2 Timotiu 4

1-2Wa za oto marĩ hã aima waihu'u, 'Re ihâimana u'âsi mono nho'a, Cristu Zezusihi nho'a zama. Nimahã bâtâ na te za Cristu Zezusi hã dahâimanazém na da'awaihu'u, dawasété na, dawẽ na zama. Taha zarina, te za aihĩni norĩ ma dama arowairébé, dahâiba ré norĩ ma, duré adâ'â norĩ ma zama. Wanhib'apito hã te za wei mo apâ, Danhib'apito uptabi na oto dama 're sãmra mono da. Ãne wa, wa za aima ti'ru. Ma'ãpé, Wanhib'apito wasu'uwẽ na dama 're rowasu'u u'âsi mono za. Asô danhimiparizém na, duré asô danhimipari õ zém na zama, te za Wanhib'apito wasu'uwẽ na 're ida'apo're pu'u u'âsi mo. Da'ãma aiwa'a ãna, te za asimiroti na 're ida'apawapto mo, dawasété na 'râwi 're dasisãmri za'ra mono da, dawasédé hã da te 're rẽme pese za'ra mono da, dawẽ na si oto 're dahâimana za'ra mono da. 3E marĩ wa, wa ãne aima ti'ru. Nimahã na hã sena roti hã da te 're wapari ze za'ra mono õ di za. Rowasu'u hã da te 're iwapari ze za'ra mono zéb uwaibaba si, te za da te 're wapari za'ra. Dama rowahutu'wa da, te za da'ahâ na da te dasima 're pisutu za'ra, rowasu'u hã da te 're iwapari ze za'ra mono zéb uwaibaba si, te te dama 're rowasu'u za'ra mono da. 4Roti tô sena uptabi hã te za da te 're rẽme za'ra, da te 're wapari za'ra mono tõ da, dahi'rata norĩ nhimirob'rãzarõtõ 'rata si rowasu'u senai õ hã, da te 're wapari za'ra mono da oto. 5Ta norĩ ne 're aihâimana mono õ di za. Asimiza'rese te za 're aihâimana mo. Te za duré aihâimanazém na ãma 're ipibui pese mo. Duré, Wanhib'apito zazei'wa 're aimorĩ 'ru te, da te dasiwi aima 're rob'manharĩ wasété mono nherẽ, 're asisawi mono õ di za, 're robzépata mono tõ da. Te za duré Wanhib'apito wasu'uwẽ na 're ida'apo're pu'u u'âsi mo, 'Re ihâimana u'âsi mono te te aima ipisutuzéb zarina, asimiromhuri na tãma ãma 're uwaimrami mono da.

6Wa za oto aima ĩsiwasu'u. Ĩnhibâdâ romhuture di oto. Wanhib'apito zadawa wasu'u'wa 're ĩmorĩ 'ru te, za da te dasiwi ĩwĩrĩ nherẽ, ĩdâ'â tõ da hã, ĩsisawi õ di za. 7-8'Re dasi'wamhâri za'ra mono wa, danhiptete na dasiwi 're idawairébé mono ne, wa tô wa hã ĩnhiptete na 're ĩpusi. Duré dawara na dawi ĩwatobro ne, wa 're ĩhâimana, Wanhib'apito ma, ĩnhimiromhuri na te ĩsina tãma uwaimrami pari wa. Cristu umnhasi sina, wa tô duré 're morĩ u'â, isimiroti 'madâ'â sina. Ni'wa hã dawara na dawi watobro wẽ te, te za ropsu 'manharĩ hã sô tihâiba, da te ãma isõprezéb da hã. Tane, te marĩ iwẽ uptabi hã ĩzô 're hâimana, Wanhib'apito ma, ĩnhimiromhuri na te ĩsina tãma uwaimrami wẽ te. Nimahã na te za bâdâ hã iwa waptãrã, Wanhib'apito apâ we imorĩzéb da hã, dahâimanazém na te te ida'awaihu'uzéb zarina, te te da'ãma i'arowairébézéb da hã. Tawapsi, ta hã wẽ uptabi wa, te za marĩ iwẽ uptabi hã ĩma pisutu, i'uwaibaba si. E ĩma si te za pisutu. Mare di. Aihĩni Wanhib'apito zawi sina, wei imorĩzéb zô 're isimipari za'ra mono norĩ ma zama, te za duré marĩ iwẽ uptabi hã tãma pisutu za'ra.

Paulu hã Timotiuhu ma, marĩ na te te ipo're pu'uzém na rowasu'u

9Ma'ãpé, we asima rowairébé, we ĩtẽme aimorĩ hâ, ĩzabu da. 10Demasi hã ĩ'ãma sapa'a õ di oto. Ma tô ĩwi watobro, Tesalonita na 'ri nho'õmo nhisi u morĩ da, marĩ hã te te sima i'awẽ zarina, taha na si oto 're morĩ da. Cresẽti hã ma tô mo, Galasia na danhipti'a nho'õmo nhisi u. Titu hã ma tô duré mo, Damasiza na danhipti'a nho'õmo nhisi u. 11Lucaha si te ĩ'rata nhamra. Ãhã wa, Marcuhu zô rowaimrami mono za, sõpẽtẽ da, asiré we saprõni da, ĩnhimiromhuri na te te 're ĩpawapto mono da. 12Wa hã wa tô Tiquicu hã satõ, Éfézu na 'ri nho'õmo nhisi u morĩ da hã. 13Tawamhã we aimorĩ wamhã, ĩsi'ubuzé hã we ĩma âri za, Capuhu nhorõwa ãma te irẽme hã, Trowadi na 'ri nho'õmo nhisi ãma. Ibaihâ zama, we ĩma duri za. Ibaihâ hã romhâ 'manharĩ hã, ĩma wẽ uptabi wa, ta norĩ zama we ĩma duri za.

14Alesãdri hã ma tô ĩwi ro'wa'rutu pese, isi'uwazi na romhuri'wa hã. Wanhib'apito si te za tãma ãma wa'rã, marĩ te te ĩma i'ab'manharĩ wasété zé wa'rãmimhã. 15Taha aibâ hã ma tô wanhimirowasu'u na hã wazada tihâiba, sahi sina. Ma'ãpé tiwi 're asi'madâ'â pese mono za.

16Da'ãma rowairébé'wai ma, ĩsiwasu'u 'rata wamhã, ĩhâimana wasété õ zém na hã, ni'wa hã ĩ'ãma sapa'a õ di aré, tinhimiroti na ĩ'ãma sime da. Aihĩni ma tô ĩwi sina tipahâ za'ra. Tane nherẽ, te ĩsima wẽ õ di, da te ĩrẽmezém na te te dama ãma i'awa'rãmi da hã, 'Re ihâimana u'âsi mono hã. 17Da te ĩrẽme za'ra nherẽ, ma tô Wanhib'apito hã ĩ'rata tihâiba, te te ĩnhiptete da, 'ri para zudeu'õ norĩ ma, te rowasu'u da, Wanhib'apito wasu'uwẽ na. Ãhã wamhã, ma tô Wanhib'apito hã ĩnho'reptu, ĩdâ'â tõ da a'â. 18Tane te za Wanhib'apito hã duré rowasété hawi ĩnho'reptu, hâiwa u te te ĩ'ãwisi wẽ da, tinhib'a'uwẽ norĩ te te 're i'ab'madâ'â mono zéb u hã. Ta hã si wẽ uptabi wa, aihĩni wa za ãma 're wawata u'âsi za'ra.

Paulu hã sisa'u te te idazawizém na rowasu'u

19Ma'ãpé ĩma sawi zahuré na, Prisila norĩ hã Aquiraha me. Duré ĩma sawi za'ra na, Onesifuruhu nhorõwa 're, 're ihâimana za'ra mono norĩ hã. 20Erastu hã ma tô ĩza'u nhamra, Corĩtu na 'ri nho'õmo nhisi ãma. Trufimu hã hâzé wa, wa tô tirẽ, Miletu na 'ri nho'õmo nhisi ãma. 21Ma'ãpé, niha asina rosa'rata, rowa'u'u wahâ 're sa'wari mono õ ré, za we i'aimorĩzéb da na hã. Wasiré isazei'wa norĩ hã te ãma asawi za'ra, Euburu norĩ hã, Pudẽti norĩ me, duré Rino, duré Claudia. Duré uburé isazei'wa hâiba amo norĩ hã te ãma asawi za'ra.

22Timotiu, wa ĩsima aiwẽ, Wanhib'apito hã 'râwi aipẽ'ẽ 're, 're isãmra mono na, asina 're waihu'u u'âsi mono da. Duré 'Re ihâimana u'âsi mono wi, wa tô te tiwi 're waptẽrẽ u'âsi, isimizawizé hã uburé ai'ãma za'ra wa'aba 're hâimana u'âsi mono da.

Currently Selected:

2 Timotiu 4: xavBP

Highlight

Copy