1 Pedru 4

'Re idanomro mono zép tém na rowasu'u

1Cristu hã ma tô tihâiba na robzépata. Tahawa, te za asina 're asiptete za'ra wa'aba mo, asihâiba zawi ãna, isine 're irobzépata za'ra wa'aba mono zéb da hã. Ãne, da te 're robzépata za'ra mono wamhã, marĩ, da te 're i'manharĩ wasété za'ra mono zé hã, te za oto da te 're rẽme pese za'ra. 2Tahawa, ti'ai ãma 're aihâimana za'ra wa'aba mono ré, te za 're aihâimana wẽ za'ra wa'aba mo, 'Re ihâimana u'âsi mono te te sima 're iwẽ mono zéb zarina si, marĩ na asima 're irosa'rata wasété za'ra wa'aba mono zéb zarina, 're aihâimana za'ra wa'aba mono ãna oto. 3Wahub ahâ na hã ma tô ai'ãma 're si'utõrĩ za'ra wa'wa, 'Re ihâimana u'âsi mono nhimiroti waihu'u'õ'wai hâimanazém na, 're aihâimana wasété za'ra wa'aba mono ré hã. Ma tô asisô 're irowasutu za'ra wa'aba mo aré. Âzézei'wa te aré 're anomro aba mo. Duré dato iwẽ'õre hã 're 'manharĩ za'ra wa'aba mono ré, ma tô asina 're asipsaihuri za'ra wa'aba mo aré. Duré âzézei'wa 're aihâimana za'ra wa'aba mono wa, ma tô ai'rã siwamnarĩ na 're aihâimana za'ra wa'aba mo. Duré 'Re ihâimana u'âsi mono upana, ma tô romhâiba 'manharĩ ãma 're aiwata za'ra wa'aba mo, ta hã waihu'u pese newa rob'manharĩ hã. 4'Re anomro wasété aba mono zé hã, tâibâ oto. Tahawa, siwa'ru dasiré 're aihâimana za'ra wa'aba mono õ wa, te ai'ãma 're tob'uzu za'ra wa'wa, Wamama nhimiroti waihu'u'õ'wa norĩ hã. Tahawa, 're aihâimana wẽ za'ra wa'aba mono 'ru te, te oto ta norĩ hã taré te te aima 're nharĩ wasété za'ra wa'wa. 5Tane nherẽ, nimahã na ta norĩ hã 're ihâimana wasété za'ra mono zém na te te iwaihu'u za'ra zéb zarina, te za ta norĩ ma arowairébé, 'Re ihâimana u'âsi mono hã. Te te ida'awaihu'uzéb zarina, te za romhutu na uburé norĩ ma rowairébé, ihâiba ré norĩ ma, duré 're idâ'â za'ra mono norĩ ma zama. 6Tahawa, dahâimanazém na za te te dama 're arowairébé mono wa, ma tô Wanhib'apito zadawa wasu'u'wa norĩ hã Cristuhu wasu'uwẽ na te te 're dapo're pu'u za'ra, da te ãma 're saze za'ra mono da. Ta norĩ wapari'wa norĩ hã ma tô oto tidâ'â za'ra. Ti'ai ãma 're nomro mono ré, ma tô iwasété na wẽ'õ za'ra, 'Re ihâimana u'âsi mono hã, uburé 're idahâimana za'ra mono norĩ hã iwasété na te te 're i'awẽ'õ mono ne. Tane nherẽ, hâiba ré 're nomro mono ré, ma tô Wanhib'apito zadawa wasu'u'wa norĩ hã Cristuhu wasu'uwẽ na po're pu'u za'ra, ta norĩ hã rowẽ isi'utõrĩ'õ ãma 're hâimana u'âsi za'ra mono da, 'Re ihâimana u'âsi mono ne.

'Re dasipawaptob za'ra mono da, dama irotizé

7Ro isi'utõrĩzéb u hã, romhuture di oto. Tahawa, te za aihâiba na asina 're asiptete za'ra wa'aba mo. Duré aihâimana nhimiza'rese te za 're aihâimana za'ra wa'aba mo, 'Re ihâimana u'âsi mono ma, 're aimreme zusi u'âsi aba mono da. 8'Re idasisawi za'ra mono zé hã uburé roti nhipai u te 're hâimana, pire na. Tahawa, te za 're asisawi pese za'ra wa'aba mono. E marĩ wa. Dazawizé hã dama 're hâimana za'ra mono wamhã, dawasédé hã da te da'ãma 're 'madâ'â za'ra mono õ di za, ahâ na, da te 're 'manharĩ za'ra mono nherẽ, dawasédé hã. 9Te za duré 're ida'mazasi wẽ za'ra wa'aba mo ari'iwi, 're dawata'ẽ za'ra wa'aba mono ãna. 10'Re ihâimana u'âsi mono hã sõpru wa, ma tô aihâiba mono bâ dama 're iromhuri za'ra wa'aba mono zéb da hã, aima sõmri za'ra wa'wa, sipu'u pese na. Taha zarina te za oto ate aba mono bâ dama ãma 're i'uwaimrami za'ra wa'aba mo, asimiromhuri za'ra wa'aba na hã. 11Tawamhã dama 're rowahutu za'ra wa'aba mono wamhã, duré dama 're roti za'ra wa'aba mono wamhã, timreme te te aima 're isõmri za'ra wa'aba mono na si, te za dama 're irowasu'u za'ra wa'aba mo. Duré aihâiba na zama 're dapawaptob za'ra wa'aba mono wamhã, 'Re ihâimana u'âsi mono, tinhiptede te te aima 're isõmri za'ra wa'aba mono na, te za 're idapawaptob za'ra wa'aba mo. Ãne na hã te za dama ãma 're i'uwaimrami za'ra wa'aba mo, 'Re ihâimana u'âsi mono ãma 're dawata za'ra mono da, Zezu Cristuhu nhib'a'uwẽ 're aihâimana za'ra wa'aba mono wa, dama ãma 're i'uwaimrami za'ra wa'aba mono zém na. 'Re ihâimana u'âsi mono hã wẽ uptabi wa, duré waihu'u pese uptabi wa, wa za ãma 're wawata u'âsi za'ra.

Wanhib'apito zazei'wa norĩ te te 're irobzépata za'ra mono zé wasu'u

12Ĩsiwadi norĩ, ĩma i'asawi pese za'ra wa'aba norĩ, ãhã na rowasédé hã da te aima 're 'manharĩ za'ẽtẽ za'ra wa'aba mono wa, te a'â 're irobzépata za'ra wa'aba mo. Tane nherẽ, 're irobzépata za'ra wa'aba mono zém na ãma 're atob'uzu za'ra wa'aba mono õ di za, da te aima 're rob'manharĩ za'ẽtẽ za'ra wa'aba mono õ newa. 13Cristu hã aiwana za'ra wa'aba, ma tô robzépata za'ẽtẽ. Tahawa, isine 're robzépata za'ra wa'aba mono wa, te za aipẽ'ẽ 're, 're ato za'ra wa'aba mo. E marĩ wa. Cristu hã tiwaihu'u pese na apâ wei morĩ wapsi, ato za'ẽne hã aima 're hâimana za'ra wa'aba mono wa. 14Ãté Cristuhu ãma si 're aihâimana za'ra wa'aba mono 'ru te, te za da te aima 're nharĩ wasété za'ra wa'wa. Tane nherẽ, aima 're rowẽ za'ra wa'aba mono di za. E marĩ wa. 'Re ihâimana u'âsi mono pẽ'ẽzani hã aipẽ'ẽ 're aima 're hâimana za'ra wa'aba mono wa oto, rowẽ uptabi zé hã. 15-16Cristuhu zazei'wa oto 're anomro aba mono nherẽ, 're danhimroi wa'aba mono õ di za. Duré marĩ na dawi 're asipsaihuri za'ra wa'aba mono õ di za. Duré marĩ na dawi 're ro'wa'rutu za'ra wa'aba mono õ di za. Duré danhimirosa'rada hã dawi 're 'wa'rutu za'ra wa'aba mono õ di za. Ãté nimahã na dama 're aihâimana wasété za'ra wa'aba mono wamhã, te za da te aima 're rob'manharĩ wasété za'ra wa'wa. Ãne zarina, 're robzépata za'ra wa'aba mono wamhã, i'uwaibaba te za tô 're irobzépata za'ra wa'aba mo. Tane nherẽ, Cristuhu zazei'wa 're anomro aba mono 'ru te, 're robzépata za'ra wa'aba mono wamhã, 're aséb za'ra wa'aba mono õ di za. Cristuhu zazei'wa na, da te 're asisi za'ra wa'aba mono wẽ te, te za 'Re ihâimana u'âsi mono ãma si 're aiwata za'ra wa'aba mo.

17Bâdâ hã ma tô oto iwa waptãrã, 'Re ihâimana u'âsi mono hã te te dama i'arowairébézéb da hã, ta hã dahâimanazém na dawaihu'u'wa 're hâimana mono wa. Tahawa, te za a'â tinhib'a'uwẽ norĩ ma arowairébé, 're iwahâimana za'ra mono zém na, te te wa'awaihu'u wa. Tawamhã e niha za isazei'õ'wa norĩ ma te te irowairébézé hã. Wanhib'apito wasu'uwẽ na, 'Re ihâimana u'âsi mono, we te te dama iwaihu hã te te ãma saze za'ra õ wa dame, ta norĩ ma, 're rowẽ za'ra mono õ di za.

18Duréihã ãhã wasu'u na ma tô ãne na dama rowasu'u, 'Re ihâimana u'âsi mono zadawa 'mahârâ'wa hã:

“Ãté marĩ ahâ na te za sada 're hâimana za'ra, 're inomro wẽ mono norĩ zada hã, tinho'reptuzé hã te te sina 're uwaimrami za'ra mono õ ré. Tawamhã e niha te za tãma 're romhâimana za'ra, 'Re ihâimana u'âsi mono wẽ'õ'wa norĩ ma hã, siwa'ru 're ihâimana za'ra mono norĩ ma hã.”

19Ãté wa za a'â robzépada hã wa te wasina 're 'madâ'â za'ra, 'Re ihâimana u'âsi mono te te wama 're i'awẽ mono zéb zarina. Tane nherẽ, 'Re ihâimana u'âsi mono, wa'apoto mono 'wai umnhasi sina, wa za dama 're wahâimana wẽ za'ra, ta hã tinhimiropisutu wẽ na za te te wama ãma 're a'uwaimrami u'âsi mono wa.

Currently Selected:

1 Pedru 4: xavBP

Highlight

Copy