Hebreu 7

Mequizédéquihi wasu'u

1Ta hã Mequizédéqui hã Salẽ na 'ri nho'õmo nhisi ãma danhib'apito, ma tô dama 're hâimana. Sasedoti na te duré dama 're hâimana, 'Re ihâimana u'âsi mono ma, da'ãma romhuri'wa na. Danhipai u dama pire uptabi na 're ihâimana mono ma, romhuri'wa na te 're hâimana. Duréihã Abra'ã norĩ hã, danhib'apito norĩ, maparane si'uiwa na te te ãma ai'uté za'ra pari, apâ si'aba'réi ré, ma tô sõpẽtẽ Mequizédéqui hã, Abra'ã hã. Tahawa, ma tô mreme pire na Mequizédéqui hã ãma mre, 'Re ihâimana u'âsi mono ma, marĩ hã iwẽ si te te tãma 're apisutu mono da, Abra'ãhã ma hã. 2Tawamhã Abra'ã norĩ hã te te da'ãma ai'uté za'ra pari, danhibro te te i'wasari hã ma tô Abra'ã hã tinhiptõmo hi za'ratazém hawimhã misi waze, te te ipo hã. Taha parimhã, ma tô misi tãma tisõ, Mequizédéquihi ma. Mequizédéquihi nhisi hã: “Danhib'apito, sena na si da'madâ'â'wa” te wasu'u. Duré iwaptẽrẽzéb amo hã “Salẽ ãma danhib'apito”, iwaptẽrẽzéb amo hã. Salẽ hã “rowẽ” te wasu'u. Taha zarina, Salẽ ãma danhib'apito na iwaptẽrẽzé hã, “Danhib'apito, dama rowẽ nhomri'wa” te wasu'u. 3Taha mama nhisi ui'éré hã hâimana õ di, ibaihâ na hã, ina nhisi me. Ihi'rata norĩ nhisi ui'éré zama, hâimana õ di duré. Iwaptã'ãzém na ãma irob'ui'éré hã hâimana õ di duré, idâ'âzém na irob'ui'éré na zama. 'Re ihâimana u'âsi mono 'ra ne, te pire na dama 're hâimana u'âsi ta hã, Wanhib'apito ne, sasedoti na da'ãma romhuri'wa 're hâimana u'âsi mono wa.

4Mequizédéqui hã dama pire uptabi di. Ma'ãpé ãne na ãma rosa'rata pese za'ra wa'aba. Abra'ã wahi'rata uptabi hã ma tô danhibro hã Mequizédéquihi ma po'o, pire na dama 're hâimana mono wa, ta hã. Te te da'ãma ai'uté za'ra pari, danhibro te te apâ siré i'wasari hã tinhiptõmo hi za'ratazém hawi ma te misi po'o. Taha pari, ma tô, tô misi tãma tisõ, Mequizédéquihi ma hã. 5Levita norĩ hã sasedoti na dama 're ihâimana za'ra mono hã, 'Re ihâimana u'âsi mono nhimiroti na Mozési te te ãma irob'ui'éré zarina, te za danhibro hã te te dawi 're waibu, tisiré a'uwẽ norĩ wi, tô Izaraéu nhihudu norĩ wi. Danhibro hã danhiptõmo hi mono bâ da te 're po'o za'ra mono parip si, misi te za da te tãma 're sõmri za'ra, levita norĩ ma hã. Abra'ãhã nhihudu si, siré 're hâimana za'ra mono nherẽ, te za te te tãma 're sõmri za'ra, levita norĩ ma hã. 6Tawamhã Mequizédéqui hã Levihi nhihudu, 're hâimana mono õ nherẽ, ma tô Abra'ã hã danhibro hã tãma tisõ. Tinhiptõmo hi mono bâ te te po'o mono pari, ma tô misi tãma tisõ. Tawamhã Mequizédéqui hã mreme pire na ma tô ãma mre, 'Re ihâimana u'âsi mono ma, iwẽ uptabi hã te te tãma 're apisutu mono da, Abra'ãhã ma hã. Taha ma, ma tô 'Re ihâimana u'âsi mono hã tãma ropisutu, duréihã. 7'Re ihâimana u'âsi mono hã iwẽ hã te te dama 're apisutu mono da, ni'wa hã da'ãma mreme wamhã, ta hã pire na dama 're ihâimana mono. Ãne hã wama waihu'u pese za'ra di. Tahawa, wa za ãne na ãma waihu'u za'ra ni, Mequizédéqui hã Abra'ãhã ma, pire na 're ihâimana mono zém na hã. 8Levita norĩ hã, sasedoti na da'ãma romhuri'wa norĩ hã te za tô te te dawi 're waibu danhibro hã, danhoprubzé da te tãma 're ipo'o za'ra mono hã. Tane nherẽ, te za uburé ta norĩ hã 're dâ'â za'ra, levita norĩ hã. Mequizédéquihi si, dâ'â ãna wama 're ihâimana mono ne, te wama 're hâimana sasedoti na hã, idâ'âzém na ãma irob'ui'éré hã ãma hâimana õ wa, ibaihâ na hã. 9-10Levi hã uburé sasedoti norĩ hi'rada te 're hâimana, uburé da'ãma romhuri'wa norĩ hi'rada, duré danhoprubzé te te dawi 're iwaibui mono norĩ hi'rada. Mequizédéqui hã Abra'ã te te sõpẽtẽ wamhã, Levi hã zahadu poto õ di. Tane nherẽ, te taha wamhã Abra'ãhã hâiba 're tihâiba, tihi'rata hâiba 'remhã. Tahawa, Abra'ã hã danhibro, Mequizédéquihi ma te te po'o wamhã, taha nhipai u ma duré Levi hã tãma po'o, Abra'ãhã hâiba 're, hâimana wa. Tawamhã Mequizédéqui hã Levihi ma zama pire na 're ihâimana mono zé, te wasu'u, ã hã.

11Duréihã 'Re ihâimana u'âsi mono hã ãma 're dahâimana wẽ za'ra mono da, tinhimiroti te te dama 're anhomri mono wamhã, ma tô duré sasedoti norĩ te te da'ãma 're iromhuri za'ra mono zéb da hã, te te dama 're awaihu'u. Sasedoti norĩ hã levita norĩ tinhimiromhuri na 'Re ihâimana u'âsi mono ma, te te ãma 're uwaimrami uptabi za'ra mono 'wa'âhã, taha zarina te aré 'Re ihâimana u'âsi mono hã te te 're da'awẽsãmri, dawasédé hã taha zarina te te da'ãma 're ab'madâ'â mono õ wa aré. Tane nherẽ, ta norĩ hã tinhimiromhuri na te te ãma 're uwaimrami uptabi za'ra mono õ di, 'Re ihâimana u'âsi mono ma hã. Tahawa, sasedoti ihâiba amo hã levita norĩ nhibrob're isébré hã te oto dama 're hâimana, Levihi nhihudu na 're hâimana mono õ nherẽ, duré Arãhã nhihudu na hã 're hâimana mono õ nherẽ. Mequizédéqui hã sasedoti na pire na dama 're ihâimana mono ne, te ta hã dama pire uptabi na 're hâimana oto. 12Duréihã sasedoti norĩ hã 'Re ihâimana u'âsi mono ma da'ãma romhuri'wa norĩ hã tinhimiromhuri na te te tãma ãma 're uwaimrami uptabi za'ra mono õ wa, ta norĩ nhibrob're sasedoti ihâiba amo hã ma tô duré ãzé. Sébré wamhã, ma tô duré 'Re ihâimana u'âsi mono hã tinhimiroti té hã isu dama tisõ, sasedoti norĩ hâimanazém na isimiroti 'rata na Mozési te te ãma irob'ui'éré nhowa're're. 13Ta hã sasedoti ihâiba amo hã danhowa're're isébré té hã, Wanhib'apito, te wasu'u. Ta hã Levihi nhihudu na hã 're hâimana mono õ di. Izaraéu 'ra hâiba amo nhihudu te 're hâimana. Niwamhã ni'wa hã isiré Izaraéu 'ra hâiba amo nhihudu hã sasedoti na dama 're hâimana mono õ di, isine da hã. Mare uptabi di. 14Wanhib'apito hã Zudaha nhihudu, te 're hâimana. Ãne hã dama waihu'u pese uptabi di, iwasu'u na hã. Mozési hã, Zudaha nhihudu norĩ ãma te te dama ãma rowasu'u õ di, sasedoti na te te da'ãma 're i'mairomhuri mono da hã.

Sasedoti ihâiba amo Mequizédéquihi ne, dama 're ihâimana mono zé wasu'u

15Ãhã wasu'u hã wama waihu'u pese za'ra di oto. E marĩ wa. Sasedoti ihâiba amo hã oto danhowa're're wama sébré za'ra wa, Mequizédéqui hã sasedoti na dama 're ihâimana mono ne, 'Re ihâimana u'âsi mono ma da'ãma romhuri uptabi 'wa da hã oto. 16'Re ihâimana u'âsi mono nhimiroti 'rata na Mozési te te ãma irob'ui'éré zarina, ma tô levita norĩ si, sasedoti na dama 're hâimana za'ra. E tawamhã Wanhib'apito hã Levihi nhihudu 're hâimana mono wa, ma tô ãzé, sasedoti na dama 're hâimana mono da. Mare di. Ta hã Levihi nhihudu 're hâimana mono õ di. E marĩ zarina, ma te bété tawamhã ãzé. Ta hã si'utõrĩ waihu'u õ wa, ma tô ãzé, sasedoti na dama 're hâimana u'âsi mono da. Nimahã na hã si'utõrĩ waihu'u õ di za tô, siptete uptabi wa, duré waihu'u pese uptabi wa. 17Duréihã, ma tô ni'wa hã ibaihâ na ãma rob'ui'éré iwasu'u na hã, 'Re ihâimana u'âsi mono, ti'ra ma te te irotizém na hã, ãne:

“A hã, sasedoti norĩ, dama 're ihâimana za'ra mono ne, te za sasedoti na dama 're aihâimana u'âsi mo, duréihã Mequizédéqui hã sasedoti na pire na dama 're ihâimana mono ne.”

18-19Ãne wa, 'Re ihâimana u'âsi mono nhimiroti 'rata na Mozési te te ãma irob'ui'éré hã pire na dama 're hâimana mono õ di oto. E marĩ wa. Marĩ dai õ wa oto, te te ãma 're ida'anho'reptui mono zéb da hã. 'Re ihâimana u'âsi mono nhimiroti 'rata zarina, da te dasina tãma 're uwaimrami waihu'u za'ra mono õ wa, taha na te te sima da'ãma 're aroti mono õ di, dawasédé hã te te oto da'ãma 're i'ab'madâ'â mono õ zéb da hã, duré taha zarina te te 're ida'awẽsãmri mono da hã. Tahawa, aimawi hã iwẽ uptabi hã ma tô 'Re ihâimana u'âsi mono hã wama pisutu za'ra oto, sô 're iwanhimipari za'ra mono zéb da hã: Cristuhu si te oto sasedoti na pire uptabi na dama 're hâimana. Taha zô si wasina 're wanhimipari za'ra mono wamhã, wa za itẽme 're wasihutu wapẽ'ẽ 'remhã 'râwi, 'Re ihâimana u'âsi mono u hã.

20-21Duréihã sasedoti norĩ hã da'ãma romhuri'wa da, 're sisisi mono wamhã, tinhisi na mreme pire na te te tãma 're ropisutu za'ra mono õ di, 'Re ihâimana u'âsi mono hã. Tazahã, Zezusi hã dama sisasedoti da, 'Re ihâimana u'âsi mono te te oto pisutu wamhã, mreme pire na ma tô tãma ropisutu, ãne:

“Wa hã Danhib'apito uptabi, ĩmreme ipire na wa za oto aima ropisutu, ãne: ‘A hã sasedoti na te za dama 're aihâimana u'âsi mo. Niwamhã te dawi aiwazere õ di za, ta hawimhã.’ Ãne wa aima ropisutu. Ĩnhimiropisutu na te aima ãma isaprĩ da hã, mare uptabi di za.”

22Ãne na Zezusihi ma, timreme ipire na te te tãma ropisutu wa, 'Re ihâimana u'âsi mono te te dama iropisutuzép té iwẽ uptabi hã te wasu'u. Duréihã 'Re ihâimana u'âsi mono te te dama iropisutuzém nhipai u iwẽ uptabi hã, te wasu'u.

23Duréihã sasedoti norĩ hã ahâ uptabi na ma tô sisõwa're're te te da'ãma 're romhuri za'ra, 're si'utõrĩ mono sidâpâsi. 24Tazahã, Zezusi hã nimahã na tidâ'â na te te sahu õ di za. Õne u'â te za 're hâimana u'âsi. Tahawa, sasedoti na te za tô dama 're hâimana u'âsi oto, watobro waihu'u ãna ni'wai ma. 25Tahawa, te te 're da'anho'reptui waihu'u pese mono di ta hã, da te dasina 're i'umnhasi za'ra mono zéb zarina, 'râwi dapẽ'ẽ 're itẽme 're idasihutu mono norĩ hã, 'Re ihâimana u'âsi mono u. 'Re ihâimana u'âsi mono ma, da'ãma 're mreme mono da, dama 're hâimana u'âsi mono wa, te te 're da'anho'reptui waihu'u pese mono di, ta hã oto.

26Tahawa, te oto õhõ si sasedoti ipire uptabi na hã wama 're hâimana za'ra, Timama ma, te te wa'ãma 're romhuri mono da. Taha si te 're timorĩ wẽ uptabi. Õhõ si ma tô 'Re ihâimana u'âsi mono hã te te 're wẽsãmri, marĩ te te 're ab'manharĩ wasété mono õ wa. Tahawa, iwasédé hã sena na da te ãma 're sa'ra waihu'u za'ra mono õ di. 'Re ihâimana u'âsi mono hã ma tô tãma pisutu, ti'ai ãma dawasété na 're idanomro mono norĩ nhiti 're sãmra mono da oto, hâiwa ãma danhipai u dama pire uptabi na 're hâimana u'âsi mono da. 27Duréihã sasedoti norĩ 're ihâimana za'ra mono ne, 're hâimana mono õ di, Zezusi hã. Ta norĩ hã awẽ sidâpâsi te za tinhoprubzé hã si'udâna te te tãma 're sõmri 'rata za'ra 'Re ihâimana u'âsi mono ma, tiwasété parizéb da hã. Taha pari, te za duré da'udâna zama danhoprubzé hã te te tãma 're sõmri za'ra, dawasédé te te dama ãma 're apari mono da. Tanei õ di, Zezusi hã sasedoti na te te wa'ãma 're iromhuri za'ra mono zé hã. Niwa marĩ te te 'manharĩ wasété waihu'u õ wa, awẽ sidâpâsi si'udâna tinhoprubzé hã te te tãma 're anhomri mono õ di, Timama ma hã. Misi haré ma tô tinhoprubzém na hã tãma sisõ, 'Re ihâimana u'âsi mono ma, dazada dâ'â da, sihâiba zawi ãna tãma sisõmri wamhã, õhõ haré dawasédé hã te te oto dama ãma 're i'apari mono zéb da hã. 28Duréihã 'Re ihâimana u'âsi mono nhimiroti 'rata na Mozési te te ãma irob'ui'éré zarina, ma tô sasedoti da, te te 're da'apisutu, 'Re ihâimana u'âsi mono hã. 'Re danomro wasété mono wa, danhib'uware na 're dahâimana za'ra mono nherẽ, ma tô ãne da hã te te 're da'apisutu. Tane nherẽ, ma tô 'Re ihâimana u'âsi mono hã timreme pire na ti'ra ma ropisutu, taha si sasedoti na misi wama 're hâimana za'ra mono da oto. Ta hã te uburé marĩ hã Imama te te tãma 're i'apisutu mono zéb zarina, te te tãma ãma 're a'uwaimrami u'âsi, Timama ma hã.

Currently Selected:

Hebreu 7: xavBP

Highlight

Copy