Mateo 24

1Cꞌacꞌariꞌ xelto ja Jesús chipan ja nimlaj templo xin Dios, kas rmajon binem ja tok xetiloc ja rdiscípulo ruqꞌuin in quewaꞌ quibij tre riꞌ:

—Tatzꞌataꞌ can mpeꞌ ja templo leꞌ, congana banon rbanic, xecheꞌ tre. 2Pro bix chique rmal ja Jesús:

—Ja rixix nixtajini netzꞌat ja laleꞌ pro anin nbij chewe, jalaꞌ templo leꞌ nerilaꞌ na jun kꞌij ja tok xtiyoji nojelal, ni majun abaj xtiriklaꞌ chi ta riꞌ, xecheꞌxi.

3Ja cꞌa Jesús arjaꞌ tzꞌubul parwiꞌ ja ti jayuꞌ rbinaꞌan Rjayuꞌal Olivo in ecꞌoli chique ja rdiscípulo quiyonaj quiꞌ ruqꞌuin in quibij tre:

—Tabij chake ¿nak kꞌij xtibantaji jalaꞌ ja cꞌa xabij kaj chake leꞌ? In chakajaꞌ ¿nak chi retalil nwinakari ja ncꞌutu rxin chi xajalal majaꞌn catmelojpi chic jutij in ja tok xtiqꞌuis awaꞌ ja rwachꞌulew riꞌ? xecheꞌ tre. 4Ja cꞌa Jesús quewaꞌ xbij chique riꞌ:

—Kas tebanaꞌ jutzꞌit cuenta ewiꞌ, maxta cꞌo jun quixbano engañar. 5Queriꞌ nbij chewe como e qꞌuiy ja winak nepi na jeꞌe in xa queyon nquecoj quiꞌ chi e Cristo, quewaꞌ nquibij chique ja winak riꞌ: —Anin in Cristo, necheꞌ na chique, in e qꞌuiy ja winak ja xquequeban engañar. 6Cꞌo nimak tak chꞌaꞌoj xtiban na nojel nat nakaj pro ja tok xtekaj rbixic ewqꞌuin maxta texbej ewiꞌ rmal como ni rjawaxic wiꞌ chi nbantaj cumplir nojel awaꞌ wariꞌ pro jariꞌ ma qꞌuisbal rwachꞌulew ta. 7Queriꞌ nbij chewe como cꞌo jeꞌe tinamit xtiyictaj na trij juleꞌ chic tinamit in chakajaꞌ ja gobierno jeꞌe nyictaj trij juleꞌ chic gobierno. In chakajaꞌ cꞌo nimak tak rcꞌayewal xtiwinakar na pa tak lugar jeꞌe caniꞌ tre nimak tak waꞌal, nimak tak yobil in cubarkan. 8Nojel awaꞌ wariꞌ xa majbal rxin ja nimak tak rpokonal.

9Ja cꞌa rixix nixjach na pa quekꞌaꞌ winak chi nba̱n pokon chewe in nixcamsax na. Xa itzel nixtzꞌat na cumal ja winak ja recꞌo nojel tak nación pro mwal anin ja tok xtiban queriꞌ chewe. 10Chipan ariꞌ tiempo e qꞌuiy ja winak ja xtiqueyaꞌ can ja yukulbal quecꞌuꞌx ja cꞌo wqꞌuin in ecꞌoli ja cachbil xa nequejach pa quekꞌaꞌ ja netzelan quixin, xa itzel xtiquetzꞌat chic quiꞌ chibil tak quiꞌ. 11In e qꞌuiy ja winak ja newinakar na e profeta necheꞌxi, pro ma katzij ta chi e profeta in e qꞌuiy ja winak ja xquequeban engañar. 12Ja cꞌa ritzelal janila xtibe más pa nim in rmal ja congana itzelal nbani xa chewiꞌ ja tok e qꞌuiy ja winak xa nchupi ja rajoben riꞌil ja cꞌo pa tak canma, xa nqꞌuisi. 13Pro canojel ja xtiquecochꞌ quewach chipan ja rpokonal in ni matiqueyaꞌ can wiꞌ ja yukulbal quecꞌuꞌx wqꞌuin ejeꞌeꞌ riꞌ nquewil na ja totajem xin Dios. 14Ja cꞌa utzlaj tzij ja ncꞌamonto tre ja gobierno xin chilaꞌ chicaj jariꞌ nel na rbixic nojel nat nakaj, nojel rwachꞌulew nekaj wiꞌ. Nojel nekaj wiꞌ rbixic utzcꞌa chi nquicꞌaxaj ja winak ja recꞌo nojel tak nación. Cꞌa tokocꞌariꞌ xtipeti ja qꞌuisbal rwachꞌulew.

15Rmalcꞌariꞌ nbij chewe, kas turkaj chewe ja bitajnak can rmal ja rojer profeta Daniel. Ja xbij ja Daniel chi nerilaꞌ na jun kꞌij ja tok cꞌoli ja npeti ja más chi na itzel ntzꞌa̱t rmal ja Dios. Ja cꞌa tok npeti arjaꞌ npeꞌe chipan ja lugar santo in congana camíc nuban. (Ja nesiqꞌuin awaꞌ juleꞌ tzij riꞌ kas tiquiwasaj jutzꞌit quinaꞌoj trij.) 16Jariꞌ, tok xtetzꞌat chi paꞌl chic chipan ja lugar santo, ja cꞌa neban, ja rixcꞌo chipan ja departamento Judea mejor quixanmaji, tewawaj ewiꞌ pa tak cꞌachelaj. 17Ja rixcꞌo parwiꞌ terraza triꞌ mejor quixanmaji chakajaꞌ, ma quixkajpi chi ta pa tak ewochoch chi rlasaxic ja remebaꞌil pa jay, 18in ja rixcꞌo pa tak chenoj triꞌ mejor quixanmaji chakajaꞌ, ma quixmelojpi chi ta chi ewochoch chi rcꞌamaric echaqueta. 19Anin congana npokonaj quewach ja rixokiꞌ ja xajalal majaꞌn queqꞌuejeꞌ tak cal triꞌ in chakajaꞌ ja recꞌo chic tak yaquiꞌaꞌ chwaquekꞌaꞌ. 20Tecꞌutuj tre ja Dios chi ma pa rtiempo tew ta ja tok xterilaꞌ ja kꞌij chi nixanmaji in ma pa jun xulaꞌnbal kꞌij ta chakajaꞌ. 21Queriꞌ nbij chewe como cꞌo jun nimlaj rpokonal npi na pro janila nim. Jaruꞌ pa tiempo tzꞌucarnakto ja rwachꞌulew mta jun rpokonal penak ta ja más chi ta nim chwach awaꞌ ja nintajini nbij chewe riꞌ in ni mchita wiꞌ jun xtipi chi ta ja más chi ta nim chakajaꞌ. 22Xarwariꞌ, xa pajtali ja rtiempo. Ja cꞌa wixta maquita pajtali ja rtiempo ni ta majun winak xtutoꞌ ta riꞌ chipan. Pro cumal ja winak ja rechaꞌon rmal ja Dios chewiꞌ tok pajtali ja rtiempo. 23Ja cꞌa wi cꞌo jun xtibij chewe chi: —Peti ja Cristo, waweꞌ cꞌo wiꞌ riꞌ, wi neꞌe, ma tenimaj ta. Owi nbij chewe chi: —Quelaꞌ cꞌo wiꞌ leꞌ, wi neꞌe, chakajaꞌ ma tenimaj ta. 24Queriꞌ nbij chewe como ecꞌoli winak ja nepi na, juleꞌ xtiquecoj quiꞌ chi e Cristo in juleꞌ xtiquecoj quiꞌ chi e profeta xin Dios pro ma katzij ta ja nquibij. Ejeꞌeꞌ cꞌo nimak tak milagro xtiqueban, jutzꞌit laj nequeban engañar ja winak ja rechaꞌon rmal ja Dios pro jariꞌ mta moda xquequechꞌec ta. 25Bien tebanaꞌ cuenta ewiꞌ chwach ja wariꞌ como xinyaꞌ pon rbixic chewe. 26Rmalcꞌariꞌ nbij chewe, ja cꞌa wi ecꞌoli nebin chewe chi: —Joꞌ mpeꞌ, peti ja Cristo, cꞌo jun lugar kas talani, triꞌ cꞌo wiꞌ, wi necheꞌe, ma quixbe ta. Owi nquibij chewe chi: —Joꞌ mpeꞌ, cꞌo jun cuarto ja rwawan wiꞌ riꞌ, wi necheꞌe, ma tenimaj ta chakajaꞌ. 27Queriꞌ nbij chewe como caniꞌ nuban ja cayipaꞌ tok nuqꞌuiak riꞌ chicaj chaka bar ta triꞌ ntzꞌa̱t wiꞌ in queriꞌ cꞌa tre chakajaꞌ ja Ralcꞌwalaxel ja xoc alaxic cuqꞌuin ja winak, ja tok xtipi chic jutij waweꞌ chwachꞌulew jariꞌ mta bar ta triꞌ ja maquita ntzꞌa̱t wiꞌ. 28Ja juicio puersa nkajto na ja caniꞌ nqueban ja cꞌuch, xa bar ta triꞌ cꞌo wiꞌ ja camnak tak cuerpo triꞌ nekajto wiꞌ.

* * * * * * * * * *

29Ja tok chaka maril xtocꞌowi jawaꞌ nimlaj rpokonal riꞌ cꞌacꞌariꞌ maticaꞌy chic ja kꞌij, nkꞌekumiri in maticaꞌy chic ja icꞌ chakajaꞌ. Ja cꞌa chꞌumil jariꞌ netzakto in ja nimak tak poder rxin ja caj nsi̱l na. 30Cꞌacꞌariꞌ cꞌo jun retal nwinakar chicaj jariꞌ retal ja Ralcꞌwalaxel ja xoc alaxic cuqꞌuin ja winak chi xajalal majaꞌn tipi chic jutij waweꞌ chwachꞌulew. Ja cꞌa winak ja recꞌo nojel tinamit waweꞌ chwachꞌulew ejeꞌeꞌ nquemaj na jun nimlaj bis, nquetzꞌat na ja Ralcꞌwalaxel ja xoc alaxic cuqꞌuin ja winak, arjaꞌ penak cꞌamonto rmal juleꞌ sutzꞌ, janila jun nimlaj poder cꞌo chic pa rukꞌaꞌ in congana nim chic rukꞌij. 31Cꞌo cꞌa jun trompeta ncꞌaxax na congana nim rukul, jariꞌ nertakbejel ja ángel rxin chi nebe, neꞌequimoloꞌ ja winak ja rechaꞌon rmal pro nojel rwachꞌulew nebe wiꞌ chi quimolic, mta ja maquita xqueꞌekaj wiꞌ chi quimolic.

32Camic tewasaj cꞌa enaꞌoj tre jun cheꞌ higuera jariꞌ ncꞌambej tzij chewach. Ja higuera ja tok npulani cꞌo tak rukꞌaꞌ nwinakari in ruxak chakajaꞌ jariꞌ retal nucꞌut chewach chi xa nnakajinto ja rtiempo cꞌatan. 33In queriꞌ cꞌa tre chakajaꞌ ja tok xtemaj rtzꞌatic nojel ja cꞌa xinbij chewe jariꞌ retal nucꞌut chewach chi ma nat chi ta cꞌo wiꞌ ja kꞌij ja xecꞌwaxaj chwe, congana nakaj cꞌoto chi wiꞌ triꞌ. 34Ni katzij wiꞌ ja xtinbij chewe riꞌ, ja tinamit Israel ejeꞌeꞌ cꞌa ecꞌo na ja tok nbantaj cumplir nojel awaꞌ wariꞌ, ma chupnak ta quewach. 35Ja caj in rwachꞌulew jariꞌ xa nchup na rwach pro ja ntzobal anin jariꞌ ni matichup wiꞌ rwach, mta ariꞌ ja maquita nbantaj cumplir.

36Pro majun winak otakyon ja mero kꞌij in ja mero hora ja xtibantaji in nixtacꞌa ángel ta chakajaꞌ ja recꞌo chilaꞌ chicaj pro ja nataꞌ Dios xa ruyon arjaꞌ ja rotakyon. 37Xarwariꞌ, ja caniꞌ bantaji ja pa rtiempo ja Noé ojer queriꞌ cꞌa xtibantaj chic chakajaꞌ ja tok xtipi chic jutij waweꞌ chwachꞌulew ja Ralcꞌwalaxel ja xoc alaxic cuqꞌuin ja winak. 38Queriꞌ nbij chewe como ja pa rtiempo ja Noé, ja tok majaꞌn tipeti ja nimlaj kꞌekaljab ja winak xa banoj tak waꞌim neꞌoclaꞌ wiꞌ il in banoj tak cꞌulbic in nijawariꞌ quimajon rbanic ja tok xoqui ja Noé chipan ja nimlaj lancha. 39Ja cꞌa winak ni ma xquechꞌob ta wiꞌ ja penak chiquij, cꞌa tokoriꞌ chꞌobtaj cumal ja tok peti ja nimlaj kꞌekaljab chiquij, congana lawuloꞌ ban chique rmal ja yaꞌ in xejikꞌi canojelal. In queriꞌ cꞌa tre chakajaꞌ ja Ralcꞌwalaxel ja xoc alaxic cuqꞌuin ja winak ja tok xtipi chic jutij waweꞌ chwachꞌulew, cꞌa jaꞌ xtiquenaꞌ ja winak tok xtipeti. 40Ja cꞌa tok xterilaꞌ riꞌ tiempo e caꞌiꞌ achiꞌiꞌ xa jun ecꞌo wiꞌ pa chenoj triꞌ, jun xticꞌamarel in jun xticanaj can chipan ja rpokonal. 41In chakajaꞌ e caꞌiꞌ ixokiꞌ ja xa jun ecꞌo wiꞌ quimajon queꞌem triꞌ, jun xticꞌamarel in jun xticanaj can. 42Rmalcꞌariꞌ nbij chewe, quixcꞌascꞌoti como anin in ewajaw in ma ewotak ta nak kꞌij xquinmelojpi chic jutij. 43Pro bien teyaꞌaꞌ ewxquin tre ja xtinbij chewe riꞌ, jun rajaw jay ja tok nba̱n alakꞌ ruqꞌuin, ja wixta rotak nak hora chi nekaji ja ralakꞌom ruqꞌuin chakꞌaꞌ nchajij ta cꞌariꞌ rochoch, ncꞌascꞌot ta cꞌariꞌ in maquita nuyaꞌ lugar tre ja ralakꞌom chi noc ta pa rochoch. 44Rmalcꞌariꞌ nbij chewe, ni rjawaxic wiꞌ chi nixcꞌascꞌot ixix chakajaꞌ como ja Ralcꞌwalaxel ja xoc alaxic cuqꞌuin ja winak arjaꞌ chaka jalal tok xtipi chic jutij chipan jun hora ja ni ma echꞌobon ta.

* * * * * * * * * *

45Techꞌoboꞌ cꞌa chi utz ja xtinbij chewe riꞌ, ja rajsamajelaꞌ ¿echinatak ja nebano cumplir ja nbix chique cumal ja quipatrón, echinatak ja buena quinaꞌoj? Caniꞌ tre jun patrón tok cꞌo jun ajsamajel ruqꞌuin in nuyaꞌ rsamaj chi arjaꞌ npeꞌe chiquij ja juleꞌ chic rach tak ajsamajelaꞌ chi neruban cuenta in nuyaꞌ queway ja tok ncꞌatzin chique. 46Congana quiꞌil tre ja rajsamajel ja wi ntajini nuban cumplir ja rsamaj ja tok xturkaji ja rpatrón ruqꞌuin. 47¿Nak nuban ja patrón? Seguro chi nojel ja mebaꞌil cꞌo ruqꞌuin nujach pa rukꞌaꞌ awaꞌ jun ajsamajel riꞌ chi arjaꞌ npeꞌe trij. 48Pro ja rajsamajel wi xa itzel rnaꞌoj in wi xa nbij kaj pa ranma chi: —Na la kꞌij npit ariꞌ ja npatrón, wi neꞌ kaj, 49in wi numaj quichꞌayic ja rach tak ajsamajelaꞌ, wi xa banoj tak waꞌim in tijoj tak yaꞌ nuban cuqꞌuin kꞌabarelaꞌ, 50ja wi xa queriꞌ ntajini nuban nerilaꞌ na jun kꞌij tok cꞌa jaꞌ xtunaꞌ xturkaji ja rpatrón, ni majun nak ta rnaben. 51Ja cꞌa rajsamajel janila jun nimlaj rpokonal xtutij pa rukꞌaꞌ ja rpatrón in nta̱kel rmal chipan ja lugar ja bar ecꞌo wiꞌ ja winak ja xa cacaꞌ quipalaj. Ja cꞌa winak janila chi okꞌej xtiqueban chipan ariꞌ lugar in xtiquicachꞌachꞌej cakꞌ.

Currently Selected:

Mateo 24: tzjW

Highlight

Copy