Marcu 12

Buru na romhuri wasété 'wa norĩ wasu'u

Mateu 21.33-46; Luca 20.9-19

1Tawamhã tinhimirowasu'u na ma tô duré tãma ãma sãna'rata za'ra, ãne:

— Aibâ hã te 're sãmra, buru tede'wa hã. Tawamhã tiburu ãma ma tô a're, uwa 'ru hã. Te te a're pari, ma tô buru 'wawi wa'ra. Ma tô duré ẽtẽ nhisiwi sada ab're, uwa 'rãi watizéb da hã, iwa'u zô. Taha pari, 'ri 'rãihâ hã ma duré buru wa'wa 'manha, isipsaihuri norĩ zô, dasipapara rob'madâ'âzéb da hã. Tawamhã ma tô ni'wam norĩ hã sisõ'a ré pisutu za'ra, iburu hã te te sô 're 'madâ'â za'ra mono da. Uwa 'ru 'rã hã 're 'rãi prédub za'ra mono wapsi, te za te te tãma 're po'o za'ra, buru tede'wai ma hã. Taha pari, te oto mo, buru tede'wa hã darob amoi u, tame a'â sãmra da. 2Tawamhã oto 'rãi prédu mono wa, ma tô buru tede'wa tãma iromhuri'wa hã 'mazatõ tiburu u, uwa 'ru 'rã hã buru 'madâ'â'wa norĩ te te tãma ipo'o za'ra zô. 3Tane nherẽ, itẽme wisi za'ra wi, ma tô siwi ti'â, te te siwi azâri da. Tawamhã ubana ma tô siwi satõ apâ. 4Taha pari, te duré iwa'rãmi sô 'mazatõ, tãma iromhuri'wa hã. Tane nherẽ, buru u itẽme wisi za'ra wamhã, ma tô tãma rob'manharĩ wasété za'ra. I'rãi wi, ma tô siwi azâ. 5Taha pari, te duré 'mazatõ, iwa'rãmi. Tane nherẽ, ma tô siwi tiwĩ, buru na romhuri'wa norĩ hã. Siwa'rãmi sihutu sidâpâsi, ma tô nasi hâ za'ra. Ma tô duré nasi simro. 6Tawamhã buru tede'wai 'ra si te oto i'rata 're hâimana, danhowa're're te te isatõrĩ da hã, iburu na romhuri'wa norĩ u. I'ra hã tãma sawi pese uptabi di. Tãma sawi nherẽ, ma tô satõ, buru na romhuri'wa norĩ u, morĩ da. Ãne te imama hã sima rosa'rata: “Ĩ'ra si'aibâ hã te itẽme satõrĩ za'ra wamhã, ãté te za siwi hâiba wazé.” 7Tane nherẽ, buru na romhuri'wa norĩ u wisi wamhã, te ãne sima 'mahârâ za'ra: “Õhõta buru tede'wai 'ra hã te wei mo, timama uirĩ na buru tede'wa na 're ihâimana mono da hã. Wa te wasiwi wĩrĩ aba, buru hã wate za'ra da.” Ãne ma tô sima 'mahârâ za'ra, buru na romhuri'wa norĩ hã.

8— Tawamhã ma tô siwi ti'â, buru tede'wai 'ra hã, te te siwi wĩrĩ da. Te te siwi wĩrĩ pari, ma tô ihâiba hã siwi time, buru nhiti.

9— Buru na romhuri'wa norĩ ma hã e niha te za buru tede'wa hã tãma rob'manharĩ za'ra. Te za sô timorĩ za'ra, uburé te te uprosi da, buru na romhuri'wa norĩ hã. Tawamhã te za duré aimawi da'maipisutu, tiburu 'madâ'â'wa da.

10— Oro 'Re ihâimana u'âsi mono zadawa wasu'u na rob'ui'éré hã 're sõré za'ra wa'aba mono za, aima waihu'u za'ra wa'aba õ di bété. Ãne ibaihâ na rob'ui'éré hã:

“Ẽtẽ tomhâpâ wẽ 'ri na'ratazéb da, wẽ uptabi nherẽ, wasété newa, 'ri'wa norĩ te te siwi iwẽ'õ hã te oto tô taré nherẽ pire na hã, 're sa'wari u'âsi.

11Uburé Danhib'apito hã ma tô ãne hã pisutu, 'ri na'rata uparizéb da, pire na 're isa'wari mono da hã.

Tahawa, ãne na wa te ãma 're rosa'rata za'ra mono wamhã, wa ãma 're watob'uzu u'âsi za'ra, wa norĩ hã.”

12Buru na romhuri'wa norĩ wasu'u hã te te dama wasu'u wamhã, tisiré zudeu norĩ ma, pire na 're ihâimana za'ra mono norĩ, te wasu'u, Zezusi hã, 'Re ihâimana u'âsi mono ma, da'ãma romhuri'wa norĩ hã, duré dama rowahutu'wa norĩ hã, duré dama roti'wa norĩ hã. Ãne na ma tô sina waihu'u za'ra. Taha 'ru te, te aré siwi ti'â. Tane nherẽ, da'ahâ nhimimnhasi te, te õne haré ai'aba'ré, isiti.

Zezusi hã, rob'uiprazé arĩ na da te isadanharĩzé wasu'u

Mateu 22.15-22; Luca 20.20-26

13Tawamhã 'Re ihâimana u'âsi mono ma, da'ãma romhuri'wa norĩ hã ma tô farizeu norĩ hã 'mazatõrĩ za'ra, Zezusihi u si'aba'ré da. Erodihi niwĩ 're ihâimana za'ra mono norĩ zama, ma tô itẽme 'mazatõrĩ za'ra, tinhimiroti na te te upai wa, te te siwi wẽ'õ za'ra da. 14Tawamhã itẽme sihutu wamhã, te siwi sadanha, ãne:

— Rowahutu'wa, tô sena na wa tô aimreme na aiwaihu'u za'ra ni. Danhimirosa'rata na nare a hã 're aihâimana mono õ di. Duré dapire na 're dahâimana za'ra mono nherẽ, aima hã aiwapsi dahâimanazé hã. 'Re ihâimana u'âsi mono nhimiroti zarina si, te uburé marĩ hã dama 're i'awaihu'u mo, sena na. Tahawa, te za asimirosa'rada hã wama iwaihu'u za'ra, wa te aiwapari za'ra da. E Roma ãma danhib'apito uptabi ma, wa za rob'uiprazé hã wa te 're arĩ za'ra, isimiwada'uri zarina. E 'Re ihâimana u'âsi mono ma, wẽ di. E tãma wẽ õ di.

15Tô sena te te siwi ãma waihu'u za'ra da newa, ma tô siwi sadanha. Ãne na hã senai õ na, ma tô sina waihu'u za'ra, Zezusi hã. Tahawa, te ãne tãma nharĩ za'ra:

— E marĩ da, te ãne na asiwi ĩzadanharĩ 'wa, ĩmreme na te ãma aima upa za'ra wa'aba wa, asiwi ĩwẽ'õ za'ra wa'aba da. Tane wamhã, ma'ãpé rob'uiprazé isapotore hã we ĩma 'mai'âri aba asiwi, te 'madâ'â da.

16Tawamhã ma tô ni'wa hã tãma tisõ, Zezusihi ma. Te ãma dazadanharĩ za'ra, ãne:

— E 'wai hâibarĩ, rob'uiprazé isapotore na hã. E 'wa sisi ui'éré duré, ãma hã.

Tawamhã asa ma tô ãma tãma wa'rãmi za'ra, ãne:

— Ã hã, Roma ãma danhib'apito hâibarĩ. Duré taha nhisi ui'éré te ãma tihâiba.

17Tawamhã Zezusi asa te duré ãma tãma nharĩ za'ra, ãne:

— Roma ãma danhib'apito ma, te za isimiwada'uri zarina, marĩ tãma 're i'arĩ za'ra wa'aba mo apâ, ite wa. Tane duré, 'Re ihâimana u'âsi mono ma, te za marĩ hã isimiwada'uri zarina, tãma 're isõmri za'ra wa'aba mo apâ, ite wa marĩ hã.

Tawamhã ma tô ãma titob'uzu za'ra, te te tãma iwaihu'u za'ra zém na asa, Zezusi hã.

Zezusi hã, dahâiwa'utuzém na da te isadanharĩzé wasu'u

Mateu 22.23-33; Luca 20.27-40

18-19Taha pari, ni'wam norĩ hã ma itẽme aihutu, Zezusihi u, saduseu norĩ hã. Ta norĩ hã 're dadâ'â za'ra mono wamhã, ab're hawi apâ 're idahâiwa'utu za'ra mono õ na te te dama 're iroti za'ra mono. Ta norĩ hã te tãma rowasu'u za'ra, Zezusihi ma, ãne:

— Rowahutu'wa, wahi'rada Mozési hã ma tô ãne dama roti: “Aibâ imro ré hã 'ra õ ré, dâ'â wamhã, tizédé'aba mro na te za timro ino hã, ai'uté hã te te 'maipoto da, iwamhã isédé'aba 'ra ne, 're morĩ da.” Ãne wahi'rata nhimiroti na rob'ui'éré hã. 20Wa za oto aima rowasu'u za'ra ni, dasisãnawã si 're ihâimana za'ra mono norĩ wasu'u na. Aibâ hã sisãnawã si, te 're hâimana za'ra, 7 na ihâiba za'ra hã. Tawamhã ipoto'rada hã ma tô timro oto. Tawamhã 'ra õ ré, ma dârâ, aibâ hã. 21Tawamhã isõsi hã ma tô duré ãma timro pi'õi ãma hã, isõwa're're. Ta hã 'ra õ ré, ma duré dârâ. Taha nhosi, ãma mro wamhã, 'ra õ ré, ma duré dârâ. 22Aibâ norĩ hã ma tô nasi sisõwa're're ãma timro za'ra, pi'õi ãma, 7 na ihâiba za'ra hã aibâ norĩ hã. Tane nherẽ, 'ra õ ré, ma tô sisarina ai'utõ. Tawamhã nimahã bâtâ na ma tô duré pi'õ hã, timro norĩ zarina, dârâ. 23Aibâ norĩ hã 7 na ihâiba za'ra hã, misi pi'õ nherẽ, ma tô nasi sisõwa're're ãma timro za'ra. Tawamhã 're idadâ'â za'ra mono norĩ hã, 'Re ihâimana u'âsi mono, ab're hawi za apâ oto te te 're da'ahâiwa'utu mono wamhã, e 'wai me te za oto 're simasisi zahuré.

24Tawamhã Zezusi te asa tãma rowasu'u za'ra:

— A norĩ wa'wa hã ma tô rosa'rata na ãma i'upa za'ra wa'wa, ab're hawi, za apâ 're idahâiwa'utu za'ra mono õ na hã. E marĩ wa. 'Re ihâimana u'âsi mono zadawa wasu'u na rob'ui'éré hã 're sõré za'ra wa'aba mono nherẽ, aima waihu'u za'ra wa'aba õ wa, duré tiwaihu'u pese na, za ab're hawi apâ te te 're ida'ahâiwa'utu mono zé hã, aima waihu'u za'ra wa'aba õ wa. 25'Re ihâimana u'âsi mono hã ab're hawi apâ te te 're da'ahâiwa'utu mono wamhã, hâiwa ãma romhuri'wa norĩ ne, te za oto 're dahâimana u'âsi za'ra, dasina 're damro za'ra mono ãna. 26Marĩ, wa za duré aima waihu'u za'ra wa'wa, 're dadâ'â za'ra mono pari, apâ 're idanomro mono zé wasu'u na. Wede zapore iro'o na ma tô ãma rob'ui'éré, Mozési hã. E niha 're sõré za'ra wa'aba mono nherẽ, aima waihu'u za'ra wa'aba õ di. Ãne ma tô Mozésihi ma siwasu'u, 'Re ihâimana u'âsi mono hã: “Wa hã Abra'ãhã nhib'apito, wa 're ĩhâimana u'âsi, duré Izaquihi nhib'apito, duré Zacoho nhib'apito.” Ãne ma tô Mozésihi ma siwasu'u, 'Re ihâimana u'âsi mono hã, Abra'ã norĩ uirĩ na nherẽ. 27Wahi'rata norĩ hã dawi 're dâ'â za'ra mono nherẽ, 'Re ihâimana u'âsi mono wi, 're dâ'â za'ra mono õ di. Tahawa, ma tô Isib'apito za'ra na siwasu'u. Dâ'â u'âsi 're hâimana za'ra mono 'wa'âhã, Isib'apito na aré siwasu'u õ di. Ãne wa, ma tô rosa'rata na ãma i'upa za'ra wa'wa, ab're hawi apâ 're idahâiwa'utu za'ra mono õ na hã.

'Re ihâimana u'âsi mono nhimiroti hã danhipai u ipire uptabi wasu'u

Mateu 22.34-40; Luca 10.25-37

28Tawamhã 'Re ihâimana u'âsi mono nhimiroti 'rata na rob'ui'éré na dama rowahutu'wa hã ma tô ãma mreme wapa, da'rata isa hã. Zezusi hã saduseu norĩ ma, te te rowasu'u wẽ wa, te ãne sadanha:

— 'Re ihâimana u'âsi mono nhimiroti hã e ma hã te tihâiba, uburé dama ipire uptabi hã.

29Tawamhã Zezusi hã ma tô ãma sada'â asa:

— 'Re ihâimana u'âsi mono nhimiroti, danhipai u ipire uptabi hã ãne: “Izaraéu nhihudu norĩ, ma'ãpé ĩwapari pese za'ra wa'aba za. 'Re ihâimana u'âsi mono hã Wanhib'apito hã, misire danhib'apito uptabi, te 're hâimana. 30Tahawa, Asib'apito 're hâimana aba mono wa, te za asiwi 're isawi pese za'ra wa'aba mo, sena na. Taha zarina, te za isimiroti na ãma 're irosa'rata u'âsi za'ra wa'aba mo. Taha zarina, te za duré asimi'ẽ na tãma 're iromhuri u'âsi za'ra wa'aba mo.” Ãne isimiroti hã danhipai u ipire uptabi hã. 31Ãne duré isimiroti hâiba amo hã aiwa ipire uptabi hã: “Uburé te za 're idazawi pese za'ra wa'aba mo. Marĩ iwẽ zô asima 're asõpré wa'aba mono ne, te za duré uburé dama zama sô 're asõpré wa'aba mo, iwẽ zô.” Ã norĩ si isimiroti hã, ipire uptabi zahuré hã. Isipai u hã roti hã 'maihâimana õ di, ipire uptabi hã.

32Tawamhã rowahutu'wa hã te asa tãma tinha, ãne:

— Tane tô rowahutu'wa. Tô sena uptabi, asimirowasu'u hã. Misire danhib'apito uptabi te 're hâimana, 'Re ihâimana u'âsi mono hã. Ni'wa hã 're hâimana mono õ di, isipai u hã. 33Tahawa, wa za tô wa te 're sawi pese za'ra, 'Re ihâimana u'âsi mono hã. Taha zarina, wa za isimiroti na wa te ãma 're rosa'rata u'âsi za'ra. Wa za duré wanhimi'ẽ na wa te tãma 're romhuri u'âsi za'ra. Wa za duré wa te 're dazawi pese za'ra. Marĩ iwẽ zô wasima 're iwanhopré mono ne, wa za uburé dama zama sô 're wanhopré, iwẽ zô. Wa norĩ hã wa za wanhimizama hã duré wanhimarĩ hã wa te tãma 're sõmri za'ra, 'Re ihâimana u'âsi mono ma, da te tãma 're zata za'ra mono da, izatazém na. Ãne wamhã, tãma wẽ di, 'Re ihâimana u'âsi mono ma. Tane nherẽ, maparane isimiroti hã ipire uptabi hã wa te 're 'madâ'â pese za'ra mono wamhã, tãma wẽ uptabi di za.

34Tawamhã rowahutu'wa hã te te tãma ãma uwaimrami wẽ wa, ma duré Zezusi hã tãma waihu'u:

— Tane tô. A hã, 'Re ihâimana u'âsi mono, da'ãma 're isib'a'uwẽ mono zém nhiti, romhâ na aihâimana õ di, ãhã na hã.

Taha parimhã, ni'wa hã te te sadanharĩ na sahu õ di oto, Zezusi hã tinhimiroti na te te ãma upai õ wa.

Danho'reptui'wa na, Zezusi te te ida'azadanharĩzém na rowasu'u

Mateu 22.41-46; Luca 20.41-44

35Tawamhã bâtâ na te Zezusi hã dama rowahutu, 'Re ihâimana u'âsi mono nhorõwa 'ri 'wawi, wa'ra 're. Tawamhã te te dama rowahutu ré, te da'mahâ:

— E niha rowahutu'wa norĩ hã te te dama 're rowasu'u za'ra, Dawihi nhihudu 're imorĩ na hã, 'Re ihâimana u'âsi mono te te ipisutu na hã Danho'reptui'wa da. 36Duréihã apito Dawi hã ma tô danho'reptui'wa na ãma rob'ui'éré, 'Re ihâimana u'âsi mono hã Tipẽ'ẽzani na te te tãma iwaihu'uzéb zarina. Ãne ãma irob'ui'éré hã:

“'Re ihâimana u'âsi mono hã ma tô Ĩnhib'apito ma tinha, ãne: ‘Ĩ'rata te za 're asãmra mo, ĩnhimire niwĩ dama aipire na ĩsiré 're aihâimana u'âsi mono da. Asitob'ru norĩ nhiptetezé hã wa za te tiwi 're a'uprosi, wapu na aima 're hâimana za'ra mono da oto, duré aima sib'uwa na 're hâimana za'ra mono da oto.’ ”

37— Danho'reptui'wa da hã tinhib'apito na ma tô sisi, Dawi hã. Isib'apito 're morĩ nherẽ, e niha te za isa'u si poto nherẽ, Danho'reptui'wa da hã isihudu na 're hâimana.

Tawamhã Zezusihi nhimiroti hã wẽ wa, ma da'ahâ na wapari ze za'ra ni.

Dama rowahutu'wa norĩ hâimanazém na rowasu'u

Mateu 23.1-36; Luca 20.45-47

38-39Tawamhã Zezusi hã ma duré dama waihu'u, ãne:

— Ma'ãpé rowahutu'wa norĩ hâimanazé hã waihu'u za'ra wa'aba. Ta norĩ hã uza pa ré, 're inomro mono da si, tãma iwẽ za'ra hã. Duré dama pire na 're hâimana za'ra mono wa, 'ri nhi'riti wa, da te dasina 're i'ubumroi mono zéb ãma, da te 're iwazéb za'ra mono da si, ma tô te te sima 're wẽ za'ra. Duré dama ipire norĩ simasisizém na 're si'ubumroi mono da si, tãma iwẽ za'ra hã, rowahutuzéb ãma duré 'ri para dasiré 're idasaihuri mono zéb ãma hã. 40Dama rowahutu'wa zahã, te sadawa nhipese na pi'õi mrotõ norĩ wi, isimarĩ na 're sipsaihuri za'ra. Tane nherẽ, te ta norĩ hã danho'a 'Re ihâimana u'âsi mono ma 're mreme zusi hâ, 're hâimana wẽ uptabi za'ra mono newa. Tahawa, te te dama 're irob'manharĩ za'ra mono zém nhipai u, te za 'Re ihâimana u'âsi mono hã te te tãma 're rob'manharĩ za'ẽtẽ za'ra.

Pi'õi mrotõ nhoprubzé wasu'u

Luca 21.1-4

41Tawamhã 'Re ihâimana u'âsi mono ma, rob'uiprazé da te 're iséme mono zéb 'rata, te nhamra Zezusi hã, 'ri 'wawi wa'ra 're. Rob'uiprazé, da te nasi séme za'ra ré, te da'ab'madâ. Isibro pese norĩ hã, ahâ na te nasi séme za'ra, rob'uiprazé hã sa'ẽtẽ na. 42Taha ré, ma tô wi pi'õi mrotõ hã, isibrob'õ hã. Tawamhã rob'uiprazé isapotore hã ma tô tiza, surure nherẽ. 43-44Tawamhã tisiré 're inomro mono norĩ zô, te sima sô tihârâ za'ra, Zezusi hã. Ãne te tãma rowasu'u za'ra:

— Tô sena ã pi'õi mrotõ hã sibrob'õ nherẽ, ma tô tinhoprubzém na uburé da'a'rãnhipa. Isiré iséme'wa norĩ hã rob'uiprazé, nasi tãma isi'atarẽme za'ra si, te nasi sé. Tanei õ di, pi'õi mrotõ hã. Simarĩ õ nherẽ, tihâimanazéb da, te te aré itédé hã ma tô ibâre tãma tisõ, wahuré. Ãne wamhã, ma tô tinhoprubzém na uburé da'a'rãnhipa.

Currently Selected:

Marcu 12: xavBP

Highlight

Copy