Éxodo 24

Aitorohatiha Cana Coaunerane jerecuruhane coujunaca

1Niritiin jetaote:

“Chajaain Aaroon, Nadab, Abio, chaaen caaunsi chooncani Isarael bichauhenaauru, naaonjoainuri uhaain, nii nihanune jaun iniha uu carene. Nete laen naineneeiche, nii nihanune jaun, nichuuntaaichene, raujiaaincha nita nihanune jaacha coarajeein, neseeorihaa coaacuche. 2Nii carohan nichuutaain, ijiniichaain iniha unaa nainecuruhi leeochaauru cachaauru, iichate nainereein, carene nichuuntaainera”, naa Moisesa rai Cana Coaunerane jaun, 3nii rai aitoha Cana Coaunerane rijitojoeein, cachaauru rai biha cuha Moisesane jana jetaote, satiin jereein jetao: “Nii jeriha Cana Coaunera rijijieeina chujian airichaanuhincha”, naaure jetao, ita rijitiin jachaatorohaain.

4Niritiin jerecuruhane jaun jetaote, nii rai aitoha Cana Coaunerane jaa laenaain jetao, nii cojoanoo janohetiin nimichuhin, nii ichatane ucuuno macararo teein jetao, ajeri caje rori jaain, nii Isaraeli laurichuru naineein jetao, le choonca coroatajai ajeri jaberoco, nitohanai que banijiaain nenaa loroaaneje jetao, leinjianaain Moisesa. 5Nii baiha jetaote, Isaraelitaauru enamanaacuru letoae jetao, Moisesa, torocuru sooruhane, jitariin nii acaauru rai Cana Coauneraacha beratenojoi jerecuruhane coujunacane que, Cana Coaunera rai mocooruhane coina. 6Nitohaneein coroatajai tasoon cuhane, nii ichana teein jetaote, ita tabaainijianaain coujunacateein, nii leeocha cuhane nenaa que jetao, nii ajeri caje ichanohin rori cabue jetao, Moisesa. 7Nii baiha jetaote, nii acaauru rai aitoha Cana Coaunerane jaa coujunaca, laenaain niicha rucuji quiricha ereretaa cachaauru raine jaun aonaain jetao:

“Jeriha Cana Coaunerane rijijieein chujia, niicha jereeicha ichajeein ichaorichaa nuhincha”, naain jetao, tonoraaure.

8Niritiin jerecuruhane jaun jetaote:

“Caa ichanate, nii inara aina Cana Coauneraacha ichana jerei tonoraain neriquicheeine coina, aitocohichene jaa coujunacanera”, naain jetao, nii cachaauru ichoae cuaain nii ichana, niicha leruhi riajae jetao, Moisesa.

9Niritiin acaauru ichoae cuaain, nii ichana rihacane baiha jetaote, Aaroon, Nadab, Abio, chaaen caaunsi chooncani Isarael bichauhenaauru, naaonjoainuri aina jetao, nii ichatane ucuuno que iniha cue Moisesa. 10Inaen ecu iniha uruhane jana jetaote, Isaraeli neeuruhane Coaunera, Cana Coaunera coaracuruhane jana jetao, aiha dedene tocohaneein jerichanejeein ajiarojoijoaain inanacae rai nasaji. 11Ne jetaote, nii chatohaneein baasoneein, nii coaaraauru Isaraeli bichauhenaauru cachaauru teniha Cana Coaunerane jaun jetao, lenoneein acau cohin, naaonjoaaunre Cana Coaunera Coaracuruha natiin.

Sinaai bichatane ecuuno que te iniha cue Moisesa

12Nitohaneein coaracuruhane jana jetaote:

“Caa nihanune jaun, ichatane ecuuno que iniin, ecu canu coacu, aihane ajeri caje nenaa tabara ichoae, tonoraauruha Isaraelitaaurune coina, caitoonjoan quiicha laenai te icheite, que acaauru relaai, canu jerichaaune rijijieein neeuruhane coina”, nae jetao, Moisesa rai Cana Coaunera.

13Nii jaun jetaote, nii rai coriha Josoe aina, nii ichatane ecuuno, niha Cana Coaunerane jaun iniha cuneein jetao: 14“Cau jelaihacha neein canacaanu cohacuche, turuha uhacaanune reentihaain. Caute inara aina nedaaurureein Aaroon aina Hor, niha chatoanai rucuhenacai inara raine, acaauru caje bajaauche”, nae jetao Moisesa, nii Isarael bichauhenaauru rai.

15Inaen niritiin iniha cuha Moisesane jana jetaote, dede sacari nejesinaneein nedae, nii ichatane ecuuno. 16Nitohaneein jetaote, nii Sinaai bichatane conaaijaaintoha, rai caohachaain nenaa que Cana Coaunerane jaun jetao, saota janoneein, dede sacari nejesinaneein nedae, nii ichatane ecuuno satono. Nii jana jetaote, caaunsi janoniane cuhane jetao, nii dede sacari jana neein jetao, Moisesa cotijiae Cana Coaunera. 17Aiha leinjiin usi cacha itajeranune tocohaneein ecooca, nii Cana Coaunera rai caohachaain nenaa coasinacaain, nii ichatane ecuuno satononihane jana jetaote, coaracure Isaraelitaauru. 18Nii jana jetaote, nii ichatane ecuuno satononiha iniin jetao, nii dede sacari jana enohin, jenachoonca jiichooneein, jenachoonca janotiineein, ucuae nedae Moisesa.

Currently Selected:

Éxodo 24: URA

Highlight

Copy