Zenezi 8

I'â watobro 'rãsutu zé wasu'u

1Tawamhã 'Re ihâimana u'âsi mono, Nowéhé ãma, duré uburé abaze, uba're wa isiré ihâimana za'ra norĩ ãma, ma tô oto po're puru. Tahawa rowa'u, ti'a nhisiwi te te â wapõrĩ mono da hã, ma tô tãma tinha. Ãhã wa, ma tô duré apâ â'ré mono na hã ãma sãna'rata. 2Tawamhã ub're norĩ, hâiwa isi'ridawa me hã ma tô apâ oto atob zahuré. Tahawa, tã te te oto duré sazâri wamhã, 3ma tô 150 bâtâ na apâ atãma na â nhi'ré mono. 4Tawamhã dia 17, a'amo 7 na ihâimana ãma ma tô uba're Ararati na ẽtẽ wamri 'rãihâ nhisiwimhã oto nomro. 5Tawamhã 10 na a'amo za'rata tẽme ma tô â nhi'réi u'âsi mono, apâ ti'ai u hã. Tawamhã 10 na a'amo za'rata te, bâdâ imorĩ'rata ãma ma tô ẽtẽ 'wasudu hã te te oto urĩrĩ.

6Tawamhã bâdâ 40 na isi'utõrĩ ãma, ma tô Nowé romhâimana wana ré, uba're na zanela 'ri zadazâri te te i'manharĩ hã 'ridawa. 7Tahawa, sitoro corvo na isisi hã ma tô time. Ta hã â, ti'a te te i'urĩrĩ zô te te sapari sina ma tô 're wara, te te 're sa'oto mono sina. 8Taha pari Nowé utu'u, ma tô duré time, ti'ai 'ré zô te te 're rob'madâ'â mono da. 9Tane nherẽ, ãma isabzéb da, utu'u rob'ré hã te te 'masãmri õ di, zahadu â, ti'a hã te te urĩrĩ mono õ wa. Tahawa utu'u apâ te te itẽme sina siri wamhã, ma tô Nowé tinhib'rada hã sô wẽ. Tawamhã te te âri wamhã, ma tô apâ uba're 'ri para u hã tisã.

10Tawamhã Nowé, 7 bâtâ na te a'â duré sapa. Taha pari ma tô duré apâ utu'u hã time, te te rowaimrami mono da hã. 11Tahawa hâiwahâ pesere si, ma tô apâ hã wi. Ãhã wa, tiwata na oriwera su uzé hã ma tô ãwisi. Tawamhã taha na ma tô Nowé waihu'u, oto apâ i'â'ré na hã. 12Tawamhã 7 bâtâ na, ma tô duré a'â sapa. Taha pari, ma tô duré apâ time. Tahawa oto, apâ hã wisi õ di.

13Ãne Nowéhé ãma 600 na ãma iwahub ãma, ma tô apâ â hã ti'ai ãma hã ti'ré pese. Tawamhã a'amo imorĩ'rata te na bâdâ imorĩ'rata ãma ma tô Nowé, uba're upsibizé hã sa'ré. Tahawa, ti'a i'ré ma tô oto 'madâ. 14Tawamhã a'amo isãna'reb ãma, bâdâ 27 ãma, ma tô oto ti'a hã ti'ré pese. 15Tawamhã te 'Re ihâimana u'âsi mono, Nowéhé ma tinha ãne:

16— Ma'ãpé, aimro me, ai'ra norĩ me, duré asani'aba norĩ me uba're hawimhã oto aiwairébé aba. 17Duré ma'ãpé uburé abaze norĩ zama asiré sani za'ra na, si norĩ hã, abaze da te 're itébré za'ra mono norĩ hã, rom na 're ihâimana za'ra mono norĩ hã, duré di'i na 're inomro mono norĩ hã. Tawamhã ta norĩ uburé ti'ai mono bâ te te ropéi mono wa, sitébré mono wamhã, te za ti'a hã sina sitob za'ra.

18Tawamhã Nowé norĩ, timro me, ti'ra norĩ siré, duré tisani'aba norĩ siré hã ma tô uba're hawimhã oto tipusi zahuré. 19Tawamhã duré uburé abaze norĩ hã si norĩ me ma tô imono bâ nasi wairé, isiré za'ra.

Nowé, ẽtẽ za'ra te te i'manharĩzé wasu'u

20Tawamhã Nowé, ẽtẽ za'ra hã ma tô 'manha, Uburé Danhib'apito ma, ãma tãma isõprubzé te te ãma zata da. Taha pari, si norĩ abaze norĩ me, 'Re ihâimana u'âsi mono ma, iwẽ hã ma tô nima norĩ si 'mai'âri za'ra. Tawamhã ta norĩ hã ma tô ẽtẽ za'ra nhisiwimhã tãma zata za'ra. 21Tawamhã Nowéhé nhibzari zadaze, Uburé Danhib'apito te te hãi wamhã, ma tô wẽsã. Tahawa te ãne rosa'rata na hã sima tinha: “Niwamhã ti'ai ma, ãne na te irob'manharĩ na isahu da hã mare di za, iwa 're idahâimana za'ra mono norĩ u'âbâmhã, daprédup tém hawim haré, marĩ iwasété na si da te dasima 're rosa'rata u'âsi za'ra mono nherẽ. 22Tawamhã duré ti'a 're sa'wari mono ré, te za iwa rob'rezé hã, duré roptehârizé hã dama 're hâimana za'ra. Te za duré rowahâ zé zama hã 're hâimana, duré rowa'ro hã. Duré wahubzé, tã 're ita'a mono zé me te za dama 're hâimana zahuré apâ. Duré bâdâ te te 're irob'uiwẽ mono hã 're imara mono me hã te za tô 're hâimana u'âsi zahuré.”

Currently Selected:

Zenezi 8: xavBP

Highlight

Copy