Titu 2

Rowasu'u uwaibaba na si rowasu'u

1Titu, rowasu'u sena na si uwaibaba si te za isazei'wa norĩ ma 're irowahutu mo, ãma 're nomro wẽ mono da. 2Aibâ ihi norĩ ma, te za 're i'aroti mo, hâimana prédup sina 're hâimana za'ra mono da, duré tiwasété wi sina 're siptete za'ra mono sina, 're hâimana za'ra mono da. Wanhib'apito nhimiroti si te za duré te te 're sazei pese za'ra, ta hã tô sena wa. Te za duré te te 're dazawi pese za'ra. Marĩ hã sada 're hâimana za'ra mono nherẽ, Wanhib'apito ãma si te za 're nomro wẽ u'âsi. 3-4Pi'õ ihi norĩ ma zama, te za duré 're i'aroti mo, hâimana wẽ uptabi na 're hâimana za'ra mono da. Te te duré 're dawasu'u wasété za'ra mono õ di za, dama. Âzézei'wa 're hâimana za'ra mono õ di za. Roti wẽ na si te za i'ra ré norĩ hã te te 're pawaptob za'ra, timro hã duré ti'ra norĩ zama te te 're sawi pese za'ra mono da. 5Te za sina 're siptete za'ra, 're nomro wẽ mono da, i'ra ré norĩ hã. 'Ri 're, romhuri wẽ 'wa te za 're hâimana za'ra. Duré timro mreme te za te te 're 'madâ'â pese za'ra. Tawamhã da te tãma 're nharĩ wasété za'ra mono õ di za, 'Re ihâimana u'âsi mono nhimiroti na oto 're nomro wẽ mono wa, i'ra ré norĩ hã.

6'Ritéi'wa norĩ ma zama, te za duré 're i'aroti pese mo, sina 're siptete za'ra mono sina, 're nomro wẽ mono da. 7A hã aihâimana wẽ na, te za dama ãma 're asanho mo, asirã zarina si 're danomro wẽ mono da. Dama 're rowahutu mono wamhã, aimreme tô sena na si, te za duré dama 're irowahutu mo. 8Iwasu'u uwaibaba si, te za dama 're irowahutu mo, da te aima 're nharĩ za'ra mono tõ da, taré da te aima 're nharĩ za'ra mono wa, timreme niwĩ wawẽ'õ'wa norĩ hã 're siséb za'ra mono da.

9Iwada'uri zarina si, pawa'âbâ ãna dama romhuri'wa norĩ ma zama, te za 're i'aroti mo, tinhib'apito mreme hã te te 're wapari pese za'ra mono da, isimiromhuri na te te 're wẽsãmri za'ra mono da, isib'apito hã. Romhuri'wa norĩ hã timreme na te te tãma 're wa'rãmi za'ra mono õ di za, tinhib'apito ma hã. 10Duré marĩ hã tinhib'apito wi te te 're simi'uri za'ra mono õ di za. Te za te te tãma 're romhuri wẽ za'ra, te te tiwi 're upa za'ra mono ãna. Tawamhã 'Re ihâimana u'âsi mono nhimiroti zarina si 're nomro wẽ mono wa, te za Wa'anho'reptui'wa nhimiroti wẽ na 're dawata za'ra.

11'Re ihâimana u'âsi mono hã ma tô dama siwaihu'u, tinhimizawi pese zém na, uburé te te 're ida'anho'reptui mono zéb da hã. 12Ta hã te te 're wa'azawi pese mono wa, ma tô wama waihu'u, wa te 're rẽme pese za'ra mono da, isazei'õ'wa norĩ hâimanazé hã, dawẽ te, wawasété zô wa te 're rowasutu tõ za'ra mono da, ti'ab ré wasina 're wanhiptete za'ra mono da, 'Re ihâimana u'âsi mono ãma si oto 're wanomro wẽ mono da. 13Ãne wa za 're wanomro, Wa'anho'reptui'wa zô wanhimipari sina. Wa za rowẽ u'âsi 're wahâimana za'ra, wasina 're wanhimipari za'ra mono sina. Rowa'a za'ẽtẽ ré, apâ wei morĩ wapsi, wa za watõmo na 'madâ'â za'ra ni, danhipai u 're ihâimana mono hã, Wanhib'apito Zezu Cristu hã. 14Ta hã ma tô wazada sisõmri za'ra, wazada dâ'â za'ra da, 're iwanomro wasété mono hawi, te te 're wa'anho'reptui mono da, isib'a'uwẽ si 're wahâimana za'ra mono da oto. E marĩ da. Sena na 're wanomro mono da, duré wawa'a ãna iwẽ na si wa te oto 're dapawaptob za'ra mono da.

15Ĩnhimiroti zarina si, te za 're ida'apawapto mo, Wanhib'apito ãma 're danomro wẽ mono da. 'Re danomro wasété mono tõ da, te za dawi 're i'azawi pese mo. Wanhib'apito zadawa para te za aimreme pire na si dama 're i'aroti mo, asimiroti wapu wa, da te dasiwi 're aiwẽ'õ mono tõ da, dama 're i'aroti mono zém na hã.

Currently Selected:

Titu 2: xavBP

Highlight

Copy