Salmos 132
132
1Hneˉ DSAˉJØ̱Ø̱Hˈ kya̱a̱nꜙ, miˉdsoohꜚ hohꜘ kihꜗ David,
kihꜗ läꜙjëꜙ heˉ wɨɨꜘ heˉ gaꜙjëëyꜗ.
2Gaꜙtä̱ä̱yˉ hñiiyꜘ kihꜗ DSAˉJØ̱Ø̱Hˈ jnänˋ.
Gaꜙbä̱ä̱yhˉ hñiiyꜘ kihꜗ Dio kya̱a̱ꜗ Jacob
hi̱ˉ chaˉ gaꜙläꜙjëꜙ beꜘ kihꜗ, gaꜙjäyhꜘ läꜙlaˉ:
3“Saꜙ dsaˉhenꜘ goˉte˜ chaˊnehꜙ kinꜙ,
niꜙ saꜙ naˊgwɨ̱ɨ̱nꜙ nëˊ ji̱i̱ˊ kinꜙ,
4niꜙ ko̱ˉhi̱ˊpihˈ saꜙ gwɨ̱ɨ̱nꜚ,
niꜙ saꜙ kwanˋ jwëˈ jlëꜗ kyahˈ mɨˊnënꜙ,
5läꜙji̱i̱hˈ jnøøhnꜙ haˉ jeeˊ jmeenˋ ko̱o̱ˉ hneꜗ kihꜗ DSAˉJØ̱Ø̱Hˈ jnänˋ,
heꜘ baˊ Dio kya̱a̱ꜗ Jacob, hi̱ˉ chaˉ gaꜙläꜙjëꜙ beꜘ kihꜗ”, gaꜙjähꜘ David.
6Gaꜙnʉʉˊ jneˊ kihˈ waˊgooꜘ kihꜗ hmoohˊ
heˉ maˊ chihˈ jeeˊ che̱e̱ˉ Efrata.
Hiꜙ gaꜙjnäähꜗ jneˊ jeeˊ maˊ chihˈ jeeˊ che̱e̱ˉ Jaar.
7Maꜙnøøˈ jneˊ taꜙ jeeˊ chihˈ gwahꜙ kihꜗ DSAˉJØ̱Ø̱Hˈ jnänˋ,
maꜙju̱hˊ jneˊ jnënˊ hʉʉˊ tɨɨyˊ.
8DSAˉJØ̱Ø̱Hˈ kya̱a̱nꜙ, nooˉ mahꜗ goˉheꜘ nehꜙ gwahꜙ kyahꜗ
ko̱ˉjø̱hꜘ kya̱a̱hˊ waˊgooꜘ kihꜗ hmoohˊ heˉ miˉjnääꜙ beꜘ kyahꜗ.
9Waˊ kye̱hꜘ jmiˉdsaˉ kya̱a̱hꜗ hmɨɨhˉ tøˉjlë̱ë̱ˉ ñihꜗ,
hiꜙ waˊ cha̱a̱ˉ lluꜗ läꜙjë̱ë̱ꜙ hi̱ˉ naˉjngëëˈ kya̱a̱hꜗ.
10Läꜙlluꜗ heˉ gaꜙläꜙhnaahꜙ David hi̱ˉ gaꜙjmeeꜘ taˊheꜗ kyahꜗ,
taꜙ jmääꜙ taꜙ kooꜘ dsaˉtaˊ jø̱ø̱hˈ hi̱ˉ gaꜙhu̱u̱hˋ aceit.
11Gaꜙtä̱ä̱ˉ DSAˉJØ̱Ø̱Hˈ jnänˋ hñiiꜘ kya̱a̱hˊ David.
Ji̱hˊko̱hꜘ saꜙ miˉsɨɨyꜗ juuˈ kiyhꜗ, läꜙko̱o̱ˉ maˊ gaꜙjäyhꜘ:
“Ja̱a̱ˉ jeeˊ läꜙjë̱ë̱ꜙ kihꜗ saˊju̱ˉ kyahꜗ
lla̱a̱nꜚ hø̱ø̱hˈ mahꜗ jmeeyꜗ hihꜙ.
12Cherˊmahꜗ jo̱o̱ꜘsɨɨhˊ gaꜙhøøyꜘ madaꜚ kinꜙ,
hiꜙ cherˊmahꜗ gaꜙmiꜙteyꜗ heˉ miˉtë̱ë̱ꜙ jnihꜘ,
läꜙ maˉngooꜗ ja̱ˉbaˊ ka̱yˈ nëˊ kyahˈ läꜙjëꜙ johꜘ jmɨɨˊ chaˉ.”
13Jëëhꜘ DSAˉJØ̱Ø̱Hˈ jnänˋ maˉllaꜙ dsëyꜗ
jmeeyꜗ hneꜗ kiyhꜗ jwɨɨˉ Sión.
14Gaꜙjäyhꜘ:
“Jeeˊ laˉ baˊ maˉlaꜗ chaˊnehꜙ kinꜙ jeeˊ gyanˊ tä̱ä̱ꜘ.
Jeeˊ laˉ baˊ te̱e̱hˉ dsënꜙ, jëëhꜘ läꜙja̱ˉ baˊ maˉtɨhꜗ dsënꜙ.
15Miˉjä̱ä̱nꜚ chaˉmiihˉ dsaˉ hi̱ˉ tä̱ä̱hˊ jeeˊ jwɨɨˉ laˉ.
Läꜙja̱ˉ läꜙchaˉ baˊ läꜙjëꜙ heˉ llaˉkya̱a̱ꜗ hi̱ˉ täˉñeeꜘ.
16Gaꜙkye̱hnˋ jmiˉdsaˉ hmɨɨhˉ
heˉ maˊ miˉjnääꜙ haˉ läꜙ lä̱ä̱nˊ dsaˉ kya̱a̱nꜙ.
Dsaˉ hi̱ˉ naˉjngëëˈ hi̱ˉ cha̱a̱ˉ jeeˊ jwɨɨˉ Sión
häyꜗ ki̱ˉga̱a̱ˉ kihꜗ heˉ cha̱a̱yˉ lluꜗ.
17Jeeˊ jwɨɨˉ Sión laˉ, jeeˊ kihˈ jo̱o̱ꜘsɨɨhˊ David
jmeenˋ hña̱a̱ꜘ ja̱a̱ˉ hi̱ˉ chaˉ beꜘ kihꜗ.
Hi̱ˉ heꜘ le̱e̱ꜘ läꜙko̱o̱ˉ waˊjeˉ heˉ chooꜗ kihꜗ dsaˉ kya̱a̱nꜙ.
18Jmeenˋ jä̱ꜗ oˉhihꜙ hi̱ˉ naˉhøøhˊ kiyhˈ,
taˊko̱ˉji̱i̱hˈ hñiiyꜘ gyayꜙ jnä̱ä̱yꜘ tøˉjlë̱ë̱ˉ ñihꜗ.”
Currently Selected:
Salmos 132: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
