Titu 3

Isazei'wa norĩ hã 're ihâimana wẽ za'ra mono zé wasu'u

1Titu, isazei'wa norĩ hã te za 're i'apo're pu'u u'âsi mo, dama ipire norĩ nhimiroti si, duré roti'wa norĩ nhimiroti zama, te te 're wapari pese za'ra mono da. Simi'ẽ na te za imreme hã te te tãma ãma 're uwaimrami za'ra. 2Duré te te 're dabâsi wasété za'ra mono õ di za. Te te duré 're dazada'âbâ za'ra mono õ di za. Simizawi pese na si, te za 're hâimana za'ra. Duré waimri na te za uburé dama 're hâimana za'ra, hâimana wẽ na. 3Wa norĩ zama hã, Cereta nhihudu norĩ ne, wanhimiza'rese ãna, wa aré tô 're wanomro. Wapo're'õ u'âsi, wa aré 're wahâimana za'ra. Dazadawa nhipese na ma tô da te wama 're rob'rãmi za'ra. Uburé marĩ hã sipu'u pese na, wa tô aré wa te wasima 're wẽ za'ra, iwẽ newa, ãma wama 're robze za'ra mono da hã. Wa tô duré wa te dama 're rob'manharĩ wasété za'ra. Danhimarĩ na da'ruiwapari hã ma tô aré duré wama 're hâimana za'ra duré. Wawasédé hã wa te 're 'manharĩ za'ra mono 'ru te, ma tô aré da te 're wa'ruiwapari za'ra. Wa norĩ wa norĩ zama asa wa te 're da'ruiwapari za'ra aré. 4Tane nherẽ, wawasété na 're wanomro mono nherẽ, tinhoprubzém na ma tô dama 're siwaihu'u, 'Re ihâimana u'âsi mono hã Wanho'reptui'wa hã. Duré uburé te te 're ida'azawi pese mono zém na zama, ma tô dama 're siwaihu'u. 5'Re iwanomro wasété mono hawi, ma tô te te 're wa'anho'reptu. E 're wanomro wẽ mono wa, duré e wa te dama 're rob'manharĩ wẽ za'ra mono wa, ma tô te te 're wa'anho'reptu. Mare di. Wa'ãma 're ipẽ'ẽzé mono zarina, ma tô te te 're wa'anho'reptu. Tipẽ'ẽzani te te wama 're i'anhomri mono na, ma tô wapẽ'ẽ 're te te 're wa'apoto té. Wawasété hawi, ma tô wapẽ'ẽ 're, te te 're wa'a'upsõ, ãma 're wanomro wẽ mono da oto. 6Sõpru uptabi wa, ma tô wei wama te te 're anhomri Tipẽ'ẽzani hã, Zezu Cristu te te 're iwa'anho'reptui mono zéb zarina. Wẽ uptabi di, Ipẽ'ẽzani hã. 7Wawasété na 're wanomro mono nherẽ, ma tô te te 're wa'azawi pese, 'Re ihâimana u'âsi mono hã. Tahawa, ma tô te te 're wa'awẽsãmri, wawasédé hã te te oto wa'ãma 're i'ab'madâ'â mono õ zéb zarina, rowẽ isi'utõrĩ'õ ãma i'rata 're wasi'ubumroi u'âsi mono da. Tahawa, wa za wasina sô 're wanhimipari u'âsi za'ra, i'rata 're iwasi'ubumroi u'âsi mono zéb zô hã. 8Te aima irowasu'uzé hã tô sena.

Tahawa, te za isazei'wa norĩ ma 're i'aroti mo, marĩ wẽ na te te 're dapawaptob u'âsi za'ra mono da. Te aima 're irowasu'u mono zé hã wẽ uptabi di, dama 're irowẽ za'ra mono zéb da hã. 9Ni'wam norĩ hã zudeu norĩ hi'rata norĩ nhisi wasu'u na, te ãma 're sisada'âbâ za'ra. 'Re ihâimana u'âsi mono nhimiroti, zudeu norĩ ma 're ihâimana za'ra mono na zama, te duré 're sisada'âbâ za'ra. Ãne wamhã, dama 're irowẽ za'ra mono zé hã, mare di. Tahawa, marĩ na 're idasisada'âbâ za'ra mono zé hã, 're wapari mono õ di za. 10Ãté ni'wa hã te za aimawi tinhimirowasu'u na te te 're ro'wa'rutu, isazei'wa norĩ wi. Taha zarina, isazei'wa norĩ hã sima ãma 're siwanhizari za'ra mono wamhã, te za tãma 're i'aroti mo, ãne na te te dama 're rowasu'u za'ra mono tõ da. Tawamhã ãne na te te aiwapari õ wamhã, te za duré tãma ãma isahu. Tawamhã te te aiwapari õ wamhã, ma'ãpé, tiwi 're asi'madâ'â pese mono za. Ãhã wamhã, duré oto isiré 're aihâimana mono õ di za. 11E marĩ wa. Tãma roti nherẽ, te te i'aiwapari õ na, waihu'u wa. Duré oto roti sena hawi sipai wamhã, te za iwasété na dasiwi hã waihu'u ni za.

Paulu hã, Tituhu ma te te irowaihu'u 'rãsutu zé

12Nimahã na, wa za aibâ hã atẽme satõ, ãté Atemasi hã, ãté Tiquicu hã. Tahawa, ma'ãpé rosa'rata, we aimorĩ da, wasisõpẽtẽ da, Nicopuri na 'ri nho'õmo nhisi ãma. Taha na wa tô ĩsima rosa'rata, rowa'u'u wahâ nomro ré, tame ĩnhamra da. 13Duré aibâ norĩ hã pawaptob zahuré na za, Zena norĩ hã Apoluhu me. Danhimirob'manharĩzém na dawasu'u'wa, te 're hâimana, Zena hã. Marĩ hã aima ihâimana zarina, te za ipawaptob zahuré, marĩ hã tãma hâimana zahuré õ wa, inebzéb da hã. 14Wa tô ĩsima wẽ, wasiré isazei'wa norĩ hã marĩ zô dawi 're ro'wanhi'riti za'ra mono wamhã, te te 're dapawaptob za'ra mono da, taré 're hâimana za'ra mono tõ da, dapawaptob ãna.

15Uburé ĩsiré 're isi'ubumroi mono norĩ hã ma tô timreme na ãma asawi za'ra. Wasiré isazei'wa norĩ hã wa wamreme na ãma sawi za'ra ni, wazawi'wa norĩ hã.

'Re ihâimana u'âsi mono wi, wa aima za'ra wa'aba, te tiwi 're rowaptẽrẽ u'âsi, aihĩni te te 're aipawaptob u'âsi za'ra wa'aba mono da, rowẽ u'âsi ãma 're anomro aba mono da.

Currently Selected:

Titu 3: xavBP

Highlight

Copy