Salmos 24
24
1Kihꜗ DSAˉJØ̱Ø̱Hˈ jnänˋ baˊ laˈ hwaꜗ
hiꜙ läꜙkye̱ˉ heˉ chaˉ nëˊ kihˈ.
Läꜙka̱a̱ˉ jmɨˉgyʉʉꜙ laꜗ kiyhꜗ,
läꜙkye̱ˉ hi̱ˉ cha̱a̱ˉ nëˊ kihˈ kaˉlähꜘ.
2Hñiiyꜘ gaꜙjmeeyꜘ gaꜙläꜙjnäꜘ hwaꜗ nëˊ jmɨˉñeehꜚ.
Gaꜙjmeeyꜘ gaꜙjä̱ꜘ ko̱o̱ˉ hwehˉ läꜙ maˊ gaꜙläꜙjnäꜘ.
3¿Hi̱i̱ˉ wɨɨꜗ jeeˊ gyaˈ Dio?
¿Hi̱i̱ˉ baˊ hi̱ˉ dsaˉta̱a̱hˋ gwahꜙ naˉjngɨɨˈ kiyhꜗ?
4Hi̱ˉ saꜙ maˉjmeeꜘ heˉ hlɨɨhˈ baˊ naˉngëˈ jwëˈ.
Läꜙja̱ˉ hi̱ˉ saꜙ maˉhlä̱ä̱hˉ kya̱a̱hˊ hʉʉˊdsëˉ kihꜗ,
hi̱ˉ saꜙ jmeeꜙ jʉʉhˉ kihꜗ he̱e̱hꜚ heˉ naˉlaꜚ kooh˜ dsaˉ,
hiꜙ läꜙja̱ˉ hi̱ˉ saꜙ chehꜗ nëˊ kihˈ juuˈ taˉjuuˈ.
5DSAˉJØ̱Ø̱Hˈ jnänˋ miˉjä̱ä̱ꜗ hi̱ˉ heꜘ.
Dio hi̱ˉ lä̱ä̱˜ jneˊ jmeeꜙ yaˉhë̱ë̱yˈ lluꜗ baˊ.
6Läꜙja̱ˉ jmeeꜗ Dio kihꜗ läꜙjë̱ë̱ꜙ hi̱ˉ hnaayhˉ.
Läꜙja̱ˉ jmeehˈ kihꜗ hi̱ˉ hnaahˉ hneˉ Dio kya̱a̱ꜗ Jacob.
7Näˊ hnähꜘ hoˊhaahˊ jʉʉhˉ kihˈ jeeˊ jwɨɨˉ naˉ.
Näˊ daˊ hnähꜘ hoˊhaahˊ heˉ maˊ chihˈ kihꜗ jä̱ä̱ꜗ,
mahꜗ dsaˉheꜘ Dsaˉtaˊ hi̱ˉ gyaꜙ yaꜙjwɨɨꜗ.
8¿Hi̱i̱ˉ naˉ Dsaˉtaˊ hi̱ˉ gyaꜙ yaꜙjwɨɨꜗ?
DSAˉJØ̱Ø̱Hˈ jnänˋ baˊ naˉ hi̱ˉ jaꜗ naˉ.
Be̱e̱yꜘ jwërte hiꜙ hä̱ä̱yˈ kaˉlähꜘ,
hiꜙ chaˉ beꜘ kiyhꜗ mahꜗ jmeeyꜗ hniiˉ.
9Näˊ hnähꜘ hoˊhaahˊ jʉʉhˉ kihˈ jeeˊ jwɨɨˉ naˉ.
Näˊ daˊ hnähꜘ hoˊhaahˊ heˉ maˊ chihˈ kihꜗ jä̱ä̱ꜗ,
mahꜗ dsaˉheꜘ Dsaˉtaˊ hi̱ˉ gyaꜙ yaꜙjwɨɨꜗ.
10¿Hi̱i̱ˉ naˉ Dsaˉtaˊ hi̱ˉ gyaꜙ yaꜙjwɨɨꜗ?
DSAˉJØ̱Ø̱Hˈ jnänˋ baˊ naˉ hi̱ˉ jaꜗ naˉ.
Be̱e̱yꜘ jwërte hiꜙ hä̱ä̱yˈ kaˉlähꜘ,
hiꜙ chaˉ beꜘ kiyhꜗ mahꜗ jmeeyꜗ hniiˉ.
Currently Selected:
Salmos 24: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
