Salmos 106
106
1¡Aleluya! Jmeeˊ hnähꜘ jʉʉhˉ kihꜗ DSAˉJØ̱Ø̱Hˈ jnänˋ,
peerꜙ lluꜗ dsëyꜗ.
Jëëhꜘ, ji̱hˊko̱hꜘ saꜙ lla̱a̱ꜗ heˉ hnääyꜗ jneˊ.
2¿Haˉ taꜙ jäꜙ hi̱ˉ lihꜙ jmeehꜙ juuˈ
läꜙko̱o̱ˉ teꜗ heˉ jʉhˉga̱a̱ˉ heˉ jmeeꜙ DSAˉJØ̱Ø̱Hˈ jnänˋ?
¿Hi̱i̱ˉ të̱ˊdsë̱ë̱ꜗ häꜗ kiyhꜗ läꜙko̱o̱ˉ lleˋ kihˈ?
3Lluꜗ laꜗ kihꜗ hi̱ˉ miˉteꜗ madaꜚ kiyhˈ.
Lluꜗ laꜗ kihꜗ hi̱ˉ jmeeꜙ heˉ lluꜗ jmahꜗ läꜙjëꜙ jmɨɨˊ.
4DSAˉJØ̱Ø̱Hˈ kya̱a̱nꜙ, ja̱ˉ miˉdsoohꜚ hohꜘ jnäꜘ
waˊraˉ gaꜙtëꜘ jeeˊ miˉjä̱ä̱hꜚ dsaˉ kya̱a̱hꜗ.
Ja̱ˉ ñehꜙ mahꜗ lä̱ä̱hˊ jnäꜘ.
5Läꜙja̱ˉ të̱ë̱nꜗ ka̱nˋ yaˊjøøꜚ kihꜗ hi̱ˉ naˉlle̱e̱hˊ kya̱a̱hˈ,
mahꜗ läꜙcha̱a̱nˉ lluꜗ ko̱ˉjø̱hꜘ kya̱a̱yhˊ,
hiꜙ ko̱ˉjø̱hꜘ baˊ jë̱ë̱ꜘ dsëˉ jnäähˈ.
6Maˉjmeeˊ jnäähꜗ chaˉmiihˉ dsoˊkyeˉ
ja̱ˉbaˊ läꜙko̱o̱ˉ gaꜙjmeeꜘ dsaˉ maˉgyu̱hˉ kya̱a̱ꜗ jnäähꜗ.
Maˉhlä̱ä̱hˉ jnäähˈ chaˉmiihˉ, maˉjmeeˊ jnäähꜗ heˉ hlɨɨhˈ jmahꜗ.
7Maꜙkeꜙ gaꜙjëëꜗ dsaˉ maˉgyu̱hˉ kya̱a̱ꜗ jnäähꜗ heˉ jʉhˉga̱a̱ˉ heˉ gaꜙjmeehˊ hwaˈ Egipto, pero saꜙ gaꜙta̱hꜘ dsëyꜗ.
Cha̱hꜘ baˊ gaꜙgaaꜘ dsëyꜗ heˉ gaꜙläꜙñihꜘ hohꜘ kiyhꜗ chaˉmiihˉ.
Gaꜙjmeeyꜘ cha̱a̱yhˉ maˊ gaꜙllaꜙnääyꜗ chaˊhooˊ jmɨˉñeehꜚ gyʉ̱ʉ̱ˉ.
8Pero gaꜙlä̱ä̱hˋ hnihꜘ mahꜗ saꜙ miˉkwa̱hꜗ dsaˉ hneˉ.
Gaꜙmiꜙjnäähˈ kihꜗ dsaꜙ, haˉ ko̱hꜘ beꜘ saꜙ chaˉ kyahꜗ.
9Gaꜙjmeehˊ hihꜙ kihꜗ jmɨˉñeehꜚ gyʉ̱ʉ̱ˉ heˉ gaꜙhnaꜘ,
mahꜗ gaꜙhëhˊ jwëˈ läꜙ gaꜙtëꜘ nëˊ mɨˈsɨɨˊ kihꜗ jmɨɨˉ ja̱ˉ.
Gaꜙjä̱ä̱hꜙ hnihꜘ jwëꜘ ja̱ˉ läꜙko̱o̱ˉ heˉ gaꜙnääyꜗ hwaꜗ ki̱i̱ꜙ baˊ.
10Läꜙjwëꜘ ja̱ˉ gaꜙlä̱ä̱hˋ hnihꜘ
kihꜗ hi̱ˉ naˉhøøhˊ kiyhˈ.
11Hi̱hꜗ hi̱ˉ naˉhøøhˊ heꜘ gaꜙjlë̱ë̱yꜗ jmɨɨˉ,
gaꜙhä̱ä̱ꜗ läꜙjë̱ë̱ꜙ, niꜙ ja̱a̱ˉ saꜙ gaꜙla̱a̱ꜘ.
12Ja̱ˉgaˊ naꜙ gaꜙta̱hꜘ dsëꜗ dsaˉ hi̱ˉ gaꜙla̱a̱ꜘ heꜘ kihꜗ läꜙjëꜙ heˉ gaꜙjmeeꜘ Dio kiyhꜗ.
Heˉja̱ˉ gaꜙta̱a̱yhˋ gaꜙkwayꜘ tiˊhmaahˊ kihˈ Dio.
13Pero läꜙcha̱hꜘ ja̱ˉ gaꜙgaaꜘ dsëyꜗ haˉ läꜙ laꜗ heˉ jʉhˉga̱a̱ˉ heˉ gaꜙjmeeꜘ Dio.
Läꜙko̱o̱ˉ maˊ jaˈ heˉ wɨɨꜘ nëˊ kiyhˈ,
saꜙ gaꜙjø̱ø̱yꜗ haˉ läꜙ maˊ jmeeˈ Dio kya̱a̱yhˊ.
14Läꜙko̱o̱ˉ maˊ tä̱ä̱yhˊ hwaˈ ki̱i̱ꜙ ja̱ˉ,
gaꜙta̱a̱yhˋ läꜙko̱o̱ˉ ngɨɨꜙ jmɨˉngoꜗ kiyhꜗ baˊ.
Maˊ ka̱y˜ dsëꜗ Dio chaˉmiihˉ jeeˊ ja̱ˉ.
15Gaꜙkwaꜘ baˊ Dio läꜙjëꜙ heˉ gaꜙngɨɨyꜘ.
Pero läꜙja̱ˉ gaꜙche̱e̱yꜗ ko̱o̱ˉ dsooˊ heˉ gaꜙjngɨɨhꜗ kiyhꜗ.
16Maˉngëëꜘ heˉ ja̱ˉ, ko̱ˉlla̱a̱ˊ gaꜙläꜙwɨɨꜘ dsëꜗ kya̱a̱hˊ Moisé ja̱ˉbaˊ hwaˈ ki̱i̱ˉ ja̱ˉ.
Läꜙja̱ˉ gaꜙläꜙwɨɨꜘ dsëyꜗ kya̱a̱hˊ Aarón hi̱ˉ naˉjngëëˈ kya̱a̱ꜗ DSAˉJØ̱Ø̱Hˈ jnänˋ.
17Kihꜗ heˉja̱ˉ gaꜙnaꜘ hwaꜗ
mahꜗ gaꜙta̱hꜘ Datán nehꜙ tooꜙ.
Hiꜙ maˊ gaꜙjlëꜗ hoˊtooˉ ja̱ˉ
gaꜙjlë̱ë̱ꜗ Abiram kya̱a̱hˊ läꜙjë̱ë̱ꜙ dsaˉkya̱a̱yhˊ.
18Gaꜙka̱a̱ꜘ goˉte˜ hi̱ˉ maˊ jmeeꜙ ko̱ˉjø̱hꜘ kya̱a̱yhˊ.
Gaꜙjë̱ë̱yꜗ läꜙjë̱ë̱ꜙ hi̱ˉ hñaaˉ dsëꜗ heꜘ.
19Maˉngëëꜘ heˉ ja̱ˉ, gaꜙjmääyꜗ ja̱a̱ˉ gyʉ̱ʉ̱ˉ kyaˊ
läꜙko̱o̱ˉ maˊ tä̱ä̱yhˊ jeeˊ chihˈ mohꜘ Horeb.
Gaꜙju̱yhꜗ jnëyˊ chaˊnëˊ ja̱a̱ˉ dio hi̱ˉ naˉla̱a̱ꜚ kya̱a̱hˊ kuˊnøøꜚ.
20Llaꜚ heˉ maˊ jmeeyꜙ jʉʉhˉ kihꜗ Dio hi̱ˉ la̱a̱ꜗ jø̱ø̱hˈ goˉte˜,
gaꜙjmeeyꜘ jʉʉhˉ kihꜗ he̱e̱hꜚ kihꜗ ja̱a̱ˉ gyʉ̱ʉ̱ˉ kyaˊ hi̱ˉ kuhˉ nuuˉ.
21Gaꜙgaaꜘ dsëyꜗ kihꜗ Dio hi̱ˉ gaꜙlä̱ä̱yꜗ,
hi̱ˉ gaꜙjmeeꜘ heˉ jʉhˉga̱a̱ˉ hwaꜗ Egipto.
22Johꜘ heˉ jʉhˉga̱a̱ˉ saꜙ gaꜙjmeeyꜘ hwaꜗ Cam.
Haˉ ko̱hꜘ saꜙ dsa̱a̱˜ dsëˉ jneˊ heˉ gaꜙjmeeyꜘ kihꜗ jmɨˉñeehꜚ gyʉ̱ʉ̱ˉ.
23Heˉja̱ˉ maˊ hnøøˈ Dio maˊ jngëëyhˈ läꜙjë̱ë̱ꜙ dsaˉ heꜘ.
Pero Moisé hi̱ˉ naˉlle̱e̱hˊ kya̱a̱yˈ gaꜙnooˉ nëˊ kiyhˈ,
mahꜗ saꜙ maˊ jngɨɨhˈ Dio kiyhꜗ kya̱a̱hˊ heˉ yaˉjë̱ë̱ˈ dsëyꜗ.
24Maˉngëëꜘ heˉ ja̱ˉ, saꜙ gaꜙläꜙhnøøyꜗ maˊ dsaˉta̱a̱yhˋ
ko̱o̱ˉ jeeˊ lluˈ goˉte˜.
Saꜙ gaꜙjmeeyꜘ dsooꜘ heˉ gaꜙbä̱ä̱hˉ Dio hñiiꜘ
heˉ maˊ kwayˈ beꜘ mahꜗ maˊ dsaˉta̱a̱yhˋ jeeˊ ja̱ˉ.
25Gaꜙhlëëyhꜘ wɨɨꜘ kihꜗ Dio jeeˊ maˊ tä̱ä̱yhˊ ja̱ˉ.
Saꜙ gaꜙhiiyꜗ maˊ jmeeyˈ heꜗ juuˈ kihꜗ DSAˉJØ̱Ø̱Hˈ jnänˋ.
26Heˉja̱ˉ gaꜙtä̱ä̱ˉ Dio hñiiꜘ heˉ jngëëyhꜗ goˉte˜
jeeˊ laˈ hwaꜗ ki̱i̱ꜙ ja̱ˉ.
27Hiꜙ gaꜙjäyhꜘ kaˉlähꜘ:
“Jmeenˋ dsaˉnääꜗ taꜙ laꜙ taꜙ jnøꜙ jo̱o̱ꜘsɨɨyhˊ jeeˊ saꜙ ta̱a̱hˉ dsihꜘ taˊ.
Jmeenˋ sa̱ˊjñeeyꜘ läꜙka̱a̱ˉ läꜙjʉhꜗ jmɨˉgyʉʉꜙ.”
28Kë̱ë̱ˉ gaˊ kihˈ läꜙjëꜙ heˉ ja̱ˉ,
gaꜙløøyꜗ jmeeyꜙ jʉʉhˉ kihꜗ dio Baalˉpeor.
Gaꜙkuyhˉ heˉ maˊ llayꜙ chaˊnëˊ hlɨɨꜘ.
29Gaꜙjmeeyꜘ heˉ yaˉjë̱ë̱ˈ dsëꜗ Dio
kya̱a̱hˊ taˊ hlɨɨhˈ heˉ maˊ jmeeyꜙ.
Läꜙcha̱hꜘ ja̱ˉ jaꜗ dsooˊ heˉ gaꜙjngɨɨhꜗ kiyhꜗ.
30Ja̱ˉ gaˊ yaꜙhë̱ë̱ꜗ Finees,
naˊjngëëyhˋ hi̱ˉ maˊ jmeeꜙ jnäꜘhäꜘ heˉ hlɨɨhˈ.
Ja̱ˉgaˊ naꜙ gaꜙhnaꜘ heˉ maˊ dsaˉju̱u̱ꜘ dsaˉ.
31Ji̱hˊko̱hꜘ ji̱hˊlɨhꜘ saꜙ gaaꜘ dsëꜗ Dio taˊ lluˈ
heˉ gaꜙjmeeꜘ Finees.
32Ja̱ˉbaˊ läꜙja̱ˉ gaꜙjmeeyꜘ
gaꜙläꜙlle̱e̱ꜘ Dio kooꜘ jeeˊ hlaˉ jmɨɨˉ Meriba.
Kwa̱a̱t˜ kihꜗ dsaˉ heꜘ gaꜙläꜙlle̱e̱ꜘ Dio kya̱a̱hˊ Moisé.
33Jëëhꜘ gaꜙjmeeyꜘ gaꜙyaꜙjë̱ë̱ˈ dsëꜗ Moisé
läꜙji̱i̱hˈ gaꜙhlëëyhꜘ juuˈ wɨɨꜘ.
34Läꜙko̱o̱ˉ maˊ gaꜙta̱a̱yhˋ hwaˈ Canaán
mahꜗ leꜘ kiyhꜗ hwaꜗ ja̱ˉ,
saꜙ gaꜙjngëëyhꜗ läꜙjë̱ë̱ꜙ dsaˉ hi̱ˉ maˊ tä̱ä̱hˊ jeeˊ ja̱ˉ
läꜙko̱o̱ˉ madaꜚ maˊ jmeeꜙ Dio kiyhꜗ.
35Pero heˉ gaꜙjmeeyꜘ,
gaꜙka̱hꜗ gaꜙgwë̱yhꜗ kya̱a̱hˊ hi̱ˉ gaꜙcha̱a̱ꜗ heꜘ.
Hiꜙ gaꜙläꜙtë̱ë̱yˉ läꜙjëꜙ taˊ hlɨɨhˈ heˉ maˊ jmeeꜙ dsaˉ heꜘ.
36Gaꜙjmeeyꜘ taˊheꜗ kihꜗ dio hi̱ˉ naˉla̱a̱ꜚ ka̱a̱yh˜.
Heˉ ja̱ˉ gaꜙlaꜗ kiyhꜗ läꜙko̱o̱ˉ saˊläꜘ.
37Gaꜙjngëëyhꜗ gyʉ̱ʉ̱ˉ mëꜘ gyʉ̱ʉ̱ˉ ñʉʉhˉ kya̱a̱yꜗ,
gaꜙkwë̱ë̱yhˉ hi̱ˉsaꜙllu̱ꜗ.
38Gaꜙtʉ̱ʉ̱yꜗ jmaˉ kihꜗ hi̱ˉ saꜙ ä̱ä̱ˉ niꜙ miihˉ,
heꜘ baˊ gyʉ̱ʉ̱ˉ mëꜘ gyʉ̱ʉ̱ˉ ñʉʉhˉ kya̱a̱yꜗ.
Gaꜙkwë̱ë̱yhˉ dio kya̱a̱ꜗ dsaˉ Canaán.
Heˉja̱ˉ gaꜙbä̱ä̱hˋ hwaˈ ja̱ˉ, jmaˉ heˉ gaꜙtu̱u̱ˉ jeeˊ ja̱ˉ.
39Gaꜙmiꜙsoyhꜗ hwaꜗ ja̱ˉ kya̱a̱hˊ läꜙjëꜙ heˉ maˊ jmeeyꜙ.
Gaꜙjmeeyꜘ taˊ hlɨɨhˈ heˉ saꜙ lleˋ kihˈ jmeeyꜙ.
40Heˉja̱ˉ gaꜙläꜙlle̱e̱ꜘ DSAˉJØ̱Ø̱Hˈ jnänˋ kya̱a̱hˊ dsaˉ kya̱a̱yꜗ,
gaꜙläꜙhä̱ä̱yhˋ hi̱ˉ naˉlle̱e̱hˊ kya̱a̱yˈ.
41Gaꜙngëëyꜗ gooˉ dsaˉ hi̱ˉ maˊ cha̱a̱ˉ ʉ̱ʉ̱ꜘ.
Hi̱ˉ naˉhøøhˊ heꜘ gaꜙjmeeꜘ hihꜙ kiyhꜗ.
42Läꜙjë̱ë̱ꜙ hi̱ˉ naˉhøøhˊ heꜘ gaꜙjmeeyꜘ läꜙ tëˉ dsëyꜗ kihꜗ,
gaꜙjmeeyhꜙ gaꜙngëëꜘ jwë̱ë̱ˈ.
43Saꜙ naˉheꜚ ji̱i̱h˜ gaꜙlä̱ä̱ꜗ DSAˉJØ̱Ø̱Hˈ jnänˋ.
Pero hñiiꜘ dsaˉ heꜘ gaꜙnääꜗ bihꜗ cha̱a̱yhˉ kya̱a̱hˊ madaꜚ kihꜗ DSAˉJØ̱Ø̱Hˈ jnänˋ.
Kihꜗ heˉ gaꜙjmeeyꜘ läꜙja̱ˉ, gaꜙjä̱yꜘ goˉte˜ taꜙ hwaꜗ.
44Pero maꜙraꜙ heˉ maˊ nuuˉ baˊ DSAˉJØ̱Ø̱Hˈ jnänˋ,
kihꜗ heˉ maˊ chu̱u̱yꜘ kya̱a̱hˊ läꜙko̱o̱ˉ maˊ jëëy˜ lliꜘwɨɨꜘ.
45Jëëhꜘ maˊ dsooh˜ baˊ dsëꜗ DSAˉJØ̱Ø̱Hˈ jnänˋ
kihꜗ hmoohˊ heˉ gaꜙjmeeyꜘ kya̱a̱hˊ dsaˉ heꜘ.
Heˉja̱ˉ maˊ ko̱o̱yꜗ dsëyꜗ kya̱a̱hˊ hi̱ˉ heꜘ kihꜗ heˉ läˉñihꜘ dsëyꜗ.
46Läꜙji̱i̱hˈ hi̱ˉ maˊ heeyh˜ wɨɨꜘ gaꜙläꜙñihꜘ dsëꜗ kiyhꜗ, gaꜙjmeeꜘ Dio.
47Lä̱ä̱ˋ jnäähꜗ DSAˉJØ̱Ø̱Hˈ kya̱a̱nꜙ,
hneˉ hi̱ˉ la̱a̱ꜗ Dio kya̱a̱ꜗ jnäähꜗ.
Hwë̱ë̱ˋ jnäähꜗ jeeˊ gaꜙnøøˊ jnäähꜗ jeeˊ kihˈ dsaꜙ.
Ja̱ˉgaˊ naꜙ häˊ jnäähꜗ kyahꜗ hneˉ hi̱ˉ la̱a̱ꜗ naˉjngëëˈ goˉte˜.
Läꜙja̱ˉ läꜙcha̱a̱ˉ jnäähˈ lluꜗ kwaˊ jnäähꜗ tiˊhmaahˊ kyahˈ.
48¡Heˉ baˊ cheˉ llu̱u̱ꜗ DSAˉJØ̱Ø̱Hˈ jnänˋ,
hi̱ˉ la̱a̱ꜗ Dio kya̱a̱ꜗ dsaˉ Israel, läꜙjëꜙ johꜘ jmɨɨˊ chaˉ!
Läꜙjë̱ë̱ꜙ jneˊ waˊ jähnˊ: “Waˊ laˈ läꜙja̱ˉ.” ¡Aleluya!
Currently Selected:
Salmos 106: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
