Salmos 98
98
1Häˊ hnähꜘ kihꜗ DSAˉJØ̱Ø̱Hˈ jnänˋ kya̱a̱hˊ su̱ꜚ hmëëꜘ,
jëëhꜘ maˉjmeeyꜘ heˉ jʉhˉga̱a̱ˉ.
Kya̱a̱hˊ beꜘ kiyhꜗ, kya̱a̱hˊ gooyˉ naˉjngɨɨˈ
maˉlɨyh˜ maˉllaˉdsëëyˋ.
2DSAˉJØ̱Ø̱Hˈ jnänˋ maˉmiˉjnääyˉ heˉ lä̱ä̱y˜ dsaˉ.
Maˉmiˉjnääyˉ kihꜗ läꜙjë̱ë̱ꜙ dsaˉ
heˉ llayꜙ taˊ läꜙko̱o̱ˉ lleˋ kihˈ.
3Ko̱hꜘ kaˉlähꜘ maˉmiˉjnääyˉ heˉ hnääyꜗ dsaˉ Israel.
Läꜙka̱a̱ˉ jmɨˉgyʉʉꜙ maˉnuuˉ
haˉ läꜙ lä̱ä̱˜ Dio dsaˉ kya̱a̱ꜗ.
4Waˊ jë̱ë̱ˉ hohꜘ hnähꜘ häˊ hnähꜘ kihꜗ DSAˉJØ̱Ø̱Hˈ jnänˋ.
Hnähꜘ hi̱ˉ tä̱ä̱hˊ läꜙka̱a̱ˉ hwaꜗ, häˊ hnähꜘ ki̱i̱ˉ,
jnooˋ hnähꜘ goohˉ, häˊ hnähꜘ salmos.
5Jmeeˊ hnähꜘ jmɨɨˊ kihˈ DSAˉJØ̱Ø̱Hˈ jnänˋ
kya̱a̱hˊ tu̱ˉ heˉ chooˈ chaˉmiihˉ sɨˊñeꜗ.
Häˊ hnähꜘ su̱ꜚ kiyhꜗ kya̱a̱hˊ tu̱ˉ.
6Jʉʉˊ hnähꜘ luuꜘ hooˊ, jʉʉˊ hnähꜘ kya̱a̱hˊ jøøˈ chaˊnëˊ DSAˉJØ̱Ø̱Hˈ jnänˋ hi̱ˉ la̱a̱ꜗ dsaˉtaˊ jø̱ø̱hˈ.
7Waˊ hi̱i̱ˊ ki̱i̱ˉ heˉ hlu̱hꜙ jmɨˉñeehꜚ
hiꜙ läꜙja̱ˉ waˊ cha̱a̱ˉ lluꜗ läꜙjë̱ë̱ꜙ hi̱ˉ tä̱ä̱hˊ nehꜙ jmɨɨꜙ,
hiꜙ läꜙkye̱ˉ dsaˉ hi̱ˉ tä̱ä̱hˊ nëˊ hwaˈ.
8Waˊ hi̱i̱ˊ ki̱i̱ˉ jeeˊ ngëëꜙ jmɨˉjʉʉhˉ,
läꜙja̱ˉ waˊ cha̱a̱ˉ lluꜗ läꜙjë̱ë̱ꜙ hi̱ˉ tä̱ä̱hˊ nehꜙ mohꜘ.
9Ko̱ˉjø̱hꜘ baˊ häˊ hnähꜘ läꜙjë̱ë̱ꜙ hnähꜘ
chaˊnëˊ DSAˉJØ̱Ø̱Hˈ jnänˋ.
Jëëhꜘ hñiiꜘ bihꜗ jä̱yhꜘ yaˉllayˉ taˊ kihˈ dsaꜙ.
Yaˉllayˉ taˊ kihˈ läꜙjë̱ë̱ꜙ dsaˉ kya̱a̱hˊ juꜗdsooꜘ jmahꜗ.
Currently Selected:
Salmos 98: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
