Génesis 6

Yuus shuar aina tunaun takaina asarmatai ashi ijinatjai tusa timau

1Shuar aina nugkanam pampagkar, nuwa ainan akigkaruiti. 2Turawarmatai nayaimpinmaya shuar aina, nuwa shiram ainan nita wakeramun iisar nuattraru ainawai. 3Tumawarmatai Yuus chichaak: Shuar ainanka tunaun takau asarmatai tuke pujusarti tusanka tichattajai. Antsu ciento veinte uwí pujusarti, tusa tinaiti. 4Nu shuar akiamu asar, nugkanmagka shuar nayau kakaram aina matsama jaku ainawai. 5-7Tura shuar tunaun senchi takaina asar, aya pegkerchaunak enentaimtuinan Yuus nekau asa, chichaak: Wii najankau ayatnak shuar wina umirtichu ainan, kuntin ainan, nanamtin ainan tura nugkanam japinas wekain ainancha ashi ijinattajai, tusa tinaiti. 8Turasha Yuus Noénka shir enentaimtusa umirmau asa, wait anentrauwaiti.

Noé arcan takasmau

9Noéka Yuus wakeramun takau asa, chikich shuar ainan nagkasau pegker ajakuiti. 10Noéka tres uchin akiawaiti. Sem, Cam, Jafet, nu ajakaruiti. 11-12Shuar aina tunaun takaina asarmatai, nugkanmaya ainaka Yuus iismaka shir pegkerchau jasaruiti. 13Tuma asamtai Noén Yuus chicharuk: Yamaika shuar matsata nunaka ashi ijinattajai, tura nita tunaurin shuar ainanka ashi ijinattajai. 14Turatin asamtai númi gofer tutai aina nu ajakam, arca takasta. Tura tesakam entsa wayaawai tusam initkari, tura aanisha shir sakattrata. 15Arca esanti: Ciento treinta y cinco metros, wagkanti veintidos metros y medio, tura yakintisha trece metros y medio, 16tura tsaaptin atin jea awantamu nugkani medio metronam chigkarta. Nugkasha pujutai, ajapeencha pujutai, yakisha pujutai umikta. Tura arca yantamen chikichik waiti najanata. 17Turawakmin ashi nugkanam matsataina nuna ijinattsan yumin yutumtikattajai. 18Turasha aminka wii timajam turusnak uwemtikrattajme. Arcanmagka ame, amina uchiram, amina nuwem, tura uchirmin nuwe ainajaimak egkemattarme. 19-20Tumakum nugkanam ashi kuntin iruna nu, nanamtin aina, tagku aina tura japinas wekain aina nusha amijai metek iwáku juartin aishmag nuwajai jima jimarchik egkeawarta. 21Tura ame yuatin, kuntin aina yuatnusha yutai ainaka ashi chumpiata, tusa tinaiti. 22Yuus timaun turusag Noé umikuiti.

Currently Selected:

Génesis 6: hubDBL

Highlight

Copy