1 Juan 4

Llutan yachatsikuqkuna imanö kanqanpis

1Kuyë wawqikuna y panikuna, kë patsachö atskaqmi uli profëtakuna purikäyan. Tsënö këkaptinqa pipis <<Espíritu Santum käyitsimashqa willakunäpaq>> nir chämuptin shumaqraq käyipäyë Teyta Diospa willakuqnin rasunpa kashqanta o mana rasunpa kashqantapis. 2Teyta Diospa willakuqnin karqa Jesucristo kë patsaman shamur rasunpa nuna kashqantam yachatsikunqa.#4.2 Jesucristo Dios kashqanta creyirpis wakin nunakuna manam creyiyarqantsu rasunpa nuna kashqanta, sinöqa nuna niraqlla kashqantam yarpäyarqan. 3Jesucristo rasunpa nuna kashqanta mana yachatsirqa manam Teyta Diospa willakuqnintsu këkan, sinöqa anticristum. Anticristo shamunanpaq kashqanta musyayashqëkinöllam kananqa anticristukuna kë patsachö purikäyan.#Mat. 7.15; 2Juan 7.

4Kuyë wamralläkuna, Teyta Diospa wamrankunam këkäyanki. Qamkunachö këkaq Espíritu Santuqa kë patsachö këkaq espïritupitapis mas puëdiqmi. Pë yanapayäshuptikim tsë llutan yachatsikuqkunata chaskiyankitsu. 5Pëkunaqa Diospa wamran mana karmi yarpëninkunallapita yachatsikuyan. Tsëmi pëkunataqa mana cäsukuq mayinkuna chaskiyan.#Juan 15.19.

6Noqakunaqa rasunpa Diospa willakuqninmi këkäyä. Tsëmi willakuyashqäta chaskikuqkuna Teyta Diosta reqiyan. Willakuyashqäta mana chaskikuqkunaqa manam Teyta Diospa willakuqnintsu kayan. Tsënöpam musyantsik mëqan nuna rasun kaqta yachatsishqanta y mëqan nuna mana allita yachatsikushqantapis.

Teyta Dios kuyamanqantsiknö kuyanakunantsikpaq ninqan

7Kuyë wawqikuna y panikuna, Teyta Dios kuyakuq këkaptinqa juknintsik juknintsik kuyanakushun. Kuyanakurqa Diospa wamran karmi pëta reqintsik. 8Mana kuyanakurqa Diosta manam reqintsiktsu. Teyta Diosqa kuyakuqmi.

9 Wiñëpa kawanantsikpaqmi Teyta Dios japallan Tsurinta kë patsaman kachamurqan. Tsënöpam alläpa kuyamashqantsikta musyatsimarquntsik.#Juan 3.16. 10Rasunpa kaq kuyakïqa manam Diosta noqantsik kuyashqantsiktsu, sinöqa noqantsikta pë kuyamashqantsikmi. Jutsata ruranqantsikpita sacrificiu kananpaqmi Tsurin Jesucristuta kachamurqan. Tsëmi rasunpa kaq kuyakïqa.

11Kuyë wawqikuna y panikuna, Teyta Dios tsënö kuyëkämashqaqa noqantsikpis kuyanakur juknintsik juknintsik kawakushun. 12Teyta Diosta manam pipis rikashqatsu.#Juan 1.18. Tsënö kaptinpis kuyanakushqam noqantsikwan këkan. Tsëmi yanapëkämantsik pë kuyakuq kashqannö noqantsikpis kuyakuq kanantsikpaq.

13Espíritu Santuta chaskikushqa karmi Teyta Dios noqantsikwan këkashqanta y noqantsikpis pëwan këkashqantsikta musyantsik.#Rom. 8.9; 1Juan 3.24. 14Jina kikïkunam rikäyarqü Diospa Tsurin Jesucristo kë patsachö këkaqta. Tsëmi willakuyä nunakunata salvananpaq Teyta Dios pëta kachamushqanta.#Juan 3.17. 15Jesucristo Teyta Diospa Tsurin kashqanta creyir chaskiq kaqqa Teyta Dioswanmi këkan y Teyta Diospis pëwanmi këkan.

16Kananqa Teyta Dios kuyamashqantsikta musyarmi pëman markäkïkantsik. Teyta Diosqa kuyakuqmi. Noqantsikpis kuyanakurqa pëwanmi këkantsik y pëpis noqantsikwanmi këkan. 17Tsënöpam Teyta Dios munashqannö kuyanakuntsik. Tsënö kuyanakur kawar y Jesucristo kë patsachö kawashqannö kawarqa juiciu junaqchöpis manam mantsakushuntsu. 18Teyta Dios kuyamashqantsikta mana käyirmi castigamänantsikpaq kashqanta yarpantsik. Teyta Dios kuyamashqantsikta käyirqa mana castigamänantsikpaq kashqanta musyarmi mantsantsiknatsu.

19Puntata pë kuyamashqam noqantsikpis [pëta] kuyantsik. 20Pipis <<Teyta Diostam kuyä>> nikar nuna mayinta chikirqa ulikïkanmi. Nuna mayintsikta rikëkar mana kuyëkarqa ¿imanöparaq mana rikashqantsik Teyta Diosta kuyashwan? 21Teyta Diospa mandamientunchömi kënö nimantsik: <<Teyta Diosta kuyarqa nuna mayikitapis kuyë>> nir.#Mar. 12.29-31.

Currently Selected:

1 Juan 4: qwhB

Highlight

Copy