1 Pedru 3

Damro ré norĩ hâimanazé wasu'u

1-2Pi'õ norĩ, romhuri'wa norĩ hã tinhib'apito mreme te te 're iwapari pese za'ra mono ne, te za duré aimro mreme hã 're iwapari pese za'ra wa'aba mo. Ãté aimro za'ra wa'wa hã zahadu te te saze za'ra õ di, 'Re ihâimana u'âsi mono nhimiroti hã. Tane nherẽ, tãma 're aihâimana wẽ za'ra wa'aba mono zéb zarina, te za oto sima wẽ za'ra, Cristuhu zazei'wa oto 're hâimana za'ra mono da. Te te 're saze za'ra mono da, tãma 're roti za'ra wa'aba mono õ nherẽ, te za uihâ na te te 're saze za'ra. E marĩ wa. Tãma 're aihâimana wẽ za'ra wa'aba mono wa, duré imreme hã 're wapari pese za'ra wa'aba mono wa. 3-4Asima 're asipese za'ra wa'aba mono na si, 're asõpré wa'aba mono õ di za, ai'rãi waipo iwẽ na, duré asõ'rebzu za'ra wa'wa hã iwẽ na. Duré ai'uza za'ra wa'wa iwẽ na si asima 're rosa'rata za'ra wa'aba mono õ di za. Asimirosa'rata wẽ na oto 're i'anomro aba mono zéb zô si, te za asima 're asõpré wa'aba mo, duré aiwaimri 're i'aihâimana za'ra wa'aba mono zéb zô zama. Ãne si tãma wẽ uptabi di, 'Re ihâimana u'âsi mono ma hã. 5Ãne si ma tô wahi'rata sipi'õ norĩ hã 're nomro, 're ihâimana wẽ za'ra mono norĩ hã. 'Re ihâimana u'âsi mono si, ma tô ta norĩ hã te te sina 're umnhasi za'ra, te te 're pawapto wẽ za'ra mono da. 'Re inomro wẽ mono na, ma tô duré ta norĩ hã sina 're sõpré. Tahawa, ma tô timro mreme si te te 're wapari pese za'ra. 6Ãne Sara hã ma tô 're mo. Timro mreme hã ma tô te te 're wapari pese, Abra'ãhã mreme hã. Tahawa, ma tô tinhib'apito na te te 're sisi Sara, Abra'ã hã. Tane te za duré a norĩ wa'wa hã aimro ma 're aihâimana wẽ za'ra wa'aba mo. Asina aihâtâ'â ãna, te za duré 're anomro aba mo. Tawamhã Saraha nhihudu na te za te te 're asisi za'ra wa'wa, 'Re ihâimana u'âsi mono hã.

7Duré aibâ norĩ, aimro siré te oto 're aihâimana za'ra wa'aba mo. A norĩ wa'wa hã aibâ wa, aihâiba hã siptete za'ra wa'aba di, aimro hâiba za'ra wa'aba ma hã. Ãne hã te za asina iwaihu'u za'ra wa'wa. Tahawa, te za aimro ma 're aihâimana wẽ za'ra wa'aba mo. Rowẽ isi'utõrĩ'õ hã te za 'Re ihâimana u'âsi mono hã aima sõmri za'ra wa'wa, hâiwa ãma. Aimro norĩ wa'aba ma zama, te za duré tô tãma sõmri za'ra. Tahawa, te za aimro ma 're aihâimana wẽ za'ra wa'aba mo. Tawamhã 'Re ihâimana u'âsi mono ma, asiré 're aimreme zusi aba mono wamhã, te za te te 're ai'awapari 'wa, Wamama hã.

Isazei'wa norĩ, dama 're hâimana wẽ za'ra mono nherẽ, te te 're irobzépata za'ra mono zé wasu'u

8Ĩmreme na wa za oto aima 'rãsutu za'ra wa'wa. Asimirosa'rata wẽ na te za aihĩni 're asisazei pese za'ra wa'aba mo. Duré dapẽ'ẽzé zarina da te 're robzépata za'ra mono wamhã, te za dasiré aipẽ hã 're isépata za'ra wa'aba mo, aipẽ'ẽzé sina. Duré uburé marĩ wẽ na dama 're rowẽ za'ra mono wa, 're dato za'ra mono wamhã, te za duré dasiré 're ato za'ra wa'aba mo. Te za duré 're asisawi pese za'ra wa'aba mo. Asima aipire na 're aihâimana za'ra wa'aba mono õ di za. 9Duré asada 're dahâimana wasété za'ra wa'aba mono wamhã, asa dama ãma 're wa'rãmi za'ra wa'aba mono õ di za, aihâimana wasété na. Duré dapẽ'ẽ na taré da te 're ai'ruiwapari za'ra wa'aba mono wa, da te aima 're nharĩ za'ra wa'aba mono nherẽ, asa dama ãma 're wa'rãmi za'ra wa'aba mono õ di za, aimreme wasété na hã. Wamama wi si, te za ta norĩ ma 're iwaptẽrẽ za'ra wa'aba mo, iwẽ si te te tãma 're sõmri za'ra mono da, ta norĩ ma hã. Ãne da, ma tô Wamama hã sitẽme asô tihârâ za'ra wa'wa, iwẽ na si aima 're sõprub za'ra wa'aba mono da. 10Duréihã ãne na ma tô 'Re ihâimana u'âsi mono zadawa 'mahârâ'wa hã dama roti:

“Aihâiba ré, robzei u'âsi 're anomro aba mono da, asima 're wẽ za'ra wa'aba mono wamhã, aimreme wasété na dama 're nharĩ za'ra wa'aba mono õ di za. Duré dama 're asadawa nhipese za'ra wa'aba mono õ di za.

11Aiwasété wi 're aipizari za'ra wa'aba mono, iwẽ si dama 're 'manharĩ za'ra wa'aba mono da oto. Duré rowẽ na si asiré 're aihâimana za'ra wa'aba mono da si, te za asina 're irosa'rata pese za'ra wa'aba mo.

12Hâimana wẽ na dama 're ihâimana za'ra mono norĩ si, te za te te 're ab'madâ'â pese, 'Re ihâimana u'âsi mono hã. Te te duré tiwi 're rowaptẽrẽ za'ra mono wamhã, te za te te 're awapari, imreme zarina te te tãma ãma 're a'uwaimrami mono da. Tane nherẽ, dahâimana wasété na dama 're dahâimana za'ra mono wamhã, te za dazada 're hâimana.”

13A norĩ wa'wa hã 're anomro wẽ wa'aba mono da, tô sena asina 're rosa'rata za'ra wa'aba mono wamhã, e 'wa hã te za rowasédé hã te te aima 're 'manharĩ za'ra wa'wa. 14Dama 're aihâimana wẽ za'ra wa'aba mono nherẽ, da te aima 're rob'manharĩ wasété za'ra wa'aba mono wamhã, dama 're aipahi za'ra wa'aba mono õ di za. Asimirosa'rata na hã 're aihâtâ'â za'ra wa'aba mono õ di za duré. 15Cristu hã Asib'apito aima 're hâimana za'ra wa'aba mono wa, te za aihâimana prédup sina 're iwapari pese za'ra wa'aba mo. Duré Cristu 're isaze za'ra wa'aba mono zém na, da te 're asadanharĩ za'ra wa'aba mono wamhã, awa'awi te za dama 're asiwasu'u waré za'ra wa'aba mo. 16Aiwaimri te za 're asiwasu'u za'ra wa'aba mo, aimreme wasété ãna. Aihâimana wẽ na te za dama 're aihâimana za'ra wa'aba mo, asimirosa'rata wasété na 'râwi 're asiwẽ'õ za'ra wa'aba mono tõ da. Tawamhã dama 're aihâimana wẽ za'ra wa'aba mono wamhã, Cristuhu zazei'wa 're aihâimana za'ra wa'aba mono 'ru te, taré da te aima 're inharĩ wasété za'ra wa'aba mono niwĩ, te za dasimreme ma 'râwi 're danhiséb za'ra. 17Ãté 're aihâimana wẽ za'ra wa'aba mono 'ru te, te za da te aima 're rob'manharĩ wasété za'ra wa'wa. Ãne zarina, 're robzépata za'ra wa'aba mono wamhã, te za iwaihu'u za'ra wa'wa, 'Re ihâimana u'âsi mono te te sima 're aiwẽ za'ra wa'aba mono zéb zarina, a'â 're irobzépata za'ra wa'aba mono na. Ãne hã te te wama 're awẽ mono õ di, dama 're iwahâimana wasété za'ra mono zéb da hã. Dama 're wahâimana wasété za'ra mono wamhã, ãté te za da te 're wahâ za'ra. Ãne zarina, wa te 're robzépata za'ra mono wamhã, i'uwaibaba wa za tô wa te 're robzépata za'ra. 18Misi haré ma tô Cristu hã dazada dârâ, 're idahâimana wasété za'ra mono hawi, te te 're da'anho'reptui mono da. 'Re imorĩ wẽ uptabi hã ma tô dârâ, 're idanomro wasété mono norĩ da, te te 're wa'anhimroi mono da, 'Re ihâimana u'âsi mono u. Cristu hã dâ'â uptabi nherẽ, ma tô Imama hã hâiwa'utu, apâ 're hâimana u'âsi mono da. 19Tihâiba na u'âsi, te adâ'â norĩ u hã mo, dazazéb 're, 're idasimasa mono ne, nimomo 're iwairébé mono õ norĩ u. Uburé Danhib'apito uptabi na te te sina po're pu'u za'ra da, te itẽme timorĩ za'ra. 20Ta norĩ hã Nowé ti'ai ãma 're morĩ ré, te te 're wapari za'ra mono õ di, 'Re ihâimana u'âsi mono nhimiroti hã. Nowé hã 'ri ne uba're, te te 'manharĩ ré, te ta norĩ hã po're ãna 're nomro. Tane nherẽ, da'ãma wa'a su'u õ wa, te te da'uprosi su'u õ di, 'Re ihâimana u'âsi mono hã. Te te oto da'uprosi wamhã, 'ri ne uba're wa, isisisi norĩ si, ma â wi hã sõ'reptu za'ra. Ta norĩ hã umro za'ra di. 8 na ihâiba za'ra hã. 21Ta hã â hã, â dawabzuri, te wasu'u, danho'reptuzé. E da'u're wa, da'upsõzé, te â dawabzuri hã wasu'u. Mare di. 'Re ihâimana u'âsi mono ma, da te dasi'ãma 're iropisutu za'ra mono zé te wasu'u, â dawabzuri hã. Dawasédé te te dama 're apari mono wa, 'râwi 're dasiwaihu'u za'ra mono õ di oto, dawasété na hã. Tahawa, dama 're irowẽ za'ra mono zéb zarina, te za oto dasina da te tãma 're ropisutu za'ra, ãma 're idanomro mono zéb da hã. Zezu Cristu hã dâ'â uptabi nherẽ, Imama hã ab're hawi te te hâiwa'utu wa, duré apâ 're morĩ wa, te oto asõ'reptuzé hã aima tihâimana za'ra wa'wa. 22Cristu hã hâiwa u morĩ wa, te oto pire na Timama nhimire niwĩ 're sãmra, Danho'reptui'wa hã. 'Re ihâimana u'âsi mono ma romhuri'wa norĩ 'madâ'â'wa, te 're hâimana. Uburé hâiwa nho're ãma, pire na duré waihu'u pese na 're ihâimana za'ra mono norĩ ma zama, te pire uptabi na hã tãma 're hâimana za'ra.

Currently Selected:

1 Pedru 3: xavBP

Highlight

Copy