Salmos 143
143
1DSAˉJØ̱Ø̱Hˈ kya̱a̱nꜙ, nʉʉˉ daˊ heˉ chu̱u̱nꜘ kya̱a̱hˊ hneˉ.
Nʉʉˉ kihꜗ läꜙjëꜙ heˉ ngɨɨnˊ kyahˈ.
Je̱e̱hˋ kinꜙ, hneˉ Dio kya̱a̱nꜙ,
jëëhꜘ llu̱u̱hꜗ hneˉ goˉte˜ hiꜙ miˉtehˋ baˊ juuˈ kyahꜗ.
2Taꜙ ngɨɨhˊ kwa̱a̱t˜ kihꜗ hi̱ˉ jmeeꜙ taˊheꜗ kyahꜗ,
jëëhꜘ niꜙ ja̱a̱ˉ saꜙ hwë̱ë̱ˉ llu̱u̱ꜗ chaˊnëhˊ.
3Hi̱ˉ naˉhøøhˊ kinꜙ hnooyhˉ haˉ läꜙ jeeˊ jngëëyhˈ jnäꜘ.
Maˉjwä̱ä̱yꜗ jnäꜘ taꜙ hwaꜗ,
maˉta̱a̱yhˉ jnäꜘ jeeˊ naˉho̱o̱ˉ läꜙko̱o̱ˉ ja̱a̱ˉ hi̱ˉ naˉju̱u̱ˊ.
4Peerꜙ jaꜗ gaꜙhwa̱a̱nꜘ,
saꜙ manꜙ heˉ jmeenˋ.
5Dsooh˜ baˊ dsënꜙ haˉ läꜙ gaꜙlaꜗ lloꜘjooꜗ.
Ngooꜗ baˊ jnäꜘ jmeenꜙ hʉʉˊdsëˉ kihꜗ läꜙjëꜙ heˉ gaꜙjmeehˊ.
6Choonꜙ goonꜙ taꜙ kyahꜗ.
Peerꜙ kuhˉngɨɨꜙ tuhˉdsënꜙ heˉ hnaahnꜚ hneˉ,
läꜙko̱o̱ˉ jmeeꜙ hwaꜗ ki̱i̱ꜙ heˉ jø̱ø̱˜ jäꜙ jmaꜗ.
7Je̱e̱hˋ kinꜙ naꜗko̱hꜘ DSAˉJØ̱Ø̱Hˈ kya̱a̱nꜙ,
jëëhꜘ ngooꜗ gaꜙhwa̱a̱ꜘ mɨˈdsënꜙ.
Taꜙ hmäähˋ kinꜙ mahꜗ saꜙ ju̱u̱nꜘ.
8Taꜙlaꜙ tiih˜ miˊjnääˈ kinꜙ heˉ lluꜗ hohꜘ kya̱a̱hˊ jnäꜘ.
Jëëhꜘ kyahꜗ hneˉ baˊ maˉchaˉ oˉjø̱hꜙ dsëˉ kinꜙ.
Heehˋ jnäꜘ heeˉ jwëˈ ka̱nˋ, jëëhꜘ kyahꜗ baˊ hneˉ llaˉkya̱a̱nꜗ.
9Hneˉ DSAˉJØ̱Ø̱Hˈ kya̱a̱nꜙ, lä̱ä̱ˋ jnäꜘ kihꜗ hi̱ˉ naˉhøøhˊ kinꜙ.
Jëëhꜘ, kyahꜗ baˊ hneˉ chaˉ jeeˊ hmäähnˊ.
10Miˊtë̱ë̱ˈ jnäꜘ mahꜗ jmeenˋ läꜙ hyohˉ hohꜘ hñaahꜗ,
jëëhꜘ hneˉ la̱a̱hꜗ Dio kya̱a̱nꜙ.
Jmɨˉlleꜘ lluꜗ kyahꜗ waˊ jä̱ä̱ˈ jnäꜘ mahꜗ nɨɨnˋ ko̱o̱ˉ dsooꜘ baˊ.
11Kwaˊ jwëˈ jëë˜ gaˊ jnäꜘ jmɨˉgyʉʉꜙ DSAˉJØ̱Ø̱Hˈ kya̱a̱nꜙ
mahꜗ jmeeꜗ dsaˉ jʉʉhˉ kyahꜗ.
Läꜙlluꜗ heˉ miˉtehˋ juuˈ kyahꜗ,
lle̱e̱ˋ jnäꜘ jeeˊ gyanˊ jëën˜ wɨɨꜘ.
12Kihꜗ heˉ läˉñihꜘ hohꜘ jnäꜘ,
jmeeˊ waˊ ä̱ä̱hˈ goˉte˜ hi̱ˉ naˉhøøhˊ kinꜙ.
He̱e̱ꜙ goˉte˜ hi̱ˉ hnøøꜗ jmeehꜙ jnäꜘ,
jëëhꜘ jnäꜘ jmeenꜙ taˊheꜗ kyahꜗ.
Currently Selected:
Salmos 143: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
