Salmos 33
33
1Läꜙjë̱ë̱ꜙ hnähꜘ hi̱ˉ llu̱u̱ꜗ kya̱a̱yꜗ,
waˊ jë̱ë̱ˉ hohꜘ hnähꜘ kihꜗ DSAˉJØ̱Ø̱Hˈ jnänˋ.
Jëëhꜘ läꜙjë̱ë̱ꜙ hi̱ˉ llu̱u̱ꜗ lleˋ kihˈ häyꜗ su̱ꜚ.
2Häˊ hnähꜘ kihꜗ Dio kya̱a̱hˊ tu̱ˉ heˉ chooˈ chaˉmiihˉ sɨˊñeꜗ.
Häˊ hnähꜘ su̱ꜚ kya̱a̱hˊ tu̱ˉ heˉ chooˈ gyaꜗ sɨˊñeꜗ.
3Häˊ hnähꜘ su̱ꜚ hmëëꜘ, jmeeˊ hnähꜘ hi̱i̱ˊ naˊhñaahꜗ kiyhꜗ
kya̱a̱hˊ tu̱ˉ mahꜗ häˊ hnähꜘ läꜙka̱a̱ˉ tuhˉhohꜘ.
4Juuˈ kihꜗ DSAˉJØ̱Ø̱Hˈ jnänˋ laꜗ dsooꜘ.
Läꜙjëꜙ taˊ kiyhˈ miˉjnääꜙ heˉ miˉteyꜗ baˊ.
5DSAˉJØ̱Ø̱Hˈ jnänˋ hnøøꜗ heˉ lluꜗ jmahꜗ
hiꜙ hnøøyꜗ juˈdsooꜘ jmahꜗ kaˉlähꜘ.
Chaˉmiihˉ hnääyꜗ dsaˉ hi̱ˉ tä̱ä̱hˊ hwaˈ laˉ.
6Kya̱a̱hˊ juuꜗ kihꜗ DSAˉJØ̱Ø̱Hˈ jnänˋ gaꜙlaꜗ gyʉʉhˈ.
Kya̱a̱hˊ ko̱o̱ˉ gaꜙhlëëyhꜘ baˊ gaꜙla̱a̱ꜗ läꜙjë̱ë̱ꜙ nääꜗ nʉʉꜘ.
7Hñiiyꜘ gaꜙllayꜘ ko̱ˉta̱a̱ꜗ jmɨɨˉ.
Gaꜙjmeeyꜘ hø̱ø̱ˈ jeeˊ gaꜙnøøꜗ ko̱ˉta̱a̱ꜗ jmɨˉñeehꜚ.
8Läꜙka̱a̱ˉ jmɨˉgyʉʉꜙ waˊ ga̱hꜙ hnähꜘ DSAˉJØ̱Ø̱Hˈ jnänˋ.
Läꜙjë̱ë̱ꜙ hnähꜘ dsaˉ jmɨˉgyʉʉꜙ, waˊ ga̱hꜙ hnihꜘ.
9Jëëhꜘ hñiiyꜘ gaꜙjäyhꜘ waˊ leꜘ, hiꜙ läꜙja̱ˉ gaꜙlaꜗ.
Gaꜙjmeeyꜘ hihꜙ, hiꜙ gaꜙjä̱ꜘ baˊ ko̱o̱ˉ hwehˉ.
10DSAˉJØ̱Ø̱Hˈ jnänˋ jmeeyꜙ saꜙ kye̱e̱ꜘ läꜙjëꜙ juuˈ
heˉ sa̱a̱ˉjwa̱hꜘ dsaˉ jmɨˉgyʉʉꜙ.
Jmeeyꜙ taꜙ kooꜘ hʉʉˊdsëˉ heˉ jmeeꜙ dsaˉ.
11Pero nʉʉhꜚ kihꜗ DSAˉJØ̱Ø̱Hˈ jnänˋ läꜙ maˉchaˉ ja̱ˉbaˊ.
Hʉʉˊdsëˉ kiyhꜗ, ji̱hˊko̱hꜘ saꜙ läꜙsɨɨꜗ.
12Lluꜗ laꜗ kihꜗ läꜙko̱o̱ˉ nääꜗ dsaˉ
hi̱ˉ hnaahˉ maꜙraꜙ hi̱ˉ la̱a̱ꜗ Dio.
Lluꜗ laꜗ kihꜗ dsaˉ hi̱ˉ naˉlle̱e̱hˊ kya̱a̱yˈ.
13Läꜙ gaꜙtëꜘ gyʉʉhˈ jmɨˉgyʉʉꜙ jëë˜ DSAˉJØ̱Ø̱Hˈ jnänˋ taꜙ hwaꜗ
jë̱ë̱y˜ läꜙjë̱ë̱ꜙ dsaˉ jmɨˉgyʉʉꜙ.
14Läꜙ gaꜙtëꜘ jeeˊ gyayˈ
jë̱ë̱y˜ hi̱ˉ tä̱ä̱hˊ läꜙka̱a̱ˉ jmɨˉgyʉʉꜙ.
15Hñiiyꜘ gaꜙjmeeyꜘ tuhˉdsëꜗ läꜙjë̱ë̱ꜙ dsaˉ.
Hñiiyꜘ ka̱y˜ kwa̱a̱t˜ haˉ läꜙ tä̱ä̱hˊha̱a̱ˊ dsaˉ.
16Maꜙkeꜙ chaˉmiihˉ naˊllu̱u̱ˋ hløøꜘ hi̱ˉ jä̱ä̱ꜙ dsaˉtaˊ jø̱ø̱hꜗ,
ja̱ꜙ kya̱a̱hˊ heˉ ja̱ˉ naˉ lä̱ä̱yꜘ.
Läꜙja̱ˉ hi̱ˉ hä̱ä̱ˈ,
saꜙ lä̱ä̱yꜘ maꜙkeꜙ chaˉ chaˉmiihˉ beꜘ kiyhꜗ.
17Maꜙkeꜙ jä̱ä̱ꜙ dsaˉ kyaˊjɨɨhˊ, niꜙ läꜙja̱ˉ saꜙ läꜙjmääyꜗ.
Maꜙkeꜙ be̱e̱ꜘ kyaˊjɨɨhˊ hi̱ˉ jä̱ä̱yꜙ, niꜙ läꜙja̱ˉ saꜙ liyhꜙ.
18DSAˉJØ̱Ø̱Hˈ jnänˋ hä̱ä̱˜ läꜙjë̱ë̱ꜙ hi̱ˉ ga̱yhꜙ.
Läꜙja̱ˉ hä̱ä̱y˜ läꜙjë̱ë̱ꜙ hi̱ˉ kye̱ˉ oˉjø̱hꜙ dsëˉ kiyhꜗ,
läꜙlluꜗ heˉ hnääyꜗ jneˊ.
19Lä̱ä̱y˜ hi̱ˉ heꜘ maˊ hiiꜘ gooˉ ju̱u̱ꜘ.
Kwayꜙ beꜘ kiyhꜗ läꜙ maˊ jëëy˜ hooˊ.
20DSAˉJØ̱Ø̱Hˈ jnänˋ baˊ hi̱ˉ la̱a̱ꜗ oˉjø̱hꜙ dsëˉ jnänˋ.
La̱a̱yꜗ beꜘ jnänˋ,
hiꜙ la̱a̱yꜗ läꜙko̱hꜘ ñeˈ heˉ hɨɨˉ hløøꜘ jeeˊ lä̱ä̱y˜ hñiiyꜘ.
21Kihꜗ heˉ la̱a̱yꜗ läꜙja̱ˉ jnänˋ, heˉja̱ˉ jë̱ë̱ˉ dsëˉ jneˊ.
Jëëhꜘ kye̱ˊ jneˊ oˉjø̱hꜙ dsëˉ kihꜗ jmɨɨˉ naˉjngɨɨˈ kiyhꜗ.
22DSAˉJØ̱Ø̱Hˈ kya̱a̱nꜙ, waˊ hnaahꜙ jnäähˈ,
jëëhꜘ kyahꜗ hneˉ baˊ kye̱ˊ jnäähˈ oˉjø̱hꜙ dsëˉ.
Currently Selected:
Salmos 33: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
