Éxodo 21

Letononeein nenacaauru rai rauhi

(Dt 15.12-18)

1Niritiin jetaote:

“Caaurute, inara rai tenojoin erenaa rauhi, caohachane”, naain jetaote:

2“Leinjiin Ebereeo coreteein ii cachanu quete, nainere saota jaanacanejeeicha, ii aina amihaneein, caaunsi jaanacane cuhane, inaen ii caje mituhin amuhin, raotojeein nainere nihane nii mituha naja coretelanaanane. 3Comasai colane, jelai ii rene turuhalune, jelai amuhine ii caje. Jana, comasai aina turuhalune, comasai aina jiniiquiin amuhine. 4Jana, rai fatoroon comasaijiaane jana, nii comasai aina calaojoiin, cacunucohanete nainere, nii rai fatoroon raineein nedaa bereecuru aina, nii rai comasine jana, jelai amuhane caohachae, nii rai letono. 5Nii rai comasai, bereecuru, naaojoainuri colateein, nii fatoroon ratiriin amunaajereniha, nii letononete nainere 6Cana Coaunera notaracae, acuujua bacuujuaniha amaain, nii acuujua bacuujuaque suruherateein, coataque niricho jorolohitohane caohachare. Itolere cojoanonaa bana, rai letononeein nihane coina”, naain jetaote:

7“Chunucoha coseenranuque, rai cacunuque necoretihane, aihuruha nii quichaauru letonocurune rijijieein, amunaa nainihei. 8Rai comasainu que ranaa jeria, nii fatoroon ne jana jereniha nii ranuna ne, nii fatoroon coretemiin nii ranuna. Nii ranuna jerenihane corenihacha, nainihei nejelau atane caje unacaauru rai, que necoretihane. 9Que calaohi comasaijiaanetechu, cacunu balaihane rijijieein belaihane caohachae. 10Leeocha ene raain nihane, nii jauriaanejeein nenaa belaihane rijijieein, lenone, cajione, naaonjoainuri teein, coujuriu rai comasaineein nenaa tocohaneein neeuruhane coina, curuaecaain belainaamiin. 11Jana, lenone, cajione, nii naaonjoainuri, caa caitoonjoan telanaala, belainihanete, nii caje nichotihane coretelanaala, caje amureein, nii ene.

Chatohaneein ita cunaitaain, ita ateinaain niha cachane, casetecaane coina, rauhi tiha Cana Coaunerane

12Chunocoha, cunaitaain ateinarate, ateinaain casetecareeuni. 13Ateinana coacuelanaala, canu inara Coaunera nichaauneecha jerenohineein, ateinaanena, nii baiha sorohin nichotihane jaa jelai bereeuni canu. 14Jana, namute cacha aina obajeein, sohane coasilanaala, nechu jataain niicha rautaique sohin, canu rai lenonecuru sohin mocooruhane jaa rori nichae cuhin sorohane nihanatiinte, ariin ecu teein ateinaain casetecanohiniha cureein.

15Chachaainti, rai inaca, neba, naaonjoain cunaitae, niite, ateinaain casetecanohiniha cureein.

16Chachaainti cacha asiin, que necoretenihane, rai loreri asae asiin siri, niite ateinaain casetecanohiniha cureein.

17Chachaainti, rai neba, inaca, naaonjoain nocoeje chanuhe, niite, jerichanejeein ateinaain casetecanohiniha cureein.

18Chunocoha cacha, ajeri que bodoosiin leeocha cunaitaain, biji nijique tititaain cunaitaain, nii atinaelanaala eruhari cuhane loroaane, 19coatiha nii cha ujuaihoneein nerihei, nii cunaitaera. Acaihaniji, eruhari cuhane neloraain, rai nunaera aina nichaauraain amuha, nii cunaitenaane cojoanonaachate coreteein, rai coine maajeein coretihane neere, nii cunaitaera.

20Chunocoha, enuha que rai cacha, rai coseenra, naaonjoainiji faofaain ateinaane, nii sonajaain jaohane jaachate, coretihane ne. 21Jana le janojoeeiniji ichaohin, amurijiriiniji ichaohane, coatiha casetecanoinerihei, nii rai fatoroon, rai cachaneein niha nii cachane jaun.

22Chunocoha, coroatajai cacha ita sohane jana, ecu niha ene ausirinanane, nii chatohaneein cunaitaelanaala, nichoae ita comaain rai beree jitooruhanete nainere, nii beree atinaauruhane coreteratiha, nii ujuaihoneein nenacaauru que, nii ene lanane. Nete laen ecu neeuruha coroatajai joesiocurune caohachae, nabana amuritoojoaain acaauru que coreteratiha, nii ene lanane coataa. 23Charijieeiniji, nii ene ateinaauruhanete laen, ateinanohinihane neere, nii atinaera netonai. 24Jana, notaniji jiuhanete, nii ichara nota netonai nijiuhane ne, rai catu cunaitaane, nii ichara catu netonai cunaitanohinihanete ne, rai bijiniji cunaitaane, nii cunaitaera biji netonai cunaitanohinihanete ne, rai tijianiji cunaitaane, nii cunaitaera tijiha netonai cunaitanohinihanete ne, 25moconojoineein aihanete, nii mocoera netonai moconojoinihane ne, sauhitonojoineein aihane, nii sauhitoroa netonai, sauhitonojoinihanete ne, faohitohane, nii faohitoroa netonai faohitohanete ne.

26Chunocoha, rai coseenra, rai cacha naaonjoaniji nota faohitiin, jiuhanete nainere, nii nota jiuhane coreniha, jianacoon raotojoeein nihane coina, jianihane caohachae. 27Rai catuniji bacohitoha, faohitiinnete nainere, nii catu coreniha jianacoon raotojoeein nihane coina, jianihane caohachae.

Sonajaain joaeranihane casetecaane coina, rauhi tiha Cana Coaunerane

28Leinjiin cacha, leinjiin ene, naaonjoainiji ateinaa, leinjiin boey jichoque situhitiine, nii boey netonai ajeri jaberocoque bodoosiin ateinaraa nete ne. Nete laen nainecurene, nii iniho quihuruha cachaaurune. Nieichu nainecuruhi, nii boey erora casetecaauruhane. 29Nete laen, inaen nitohaneein, jichoque cacha situha situcaain ateinaain coriaa, nii boeyne, ajeri jaberocoque bodoosiin ateinaain, jerichanejeein nii nerora netonai ateinanohiniha cureein, coitucuha sainejeein berainihane. 30Chunocoha coitucuhin, ohane coataa coriquique coretena jererate, jerichanejeein nichaoque coretiha cureein. 31Jerichanejeein techu nelate, caa caitoonjoan rauhi, enamanaacuru, ranunaauru, naaonjoainuri raine maajeein. 32Leinjiin letononeein nenaa, coseenraneein nenaaniji soha nii boeyne, ajerique bodoosiin sonojoiniha cureein. Nete laen, nii fatoroon rai, nii letonocuru soha nii boeyne coretiha cureein, nii boey erora, nichata choonca moneda jataain coretiin nenaa coriquique.

33Chunocoha cacha, acau mitunaja fuhelanaala, acau mitunajaanuque ichaanasainejeein nirijieein ratirihane jana, cuhane naluhin oha boeyne nenihane, cabario rijijieein nenaa asnone, 34nii nitajihane coretihane ne, nii acau mitunaja erora. Nete laen, nii iri naluhin onaa raane caohachae.

35Chunocoha rai boey, leeocha cacha rai boey soha rai jicho que situhitiine, nii ichaaojoeein nenaa boeyque necoreteein, ita rijijieein core leruhin, jerichanejeein ita rai, nii boey onaa iniho leruuruhanete ne. 36Netechu, inaen nitohaneein coriaane jaun aiha, nii boeyne jana, caohachaain berainiha nii nerorane jaun aihane, nii boey onaa coriha nerora raine jana, raineein nedaa, nii boey onaa ne caohachae”. Nae jetao Cana coaunera.

Currently Selected:

Éxodo 21: URA

Highlight

Copy