Atu 14

Paulu norĩ hã Iconizu ãma te te iromhuri zahuré zé wasu'u

1Tawamhã Iconizu u ma tô aimasisi zahuré, Paulu norĩ hã, Banabéhé me. Tamomo simasisi zahuré wamhã, Ãtioquia ãma sada iromhâimana zahuré ne, ma tô duré sada tiromhâimana zahuré. Ãhã wamhã, Zudeu norĩ te, rowahutuzéb u ma tô tizasi zahuré, te te dama rowasu'u zahuré da. Tawamhã simirowasu'u wẽ wa, mreme wapari ze zahuré di, dama hã. Tahawa, da'ahâ na ma tô saze za'ra ni, zudeu norĩ hã, zudeu'õ norĩ me. 2Tane nherẽ, zudeu norĩ te te 're isaze za'ra mono õ hã ma tô zudeu'õ norĩ hã wada'uri wasété za'ra, sada hâimana za'ra da, Paulu norĩ zada, uburé siré isazei'wa norĩ zada zama. 3Tane nherẽ, Paulu norĩ hã te Iconizu ãma aimasisi hâ zahuré. Pahi ãna ma tô Wanhib'apito hã dama wasu'u wẽ zahuré. Tawamhã iwasu'uwẽ hã tô sena na da te waihu'u za'ra da, Wanhib'apito hã ma tô Paulu norĩ pawaptob zahuré, da te 're iwaihu'u za'ra mono zéb da hã, marĩ iwẽ hã dama i'manharĩ waihu'u'õ hã te te dama 're ab'manharĩ zahuré mono da tame. 4Tane nherẽ, õhõ na si misi da te dasima ãma rosa'rata za'ra õ di, 'ri nho'õmo ãma 're idasi'ubumroi mono norĩ hã. Ma tô dasima aipo'o ni. Ni'wam norĩ hã ma tô zudeu norĩ niwĩ 're hâimana za'ra. Ni'wam norĩ hã te duré Paulu norĩ niwĩ 're hâimana za'ra, Zezusihi zadawa wasu'u'wa norĩ niwĩ.

5Tawamhã ni'wam norĩ hã zudeu norĩ hã zudeu'õ norĩ me, ma tinhib'apito norĩ me ãma sisaze za'ra, Paulu norĩ ãma te te rowasété za'ra da, duré ẽtẽ na te te siwi pãrĩ da. 6Tawamhã damreme te te sina wapari zahuré wamhã, ma tô dawi aimani zahuré, wara sina, Paulu norĩ hã. Tahawa Rica'oniza na danhipti'a nho'õmo nhisi u ma tô tineb zahuré. Tamomo neb zahuré wamhã, Risitira na 'ri nho'õmo nhisi u, ma tô aimasisi zahuré, duré Débi na 'ri nho'õmo nhisi amoi u. 7Tame te duré dama rowahutu zahuré, Zezusihi wasu'uwẽ na.

Paulu norĩ hã Risitira ãma duré Débi ãma te te iromhuri zahuré zé wasu'u

8Tawamhã Risitira ãma te aibâ hã 're sãmra, ipotozém hawi imorĩ'õ hã para uwa zahuré wa. 9Paulu hã te te dama rowasu'u ré, ma tô ihi'ré hã mreme wapa. Tawamhã Paulu, ma tô itẽme rob'madâ. Te te 'madâ'â wamhã, ma tô sina waihu'u, tô sena Wanhib'apito te te isaze na hã, duré te te pese da, te te sina i'umnhasi na hã. 10Tahawa, te mreme 'rãihâ na tãma tinha:

— Aiwahutu. Hâiwi asa na, aipara na.

Tawamhã ihi'ré, si'aba'ré na ma tô hâiwi za. Ma tô duré oto timorĩ wẽ. 11Tahawa, Paulu te te iwahudu hã da te 'madâ'â za'ra wamhã, ma tô dasima 'mahârâ za'ra ni, dasimremezém na ãne:

— Ihâiba'õ norĩ, iwaihu'upese norĩ hã ma tô wei watẽme 'manhi'ra zahuré. Ma tô si'aibâ zahuré, ãma 're iwawata za'ra mono norĩ hã.

12Tawamhã Paulu norĩ hã ma tô sisi zahuré ni, Banabéhé me, ihâiba'õ norĩ hã waihu'u pese newa da te dasima 're isisi za'ra mono zém na. Banabé hã Zupité na ma sisi ni. Duré Paulu hã Mecuriu na ma tô duré dasiwi sisi ni, rowahutu'wai wa. 13Zupitéhé ãma 're idawata za'ra mono zé hã 'ri nho'õmo 'wawi wa'ra 'ridawa 'rata, 'ri hã. Tahawa, aibâ hã Zupitéhé ma da'ãma 're imreme mono hã ma tô powawẽ hã saprõni zahuré, ãma 're idawata za'ra mono zéb u, 'ri nho'õmo 'wawi wa'ra 'ridawa u hã. Tawamhã romnhirãrã na ma tô sõ'rebzu zahuré, tãma 'madâ'â ze zahuré da. We isaprõni zahuré 'wa hã ma tô dasine sima wẽ, powawẽ hã te te pãrĩ zahuré da, ãma dawata za'ra da, Paulu norĩ ãma, waihu'u pese zahuré newa. 14Tawamhã te te i'manharĩ wasu'u Paulu norĩ hã te te wapari zahuré wamhã, wara sina ma tô dawa'wa u tizasi waré zahuré. Taha wamhã, ti'uza hã ma tô hâiwazu zahuré, tinho'utu nho'õmoi baba, rob'ru te. Te te hâiwazu zahuré sina, ma tô hârâ 'rãihâ na da'mahârâ zahuré, ãne:

15— Aibâ norĩ, e marĩ da, te za tane i'manharĩ za'ra wa'wa. Tô'ã. 'Manharĩ za'ra wa'aba tõ. Wa norĩ hã aibâ, asine za'ra wa'aba hã. Zezusihi wasu'uwẽ na wa te aima rowasu'u za'ra wa'aba da, wa tô we wanem ni, atẽme za'ra wa'aba. Wa tô duré aima roti za'ra wa'aba ni, taré romhâiba na ãma 're aiwata za'ra wa'aba mono zém hawi 're aipizari za'ra wa'aba mono da, iwaihu'upese newa ãma 're aiwata tõ za'ra wa'aba mono da, 'Re ihâimana u'âsi mono niwĩ 're anomro aba mono da oto. Ta hã ropoto na'rata 'wa, duré hâiwa nhirõtõ 'manharĩ'wa, duré ti'ai 'manharĩ'wa, duré âporé 'manharĩ'wa. Uburé ti'ai ãma 're idanomro mono da hã, ma tô te te da'apoto, hâiwa nhirõtõ ãma 're idahâimana za'ra mono da zama, duré â 'râwi 're inomro mono da zama. 16Duréihã, dahi'rata sidâpâsi da te dasima iwẽzéb uwaibaba te 're danomro. 'Re ihâimana u'âsi mono hã te te 're da'ahâ za'ra su'u mono õ di. 17Tane nherẽ, ma tô dama 're siwaihu'u u'âsi, tinhoprubzém na sena 're ihâimana mono zém na, da te 're waihu'u za'ra mono da. Tã hã ma tô pisutu, we aima 're ta'a za'ra wa'aba mono da, te te aima 're robdi'i za'ra wa'aba mono da. Buru nho hã te duré te te aima 're sõmri za'ra wa'wa, 're i'rã za'ra mono da hã, te te ipisutu zarina, ãma 're asaihuri aba mono da hã, aima ãma 're irobzei u'âsi za'ra wa'aba mono zéb da hã.

18Ãne Zezusihi zadawa wasu'u'wa norĩ hã te te dawi sawi zahuré nherẽ, da te ãma rosahâri waihu'u za'ra õ di aré. Powawẽ hã te aré tô dasiwi pãrĩ ni, Paulu norĩ ãma idawata za'ra zéb da hã. Tane nherẽ, dama mreme pire zahuré wa, ma tô ãma rosahâri za'ra ni oto, da te dasiwi pãrĩ tõ da, iwaihu'upese zahuré newa, ãma dawata tõ zahuré da, Paulu norĩ ãma hã. 19Tawamhã zudeu norĩ hã Ãtioquia hawi te ai'aba'ré, Paulu norĩ zarina, Iconizu hawib zama. Sihutu wamhã, ma tô ãma dawada'uri wasété za'ra, aihĩni sada danhiti'ru za'ra da. Tawamhã ma tô ãma tasisaze za'ra ni. Tahawa, ẽtẽ na ma tô dasiwi hâ ni, Paulu hã da te dasiwi wĩrĩ da. Tawamhã dâ'â newa, ma tô ãma rosa'rata za'ra ni. Tahawa, ma tô da te ãma robâdâ, 'ri ahâ nhiti. 20Tawamhã isiré isazei'wa norĩ hã ma tô siwi uirĩ. I'rata simasab ré, ma tô udu, Paulu hã. Tawamhã 'ri nho'õmo u te apâ mo. Tame awẽm na te oto ne Paulu norĩ hã, Banabéhé me. Débi u te tineb zahuré. 21Tame ma tô dama rowahutu zahuré, iwasu'uwẽ na. Tawamhã da'ahâ na ma tô saze za'ra ni, Zezusihi nhirã zarina 're danomro mono da oto. Taha pari, te oto apâ tineb zahuré dahawi, siwa'rãmi.

Paulu norĩ hã Ãtioquia u, siwa'rãmi ineb zahuré zé wasu'u

Tawamhã Paulu norĩ hã Risitira wa'wai baba te apâ tineb zahuré siwa'rãmi, duré Iconizu wa'wai baba, duré Ãtioquia wa'wai baba zama. 22'Ri nho'õmo wa'wai baba neb zahuré wamhã, ma tô isazei'wa norĩ hã pawaptob za'ra, hâimana nhiptete na 're nomro mono da, 'Re ihâimana u'âsi mono ãma te te 're sasõmri u'âsi za'ra mono da. Ãne te duré tãma nharĩ za'ra:

— A norĩ wa'wa hã Zezusihi zazei'wai wa, marĩ iwasédé hã da te aima 're 'manharĩ za'ra wa'aba mono wamhã, tãma 're aipahi za'ra wa'aba mono õ di za. Ãne na hã te za tô 're irobzépata za'ra wa'aba mo. Tane nherẽ, 'Re ihâimana u'âsi mono nhib'a'uwẽ oto 're anomro aba mono wa, te za niwapsi hâiwa ãma i'rata 're aihâimana u'âsi za'ra wa'aba mo, rowẽ na. — Ãne te tãma nharĩ za'ra. 23Tawamhã 'ri nho'õmo mono bâ isazei'wa norĩ hã siré 're isi'rã'õtõ mono sidâpâsi ma tô da'madâ'â'wa da hã te te 're apisutu zahuré, Paulu norĩ hã. Sai ãna, te duré ta norĩ hã timreme zahuré, Wanhib'apito ma, te te sina 're i'umnhasi za'ra mono ma, iwasété wi da'wawi 're isimapa za'ra mono zém na te te 're pawaptob u'âsi za'ra mono da, da'madâ'â'wa norĩ hã.

24Pisidiza na danhipti'a nho'õmo nhisi wa'wai baba, te oto tineb zahuré Paulu norĩ hã, Pãfilia na danhipti'a nho'õmo nhisi u. 25Tame, ma tô Zezusihi wasu'uwẽ na dama rowahutu zahuré, Peregui na 'ri nho'õmo nhisi ãma. Taha pari, ma tô duré tineb zahuré, Atariza na uba're nhimizahârizém nhisi u. 26Ta hawi te duré tineb zahuré, rowa'u'u na uba'renem na, dame. Tawamhã apâ ma tô aimasisi zahuré Ãtioquia u, Siria na danhipti'a nho'õmo nhisi ãma timorĩ na te te isãna'rata zahuré zéb u. Ta hawi neb zahuré õ ré, ma tô Paulu norĩ ãma tamreme zusi ni, 'Re ihâimana u'âsi mono ma. Te te tãma 're romhuri wẽ zahuré mono da, te te 're pawaptob u'âsi zahuré mono da, ma tô ãma tamreme zusi ni, Ãtioquia hawi neb zahuré õ ré. Te te dama 're rowahutu zahuré mono parimhã, ma tô apâ aimasisi zahuré. 27Ãtioquia u apâ simasisi zahuré wamhã, ma tô isazei'wa norĩ zô tihârâ zahuré, te te itẽme ubumro da. Tahawa, ma tô dama siwasu'u zahuré, 'Re ihâimana u'âsi mono nhimipawaptobzém na. Ãne te tãma rowasu'u za'ra:

— 'Re ihâimana u'âsi mono, ma tô wapawapto, marĩ iwẽ hã wa te dama 're 'manharĩ mono da, iwasu'uwẽ hã wa te dama ãwisi da, zudeu'õ norĩ ma zama. Tawamhã ta norĩ zama ma tô te te 're sazei pese za'ra.

28Ãtioquia ãma te oto aimasisi hâ zahuré, Zezusihi nhirã zarina 're inomro mono norĩ 'rata, Paulu norĩ hã.

Currently Selected:

Atu 14: xavBP

Highlight

Copy