Salmos 97
97
1DSAˉJØ̱Ø̱Hˈ jnänˋ baˊ hi̱ˉ gyaꜗ jmeeꜙ hihꜙ.
Waˊ jë̱ë̱ˉ hohꜘ hnähꜘ hi̱ˉ tä̱ä̱hˊ läꜙka̱a̱ˉ hwaꜗ.
Läꜙkye̱ˉ hnähꜘ hi̱ˉ tä̱ä̱hˊ hwaˈ heˉ täähˊ jeeˊ jmɨˉñeehꜚ,
waˊ jë̱ë̱ˉ hohꜘ hnähꜘ.
2Läꜙkuˊ läꜙji̱i̱ꜗ kiyhꜗ nøøꜘ jniiꜘ lähˉ.
Heˉ lluꜗ jmahꜗ kya̱a̱hˊ juꜗdsooꜘ laꜗ hø̱ø̱yˈ jeeˊ gyayˈ.
3Taꜙ chaˊnëˊ bihꜗ hiiꜘ jeˉ, heˉ kya̱a̱hˊ jë̱ë̱yˈ hi̱ˉ naˉhøøhˊ
hi̱ˉ tä̱ä̱hˊ läꜙkuˊ läꜙji̱i̱ꜗ kiyhꜗ.
4Jeꜚñihꜗ kya̱a̱yꜗ chooꜙ jeˉ läꜙka̱a̱ˉ jmɨˉgyʉʉꜙ,
hiꜙ waˊraˉ gaꜙhɨ̱ɨ̱ꜗ ñihꜗ, hla̱a̱ꜙ läꜙ gaꜙtëꜘ hwaꜗ.
5Läꜙji̱i̱hˈ mohꜘ dsaˉjo̱o̱ꜗ
läꜙko̱hꜘ dsaˉjo̱o̱ꜗ sër˜ chaˊnëˊ DSAˉJØ̱Ø̱Hˈ jnänˋ.
Läꜙja̱ˉ dsaˉlaꜘ chaˊnëˊ Dsaˉjʉʉˊ kihꜗ läꜙka̱a̱ˉ jmɨˉgyʉʉꜙ.
6Gyʉʉhˈ jmɨˉgyʉʉꜙ miˉjnääꜙ heˉ la̱a̱yꜗ llu̱u̱ꜗ goˉte˜.
Läꜙjë̱ë̱ꜙ baˊ dsaˉ kyu̱u̱yꜙ haˉ ko̱hꜘ jø̱ø̱hˈ saꜙ la̱a̱yꜗ.
7Waˊ jäˉ oˉhihꜙ kihꜗ hi̱ˉ jmeeꜙ taˊheꜗ kihꜗ dio
hi̱ˉ naˉla̱a̱ꜚ ka̱a̱h˜ dsaˉ.
Läꜙja̱ˉ kihꜗ hi̱ˉ jmää˜ jø̱ø̱hˈ dio heꜘ.
Jëëhꜘ läꜙjë̱ë̱ꜙ dio hi̱ˉ naˉla̱a̱ꜚ ka̱a̱h˜ dsaˉ,
lleˋ kihˈ ju̱yhꜗ jnëyˊ chaˊnëˊ Dio hi̱ˉ gyaꜗ gyʉʉhˈ.
8Maˊ gaꜙnuuꜘ hi̱ˉ cha̱a̱ˉ jwɨɨˉ Sión heˉ ñeehˋ hneˉ llahˈ taˊ DSAˉJØ̱Ø̱Hˈ kya̱a̱nꜗ,
heˉja̱ˉ gaꜙjë̱ë̱ꜘ dsëyꜗ.
Hiꜙ läꜙja̱ˉ gaꜙlaꜗ kihꜗ läꜙjë̱ë̱ꜙ hi̱ˉ cha̱a̱ˉ hwaꜗ Judá.
9Jëëhꜘ hneˉ DSAˉJØ̱Ø̱Hˈ kya̱a̱nꜙ,
haˉ ko̱hꜘ saꜙ jø̱ø̱hˈ hneˉ hi̱ˉ jmeeꜙ hihꜙ läꜙka̱a̱ˉ hwaꜗ.
Jø̱ø̱hˈ gaˊ hneˉ läꜙko̱o̱ˉ gaˊ jeeˊ läꜙjë̱ë̱ꜙ dio hi̱ˉ naˉla̱a̱ꜚ ka̱a̱h˜ dsaˉ.
10Läꜙjë̱ë̱ꜙ hi̱ˉ hnääꜗ DSAˉJØ̱Ø̱Hˈ jnänˋ,
waˊ läꜙø̱ø̱hꜘ hnähꜘ goˉte˜ kihꜗ heˉ hlɨɨhˈ.
Jëëhꜘ hñiiyꜘ hä̱ä̱y˜ läꜙjë̱ë̱ꜙ hi̱ˉ naˉjngëëˈ kya̱a̱yꜗ
hiꜙ lä̱ä̱y˜ mahꜗ saꜙ tä̱yhꜙ gooˉ hi̱ˉ hñaaˉ dsëꜗ.
11Hñiiyꜘ miˉjnääyꜙ jmëëꜗ kiyhꜗ, kihꜗ hi̱ˉ llu̱u̱ꜗ,
läꜙja̱ˉ jë̱ë̱ˉ dsëꜗ dsaˉ hi̱ˉ jmeeꜙ heˉ lluꜗ jmahꜗ.
12Waˊ jë̱ë̱ˉ hohꜘ hnähꜘ hi̱ˉ llu̱u̱ꜗ
kwa̱a̱t˜ kihꜗ DSAˉJØ̱Ø̱Hˈ jnänˋ.
Jmeeˊ jʉʉhˉ kihꜗ DSAˉJØ̱Ø̱Hˈ jnänˋ hi̱ˉ naˉjngëëˈ goˉte˜.
Currently Selected:
Salmos 97: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
