Zenezi 21

Izaquihi potozé wasu'u

1Tawamhã Uburé Danhib'apito te te iropisutuzéb zarina, ma tô iwẽ hã tãma pisutu, Saraha ma. 2Tahawa ma oto tiwasã, Abra'ã si'ihi nherẽ. Ma i'ra hã tãma tisõ. Tawamhã 'Re ihâimana u'âsi mono, bâdâ te te tãma ipisutuzéb zarina, ma tô i'ra si'aibâ hã tãma waptãrã. 3Tawamhã Abra'ã ma tô sisi, Izaqui na. 4Izaquihi ãma ipotozém na 8 na bâdâ oto ãma nep siwapto wamhã, ma tô Abra'ã sihâiwata nhizâ, 'Re ihâimana u'âsi mono te te tãma iwaihu'uzéb zarina. 5Abra'ãhã ãma 100 na ãma iwahub ãma, ma tô podo, Izaqui hã. 6Tahawa te Sara tinha ãne:

— 'Re ihâimana u'âsi mono, rowẽ te, ĩsihâze ma tô ĩma tisõ. Tahawa, da te wapari za'ra mono wamhã, te za ĩme aihâ za'ra ni, da te dasima rowẽ za'ra wa.

7Tawamhã te duré tinha, ãne na zama:

— E 'wa hã Abra'ãhã ma, te te aré nharĩ da bâ bété, Sara tihâ ti'ra ma, te te tãma isõmri da na hã. Wa hã si'ĩhire nherẽ, wa tô ĩ'ra ĩzé're hawi poto da hã tãma tisõ.

8Tawamhã 'watébrémi oto prédu wamhã, ma tô oto tina hâ hã tirẽ. Tahawa tina hâ te te irẽmezé bâtâ na, ma tô Abra'ã dasa na dato isa'ẽne hã 'manha.

Aga norĩ, Ismaeu me, neb da, da te tãma irob'ru zahuré zé wasu'u

9Tawamhã Ismaeu Abra'ãhã 'ra, ezipsiu Agaha zé're te te ipodo hã nimahã bâtâ na te Izaquihi me sima tito zahuré. 10Tawamhã Sara, ãne na te te 'madâ'â zahuré wa, ma tô Abra'ãhã ma tãma tinha ãne:

— Ma'ãpé aima romhuri'wa i'ra ré hã satõrĩ, morĩ da. E tihai wa. Romhuri'wai 'ra nherẽ, ai'uirĩ na asibro hã, ĩ'ra Izaquihi siré tãma 'maihâimana tõ da.

11Ãne wa, Abra'ã hã hâtâ'â uptabi di, Ismaeu zama i'ra na hâimana wa. 12Tane nherẽ, 'Re ihâimana u'âsi mono te ãne tãma tinha:

— Abra'ã, 'watébrémi na hã, duré aima romhuri'wa na hã aihâtâ'â õ di za. Sara aimro mreme hã te za uburé i'manha. E marĩ wa. Izaquihi hawim na asihudu hã za 're hâimana za'ra mono dâ'âsina. 13Romhuri'wa zé're hawib zama tô ai'ra. Tahawa isihudu norĩ da, a'uwẽ misi ãma isitom na siré 're hâimana za'ra mono da hã, wa za duré tô wa hã 'manha.

14Tawamhã awẽm na ma tô Abra'ã hã robza'rã ré mararé uptabi udu. Tahawa, Agaha ma, ĩsa hã duré romhâ 'manharĩ na ub'rẽ â ré i'masi hã ma tô tãma tisõ. Taha pari 'watébrémi isisé te te tãma sãrĩ wamhã, ma tô iré satõ, oto morĩ da. Tawamhã Aga siwa'ru a'ubuni wi rop si 're irosa'wari mono niwĩ, ma tô 're mo, Beseba na 'ri wa'õtõ nhisi niwĩ. 15Tawamhã ub'rẽ 'remhã â tiwi si'utõrĩ wamhã, ma tô wede isapore zahâpâ awã wa, ti'ra 'watébrémi hã tisã. 16Taha pari ni'wa ti te te ime romhâ na prã na iwaptã'ãzém ne ma tô oto mo, isiti sãmra da hã. Tawamhã te ãne rosa'rata: “Ĩ'ra idâ'âzém na te i'madâ'â da hã, maze di. Ĩnhiptete dai õ di.” Tawamhã tame sãmra ré, 'watébrémi hã ma tô tiwawa na hã sãna'rata.

17Tawamhã 'Re ihâimana u'âsi mono, 'watébrémi wawa hã ma tô wapa. Tahawa 'Re ihâimana u'âsi mono ma, Hâiwa ãma Romhuri'wa, hâiwa hawi we te te 'mahârâ wamhã, te ãne Agaha ma tinha:

— Aga, e marĩ da, te aihâtâ'â na hã aihâiba. Aipahi tõ. 'Re ihâimana u'âsi mono hã ma tô 'watébrémi wawa hã wapa isãrĩzém hawi. 18Mo oto wahutu, 'watébrémi hã. Pa'âri, isib'rata na. E marĩ wa. Isihudu norĩ, misi a'uwẽ ãma isitom na ahâ na siré 're ihâimana za'ra mono da hã, wa za tãma 'manha.

19Tawamhã Agaha ma, 'Re ihâimana u'âsi mono, ma tô ito hã tãma 'ridawa. Tahawa â zô ab're, ma tô tisã. Tahawa romhâ 'manharĩ na ub'rẽ te te hu da hã, ma tô sô mo. Taha pari, ma tô Ismaeu ma hã tãma tisõ, te te hâ'rẽne da.

20Tawamhã 'Re ihâimana u'âsi mono, te 'watébrémi siré hã 're hâimana u'âsi, prédu mono ré hã. Tawamhã a'ubuni wi rop si 're irosa'wari mono ãma ma tô 're hâimana. Ma tô duré ti'i na tinhimiromhâ pe hã waihu'u pese. 21Tahawa ina hã, ma tô ezipsiu norĩ nhipi'õ hã tãma 'mai'â, ãma mro da.

Abra'ã norĩ wasu'u, Abimelequihi me

22Tawamhã Abimelequi, tô taha bâdâ we isisõré mono na ma tô Abra'ãhã ma, te te robzanhamri da hã itẽme mo. Duré taha wamhã Fico, ite dasi'wapéi 'manharĩ'wa norĩ 'madâ'â'wa hã ma tô isiré mo. Tahawa te ãne tãma tinha:

— 'Re ihâimana u'âsi mono, uburé marĩ 're i'ab'manharĩ mono zém na hã te we asiré 're hâimana. 23Tahawa, ma'ãpé ãme 'Re ihâimana u'âsi mono nho'a, asadawa nhipese ãna, ĩma, ĩ'ra norĩ ma, duré ĩnhihudu norĩ ma, asimiropisudu hã 'manharĩ. Wa hã wa tô iwẽ na aima ĩ'umnhasi sina 're ĩhâimana. Tahawa te za sena na ĩma iropisu, ĩma, duré ã hã ti'ai wa, 're i'asãmra mono ma, ai'umnhasi sina 're aihâimana mono da.

24Tawamhã Abra'ã ma te asa ãma tãma wa'rã ãne:

— Wa za tô aima ropisutu.

25Tawamhã Abra'ã, ma te Abimelequihi ma hã tãma pri'i, tãma romhuri'wa za'ra 'wa ite â zô ab're na siptete na ãma tiwi site za'ra wa.

26Tawamhã Abimelequi te ãne tãma tinha:

— Wa hã te waihu'u õ di, ni'wa te te i'manharĩ na hã. Duré niwamhã ãne na hã a hã ĩma nharĩ õ di. Imorĩ'rata uptabi, wa tô ãne na ĩma inharĩzém na hã aiwapa, ãhã na hã.

27Tawamhã Abra'ã, niha pone'ẽrebâ norĩ hã powawẽ me, ma tô te te simro, Abimelequihi ma, te te tãma sõmri za'ra da. Tahawa, ma tô roti na isisazezé hã sima 'manharĩ zahuré, itete na. 28Duré Abra'ã, tinhimizama pone'ẽrebâ ipréduptébre sipi'õ 7 na ma tô ãma aipo'o. Ãma sipo'o wamhã, 29ma tô Abimelequi hã ãma sadanha ãne:

— E marĩ da, ma tô ã hã 7 na pone'ẽrebâ 'rare sipi'õ na hã ãma aipo.

30Tawamhã Abra'ã, ma te asa ãne ãma sada'â:

— Ã norĩ hã aima ĩnhoprubzéb da hã. Tahawa, ã norĩ hã asima waibui wẽ wamhã, ma tô za oto ãma ĩzaze, wa hã ã hã â zô ab're te i'ab're na hã.

31Tahawa ã romnhisi hã za Beseba#21.31 Beseba hã hebreu norĩ mreme na “â zô ab're ãma danhimiropisutuzé” te wasu'u. na, ta norĩ hã tame ropisudu hã te te sima 'manharĩ zahuré wa.

32Tawamhã Beseba na 'ri nho'õmo nhisi ãma tinhimiropisutuzéb zahuré zé te te sima 'manharĩ zahuré parimhã, ma tô Abimelequi, Ficoho me, filisteu norĩ nhipti'ai u hã oto apâ sina siri zahuré. 33Tawamhã tame ma tô Abra'ã rob're hã a're, Beseba ãma. Te te a're wamhã, ma tô Uburé Danhib'apito 'Re ihâimana u'âsi mono ãma tiwata. 34Tahawa Abra'ã, Filisteu norĩ nhipti'ai 're ma tô 're hâimana hâ pese, wahub ahâ na.

Currently Selected:

Zenezi 21: xavBP

Highlight

Copy