Marcos 11
11
1Quimajon bey ebenak, xa chinakaj ja tinamit Jerusalén ecꞌo chi wiꞌ in xeꞌekaj chuchiꞌ ja caꞌiꞌ tinamit, jun Betfagé in jun Betania ja bar cꞌo wiꞌ ja jayuꞌ rbinaꞌan Rjayuꞌal Olivo. Ja cꞌa Jesús ecꞌo caꞌiꞌ chique ja rdiscípulo xerutak 2in quewaꞌ xbijel chique riꞌ:
—Jix ja pa tinamit leꞌ, chilaꞌ newil wiꞌ jun ti ral bur ximili ja ni mta wiꞌ jutij tzꞌulben ta cumal winak. Tequiraꞌto in tecꞌamaꞌto. 3Ja wi cꞌoli nak xtibin chewe: —¿Nak tre tok nequir ja ti bur? wi xticheꞌ chewe, quewaꞌ xtebij tre riꞌ: —Ja kajaw ncꞌatzin tre, quixcheꞌ tre, in alnak nyaꞌlaꞌto chewe. Queriꞌ xbijel ja Jesús chique.
4Xebe ja re caꞌiꞌ discípulo. Ja cꞌa tok xeꞌekaji chipan ja tinamit quewil ja ti bur ximil chuchiꞌ jun puerta ja bar nucꞌul wiꞌ riꞌ caꞌiꞌ bey in quemaj rquiric. 5Kas cꞌa quimajon rquiric ja tok xekꞌilox cumal ja winak ja recꞌo triꞌ: —¿Nak ja neban, nak tre tok nequir ja ti bur leꞌ? xecheꞌxi. 6Cꞌacꞌariꞌ quemaj rbixic chique ja binel chique rmal ja Jesús in yaꞌ lugar chique chi nquecꞌamto ja ti bur. 7Quecꞌamto ja ti bur. Ja quitziak jariꞌ quiwekbej, tzꞌabeꞌe ja Jesús trij in xumaj binem. 8Congana e qꞌuiy ja winak quisoclaꞌ ja quitziak pa rubey ja Jesús in ecꞌo chic juleꞌ xequikuplaꞌto rxak tak palma in queyaꞌ pa rubey chakajaꞌ. 9Ja cꞌa re nabeyal chwach e cachbil ja retran trij ejeꞌeꞌ congana nquerak quechiꞌ in quewaꞌ nquibij riꞌ: —Dios, koꞌatoꞌoꞌ camic, bendecido amwal ja Cristo leꞌ ja penak pan abiꞌ atat ja rat kajaw Dios. 10Bendecido amwal ja gobierno ja penak chikawach ja rxin ja kamamaꞌ David. Koꞌatoꞌoꞌ camic Dios ja ratcꞌo chilaꞌ chicaj. Queriꞌ ja nquibij.
11Ja cꞌa Jesús tok xekaji chipan ja tinamit Jerusalén xoc chipan ja nimlaj templo xin Dios. Ja cꞌa tok tzꞌattaj can rmal nojelal ja ntajini nba̱n chipan ja templo cꞌacꞌariꞌ be. Como kaj kꞌij xelel chipan ja tinamit Jerusalén, be chic chipan ja tinamit Betania e rachbil ja cablajuj apóstol.
* * * * * * * * * *
12Ja cꞌa chi rcab kꞌij tok xeꞌelto ja Jesús pa Betania arjaꞌ majtaj rmal rkꞌakꞌanil rupan. 13In xutzꞌat pon jun mocaj higuera. Ja cheꞌ cꞌo ruxak in be ja Jesús ruqꞌuin, nertzꞌataꞌ ja wi cꞌo rwach. Pro ja tok xekaj ruqꞌuin ni majun rwach, xa ruyon ruxak como majaꞌn terilaꞌ tiempo rxin ja cosecha xin higo. 14Ja cꞌa Jesús quewaꞌ xbij tre ja cheꞌ riꞌ: —Majutij xcatwachin ta xtitij chi ta higo chawe, neꞌ tre. Ja cꞌa rdiscípulo ejeꞌeꞌ quicꞌaxaj ja xbij tre ja cheꞌ.
* * * * * * * * * *
15Ja cꞌa tok xeꞌekaj chipan ja tinamit Jerusalén xoc chipan ja nimlaj templo xin Dios in xumajto quilasaxic canojel ja recꞌo chipan ja quimajon cꞌayinem e cachbil chakajaꞌ ja quimajon lokꞌoj tak nakun. Ja quimesa ja qꞌuexol tak pwok xchꞌakij pa tokꞌulew in queriꞌ xuban tre chakajaꞌ ja quichꞌacat ja necꞌayin tak palomax. 16In chakajaꞌ ma xuyaꞌ ta lugar chique ja winak chi xtiqueram chi ta ja templo cucꞌan ta ja quinakun. 17Cꞌacꞌariꞌ xumaj quitijoxic, quewaꞌ xbij chique riꞌ:
—Ja rtzobal Dios quewaꞌ tzꞌibtal chipan riꞌ: —Ja wochoch anin jariꞌ banbal oración quixin ja winak ja recꞌo nojel tak nación, neꞌe ja Dios tre ja rtemplo, pro ja rebanon ixix tre xa jun lugar ja bar neqꞌuejeꞌ wiꞌ alakꞌomaꞌ, neꞌe ja Jesús chique. 18Ja cꞌa maestro ja netijon quixin ja winak tre ja ley xin Dios e cachbil ja jefe quixin sacerdote ejeꞌeꞌ tok xekaj rbixic cuqꞌuin ja xbij ja Jesús congana quixbej quiꞌ rmal in rmalariꞌ quemaj rcanoxic rij rwach nak nqueban tre chi nquicamsaj. Ejeꞌeꞌ quixbej quiꞌ como ja tijonem ja ntajini nuyaꞌ ja Jesús kas cꞌascꞌoꞌi nquicꞌaxaj canojel ja winak in nqueyaꞌ quixquin tre. 19Ja cꞌa tok xoc chic akꞌaꞌ be chic ja Jesús, xelel chic chipan ja tinamit Jerusalén.
* * * * * * * * * *
20Ja cꞌa chi rcab kꞌij chic akꞌabil xekꞌax chic jutij ja Jesús ja bar cꞌo wiꞌ ja cheꞌ higuera rubiꞌ. Ja tok quetzꞌat ja cheꞌ chakijnak chic pro ni rachbil rcꞌamal. 21Ja cꞌa Pedro arjaꞌ xurkaj tre ja bin can tre ja cheꞌ rmal ja Jesús:
—Maestro, tatzꞌataꞌ mpeꞌ leꞌ, chakijnak chic takaꞌan ja cheꞌ ja xabij tre chi majutij xtiwachin chi ta, neꞌ tre ja Jesús. 22In bix chique rmal ja Jesús:
—Tiqꞌuejeꞌe ja yukulbal ecꞌuꞌx ruqꞌuin ja Dios. 23Anin ni katzij wiꞌ ja xtinbij chewe riꞌ, jun achi xa nak ta chi achiꞌal ncowini nbij trelaꞌ ja jun jayuꞌ leꞌ chi neli, nerqꞌuiakaꞌ riꞌ pa yaꞌ in ja jayuꞌ nbe, nnimaj. Ja rachi ncowini nuban ja wariꞌ xarwariꞌ wi matuban caꞌiꞌ rucꞌuꞌx in wi cꞌo rseguro chi nbantaji ja nbij. 24Rmalcꞌariꞌ nbij chewe xa nak ta ja necꞌutuj pan oración, ja ta neban cꞌo ta eseguro chi chomarsan chic rmal ja Dios chi nuyaꞌ chewe ja necꞌutuj. Ja wi queriꞌ neban jariꞌ nyataj chewe. 25In tok cꞌo jeꞌe oración neban, wi cꞌo jun xa nak ta ja rbanon pokon chewe rjawaxic chi necuy utzcꞌa chi ja Tatixel ewxin ja cꞌo chilaꞌ chicaj arjaꞌ nixrucuy ixix chakajaꞌ. 26Nowi matecuy jariꞌ maquixrucuy ixix chakajaꞌ ja Tatixel ewxin ja cꞌo chilaꞌ chicaj, xecheꞌxi ja discípulo.
* * * * * * * * * *
27Ja cꞌa tok xeꞌurkaj chic chipan ja tinamit Jerusalén xoqui ja Jesús chipan ja nimlaj templo xin Dios. Kas cꞌa rmajon binem chipan ja tok xeꞌekaji ja jefe quixin sacerdote e cachbil ja maestro ja netijon quixin ja winak tre ja ley xin Dios e cachbil chakajaꞌ ja principaliꞌ xin tinamit 28in quewaꞌ quibij tre riꞌ:
—¿Nak atocnak wiꞌ chewiꞌ tok amajon rbanic nojel awaꞌ ja kamajon rtzꞌatic in nak yoyon chawe chi naban? xecheꞌ tre.
29—Anin chakajaꞌ cꞌoli ja ncꞌwaxaj chewe. Ja wi xtebij chwe ja xtincꞌwaxaj chewe riꞌ anin chakajaꞌ nbij chewe nak inocnak wiꞌ chi nmajon rbanic nojel awaꞌ ja remajon rtzꞌatic. 30Camic tebij chwe, ja Juan Bautista ¿nak yoꞌ tre ja rsamaj chi neruban bautizar ja winak, la jaꞌ Dios ja cꞌo chilaꞌ chicaj ja yoꞌ tre owi xa winak? xecheꞌxi rmal ja Jesús. 31Ja cꞌa rejeꞌeꞌ quemaj tzij chibil tak quiꞌ:
—Ja wi xtikabij tre chi Dios yoꞌ tre, arjaꞌ nbij chake: —Ja wi queriꞌ ¿nak cꞌa tre tok ma xenimaj ta? neꞌ alaꞌ chake. 32Pro ja wi xtikabij tre chi xa winak xeyoꞌ tre nak la xtiqueban ja winak chake como ja chiquewach ejeꞌeꞌ ja Juan arjaꞌ jun profeta ja ni katzij wiꞌ chi profeta xin Dios. Queriꞌ nquechꞌob pro ni canojelal, xecheꞌe. 33In quibij tre ja Jesús:
—Ma kotak ta nak yoꞌ tre, xecheꞌ tre.
—In nixtacꞌa anin ta chakajaꞌ xtinbij ta chewe nak inocnak wiꞌ chi nmajon rbanic nojel awaꞌ ja remajon rtzꞌatic, xecheꞌxi rmal ja Jesús.
Currently Selected:
Marcos 11: tzjW
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
