Éxodo 31

Loanari santoario corujeleeuru icharaauru cachaauru

1Niritohane baiha jetaote:

2“Aonaaun, Hor ichoala, Uri calaohi, Joda lauri caje nenaa Besalee janijiin raau, 3itolere que nainaain, itorelere ichana inaeraneein laraajiin, cha coitucueraneein canu suujue que suujuequiin nihane coina. 4Aca nii amihanenaa ichana inaeraneein, oro, coata plata neein nenaa, chaae bronce, naaonjoainuri coujunacateein, 5jataain ajeri caohacha caje ichaain tiririchanaa inaeraneein, enuha caje joaereein amihanenaa ichana inaeraneeine maajeein nihane coina. 6Nitohanai icharaneein nihane coroatajaneraanu quene, Daan lauri caje nenaa Ahisamac calaohi Aholiab teeun aina. Chaaen nechu, satiin nitohanai ichana inaeraneein nenacaauru rai, jelai amuritoheriin coitucuhin, caa ichei caitoonjoan ichacuruhane jaanu teein neeun. 7Inara aina canu turunajaanu loanari, inara ichao rai rauhi tonoraain ichaohichene coina, quiicha teei rucuhequichene jaa camela, chaaen nii camela fuera, satiin nii loanari corujeleeuru, 8rai corujeleeuru aina mesa, corujeleeuru aina, oro nejesina caje nenaa usi nujua, enuha sacari jujui mocohichene jaanu rori, 9inihocuru mocohichene jaanu rori, corujeleeuru aina, nelaurianaja aina ojoaichu, 10saseredote Aaroon que banijiaain cajione ichanohi, canu rai saseredoteneein, namihaneeon ichaa cuuruhane, calaohichuru cajionenu, 11nii canuque banijiaain neeninu coluuquine jaa erene, santoario que banijiaain nenaa sacari jujuai, satiin naaonjoainurite, ichacurureein caa ichei aitocoaaunne rijijieein”, nae jetao, Moisesa rai Cana Coaunera.

Nebetacanaa cojoanonaa

(Ex 35.1-3)

12Niritiin jetaote:

13“Caa ichei aitorichaaunine rijitojoeein”, isaraelitaauru rai: “Canu inara Coauneraneein, inara janijiin, inara raain nihanulune coitucuhin neeuruha cachaaurune coina, fasha jaanacaneein, chariji bana satonohe lanaala, nii quiicha teei nebetacanaa cojoanonaa tonoraain, bana nebetacaauche. 14Aihane jaun, nii inara que banijiaain nenaa nebetacanaa cojoanonaa bana, nii chatoanai amihanenaa ichaelanaala, tonoraain bana nebetacaauche. Chunocoha, nii nebetacanaa cojoanonaa tonoraelanaala nenaate, ateinanohiniha cureein. Chaaen techu, nii nebetacanaa cojoanonaa bana, amihaneein niha chunine, canu cacha neein neeichene caje itajenojoiniha cureein. 15Aihane jaun, itolereneein saota janonejeeicha amihaneeuche. Nete laen, nebetacanaa cojoanonaa, caque banijiaaineein quiicha teei niha, nii caaunsi janonena jaun, bana nebetacaaichene caohachae. Chunocoha, nii nebetacanaa cojoanonaa bana, amihaneite, ateinanohiniha cureein”, naain beeu isaraelitaauru rai. 16“Aihane jaun, fasha jaanacaneein, chariji bana satonohelanaala, nii caitoonjoan nebetacanaa cojoanonaa tonoraain, neeuruhine isaraelitaauru. 17Aihate, chariji bana satonohelanaala, canu cachaneein, isaraelita nequichene janijiin, inara raain nihanulune coaracurumiin cachaauru”, nae jetao, Moisesa rai Cana Coaunera. Saota janonihane cuhane, dede, atane, naaonjoainuri coaaunaain, caaunsi janonihane cuhane namihaneeon jianeein nebetacaalu Cana Coaunerane jaun.

18Inaen nii ichatane ucuuno Sinaai, Moisesa aina irihane naineein jetaote, ajeri caje coroatajaain nenaa tabara que teein, biji coturique niicha laenai rauhi te jetao, Moisesa rai Cana Coaunera.

Currently Selected:

Éxodo 31: URA

Highlight

Copy