Tiagu 2

Aiwapsi danhimizawizém na 're idahâimana za'ra mono zém na rowasu'u

1Ĩsisãnawã norĩ, ãne wa za duré aima waihu'u za'ra wa'wa. Wanhib'apito Zezu Cristu hã rowa'a za'ẽtẽ ré, te 're hâimana u'âsi, wẽ uptabi na. Tawamhã isazei'wa 're aihâimana za'ra wa'aba mono nherẽ, dahâiba 'madâ'â zarina asiwi 're daba'a za'ra wa'aba mono õ di za, asimizawizém na hã. 2Ãté aibâ isibro pe hã te za ãzé ai'rã'õtõ aba ré, ẽtẽ waipo pré oru 'manharĩ na siptõmo hi wasisi ré, duré uza wẽ ré. Tawamhã ãté aibâ hã te za duré ãzé isimarĩ'õ hã, uza wasété ré. 3Ãté tawamhã i'uza wẽ ré ma, te za tãma i'manharĩ 'wa ãne: “Ãhãta wedeza iwẽ. Ãme asãmra.” Taha pari, te za duré isimarĩ'õ ma i'manharĩ 'wa ãne: “Hâiwim haré asa na.” Niha wamhã, “Ĩpapara asãmra, ti'ai wa.” 4Ãne dama 're 'manharĩ za'ra wa'aba mono wamhã, aiwab õ di, 're idazawi za'ra wa'aba mono zé hã. Asimirosa'rata wasété zarina, te za asiwi 're idahâiba ba'a za'ra wa'aba mo, asimizawi za'ra wa'aba zém na hã.

5Ĩsisãnawã norĩ, ĩma i'asawi pese za'ra wa'aba norĩ, ma'ãpé ĩwapari pese za'ra wa'aba. Ti'ai ãma, simarĩ ãna 're ihâimana za'ra mono norĩ, ma tô 'Re ihâimana u'âsi mono hã pisutu za'ra, te te sina 're i'umnhasi za'ẽtẽ za'ra mono na si, 're hâimana za'ra mono da, duré da'ãma 're isib'a'uwẽ mono zéb 're rowẽ uptabi na i'rata 're hâimana u'âsi za'ra mono da, isawi'wa norĩ ma, te te tãma iropisutu za'ra zéb zarina. 6Tane nherẽ, ma tô a norĩ wa'wa hã isibrob'õ norĩ hã 're ihâiba wazéb'õ za'ra wa'aba mo. Ma'ãpé rosa'rata za'ra wa'aba. E 'wam norĩ hã te bété te te 're aiwati pese za'ra wa'wa. Duré e 'wam norĩ hã ma tô datẽme te te 're asimroi wa'wa, da'ãma rowairébé'wa norĩ u, ipipa na te te ai'ãma 're rowairébé za'ra wa'aba mono da. Isibro pese norĩ si, ma tô ãne na te te aima 're rob'manharĩ wasété za'ra wa'wa. 7E ta norĩ hã Asib'apito za'ra wa'aba nhisi hã te te 're waptẽrẽ wasété za'ra mono ã bâ bété, wẽ uptabi nherẽ, ta hã.

8Ibaihâ na te tihâiba, Danhib'apito uptabi nhimiroti hã 'Re ihâimana u'âsi mono nhimiroti hã. Isimiroti hã ãne: “Dahâiba mono bâ te za 're idazawi pese za'ra wa'aba mo. Taha zarina marĩ iwẽ zô, asima 're asõpré wa'aba mono ne, te za duré uburé iwẽ zô dama zama 're asõpré wa'aba mo.” Ãne ãma irob'ui'éré hã, ibaihâ na hã. Tawamhã ãne na isimiroti hã 're 'madâ'â pese za'ra wa'aba mono wamhã, wẽ di. 9Tane nherẽ, asimizawizém na asiwi 're daba'a za'ra wa'aba mono wamhã, te za aiwasété na 're aihâimana za'ra wa'aba mo. Ãhã wamhã, Wamama nhimiroti na asimizawizém na hã ãma tãma 're uwaimrami pese za'ra wa'aba mono õ di za. 10Ãté ni'wa hã Wamama nhimiroti, Mozésihi ma te te i'awaihu hã, te za misi ãma tizaihâ. Ãne wa, te za 'Re ihâimana u'âsi mono hã iwasédé hã ãma sa'ra, isimiroti mono bâ te te 're 'madâ'â pese za'ra mono õ wa. 11Ta hã ma tô ãne dama roti aré: “Aimro na asiwi 're asipsaihuri za'ra wa'aba mono õ di za.” Ma tô duré dama roti, ãne: “'Re danhimroi wa'aba mono õ di za.” Ãne isimiroti hã. Tane nherẽ, aimro na asiwi 're apsaihuri za'ra wa'aba mono õ nherẽ, oto 're danhimroi wa'aba mono wamhã, aiwasété na te za 're aihâimana za'ra wa'aba mo, Wamama nhimiroti hã 're 'madâ'â pese za'ra wa'aba mono õ wa. 12Isimiroti hã wapawapto'wa da, te wama 're hâimana za'ra, wawasédé hã wa te 're irẽme pese za'ra mono zéb da hã. Nimahã na te za wahâimanazém na te te 're wa'awaihu'u Wamama hã, isimiroti 'madâ'â pese 'wa na. Ãne wa, wa za wamreme wẽ na si wasima wa te 're rowasu'u u'âsi za'ra. Duré wahâimanazé iwẽ na si, wa za dama 're wahâimana u'âsi za'ra. 13Nimahã bâtâ na dahâimanazém na te te da'awaihu'u wapsi, da'ãma 're ipẽ'ẽzé za'ra mono õ norĩ ãma, pẽ'ẽzé õ di za, 'Re ihâimana u'âsi mono hã, ti'ab ré da'ãma 're isiwamri za'ra mono õ norĩ ãma hã. Da'ãma 're ipẽ'ẽzé u'âsi za'ra mono norĩ ãma si, te za ãma 're pẽ'ẽzé za'ra.

Zezu Cristuhu zazei'wa na 're idasiwasu'u za'ra mono zé wasu'u

14Ĩsisãnawã norĩ, ãne wa za duré aima waihu'u za'ra wa'wa. Ãté ni'wa hã te za taré dama 're siwasu'u, Zezu Cristuhu zazei'wa 're imorĩ na, marĩ iwẽ na te te 're dapawapto mono õ nherẽ. Tawamhã e te za sina uwaimra, tinho'reptuzé hã. Mare di. Te te sina uwaimrami õ di za. 15-16Ãté wasiré isazei'wa norĩ wi, te za marĩ zô tiwi 're ro'wanhi'riti za'ra, i'uzazéb zô, duré isazéb zô, aibâ norĩ wi, duré pi'õ norĩ wi. Tawamhã ãne ta norĩ, 're nharĩ za'ra wa'aba mono wamhã: “Ma'ãpé, rowẽ na si 're ai'ubumroi wa'aba mono, ai'uza wẽ ré si, duré asai wẽ na si,” ãne wamhã, marĩ zô dawi 're iro'wanhi'riti za'ra mono zéb uwaibaba, dama ãma 're uwaimrami za'ra wa'aba mono õ wamhã, taré dama 're inharĩ za'ra wa'aba mono zé hã za. Ãne wamhã, e te za da te 're aiwẽsãmri za'ra wa'wa. Mare di. 17Tane, ni'wa hã Zezu Cristuhu zazei'wa na dama 're siwasu'u mono nherẽ, marĩ iwẽ na te te oto 're dapawapto mono õ wamhã, taré dama 're isiwasu'u mono zé hã te za 're hâimana, marĩ dai õ na.

18Ãté ni'wa hã te za ãne dama siwasu'u: “Wa hã marĩ iwẽ na, wa tô te 're da'apawaptob u'âsi. A hã ma tô dama 're asiwasu'u mo, Zezu Cristuhu zazei'wa 're aimorĩ na.” Ãté ãne te za dama tinha, ni'wa hã. Tawamhã wa hã wa aré asa tãma waihu'u, ãne: “Ni'wa hã Zezu Cristuhu zazei'wa na dama 're siwasu'u mono nherẽ, iwẽ na te te 're da'apawapto mono õ wamhã, tô senai õ di, dama 're isiwasu'u mono zé hã. Wa hã Zezu Cristuhu zazei'wa, wa 're mo. E niha te za ãne wamhã, dasiwi ĩwaihu'u ni, tô sena na, isazei'wa 're ĩmorĩ na. Marĩ iwẽ na te 're ida'apawapto mono zéb zarina si, te za dasiwi ĩwaihu'u ni, tô sena na dama 're ĩsiwasu'u mono na, Zezu Cristuhu zazei'wa tô 're ĩmorĩ na hã. 19Misire uburé Danhib'apito uptabi hã te 're sãmra. Ãne na hã aima waihu'u pese di. Taha wasu'u na ma tô ãma isaze. Wa'uburé norĩ zama ma tô misire Danhib'apito uptabi wasu'u hã waihu'u za'ra. Tahawa, te pipa te, 're rẽrẽ'ẽ za'ra. 20E niha te rosa'rata ãna 're aihâimana mo. Ãté ni'wa hã te za dama 're siwasu'u, Zezu Cristuhu zazei'wa 're imorĩ na. Tane nherẽ, marĩ iwẽ na te te 're da'apawapto mono õ wamhã, marĩ dai õ di za, dama 're isiwasu'u mono zé hã. Ma'ãpé, ãne hã waihu'u. 21Duré ma'ãpé ãma rosa'rata pese, wahi'rada Abra'ãhã wasu'u na. E marĩ wa, ma tô 'Re ihâimana u'âsi mono hã wahi'rada hã te te 're wẽsãmri. Ti'ra Izaqui hã te te tiwi sawi ãna, te aré tãma tiwĩ, ẽtẽ za'ra nhisiwimhã, 'Re ihâimana u'âsi mono ma ãma tãma isõprubzéb da, te te i'ruzéb zarina. Tahawa, ma tô wẽsã. 22Abra'ã hã ma tô mreme 'manha, te te sina 're umnhasi za'ẽtẽ mono wa, 'Re ihâimana u'âsi mono te te tãma iropisutuzém na, isihudu hã ahâ da. Imreme hã te te i'manharĩzéb zarina, wa tô ãma waihu'u za'ra ni, 'Re ihâimana u'âsi mono nhimiropisutuzé hã tô sena te te sina 're i'umnhasi mono zém na. 23Tô sena, Abra'ãhã wasu'u na da te ãma irob'ui'éré hã. Ãne ãma irob'ui'éré hã: ‘Abra'ã hã ma tô 'Re ihâimana u'âsi mono hã, Danhib'apito uptabi na waihu'u. Ma tô duré te te sina 're umnhasi za'ẽtẽ, 'Re ihâimana u'âsi mono, te te tãma iropisutuzém na. Tahawa, ma tô 'Re ihâimana u'âsi mono hã te te 're wẽsãmri, Abra'ã hã.’ Ãne ãma irob'ui'éré hã. Duré, Abra'ã hã tãma sawi pese wa, ma tô sima sisi, tisiwadi uptabi na.” Ãne wa aré asa tãma waihu'u. 24Taha wasu'u zarina, ma'ãpé marĩ hã ãma waihu'u za'ra wa'aba. Zezu Cristuhu zazei'wa na dama 're dasiwasu'u za'ra mono nherẽ, marĩ iwẽ na da te 're dapawaptob za'ra mono õ wamhã, e te za te te 're da'awẽsãmri, 'Re ihâimana u'âsi mono hã. Mare di. Wanhib'apito zazei'wa 're danomro mono wamhã, te za marĩ iwẽ na da te 're dapawaptob za'ra. Tawapsi, te za 'Re ihâimana u'âsi mono hã te te 're da'awẽsãmri.

25Ra'abihi zama ma tô wẽsã, 'Re ihâimana u'âsi mono hã isimipawapto wẽ zém na, pi'õ tihâiba iwa'âbâ zô te te 're isõmri mono hã. Ta hã ma tô duréihã Izaraéu nhihudu norĩ hã pawaptob zahuré, wapsãi'a'wa norĩ hã, pi'uriwi ti'ai wẽ zô robzabui'wa norĩ hã. Tinhorõwa u ma tô 'mazasi zahuré, tame sõtõ zahuré da, duré sa zahuré da. Bâdâdi amo na pi'uriwi apâ datẽme neb zahuré da, ma tô duré pawaptob zahuré. Tahawa, ma tô 'Re ihâimana u'âsi mono hã wẽsã pi'õ hã, aibâ norĩ hã te te pawapto wẽ zahuré wa.

26Wa za duré aima romnhimiré'é za'ra wa'wa. Ni'wa hã dâ'â wamhã, oto ipẽ'ẽzani hã tãma hâimana õ wa, ihâiba hâ si te za tihâiba. Tane ni'wa hã Zezu Cristuhu zazei'wa na dama 're siwasu'u mono nherẽ, marĩ iwẽ na dapawaptob ãna 're hâimana mono wamhã, dama 're isiwasu'u mono zép si, te za taré tãma 're hâimana.

Currently Selected:

Tiagu 2: xavBP

Highlight

Copy