Salmos 140
140
1Hneˉ DSAˉJØ̱Ø̱Hˈ kya̱a̱nꜙ, lä̱ä̱ˋ jnäꜘ kihꜗ hi̱ˉ hñaaˉ dsëꜗ.
Hä̱ä̱ˋ jnäꜘ kihꜗ hi̱ˉ hä̱ä̱ˈ,
2hi̱ˉ tä̱ä̱hˊ jmeeꜙ hʉʉˊdsëˉ hnooyhˉ haˉ läꜙ jmeeyꜗ heˉ hlɨɨhˈ,
läꜙjëꜙ jmɨɨˊ baˊ hnooyhˉ hniiˉ.
3Hnooyhˉ chaˉgaˊmiihˉ juuˈ heˉ tøhꜙ wɨɨꜘ kihꜗ dsaꜙ,
heˉ laꜗ läꜙko̱o̱ˉ venen kihꜗ mɨɨhˉ.
4DSAˉJØ̱Ø̱Hˈ kya̱a̱nꜙ, hä̱ä̱ˋ jnäꜘ kihꜗ hi̱ˉ hñaaˉ dsëꜗ heꜘ.
Lä̱ä̱ˋ jnäꜘ kihꜗ hi̱ˉ hä̱ä̱ˈ, hi̱ˉ hnøøꜗ tä̱hnꜙ.
5Hi̱ˉ jmää˜ hñiiꜘ ka̱a̱hˊ heꜘ, gaꜙhɨɨyꜘ jeeˊ naˉhmääˊ ko̱o̱ˉ cheꜘ.
Läꜙja̱ˉ gaꜙhɨɨyꜘ läꜘ chaˊjwëꜗ mahꜗ tä̱hnꜙ nehꜙ.
6Gaꜙjwɨɨnꜗ DSAˉJØ̱Ø̱Hˈ kya̱a̱nꜙ: “Hneˉ la̱a̱hꜗ Dio kya̱a̱nꜙ.”
Nʉʉˉ läꜙjëꜙ heˉ chu̱u̱nꜘ kya̱a̱hˊ hneˉ.
7Hneˉ DSAˉJØ̱Ø̱Hˈ kya̱a̱nꜙ, hneˉ hi̱ˉ be̱e̱ꜘ hi̱ˉ lä̱ä̱˜ jnäꜘ,
hneˉ saꜙ gaꜙkwahˊ jwëꜘ maˊ jle̱e̱yhˈ llenꜙ
jeeˊ maˊ hä̱ä̱nˊ jeeˊ hniiˉ,
8hneˉ DSAˉJØ̱Ø̱Hˈ kya̱a̱nꜙ,
taꜙ waˊ leꜘ läꜙ hyohˉ dsëꜗ hi̱ˉ hñaaˉ dsëꜗ heꜘ.
Taꜙ kwaˉ jwëˈ hñaaꜙ hʉʉˊdsëˉ hlɨɨhˈ heˉ jmeeyꜙ,
mahꜗ saꜙ jmääyꜗ hñiiyꜘ ka̱a̱hˊ.
9Kihꜗ läꜙjë̱ë̱ꜙ hi̱ˉ tä̱ä̱hˊ läꜙkuˊ läꜙji̱i̱ꜗ kinꜙ,
jmeeˊ waˊ dsaˉji̱i̱h˜ kihꜗ hñiiyꜘ läꜙjëꜙ heˉ hlɨɨhˈ
heˉ maˊ jäyhꜘ maˊ jmeeyˈ kinꜙ.
10Waˊ hlaˈ nëˊ kiyhˈ hmaˉjeˉ, waˊ llaˉnääyꜘ chaˊjeˉ.
Läꜙja̱ˉ waˊ llaˉnääyꜘ nehꜙ tooˉ ñiihˊ
jeeˊ saꜙ jnäꜘ saꜙ nʉʉhꜘ, jeeˊ moꜙsoꜙ hwë̱ë̱yˉ.
11Taꜙ kwaˉ jwëˈ miˉheeꜙ chaˉmiihˉ jmɨɨˊ
dsaˉ hi̱ˉ hlëëhꜙ juuˈ hlɨɨhˈ.
Waˊ jäꜘ lliꜘwɨɨꜘ nëˊ kihˈ hi̱ˉ hä̱ä̱ˈ.
12Jnäꜘ manꜙ,
DSAˉJØ̱Ø̱Hˈ jnänˋ baˊ nooꜙ nëˊ kihˈ hi̱ˉ jëë˜ wɨɨꜘ.
Miˉeeyꜙ juuˈ kihꜗ hi̱ˉ llaˉkya̱a̱ꜗ.
13Maꜙraꜙ juˈdsooꜘ, hi̱ˉ llu̱u̱ꜗ kwayꜙ tiˊhmaahˊ kyahˈ.
Läꜙjë̱ë̱ꜙ hi̱ˉ gaꜙnääˊ ko̱o̱ˉ nëëˈ baˊ dsaˉta̱a̱yhˋ jeeˊ ñehꜘ.
Currently Selected:
Salmos 140: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
