Salmos 139
139
1Hneˉ DSAˉJØ̱Ø̱Hˈ kya̱a̱nꜙ,
hneˉ baˊ kye̱hˊ kwa̱a̱t˜ kinꜙ hiꜙ kyu̱u̱hꜙ jnäꜘ.
2Hneˉ baˊ ñehˊ waˊraˉ gaꜙgyanꜗ waˊraˉ gaꜙnoonꜗ.
Hneˉ baˊ kyu̱u̱h˜ haˉ läꜙ laꜗ hʉʉˊdsëˉ kinꜙ.
3Hneˉ baˊ kye̱hˊ kwa̱a̱t˜ heeˉ naˉ jmeenꜙ jeeˊ ngënꜙ
o jeeˊ gyanˊ tiiˊ.
Hneˉ baˊ kyu̱u̱h˜ läꜙjëꜙ goˉte˜ heˉ jmeenꜙ.
4DSAˉJØ̱Ø̱Hˈ kya̱a̱nꜙ, niꜙ saꜙ gaˊ maˉhlëëhnˋ,
maˉñehˊ baˊ hneˉ läꜙjëꜙ heeˉ naˉ jwahnꜚ.
5Hneˉ chehꜗ läꜙkuˊ läꜙji̱i̱ꜗ kinꜙ,
goohˉ heˉ naˉjø̱ø̱ꜚ hiiꜘ nëˊ kinꜙ.
6Haˉ ko̱hꜘ saꜙ dsa̱a̱˜ dsënꜙ heˉ kyʉʉyh˜ chaˉmiihˉ.
Peerꜙ jʉhˉga̱a̱ˉ laꜗ hʉʉˊdsëˉ kiyhˈ,
heˉja̱ˉ saꜙ të̱ˊdsë̱ë̱nꜗ läꜙngëënꜘ.
7¿Haˉ taꜙ kyʉ̱ʉ̱n˜ kihꜗ Jmɨˉlleꜘ Naˉjngɨɨˈ kyahꜗ?
¿Haˉ baˊ taꜙ hmäähnˊ ʉ̱ʉ̱ꜘ gaˊ kyahˈ hneˉ?
8Cherˊmahꜗ gaꜙwɨɨnꜗ gyʉʉhˈ jmɨˉgyʉʉꜙ, jeeˊ ja̱ˉ ñehꜘ hneˉ.
Cherˊmahꜗ gaꜙjña̱a̱nꜗ ñiihˊ gaˊ kihˈ hwaꜗ laˉ,
jeeˊ ja̱ˉ chehꜗ hneˉ.
9Waˊraˉ jähꜘ kihꜗ leꜘ nɨɨnˋ läꜙko̱o̱ˉ ngooꜗ hyooˉ
hiꜙ lloon˜ taꜙ hngaahˋ ko̱ˉta̱a̱ˉ kihꜗ jmɨˉñeehꜚ,
10ja̱ˉbaˊ läꜙ gaꜙtëꜘ ja̱ˉ jä̱ä̱hꜙ jnäꜘ.
Läꜙja̱ˉ hä̱ä̱hꜙ jnäꜘ kya̱a̱hˊ beꜘ kyahꜗ.
11Cherˊmahꜗ jwahnꜚ: “Waˊraˉ jähꜘ kihꜗ dsaˉhmäänˋ jeeˊ naˉho̱o̱ˉ
hiꜙ jeeˊ jnäꜘ waˊjeˉ liiꜘ läꜙko̱o̱ˉ hwëˈ läꜙkuˊ läꜙji̱i̱ꜗ kinꜙ”,
12pero kyahꜗ hneˉ saꜙ chaˉ niꜙ miihˉ jeeˊ naˉho̱o̱ˉ.
Taꜙlaꜙ hwëˈ laꜗ kyahꜗ läꜙko̱o̱ˉ jmɨɨˈ.
Jëëhꜘ, kweeˉ baˊ laˈ kyahꜗ jeeˊ jnäꜘ waˊjeˉ hiꜙ jeeˊ naˉho̱o̱ˉ.
13Gaꜙtøøhˈ jmɨˉlleꜘ nehꜙ tuhˉdsënꜙ.
Gaꜙmiꜙhñaahˈ jnäꜘ nehꜙ tuhꜗ maaˋ kya̱a̱nꜙ.
14Kwanˋ tiˊhmaahˊ kyahˈ,
haˉ ko̱hꜘ saꜙ laꜗ heˉ jʉhˉga̱a̱ˉ heˉ jmeehˉ.
Haˉ ko̱hꜘ saꜙ dsa̱a̱˜ dsënꜙ kihꜗ taˊ kyahˈ.
Kihꜗ heˉ naˉ baˊ manꜙ kweeˉ.
15Niꜙ miihˉ saꜙ maˊ naˉhmääˊ kyahˈ
haˉ läꜙ maˊ dsaˉhñaaꜙ jmɨˉngoꜗ kinꜙ.
Jeeˊ naˉhmääˊ baˊ
maˊ dsaˉhñaanꜙ nehꜙ tuhꜗ maaˋ kya̱a̱nꜙ.
16Maˉjëëhꜘ baˊ hneˉ haˉ läꜙ maˊ dsaˉhñaanꜙ.
Läꜙji̱i̱hˈ ja̱ˉ, maˉjmeehˊ kwa̱a̱t˜ haˉ ko̱o̱ˉ ji̱i̱hˈ jëën˜ jmɨˉgyʉʉꜙ.
17Haˉ ko̱hꜘ jnaahˈ saꜙ laꜗ kinꜙ kya̱a̱hˊ hʉʉˊdsëˉ kyahꜗ.
Haˉ ko̱hꜘ hʉʉˊdsëˉ saꜙ chaˉ kyahꜗ.
18Waˊraˉ jähꜘ kihꜗ hënꜚ haˉ ko̱hꜘ teꜗ hʉʉˊdsëˉ kyahꜗ,
saꜙ läˉtä̱ä̱nꜙ hënꜚ, laꜗ chaˉgaˊmiihˉ läꜙko̱o̱ˉ mɨˈsɨɨˊ.
Hiꜙ waˊraˉ gaꜙñenꜗ, läꜙ maˉchehꜗ baˊ hneˉ kya̱a̱hˊ jnäꜘ.
19Hneˉ Dio kya̱a̱nꜙ, jngëëhˉ läꜙjë̱ë̱ꜙ hi̱ˉ hñaaˉ dsëꜗ.
Jmeeˊ waˊ läꜙø̱ø̱ꜘ kinꜙ läꜙjë̱ë̱ꜙ hi̱ˉ jngëëhꜙ dsaˉ.
20Jëëhꜘ, hi̱ˉ heꜘ hlëëyhꜙ wɨɨꜘ kyahˈ.
Pero heeˉ jmääꜗ heˉ hneeyˉ kya̱a̱hˊ hneˉ.
21¿Cheˊ saꜙ lleˋ kihˈ jmeenˋ naˉhä̱ä̱hnˊ hi̱ˉ naˉhøøhˊ kyahˈ
mahꜗ jmeenˋ taꜙ kooꜘ hi̱ˉ hneeˉ kya̱a̱hˊ hneˉ?
22Läꜙka̱a̱ˉ tuhˉdsënꜙ naˉhä̱ä̱hˊ jnihꜘ.
Niꜙ miihˉ saꜙ jwa̱hnꜙ kya̱a̱yhˊ.
23Hneˉ Dio kya̱a̱nꜙ,
kye̱ˉ kwa̱a̱t˜ kinꜙ mahꜗ jëëˋ haˉ läꜙ laꜗ tuhˉdsënꜙ.
Jëëˋ daˊ mahꜗ läˉñehˊ haˉ läꜙ laꜗ hʉʉˊdsëˉ kinꜙ.
24Jëëˋ daˊ cheˊ hä̱ä̱nˊ jwëꜘ hlɨɨhˈ.
Jä̱ä̱ˊ jnäꜘ taꜙ jwëꜘ heˉ saꜙ he̱e̱ꜘ ji̱hˊko̱hꜘ.
Currently Selected:
Salmos 139: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
