan: <<Autoridäkuna y precisaq Israel nunakuna, 9¿purita mana puëdiq nunata kachakätsiyashqäpitaku tapuyämanki? 10Qamkunapis y llapan Israel nunakunapis, wiyayämë. Nazaretpita Jesúspa shutinchömi kë nunata kachakätsiyarqü. Pëta crucifiquëpa wanutsishqa kayaptikipis Teyta Diosmi kawaritsimushqa. 11<Kë rumi manam allitsu> nir wayi shäritsiqkuna jitariqnömi pëta wanutsiyarqunki. Tsënö kaptinpis maestra ruminömi këkan.#Sal. 118.22. 12Jesucristullam salvamaqnintsik këkan. Pëpita mas jukqa salvamänantsikpaq manam kantsu>>.

13Pedruwan Juan mana estudiashqa këkarpis mana mantsakushpa parlayaptinmi autoridäkuna espantakuyarqan. Y Jesúspa discïpulunkuna kayashqantam käyikuyarqan. 14Kachakätsishqan nuna tsëchö shëkaqta rikarmi ima nitapis puëdiyarqantsu.

15Juntarëkäyashqanpita Pedrutawan Juanta waqtaman jorqaratsirmi kikinkunapura kënö ninakuyarqan: 16<<¿Imatataq kë nunakunata rurashun? Tsë nunata kachakätsiyashqantaqa Jerusalénchö täraq llapan nunakunam musyayan. Tsëtaqa manam negashwantsu. 17Tsënö kaptinpis willakuyashqan mëtsëmanpis mana chänanpaq pëkunata atikashun Jesúspa shutinchö pitapis manana willakuyänanpaq>>.

18Tsënö parlarirnam waqtapita qayëkatsimur niyarqan Jesúspa shutinchö imëpis manana willakuyänanpaq ni mana yachatsikuyänanpaq.

19Pedruwan Juannam kënö niyarqan: <<Tëtakuna, shumaq käyikuyë. ¿Alliku kanman Teyta Diosta cäsukuyänäpa rantin qamkunata cäsuyaptiq? 20Rikäyashqäta y wiyayashqätaqa manam upällaqa kayämantsu. Tsëtaqa imëpis willakuyäshaqmi>>.

21Purita mana puëdiq nunata kachakätsiyashqanpita llapan nunakuna Teyta Diosta alabayaptinmi autoridäkuna castigayarqannatsu, sinöqa atikëkurllam kachariyarqan. 22Jesúspa poderninwan kachakaq nunaqa chusku chunka (40) watayuqpita masllam karqan.

Teyta Diosta mañakuyanqan

23Carcelpita yarqurirnam Pedruwan Juanqa markäkuqkunaman kutïkur willayarqan mandakuq sacerdötikuna y precisaq Israel nunakuna imata niyashqantapis. 24Tsënö willayaptinmi llapanpis Teyta Diosta mañakur niyarqan: <<Teyta Dios, qammi kamarqunki ciëluta, kë patsata, lamarta y llapan imëkatapis.#Éxo. 20.11; Neh. 9.6; Sal. 146.6. 25Espíritu Santu käyitsiptinmi sirwiqniki David kënö nirqan:

<<¿Imanirtaq nunakuna Diospa contran shäriyan?

¿Imanirtaq manakaqkunata yarpäyan?

26Teyta Diospa y akrashqan Cristupa contran shäriyänanpaqmi

kë patsachö reykuna y autoridäkuna ëllukar parlayan>>.#Sal. 2.1-2.

27<<David nishqannöllam Herodespis,#Luc. 23.7-11. Poncio Pilatupis,#Mat. 27.1-2; Mar. 15.1; Luc. 23.1; Juan 18.28-29. mana Israel nunakunapis y Israel nunakunapis kë Jerusalénchö ëllukäyarqan santu sirwiqniki#4.27 Tsë palabraqa griëguchö sirwiqniki y wamrëki ninanmi. Tsënöllam 4.30-chöpis këkan. Jesúspa#Isa. 52.13; Fil. 2.7. contran shäriyänanpaq. Pëtam salvakuq Cristo kananpaq churarqunki. 28Tsënö kananpaq unëpita nishqëkinöllam llapantapis rurayarqan.

29<<Teyta Dios, autoridäkuna niyämashqanta wiyarqunkim. Kanan yanapëkalläyämë willakïnikita mana mantsakushpa willakuyänäpaq. 30Santu sirwiqniki Jesúspa shutinchö tukïläya milagrukunata rurayänäpaq y qeshyaqkunatapis podernikiwan kachakätsiyänäpaq yanapëkalläyämë>>.

31Teyta Diosta mañakur ushariyaptinmi juntarëkäyashqan wayi karkaryarqan. Tsëmi Espíritu Santupa poderninwan Teyta Diospa willakïninta mana mantsakushpa willakuyarqan.

Jesúsman markäkuqkuna yanapanakuyanqan

32Jesucristuman markäkuqkuna llapanpis juk yarpëllam kayarqan. Tsëmi imatapis kikinkunallapaq churayänanpa rantinqa wanayashqanmannö rakinakuyaq.#Hech. 2.44-45. 33Señor Jesucristo kawarimushqantam mana mantsakushpa apostolkuna willakuyaq. Llapan markäkuqkunatam Teyta Dios imëkanö yanaparqan.

34Tsëmi pëkunaqa mëqanpis pishipëchö kayarqantsu. Chakrankunata y wayinkunata rantikïkurmi tsë qellëta 35apostolkunaman apayaq. Pëkunanam waktsakunata wanayashqanmannö rakiyaq.

36Tsënöllam José shutiyuq nunapis rurarqan. Pëqa Chipre islapita Leví trïbu nunam karqan. Pëpa kuyë shutinmi apostolkuna churayarqan Bernabé nir. Tsë shutiqa <<ankupäkuq nuna>> ninanmi. 37Bernabémi chakranta rantikïkur qellëta apostolkunaman aparqan.

Currently Selected:

Hechos 4: qwhB

Highlight

Copy