Marcu 11

Zezusi hã Zeruzalẽ u, isébrézé wasu'u

Mateu 21.1-11; Luca 19.28-40; Zuwã 12.12-19

1-2Tawamhã Zezusi norĩ hã Zeruzalẽ u si'aba'réi wamhã, ma tô a'â aihutu, Oriwera na ẽtẽ 'rãihâ nhisi u. Ẽtẽ 'rãihâ 'rata, te 'ri wa'õno hã 're hâimana zahuré, Befazé na iwamri norĩ hã, Betãnha hã me. Tawamhã Zezusi hã sisõwa ma tô tisiré 're inomro mono norĩ hã 'mazatõrĩ zahuré maparane. Ãne te tãma rob'ru zahuré:

— Õwa te za oto ane wa'wa, 'ri wa'õtõ u, asõ're uwaibaba wa'aba. Ãma aimasisi aba wi, awa'awi te za awaru po'repore hã isõpẽtẽ 'wa, iprédupté hã, zahadu ni'wa hã nimomo ãma imorĩ'õ hã. Da te ãma wasisi haré, te za. Tawamhã da te ãma iwasisizé hã te za iwasihui wa'wa, we ĩma saprõni aba da. 3Ni'wa hã ãne te te asadanharĩ aba wamhã: “E marĩ da, ma iwasihui wa'wa, ãma iwasisizé hã,” tawamhã asa te za ãne tãma iwaihu'u 'wa: “Wanhib'apito hã marĩ õ wa, ãma morĩ da, wa tãma wasihu ni. Te za we aima ãma siri su'u apâ.” Ãne te za tãma ĩzadawa wasu'u wa'wa, itede'wai ma.

4Tawamhã te oto sô tineb zahuré, awaru po'repore zô. Simasisi wi, awaru po'repore ma tô sõpẽtẽ zahuré. 'Ridawa 'rata, te wasisi haré za. 5Te te wasihu zahuré wamhã, ma tô ni'wam norĩ hã ãma 'mahârâ za'ra, i'rata isimasam norĩ hã:

— E marĩ te a norĩ wa'wa hã i'manharĩ 'wa. E marĩ da, te asapa'abâ iwasihui wa'wa, awaru po'repore hã.

6Tawamhã asa ma tô dazada'âbâ zahuré, Zezusi hã te te tãma iwaihu'u zahuré zém na. Tahawa, ma tô tãma 'ru zahuré ni, awaru po'repore hã te te saprõni zahuré da, Zezusihi ma. 7Tawamhã te te ãwisi zahuré wamhã, awa'awi ma tô tãma ba'ubu zahuré, tisi'ubuzém na. Taha pari, ma tô ãma darõno, Zezusi hã. 8Ãma sarõtõ wamhã, da'ahâ na ma tô bâdâdi hã tãma waptâ za'ra ni, dasi'ubuzém na. Ni'wam norĩ hã rom na isupo sui wawẽ te te i'manhizâri za'ra na, ma duré tãma waptâ za'ra. 9Tawamhã Zezusihi nhowa isi'aba'ré norĩ hã isarina isi'aba'ré norĩ zama, mreme 'rãihâ na te sima 'mahârâ za'ra:

— 'Re ihâimana u'âsi mono ãma 're wawata za'ra wa'aba mono. Isadawa para we imorĩ ma, iwẽ si te te tãma 're pisutu u'âsi mono neza. Apito Dawihi ma, te te iropisutuzéb zarina, te we oto mo, watẽmeb za'ra, Wanhib'apito na 're hâimana mono da. 10'Re ihâimana u'âsi mono hã tô sena sõprub di.

11Tawamhã Zeruzalẽ u oto wisi wamhã, 'Re ihâimana u'âsi mono nhorõwa 'ri u, ma ãzé Zezusi hã, te te robzabu da. Tame tiwi hâiwahâ wa, te oto mo, Betãnha na 'ri wa'õtõ nhisi u, tisiré norĩ me, aibâ 12 na ihâiba za'ra norĩ me.

Figuera wede ma, Zezusi te te inharĩzé wasu'u

Mateu 21.18-19

12Tawamhã bâtâ amo na Betãnha hawi te apâ ai'aba'ré, Zeruzalẽ u. Morĩ ré, ma tô mra hã tiwĩ, Zezusi hã. 13Tawamhã si'aba'réi ré, romhâ ré, ma wede hã tisã, figuera wede hã. Sui hâza'õtõ wa, te sô mo, 'rãi õ'umnhasite. Tawamhã 'râwi isu si ma tô 'madâ. I'rã hã robaba di. Zahadu a'amo hã watobro õ di, i'rã uptabi zéb da hã. 14Tawamhã Zezusi te wede ma tinha, ãne:

— Ai'rã hã da te 're huri mono õ di za oto. Ai'rã'õ u'âsi, te za oto 're asa mo.

Tawamhã ma tô mreme wapari za'ra, wede ma, te te inharĩzém na hã, isiré 're inomro mono norĩ hã.

'Re ihâimana u'âsi mono nhorõwa 'ri hawi, Zezusi te te idazate mono zé wasu'u

Mateu 21.12-17; Luca 19.45-48; Zuwã 2.13-22

15Tawamhã Zezusi norĩ hã ma tô Zeruzalẽ u apâ aihutu. 'Re ihâimana u'âsi mono nhorõwa u, ma tô asisi, 'ri 'wawi wa'ra 're. Tame te da te 're rowede za'ra. Ni'wam norĩ hã te duré te te dawi 're rob'uipra za'ra. Tawamhã dama rowede'wa norĩ hã ma tô Zezusi hã te te sate, rob u. Te te dawi 're irob'uipra za'ra mono norĩ zama, te te duré sate. Duré rob'uiprazém na te te dawi ãma 're isaprĩ za'ra mono norĩ wi, ma wedeza hã te te tiwi anhamra, duré utu'u wede'wa norĩ simasisizéb zama. 16Te duré dawi rosawi, 'ri nho're wa'wai baba, da te ro'wasari tõ da. 17Te duré dama rowasu'u, da te ãma irob'ui'érézéb zarina, ãne:

— Duréihã wahi'rada hã ma tô ãne na rob'ui'éré ibaihâ na, 'Re ihâimana u'âsi mono mreme na: “Ĩnhorõwa hã iwa ĩma 're idamreme zusi mono zém na, te za da te 're sisi za'ra, 'ri hã.” Ãne te tinha. Tane nherẽ, a norĩ wa'wa hã ma tô iwa asima ãma 're irob'manharĩ wasété za'ra wa'aba mo. Tahawa, danhibrom na dawi 're isipsaihuri za'ra mono norĩ, 're isi'ubumroi mono zém ne, te oto 'ri hã 're sa, wasété uptabi na.

18Tawamhã aibâ norĩ hã ma tô iwasu'u hã wapari za'ra, sasedoti ipire norĩ hã, rowahutu'wa norĩ zama. Ãne hã te te wapari za'ra wamhã, ma tô ta norĩ hã sima ãma rosa'rata za'ra, te te siwi wĩrĩ da. Tane nherẽ, Zezusihi nhimiroti na, da'ahâ na ãma 're dawata za'ra mono wa, te te sima danhimimnhasi za'ra wa, te te siwi wĩrĩ õ di a'â.

19Tawamhã bâdâ sébré wi, te Zezusi norĩ hã Zeruzalẽ hawi apâ ai'aba'ré, Betãnha na daza'ru nhisi u.

Figuera wede wasu'u

Mateu 21.20-22

20Awẽm na mararé si'aba'réi wamhã, ma tô Zezusi norĩ hã 'madâ'â za'ra, figuera wede hã, uburé iwede 'ré na. 21Tawamhã Pedru hã ma tô ãma po're puru, Zezusi hã wede ma, te te inharĩzém na hã. Tawamhã ãne te Zezusihi ma tinha:

— Rowahutu'wa, 'madâ'â. Õhõta figuera wede. Ahâmhâ tãma inharĩ hã ma tô tiwede'ré.

22-23Tawamhã Zezusi te asa tãma tinha, ãne:

— Tô sena wa aima waihu'u za'ra wa'wa. 'Re ihâimana u'âsi mono si, te za asiwi 're i'umnhasi za'ra wa'aba mo, te te 're aipawaptob za'ra wa'aba mono da. Tawamhã ã ẽtẽ 'rãihâ ma, nharĩ za'ra wa'aba wamhã, uihâ na sisa'o'o da, âi ba sime da, te za ãma aima uwaimrami za'ra wa'wa. 'Râwi asiwawã za'ra wa'aba õ di za, za te te aima ãma i'uwaimrami za'ra wa'aba zém na hã. Tãma inharĩ za'ra wa'aba zéb uwaibaba, za te te ãma aima i'uwaimrami aba na, te za ãma isaze za'ra wa'wa. Tawamhã te za tô te te ãma aima 're a'uwaimrami 'wa, 'Re ihâimana u'âsi mono hã. 24Tahawa, wa aima waihu'u za'ra wa'wa. 'Re ihâimana u'âsi mono ma, 're aimreme zusi aba mono wamhã, duré marĩ na tiwi 're rowaptẽrẽ za'ra wa'aba mono wamhã, za te te ãma aima 're i'a'uwaimrami aba mono zém na, te za ãma 're isaze za'ra wa'aba mo. Tawamhã te za tô te te ãma aima 're a'uwaimrami u'âsi 'wa. 25-26'Re ihâimana u'âsi mono ma, 're aimreme zusi aba mono da wamhã, te za a'â aiwi 're da'ru simani za'ra wa'wa. Dawasédé hã da'ãma 're 'madâ'â za'ra wa'aba mono õ di za oto. Tawamhã Aimama 'wa hã hâiwa ãma 're isãmra mono hã te te duré ai'ãma 're 'madâ'â za'ra wa'aba mono õ di za oto, aiwasété 'wa hã.

Zezusi hã ipisutu'wai ãma, da te dasiwi isadanharĩzé wasu'u

Mateu 21.23-27; Luca 20.1-8

27Tawamhã ma tô apâ aihutu Zeruzalẽ u, Zezusi norĩ hã. 'Re ihâimana u'âsi mono nhorõwa ãma, 'ri 'wawi wa'ra 're, te 're mo, Zezusi hã. Tame 're morĩ ré, ma tô aibâ norĩ hã itẽme aihutu, sasedoti ipire norĩ hã, duré dama rowahutu'wa norĩ hã, duré zudeu norĩ ma roti'wa norĩ hã. 28Tawamhã ãne te siwi sadanha:

— E 'wa sadawa para, te bété ãne hã marĩ hã dama 're i'ab'manharĩ mo. E 'wa hã, aipisutu'wa pâ.

29Tawamhã Zezusi te asa tãma nharĩ za'ra, ãne:

— Wa hã wa za duré asadanharĩ na aima ãma wa'rãmi za'ra wa'wa. We ĩma waihu'u za'ra wa'aba wapsi, wa za duré wa hã aima wasu'u za'ra wa'wa za, ĩpisutu'wa hã. 30Ma'ãpé, we ĩma waihu'u za'ra wa'aba. E 'wa sadawa para, te Zuwã Batista hã â dawabzuri te te dama 're ab'manharĩ. E 'Re ihâimana u'âsi mono zadawa para. E taré dazadawa parap si.

31Tawamhã 'râwi te sima nharĩ za'ra, ãne:

— E niha, wa za tãma waihu'u za'ra ni, õne wamhã. 'Re ihâimana u'âsi mono zadawa para, â dawabzuri te te dama 're i'ab'manharĩ mono na, wa te tãma waihu'u za'ra wamhã, te za wazadanharĩ na sahu za'ra, ãne: “E niha bété, Zuwã Batistaha nhimirowasu'u hã 're saze za'ra wa'aba mono õ di.” 32Tazahã dazadawa parap si, â dawabzuri te te dama 're i'ab'manharĩ mono na, wa te tãma waihu'u za'ra wamhã, te za wazada tazahi za'ra ni za.

Ãne te 'râwi sima nharĩ za'ra, dapipa te, Zuwã Batista hã tô sena 'Re ihâimana u'âsi mono zadawa 'mahârâ'wa 're imorĩ na, da te 're saze za'ra mono wa. 33Tahawa, sada dazahi za'ra õ'umnhasite, sina pahi za'ra wa, ma tô duré Zezusihi ma waihu'u na wa'rãmi za'ra, ãne:

— Ni'wa sadawa para, ma tô Zuwã hã â dawabzuri hã te te dama 're ab'manharĩ. Wa norĩ hã wa te waihu'u za'ra õ di, ipisutu'wa hã.

Tawamhã Zezusi ma asa ãma tãma wa'rãmi za'ra, ãne:

— A norĩ wa'wa hã ĩma waihu'u za'ra wa'aba õ nherẽ, wa hã te duré aima waihu'u za'ra wa'aba õ di za, ni'wa sadawa para, marĩ hã te dama 're i'ab'manharĩ mono na.

Currently Selected:

Marcu 11: xavBP

Highlight

Copy