Marcos 8

1Jariꞌ tiempo congana e qꞌuiy ja winak quimolon quiꞌ ruqꞌuin ja Jesús in mta queway quicꞌamonto. Ja cꞌa Jesús arjaꞌ xersiqꞌuij pon ja rdiscípulo in quewaꞌ xbij chique riꞌ: 2—Congana npokonaj quewach ja winak, tuban oxiꞌ kꞌij queqꞌuejeꞌ wqꞌuin in mchita nak chi ta ja nquetij. 3Ja wi xquenutakel chi tak cochoch, wi mta way xtiquetijel jariꞌ wotak chi netujkar pa bey. Ecꞌoli chique congana nat epenak wiꞌ, neꞌ chique. 4Ja cꞌa rdiscípulo ejeꞌeꞌ quibij tre:

—Jawaꞌ lugar ja rokcꞌo wiꞌ riꞌ congana talani ¿bar cꞌa nekacꞌamaꞌ wiꞌ ja xtiquetij ja winak leꞌ? xecheꞌ tre.

5—¿Jaruꞌ rkan ja caxlanway cꞌol ewqꞌuin? xecheꞌx rmal ja Jesús.

—Wukuꞌ rkan, xecheꞌ tre. 6Ja cꞌa Jesús xbij chique ja winak chi netzꞌabeꞌ kaj pa tokꞌulew. Cꞌacꞌariꞌ xucꞌam ja wukuꞌ rkan caxlanway, xmaltioxij tre ja Dios, xuwechꞌ in xujach chique ja rdiscípulo chi ejeꞌeꞌ nqueyaꞌ chic chique ja winak in queriꞌ queban queyaꞌ chique. 7In chakajaꞌ ecꞌo jun caꞌiꞌ cakan chꞌuꞌ e taknoꞌy. Ja cꞌa Jesús xermaltioxij tre ja Dios in xuyaꞌ orden chi neyaꞌi ja chꞌuꞌ chique ja winak chakajaꞌ. 8Xewaꞌi ja winak in xenoji chi utz. Ja cꞌa caxlanway rachbil chꞌuꞌ mol ruchiꞌ ja totaji, wukuꞌ chacach xuban. 9Ja xewaꞌi ecꞌo la quijiꞌ mil. Cꞌacꞌariꞌ ja Jesús xeruban can despedir, 10xoquel ja pa lancha e rachbil ja rdiscípulo, xebe pa tak lugar ja cꞌo pa rcuenta Dalmanuta.

* * * * * * * * * *

11Ja tok xeꞌekaji ecꞌo juleꞌ fariseo xeꞌekaj ruqꞌuin ja Jesús. Ejeꞌeꞌ quemaj tzij ruqꞌuin pro xa chꞌaꞌonem nqueban tre. Cꞌoli quicꞌaxaj tre pro xa nquicꞌambajbej rxin quewariꞌ:

—Tabanaꞌ jun milagro ja ncꞌutu chikawach chi Dios yoyon chawe ja poder ja cꞌo pan akꞌaꞌ, xecheꞌ tre. 12Ja cꞌa Jesús tok xcꞌaxaj ja bix tre, arjaꞌ congana bison cumal in quewaꞌ xbij chique riꞌ:

—¿Nak tre tok ixix ja rixcꞌo chipan awaꞌ tiempo riꞌ necꞌutuj jun milagro chwe ja xa necꞌambajbej wxin? Ni katzij wiꞌ ja xtinbij chewe riꞌ, ja rixix ja rixcꞌo chipan awaꞌ tiempo riꞌ mta jun milagro xtinban ta chewach ja caniꞌ necꞌutuj chwe, neꞌ chique. 13Ja cꞌa tok bitaji ja queriꞌ rmal, ja Jesús xeruyaꞌ can, xeꞌoquel chic jutij chipan ja lancha, xebe chic chajuparaj yaꞌ.

14Ecꞌo chic pa lancha ebenak. Ja cꞌa rdiscípulo ja Jesús ejeꞌeꞌ mta queway quicꞌamonto, quimestaj can, xa jun rkan ja caxlanway ja cucꞌan. 15Ja cꞌa Jesús quewaꞌ xbij chique riꞌ:

—Kas bien techꞌoboꞌ, kas bien tebanaꞌ cuenta ewiꞌ chwach ja levadura quixin ja fariseo in chwach chakajaꞌ ja levadura rxin ja Herodes, neꞌ chique. 16Ja cꞌa rdiscípulo ejeꞌeꞌ quemaj tzij chibil tak quiꞌ, quewaꞌ nquibij riꞌ:

—Queriꞌ nbij chake rumac ja mta way kacꞌampi ta, xecheꞌe. 17Ja cꞌa Jesús arjaꞌ bien rotak chi ja nquechꞌob ejeꞌeꞌ chi levadura xin caxlanway ja nnatax chique rmal pro ja nnatax chique jariꞌ ja tijonem quixin ja fariseo in rxin ja Herodes, quewaꞌ xbij chique riꞌ:

—¿Nak tre tok nebij: —Takaꞌan mta way kacꞌampi ta, kas nixcheꞌe? ¿Majaꞌn ek tichꞌobtaj emwal? ¿Majaꞌn takaꞌan tikaj pan ewiꞌ nak rbanic? ¿La congana cꞌayew chi nechꞌob nak rbanic? 18Cꞌo panewach pro ¿la matetzꞌat ja ncꞌu̱t chewach? In chakajaꞌ cꞌol ewxquin pro ¿la matoc pan ewxquin ja nbix chewe? In chakajaꞌ ¿la maturkaj chewe 19ja tok xinwechꞌ ja joꞌoꞌ rkan caxlanway in xenutzuk joꞌoꞌ mil winak tre? ¿Jaruꞌ chacach ja totaji ja xemol ruchiꞌ? neꞌ chique.

—Cablajuj chacach, xecheꞌ tre. 20Ja cꞌa Jesús xbij chic chique:

—In tok xenutzuk chic ja quijiꞌ mil winak tre ja wukuꞌ rkan caxlanway ¿jaruꞌ chacach ja totaji ja xemol ruchiꞌ? neꞌ chique.

—Wukuꞌ chacach, xecheꞌ tre.

21—Pro ¿nak cꞌa tre tok majaꞌn tichꞌobtaj emwal nak rbanic? xecheꞌxi rmal ja Jesús.

* * * * * * * * * *

22Ja tok xeꞌekaji chajuparaj yaꞌ pa jun tinamit rbinaꞌan Betsaida xeꞌekaj wiꞌ. Cꞌo cꞌa jun achi moy xeya̱ꞌ chwach ja Jesús. Ja recꞌamyonel rxin ja moy ejeꞌeꞌ congana quicꞌutuj tre ja Jesús chi nuchap ja moy chi ntzursaj. 23Cꞌacꞌariꞌ ja Jesús xuchap ja moy chi rukꞌaꞌ, xyukejel, xlasajel chipan ja tinamit. Ja cꞌa tok lastajel rmal chipan ja tinamit xuyaꞌ ruchub chi tak rwach, xuyaꞌ rukꞌaꞌ trij tak rwach in quewaꞌ xbij tre riꞌ:

—¿La ncaꞌy chic jutzꞌit ja rawach? neꞌ tre. 24Ja cꞌa rachi xumaj caꞌyem in xbij tre ja Jesús:

—Ecꞌo juleꞌ achiꞌiꞌ nenutzꞌat pro ja nenutzꞌat pon leꞌ xa e caniꞌ juleꞌ cheꞌ, quimajon binem, neꞌ tre. 25Cꞌacꞌariꞌ ja Jesús xuyaꞌ chic jutij ja rukꞌaꞌ trij rwach ja rachi. Ja cꞌa rachi xumaj rtzꞌelwachixic ja nutzꞌat in tzuri ja rwach, utz chic nutzꞌat nojelal. 26Ja cꞌa Jesús xbij tre:

—Jat chi awochoch pro maxta catoc chipan ja tinamit nixtacꞌa cꞌo ta jun ja cꞌo chipan ja tinamit xtabij wiꞌ ja xinban chawe, neꞌ tre.

* * * * * * * * * *

27Cꞌacꞌariꞌ ja Jesús e rachbil ja rdiscípulo xebe pa tak aldea ja cꞌo chinakaj ja tinamit Cesarea ja cꞌo pa rcuenta Filipo, kas cꞌa quimajon bey ja tok quewaꞌ xcꞌaxaj chique riꞌ:

—Anin ¿nak inocnak wiꞌ ja nquibij chwe ja winak? neꞌ chique.

28—Ecꞌoli nebin chawe chi atat at Juan Bautista, juleꞌ chic nebini chi at Elías in ecꞌo chic juleꞌ ja nebini chi at jun chic chique ja rojer tak profeta, xecheꞌ tre.

29—Ja cꞌa rixix ¿nak nebij chwe, nak inocnak wiꞌ? neꞌe ja Jesús chique. Peti ja Pedro, xbij tre:

—Ja ratat at Cristo ja ratchaꞌon rmal ja Dios, neꞌ tre. 30Ja cꞌa Jesús congana xuban recomendar chique chi ni majun bar ta triꞌ nquibij wiꞌ chi arjaꞌ ja Cristo.

31Cꞌacꞌariꞌ xumaj rkꞌalasaxic chiquewach ja rdiscípulo nak xtiban na tre, quewaꞌ xbij chique riꞌ:

—Anin ja rin Alcꞌwalaxel ja xinoc alaxic cuqꞌuin ja winak qꞌuiy rwach ja rpokonal ntij na, xa itzel ninquetzꞌat na ja principaliꞌ xin tinamit e cachbil ja jefe quixin sacerdote e cachbil chakajaꞌ ja maestro ja netijon quixin ja winak tre ja ley xin Dios, nincamsax na in chi rox kꞌij nincꞌastaj na, neꞌ chique. 32Arjaꞌ bien xuchꞌob chiquewach chi nba̱n na queriꞌ tre. Ja cꞌa Pedro arjaꞌ xuchap chi rukꞌaꞌ in xumaj rchꞌaꞌic tre ja xbij. 33Pro ja cꞌa Jesús tok xcꞌaxaj ja bix tre rmal ja Pedro arjaꞌ xuyaꞌ vuelta, xertzꞌelwachij pon ja rdiscípulo in xumaj rchꞌaꞌic tre ja Pedro ja xbij: —Catel chinwach Satanás. Queriꞌ nbij chawe como ma queriꞌ ta nawajoꞌ chwe chi nban ja caniꞌ nrajoꞌ chwe ja Dios chi nban, xa junan anaꞌoj cuqꞌuin winak, neꞌ tre.

34Cꞌacꞌariꞌ ja Jesús xersiqꞌuij pon ja rdiscípulo e cachbil ja juleꞌ chic winak ja recꞌo triꞌ, quewaꞌ xbij chique riꞌ:

—Xa nak ta ja cꞌo rgana nyukeꞌ rucꞌuꞌx wqꞌuin rjawaxic chi matuyaꞌ rgana ja tzabuklaj cꞌaslemal rcꞌan. Rjawaxic chakajaꞌ chi matipokonaj nutij ja rpokonal mwal in ntreꞌel chwij. Jariꞌ caniꞌ jun cruz nya̱ꞌ trij pro matipokonaj nucꞌam ja cruz, nrijkajel in nbe ja bar necamsax wiꞌ. 35Queriꞌ nbij chewe como xa nak ta ja npokonaj nuyaꞌ can ja rcꞌaslemal jariꞌ matuwil cꞌariꞌ ja utzlaj cꞌaslemal ja mta qꞌuisic trij. Pro xa nak ta ja matipokonaj nuyaꞌ can ja rcꞌaslemal mwal anin in rmal ja utzlaj tzij ja ncꞌamonto jariꞌ can nuwil ja utzlaj cꞌaslemal ja mta qꞌuisic trij. 36Como caniꞌ tre jun winak ¿nak cꞌa nuchꞌec trij wi xuchꞌec nojel ja mebaꞌil rxin ja rwachꞌulew pro wi ma xuwil ta ja utzlaj cꞌaslemal ja mta qꞌuisic trij? 37Ja wi xutzak ja utzlaj cꞌaslemal ja mta qꞌuisic trij jariꞌ mta jun mebaꞌil ja xtilokꞌbej ta. 38Queriꞌ nbij chewe como ja winak ja recꞌo chipan awaꞌ tiempo riꞌ xa nak ta chi winakil wi xa qꞌuixbal nquenaꞌ nquecoj quiꞌ wqꞌuin in wi xa qꞌuixbal nquenaꞌ rmal ja ntzobal, anin chakajaꞌ qꞌuixbal nnaꞌ chi xquenucoj ta pa ncuenta. Anin ja rin Alcꞌwalaxel ja xinoc alaxic cuqꞌuin ja winak xa qꞌuixbal nnaꞌ chi xquenucoj ta pan ncuenta tokoriꞌ tok xquinpi chic jutij e wachbil ja ángel xin Dios ja tok congana nchꞌaꞌan chic chwij ja gloria xin Dios. Ja winak ja recꞌo chipan awaꞌ tiempo riꞌ ejeꞌeꞌ xa quiyaꞌon can ja Dios in junwiꞌ chi na yukul wiꞌ quecꞌuꞌx, congana il mac ja netajini nqueban, neꞌe ja Jesús chique.

Currently Selected:

Marcos 8: tzjW

Highlight

Copy