Atu 16

Timotiu hã ime morĩ zahuré da, Paulu te te sima iwẽzé wasu'u

1Tawamhã Débi u ma tô aimasisi zahuré, Paulu norĩ hã. Taha pari, ma tô duré aimasisi zahuré, Risitira u. Tame te aibâ hã 're sãmra, Zezusihi zazei'wa hã, Timotiu na isisi hã. Ina hã zudeu, Zezusihi zazei'wa, ta hã. Tane nherẽ, imama hã zudeu õ di, gregu norĩ siré hã, ta hã. 2Isazei'wa norĩ hã uburé ma tô Timotiu hã wẽsãmri za'ra, Risitira ãma 're isi'ubumroi mono norĩ hã, duré Iconizu ãma 're isi'ubumroi mono norĩ hã. 3Tawamhã Paulu hã ma tô sima wẽ, Timotiu hã isiré morĩ da. Tane nherẽ, zudeu norĩ hã uburé tãma waihu'u pese za'ra di, Timotiuhu mama hã gregu norĩ siré na hã. Tahawa, Paulu hã ma tô Timotiu sihâiwata nhizâ, sizudeu da oto, te te duré ãma siwi wẽ'õ tõ da, zudeu norĩ hã. 4Tawamhã Paulu norĩ hã daza'rui mono bâ ma tô te te dawaimrami za'ra, Zezusihi zadawa wasu'u'wa norĩ nhimirosa'rata na, te te dama rowasu'u za'ra mono da, duré Zeruzalẽ ãma da'madâ'â'wa norĩ nhimirosa'rata na zama. Ma tô duré dama roti za'ra, ta norĩ nhimirosa'rada hã da te 're 'madâ'â pese za'ra mono da, isazei'wa norĩ hã. 5Taha zarina, ma tô Wanhib'apito te te sina 're i'umnhasi za'ra mono zém na 're siptete za'ra, isazei'wa norĩ hã daza'rui mono bâ siré 're isi'rã'õtõ mono hã. Awẽ sidâpâsi ma tô dasina dahâ'â, isazei'wa hã.

Paulu hã Trowadi ãma marĩ hã sõtõ 'rowim ne te te i'madâ'âzé wasu'u

6Tawamhã Paulu norĩ hã ma tô ai'aba'ré, Prizia na danhipti'a nho'õmo nhisi wa'wai baba, duré Galasia na danhipti'a nho'õmo nhisi wa'wai baba. Tane nherẽ, 'Re ihâimana u'âsi mono pẽ'ẽzani hã ma tô sadawa uwati za'ra, Azia na danhipti'a nho'õmo nhisi ãma iwasu'uwẽ na te te dama rowasu'u za'ra tõ da a'â. 7Tawamhã ma tô aihutu, ti'a nhizârizéb u, Mizia na danhipti'a nho'õmo nhisi u. Taha wamhã, Bitinia na danhipti'a nho'õmo nhisi u hã duré sisisi neza. Tane nherẽ, Zezusi hã ma tô Tipẽ'ẽzani na tiwi rosawi za'ra, tamomo si'aba'ré tõ da. 8Tahawa, Mizia na danhipti'a nho'õmo nhisi wa'wai baba, ma tô ro'rahâri waré za'ra. Tawamhã Trowadi na 'ri nho'õmo nhisi u, ma tô aihutu, uba're za'ẽtẽ nhimizahârizéb u. 9Tawamhã sõtõ 'rowim ne, ma tô marĩ hã 'madâ Paulu hã, bara na. Aibâ hã Masédonia na danhipti'a nho'õmo nhisi ãma 're isãmra mono hã te i'rata za, sa'ẽtẽ te te waptẽrẽ da, ãne:

— Wei watẽme aimorĩ, Masédonia u wa'ãma aime za'ra da.

10Tawamhã ãne hã Paulu sõtõ 'rowim ne te te 'madâ'â wamhã, wa tô wasima ro'ubumro za'ra ni, Masédonia u wasi'aba'ré da. E marĩ wa. Zezusihi wasu'uwẽ na tame wa te dama rowasu'u za'ra da, 'Re ihâimana u'âsi mono te te iwapisutu za'ra na wa te wasina waihu'u za'ra wa.

Paulu norĩ hã Filipu ãma te te iromhuri na'rata za'ra zé wasu'u

11Tawamhã Trowadi hawi, wa tô ai'aba'ré ni, rowa'u'u na uba'renem na. Samotarasiza na rob'ré za'iti nhisi u, ma tô waré tiwara waré za'ra. Ta hawimhã awẽm na si wa tô saprĩ za'ra ni zara u, Neapuri na 'ri nho'õmo nhisi u hã. 12Tawamhã Neapuri hawi, wa tô aihutu ni, Filipu na 'ri nho'õmo nhisi u, Masédonia ãma 'ri nho'õmo u hã. Tame te romanu norĩ hã 're si'ubumro. Tame wasi'ubumroi ré, ma tô bâdâ hã umro na wa'ãma ai'utõrĩ za'ra. 13Tawamhã sabadu na wa tô wawairébé ni, 'ri nho'õmo hawi, pazaihâ u 'Re ihâimana u'âsi mono ma, wamreme zusi da. Tame, zudeu norĩ hã tãma 're imreme zusi mono zém na wa te wasima rosa'rata za'ra wa, wa tamomo ai'aba'ré ni. Tame ma tô pi'õ norĩ hã ubumro, âdawa. Tawamhã wa norĩ hã wa tô i'rata asimro ni, pi'õ norĩ 'rata, wa te wasima rowasu'u za'ra da. 14Tame te pi'õ hã nhamra, Lidia na isisi hã. Tiatira na 'ri nho'õmo nhisi ãma 're isãmra mono aré ta hã, Lidia hã. Zazahâ iwẽ hã te te dama 're i'awede mono, ihâpré pe hã. Ta hã, 'Re ihâimana u'âsi mono ãma 're iwata mono duré. Tawamhã Pauluhu nhimirowasu'u te te wapari wamhã, Wanhib'apito hã ma tô pawapto, te te ãma saze da. 15Tahawa, ma tô â dawabzuri hã 'manharĩ za'ra, Lidia norĩ hã isiré isõrõwa ãma 're isi'ubumroi mono norĩ me. Taha pari, te duré wazô tihârâ za'ra, i'rata wasi'ubumro da a'â. Ãne te wazô tihârâ za'ra:

— Wa hã, Wanhib'apito zazei'wa na sena na ĩwaihu'u za'ra wa'aba wamhã, ĩnhorõwa ãma te za asimroi wa'wa a'â.

Ãne wama siwaihu'u za'ra zawi te, wa tô itẽme ai'aba'ré ni, i'rata wasi'ubumro da a'â.

Paulu norĩ hã dazazéb 're, da te isitob zahuré zé wasu'u

16Tawamhã nimahã bâtâ na 'Re ihâimana u'âsi mono ma, 're idamreme zusi mono zéb u wasi'aba'réi ré, azarudu hã ma tô wawa'rãmi mo, pawa'âbâ ãna dama romhuri'wa hã. Wa'uburé ré 're hâimana mono wa, te marĩ hã romhâ ré te te dama 're awaihu'u siro, ta hã. Tawamhã azarutu wada'uri'wa norĩ hã ma tô rob'uiprazé hã ahâ na i'upana te te sima 're waibu, marĩ hã romhâ ré te te dama 're i'awaihu'u mono zé wa'â hã. 17Tawamhã azarudu hã ma tô Pauluhu zarina, duré wazarina zama hã mo. Mreme 'rãihâ na te nasi te te wa'mahârâ za'ra, ãne:

— Õ hã aibâ norĩ hã, 'Re ihâimana u'âsi mono ma romhuri'wa norĩ, iwaihu'u pese uptabi ma romhuri'wa za'ra. Niha te za aima waihu'u za'ra wa'wa, asisõ'reptu za'ra wa'aba zéb da na hã.

18Awẽ sidâpâsi te nasi ãne te te wa'ab'mahârâ. Te te nasi wa'ab'mahârâ u'âsi mono wa, wapari a te, nimahã bâtâ na ma tô Paulu hã sô aipi'ra, wa'uburé ma, te te nharĩ da. Ãne te taha wamhã tãma tinha:

— Zezu Cristuhu zadawa para, wa aima rob'ru. Mo oto aimorĩ, azarutu nhiti.

Tawamhã awa'awi, ma azarutu hawi watobro. Ma tô isiti hã mo oto. 19Tahawa, azarudu hã marĩ hã romhâ ré te te oto dama 're awaihu'u mono õ di. Tahawa, iwada'uri'wa norĩ hã ma tô Paulu norĩ zada tinhiti'ru za'ra, iwa'â te te sima 're waibui mono õ wa oto. Tahawa, ta norĩ hã ma tô siwi pamra, Paulu norĩ hã. Taha pari, ma tô siwi tisa, dama ipire norĩ tẽme 'ri nho're u. 20Tawamhã apito siromanu norĩ nho're te te siwi simizusi wamhã, te ãne tãma rowasu'u za'ra:

— Ã aibâ norĩ hã, zudeu norĩ siré 're iwanomro mono zém na ma tô wawi ãma ro'wa'ré zahuré, ãme waza'rui 'remhã. 21'Re idanomro mono zép tém na te dama rowasu'u zahuré, 're iwahâimana za'ra mono zéb upana. Wa norĩ hã, romanu. Tahawa, isarina ãma 're iwanomro mono da hã, wa te waihu'u za'ra õ di.

22Tawamhã õhõ na si ma tô da'ahâ na ãma tasisaze za'ra ni, Paulu norĩ ma, rowasédé hã da te dasiwi 'manharĩ za'ra da. Tawamhã apito norĩ hã ma tô da'wapéi'wa norĩ ma 'ru za'ra, Paulu norĩ uza hã te te tiwi hâiwazu za'ra da, Silaha me. Tahawa, ma tô sa'ẽtẽ tiwi hâiwazu zahuré ni, i'uza hã. Wedehu na te duré da te 're pré'é zahuré. 23Da te 're pré'é zahuré mono parimhã, ma tô 'mazasi zahuré ni, dazazéb u. Taha pari, dazazé 'madâ'â'wai ma, ma tô 'ru zahuré ni, hâiba si'uiwa na te te siwi 'madâ'â pese da, pusi õ'umnhasite. 24Tahawa, ãne, da te tãma 'ru za'ra wa, ma tô 'mazasi zahuré, dazazé 'ri 're wa'wa amo nhipai u. Tame wedepo'o zapu'u 're, ma tô ipara hã za zahuré ni, da te para'õtõ tété zahuré da.

Paulu norĩ hã dazazéb 're isima'wara zahuré zé wasu'u

25Tawamhã mara wa'wa, ma tô Paulu norĩ hã 'Re ihâimana u'âsi mono ma timreme zahuré, Silaha me. Tinho're na te duré ãma tiwata zahuré. Tawamhã 'ri 're wa'wa amo niwĩ isimasam norĩ hã te wapari za'ra, isõ're zahuré zé hã. 26Tawamhã te awa'awi ti'a hã 're wara. Ti'ai 'rowi, 'ri na'rata tétézé hã te sãsã'ã, dazazéb 'ri hã. Tawamhã awa'awi ma uburé 'ridawa nhitobzé hã si'ridawa za'ra. Dapawasisizé hã duré daparatétézé hã ma tô sisinarĩ, dazazéb 're isimasam norĩ ma, isi'uwazi nhorõ rudu hã. 27Tahawa, dazazé 'madâ'â'wa hã ma tô udu. Utu wamhã, ma tô 'ridawa hã 'madâ. 'Ridawa haré te za, dazazé hã. Tahawa, ma tô tinhi'wa hã sisada waze, ãma siwĩrĩ da aré, isimasam norĩ hã wairébé newa. 28Tahawa, te Paulu hã hârâ 'rãihâ na 'mahâ, ãne:

— Tô'ã. Asiwĩrĩ tõ. Ãhãta wa aihĩni aimasam ni.

29Tawamhã ma tô dazazé 'madâ'â'wa hã rob'uiwẽzéb zô hâ. Wara sina, ma tô itẽme tizébré zahuré, Paulu norĩ u. Ipapara, ma tô aime zahuré hi'rãtitõ, rẽrẽ'ẽ sina. 30Taha pari, ma tô sani zahuré, rob u. Te tãma nharĩ zahuré, ãne:

— Aibâ norĩ, e marĩ wa za 'manha, danho'reptuzé hã te ĩsina uwaimrami da.

31Tawamhã ma tô asa tãma rowasu'u zahuré, ãne:

— Wanhib'apito Zezusi asina umnhasi. Tawamhã ta hã te za asõ'reptu, asõrõwa ãma asiré 're ai'ubumroi wa'aba mono norĩ me.

32Tawamhã Wanhib'apito zadawa wasu'u na te duré tãma rowasu'u za'ra, dazazé 'madâ'â'wai ma, duré isiré 're isi'ubumroi mono norĩ ma zama. 33Mara wa'wam nherẽ, dazazé 'madâ'â'wa hã ma tô a'â Paulu norĩ hã hâiba upsõ zahuré, da te dasiwi 're ipré'é zahuré mono zém na da te ihânhinarĩ zahuré mono zé hã. Te te upsõ zahuré parip si, ma tô â dawabzuri hã 'manha, dazazé 'madâ'â'wa hã. Ãhã wamhã, isiré 're isi'ubumroi mono norĩ zama ma tô duré 'manharĩ za'ra. 34Taha pari, tinhorõwa u te oto saprõni zahuré. Isa ma tô tãma sõmri zahuré, sa zahuré da. Tawamhã dazazé 'madâ'â'wa hã, toi uptabi di oto. Isõrõwa ãma isiré 're isi'ubumroi mono norĩ zama toi uptabi za'ra di, 'Re ihâimana u'âsi mono te te saze za'ra wa, duré ta norĩ hã.

Paulu norĩ hã dazazém hawi ipusizé wasu'u

35Tawamhã awẽ mararé romanu na danhib'apito norĩ hã ma tô damrami'wa norĩ hã sô 'mazatõrĩ za'ra, Paulu norĩ hã da te dasiwi sani da, Silaha me. Ãne te tãma 'ru za'ra:

— Aibâ norĩ hã sani wa'aba, neb zahuré da oto. 36Tawamhã dazazé 'madâ'â'wa hã ma tô Paulu norĩ ma rowasu'u, ãne:

— Danhib'apito norĩ hã ma tô ai'rui wa'wa, da te asani wa'aba da, ane wa'aba da oto. Rowẽ na ane wa'aba za.

37Tawamhã te Paulu hã asa tãma nharĩ za'ra, ãne damrami'wa norĩ ma:

— Marĩ hã wa te 'manharĩ wasété õ nherẽ, ma tô dama wa'ru, danho'a da te 're wapré'é mono da, wa norĩ hã romanu norĩ siré nherẽ. Ma tô wamrami ni, dazazéb 're, wasima'wara da. Tawamhã e pi'uriwi te za wazatõrĩ za'ra. Mare di. Apito norĩ hã te za wei wazô ai'aba'ré, si'uihâ na danho'a te te siwi wazani da, waneb da.

38Tawamhã damrami'wa norĩ ma tô Paulu norĩ hã tãma sadawa wasu'u za'ra, danhib'apito norĩ ma. Romanu norĩ siré na siwasu'u zahuré wa, ma tô tipẽ'ẽwara za'ra. 39Tahawa, ma tô itẽme ai'aba'ré, tãma siwasu'u za'ra da, Paulu norĩ ma, ta norĩ hã te te sina 'ruiwapari za'ra tõ da. Taha pari, ma tô siwi sani zahuré dazazém hawi, neb zahuré da. Tawamhã ma tô tãma rob'ru za'ra, 'ri nho'õmo hawi neb zahuré da oto. 40Tawamhã dazazém hawi da te sani zahuré wamhã, ma tô tineb zahuré, Lidiaha nhorõwa u. Tame ma tô isazei'wa norĩ me sisõpẽtẽ za'ra. Tawamhã tinhimirowasu'u na ma tô tãma rowẽ zani za'ra. Taha pari, te oto tineb zahuré, Filipu hawi.

Currently Selected:

Atu 16: xavBP

Highlight

Copy