Salmos 115
115
1DSAˉJØ̱Ø̱Hˈ kya̱a̱nꜙ, taꜙ jmääꜙ jnäähˈ ka̱a̱hˊ.
Saꜙ chaˉ heˉ la̱a̱ꜗ jnäähˈ niꜙ miihˉ.
Jmääˋ hñaahˈ jø̱ø̱hˈ baˊ,
läꜙlluꜗ heˉ läˉñihꜘ hohꜘ hiꜙ heˉ miˉtehˋ juuˈ kyahꜗ.
2Taꜙ kwaˉ jwëˈ miˉkwa̱hꜗ dsaˉ hneˉ mahꜗ sɨɨyhꜙ jnäähˈ:
“Naꜚ baˊ Dio kya̱a̱hꜗ.”
3Dio jnänˋ gyaˈ gyʉʉhˈ jmɨˉgyʉʉꜙ.
Jmeeyꜙ läꜙjëꜙ heˉ hyohˉ dsëyꜗ hñiiꜘ bihꜗ.
4Pero dio kya̱a̱ꜗ dsaˉ heꜘ naˉla̱a̱ꜚ kya̱a̱hˊ kuˊnøøꜚ kuˊtøøˉ.
Hi̱ˉ naˉla̱a̱ꜚ ka̱a̱yh˜ hñiiyꜘ baˊ dio kya̱a̱yꜗ.
5Chaˉ toˉhooyˊ, pero saꜙ hlëëyhꜙ.
Chaˉ mɨˈnëyˊ, pero saꜙ jëëy˜.
6Chaˉ toˉgwayˊ, pero saꜙ nuuyˉ.
Chaˉ taˉhiyhˊ, pero saꜙ ta̱yhꜗ jmehꜗ.
7Chaˉ maˉgooyˉ, pero saꜙ koh˜jmeeyꜙ läꜙjëꜙ heˉ chaˉ.
Chaˉ maˉtɨɨyˊ, mahꜗ saꜙ ngëyꜙ.
Chaˉ tʉˊ tʉˊluuyˋ, mahꜗ saꜙ nʉʉhꜘ hi̱i̱ˊ.
8Ja̱ˉbaˊ läꜙko̱o̱ˉ la̱a̱ꜗ dio heꜘ, la̱a̱ꜗ hi̱ˉ gaꜙjmääyꜗ.
Hiꜙ läꜙja̱ˉ la̱a̱ꜗ hi̱ˉ kye̱ˉ oˉjø̱hꜙ dsëˉ kihꜗ dio heꜘ.
9Hnähꜘ dsaˉ Israel,
waˊ chaˉ oˉjø̱hꜙ dsëˉ kyahꜗ hnähꜘ kya̱a̱hˊ DSAˉJØ̱Ø̱Hˈ jnänˋ.
Jëëhꜘ, hi̱ˉ heꜘ baˊ hi̱ˉ kwaꜙ beꜘ
hiꜙ la̱a̱yꜗ läꜙko̱o̱ˉ ñeˈ heˉ hɨɨˉ dsaˉ jeeˊ lä̱ä̱˜ hñiiꜘ.
10Hnähꜘ saˊju̱ˉ kihꜗ Aarón,
waˊ chaˉ oˉjø̱hꜙ dsëˉ kyahꜗ hnähꜘ kya̱a̱hˊ DSAˉJØ̱Ø̱Hˈ jnänˋ.
Jëëhꜘ, hi̱ˉ heꜘ baˊ hi̱ˉ kwaꜙ beꜘ
hiꜙ la̱a̱yꜗ läꜙko̱o̱ˉ ñeˈ heˉ hɨɨˉ dsaˉ jeeˊ lä̱ä̱˜ hñiiꜘ.
11Läꜙjë̱ë̱ꜙ hnähꜘ hi̱ˉ ga̱hꜙ DSAˉJØ̱Ø̱Hˈ jnänˋ,
waˊ chaˉ oˉjø̱hꜙ dsëˉ kyahꜗ hnähꜘ kya̱a̱yhˊ.
Jëëhꜘ, hi̱ˉ heꜘ baˊ hi̱ˉ kwaꜙ beꜘ
hiꜙ la̱a̱yꜗ läꜙko̱o̱ˉ ñeˈ heˉ hɨɨˉ dsaˉ jeeˊ lä̱ä̱˜ hñiiꜘ.
12DSAˉJØ̱Ø̱Hˈ jnänˋ saꜙ dsaˉgaaꜘ dsëyꜗ jneˊ,
maꜙraꜙ heˉ miˉjä̱ä̱ꜗ bihꜗ jneˊ.
Maꜙraꜙ heˉ miˉjä̱ä̱yꜗ jneˊ hi̱ˉ la̱a̱ꜗ dsaˉ Israel,
hiꜙ miˉjä̱ä̱yꜗ jmiˉdsaˉ jnänˋ hi̱ˉ la̱a̱ꜗ saˊju̱ˉ kihꜗ Aarón.
13Maꜙraꜙ heˉ miˉjä̱ä̱ꜗ bihꜗ läꜙjø̱hꜗ läꜙmähꜗ, läꜙjë̱ë̱ꜙ hi̱ˉ ga̱yhꜙ.
14Waˊ miˉjä̱ä̱ꜗ DSAˉJØ̱Ø̱Hˈ jnänˋ jneˊ chaˉgaˊmiihˉ.
Läꜙja̱ˉ waˊ miˉjä̱ä̱yꜗ chihˉ jnänˋ kaˉlähꜘ.
15DSAˉJØ̱Ø̱Hˈ jnänˋ hi̱ˉ gaꜙjmeeꜘ gyʉʉhˈ hwaꜗ,
waˊ miˉjä̱ä̱yꜗ jneˊ.
16Gyʉʉhˈ jmɨˉgyʉʉꜙ laꜗ hø̱ø̱ˈ DSAˉJØ̱Ø̱Hˈ jnänˋ.
Pero hwaꜗ laˉ gaꜙjmeeyꜘ hø̱ø̱ˈ dsaˉ jmɨˉgyʉʉꜙ.
17Hi̱ˉ maˉnaˉju̱u̱ˊ, moꜙsoꜙ häyꜗ kihꜗ DSAˉJØ̱Ø̱Hˈ jnänˋ.
Moꜙsoꜙ chaˉ moꜙ leꜘ jmeeyꜙ,
maˉlaꜙ maˊ tä̱ä̱yhˊ jeeˊ naˉkëˊ tiˊsɨ̱hꜘ.
18Pero jneˊ jmeenˊ jʉʉhˉ kiyhꜗ jmɨɨˊ naˈ,
läꜙja̱ˉ läꜙjëꜙ johꜘ jmɨɨˊ chaˉ. ¡Aleluya!
Currently Selected:
Salmos 115: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
