Filemo 1

1-2Filemo, a hã wasiwadi wama asawi pese di, duré wasiré Cristu Zezusihi ma romhuri'wa. Ãhã na, wa hã Paulu, wa za asawi, ĩnhimi'ui'éré na. Wano Timotiuhu me, wa za asawi ni. Duré Zezusihi zazei'wa norĩ, asõrõwa u siré 're isi'rã'õtõ mono norĩ zama, wa za ãma azawi ni. Duré wahidiba hã Apiza hã wa za ãma sawi ni. Duré aibâ hã Arquipu hã wa za ãma sawi ni. Ta hã te duré wasiré Wanhib'apito ma, te te 're romhuri pese. Wa hã Zezu Cristuhu ma romhuri'wai wa, ma tô dasiwi ĩ'âri ni. Dazazéb 're ma tô duré dasiwi ĩnherẽ ni. Tawamhã dazazéb 're, ĩnhamra ré, wa za aima ãma rob'ui'éré za'ra wa'wa.

3Wamama ma, wa ai'ãma 're wamreme zusi u'âsi, 'Re ihâimana u'âsi mono ma, duré Wanhib'apito Zezu Cristuhu ma zama, isimizawizé hã ai'ãma 're hâimana u'âsi mono da, rowẽ u'âsi, ãma 're aimorĩ da.

4-5Filemo, asawi di. Ãhã na wa za aima waihu'u, Wamama ãma ĩwatazém na, ai'ãma hã. Aiwasu'u wẽ hã ma tô we nasi ĩtẽme waptãrã. Wanhib'apito Zezusihi zazei'wa te, u, 're aimo. Te duré, u, 're i'azawi pese mo, uburé isazei'wa norĩ hã. Tahawa, aiwasu'u wẽ hã we ĩtẽme 're waptã'ã mono wa, ĩto ti, wa hã aima hã. Duré 'Re ihâimana u'âsi mono ma, ai'ãma 're ĩmreme mono wamhã, wa duré ãma 're ĩwata u'âsi, Ĩnhib'apito ãma. 6'Re ihâimana u'âsi mono hã ma tô uburé Cristuhu zazei'wa norĩ ma 're sõpru, uburé marĩ iwẽ na. A hã, Cristuhu zazei'wai wa, wa oto wasiré 're wahâimana za'ra. Tawamhã wa ai'ãma 're ĩmreme, 'Re ihâimana u'âsi mono ma, te te aima 're awaihu'u pese mono da, aipẽ'ẽ 're, uburé marĩ iwẽ hã Cristuhu zazei'wa norĩ ma, te te 're i'anhomri mono hã. 7A hã ĩno. Ĩma asawi di. 'Re asimizawi pese mono wa, ĩto ti. Duré ĩtoi uptabi di, ĩpẽ'ẽ 'remhã. Tahawa, ĩma rowẽ uptabi di. Duré uburé isazei'wa norĩ hã robze na oto 're si'ubumroi mono wa, marĩ na a hã 're apawapto mono wa, ĩtoi uptabi di, aima.

8Tahawa, marĩ na wa za aima rowaihu'u. Wa za duré aiwi rowaptẽ. Wa hã asiré Cristuhu zazei'wai wa, adub'rada, wa oto 're mo. E tahawa, wa za ãma aima ti'ru, marĩ hã 'manharĩ da. Mare di. Te ãma aima 'rui õ di za. 9Ĩma asawi pese wa, wa hã Paulu, dazazéb 're ĩnhamra nherẽ, Cristu Zezusihi zadawa wasu'u'wai wa, wa za taré aiwi rowaptẽ, asi'uihâ na si marĩ hã 'manharĩ da. 10Ãne ãhã na Onezimuhu ãma, wa za aima rowaihu'u. Wa za duré aiwi rowaptẽ, Onezimuhu ma. Cristuhu zazei'wa te oto 're mo, ta hã. Wanhib'apito wasu'uwẽ hã wa tô tãma waihu'u, dazazéb 're ĩnhamra ré. Ãhã wamhã, ma tô saze. Tahawa, ĩ'ra ne, te oto ĩma 're hâimana, Onezimu hã. 11Te te aima 're romhuri zei mono ãna, te aré 're mo, Onezimu hã. Tahawa, aré aima hã wẽ õ di ta hã. Tazahã, ãhã na hã tihâimanazém na ma saprĩ oto. Ãhã wamhã, aima wẽ di za oto. Duré ĩma zama hã wẽ di za oto.

12Ĩma hã duré oto sawi di. Ĩma sawi uptabi nherẽ, ãhã na wa za oto Onezimu hã atẽme satõ, ai'rata 're sãmra mono da, apâ. 13Ĩ'rata 're sãmra mono 'wa'âhã, te aré te te 're ĩpawapto, ai'upana. Te te 're ĩpawapto mono da, wa tô ĩsima wẽ, dazazéb 're ĩnhamra ré, wa hã iwasu'u wẽ 'wai wa. 14Tane nherẽ, te za asi'uihâ na si tãma ipisu, apâ we ĩtẽme satõrĩ da, ãne hã aima wẽ wamhã. Duré aima wẽ õ wamhã, mare di za. Ãne wapsi hã tô marĩ õ di za, ĩma hã wẽ di za tô. Wa hã, ãne hã te ãma aima pisutu õ di. Mare di.

15Ta hã Onezimu hã ma tô aré airẽ. Ãté suru na asiti 're sãmra mono nherẽ, wẽ di. E marĩ wa, wẽ di. Atẽme wisi wapsi, ãté te za oto ai'rata 're sãmra u'âsi. Tahawa, ãté ãne hã aima wẽ di za tô. 16Cristuhu zazei'wa te za oto 're mo, Onezimu hã. Pawa'âbâ ãna aima romhuri'wa si 're morĩ õ di za oto. Cristuhu zazei uptabi 'wa oto 're morĩ wa, wano te za oto 're hâimana, Onezimu hã. Tô sena ĩma sawi di. Tawamhã aima sawi uptabi di za oto, ta hã. Asiré isazei'wai wa, ano te za oto 're mo, asiré.

17Ãhã na, wa za aiwi rowaptẽ, Onezimuhu ma. Ma'ãpé, atẽme wisi wi, sawi na za, ai'rata apâ 're hâimana u'âsi mono da oto. Wa hã asiré isazei'wai wa, atẽme ĩwisi 'wa'âhã, te aré ĩzawi. Tane te za isawi, Onezimu hã, apâ aima 're hâimana mono da. 18Ãté ai'rata sãmra ré hã, ma tô marĩ hã aiwi wasété. Ãté marĩ, ma tô aiwi ti'â, asiti morĩ õ ré. Sena wamhã, ma'ãpé we ĩma waihu'u za, apâ iwa'âbâzéb zarina te aima sõmri da, isõwa're're, Onezimuhu upana. 19Tô sena, ĩmreme hã. Wa hã Paulu hã wa za aima wa'â. Ãne wa oto aima rob'ui'éré, waihu'u da. A hã, Zezusihi zazei'wa. Ãhã na Zezusihi wasu'uwẽ zarina, robze na te oto 're aimo, iwasu'uwẽ hã te aima waihu'u wa, wa hã. 20Tahawa, wa ãne aima roti. Duré wa aiwi rowaptẽ, Onezimuhu ma, sawi da, duré ai'rata 're sãmra mono da, a hã ĩno, Cristuhu zazei'wai wa. Ãne ai'rata 're sãmra mono wamhã, wẽ di za ĩma hã.

21Ãne, wa aima rob'ui'éré, ĩnhimiroti hã waihu'u da. Zahadu wapsi, uburé 're i'ab'manharĩ wẽ mono zé hã, Onezimuhu ãma hã, ĩnhimiroti zarina hã wa za waihu'u. Ãté ĩnhimiroti zarina si õ di za. Ãté asi'uihâ na asimirosa'rata zarina zama, te za tãma i'manharĩ wẽ. 22Duré misi wa za aiwi waptẽ. Ma'ãpé, daza'warizé hã ĩma pisutu, ai'rata za'ra wa'aba a'â ĩnhamra da. A norĩ wa'wa hã ma tô duré ĩma 're irowaptẽrẽ za'ra wa'aba mo, hâiwa u, 'Re ihâimana u'âsi mono wi, te te ĩzatõrĩ da, dazazém hawi atẽme za'ra wa'aba, ãma ĩmorĩ da apâ. Tahawa, wa sô mapa, ĩmorĩzéb zô, atẽme za'ra wa'aba, ĩma 're irowaptẽrẽ za'ra wa'aba mono zéb zarina, ãma ĩmorĩ da hã apâ. Ãne si.

23Ãhã na Epafrasi hã te ãma asawi. Ta hã duré Cristu Zezusihi wasu'u'wai wa, dazazéb 're te nhamra, ĩme. 24Marcu hã te duré ãma asawi, duré Aristacu hã, duré Demasi, duré Luca. Ta norĩ hã, ĩsiré Wanhib'apito ma romhuri'wa norĩ. Ãne si, wa ĩnhimirob'ui'éré hã ãma aima 'rãsutu.

25Wa hã wa duré 're ĩmreme u'âsi, Wamama ma, ai'ãma za'ra wa'aba, Wanhib'apito Zezu Cristu hã te te 're aipawaptob u'âsi za'ra wa'aba mono da, robzei u'âsi, ãma 're anomro aba mono da.

Currently Selected:

Filemo 1: xavBP

Highlight

Copy