Salmos 40
40
Yuusru ame wakeramun takastasan wakerajai timau
(Sal 70)
David kantamtain kantamamu
1Wina apurun ninak enentaimtusan
yainkata tusan aujsamiajai,
turam ni anturtuk yainkamiayi.
2Tura wii jakattsan pujai,
tura shuar paakanam tepea jamaina numamtuk
ashi jakattsan pujai Yuus uwemtikrurmiayi.
Tura muchig uun
ishichkisha umuchmainchauwa numamtinan
wekakrisha iyamainchau wii wekasatnun umikmiayi.
3Tura nuiyasha wina emematrakum yamaram kanta
kantamata tusa jintintruamiayi.
Turutamtai Yuusan emematku kantamruamiajai.
Nuna antukar nukap shuar aina Yuusan nekaspapita, tusa tiarmiayi.
4Shuar ememachu,
tura yuusrimattsa najanamun emematchau
aina nu, Yuusa nunak nekaspapita tinu aina
nu shir aneasartinaiti.
5Apu, wina Yuusru,
ame wait anenkartakum
wainchatai aina nukap iwainakuitme.
Amijai metekka chikichkiksha atsawai.
Nu ainan pachisan etserkattsan wakeraknasha shir nukap asamtai ashika etsertsujai.
6Shuar aina tagku ainan maa epena nu, tura anentak ainan itaina nusha,
ameka nuka shir anentatsme.
Turasha ameka wii wakeramun umikti tusam nekamtikruawaitme.
7Tusan chichakun: “Yuusru, wina pachitas papiinum aararua nunisnak jui pujajai”.#He 10.5-7
8Wina apuru, ame wakeramu takata nu shir amajtawai.
Amina chichamrum jintintruawaitam nu unuimarmau arutui.
9Aminu aina nukap
iruuntramunam chicham nekasa nuna etserkauwaitjai.
Yuusru wika amina pachisan
chichamrumin pegke ukchamiaj nusha shir nekame.
10Amina chichamrumin unuimarmaunka ukan inaitsuk etserkauwaitjai.
Tura ame timau metek uminaitam nuna,
uwemtikartinaitam nuna,
anegkratnaitam nuna,
tura amina chichamrum nekasa nunasha uutsuk,
aminu aina nukap iruuntramunam etserkauwaitjai.
11Tuma asamtai apuru ame wait anegkrattairmeka urtukaipa,
amina anegkrattairmijai, tura amina chichamrum nekasa nujai yainkata.
12Wii waitamua nuka shir nukap asar nekapmakrisha ejémaitsui.
Wina tunauruka wina wichrun nagkasau shir nukap arutui.
Tumau asan natsamakun shir iimmain nekapeatsjai
nuiyasha jakamnau nekapeajai.
13Apuru,
¡wait aneasam,
agkanmamtikruata,
turam wári yainkata!
14Shuar aina wina mantuawartasa
wakerutaina nuka ame inatsararta
turamu asar,
wina pegkerchau amajtukartasa wakeruina nuka
natsaarar tsekegkiarti.
15Tura wina wishikruraru aina nuka
natsaararu asar tsekegkiarti.
16Antsu amina seatmainaka shir aneasar pujusartinaiti.
Tura uwemrartasa wakerin ainaka
inaitamtsuk amina pachitmasar:
“Yuuska senchirtinaiti”
tusar tuke emematramiartin ainawai.
17Wika atsuma asan
wake mesemar nekapeajai,
wait aneasam apu winaka kajinmattrukipa.
Ametme wina yainkam uwemtikrinmeka.
¡Tumau asam apu wári yainkata!
Currently Selected:
Salmos 40: hubDBL
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
