1 Pedru 2
2
1Tahawa, te za aiwasédé hã 're irẽme pese za'ra wa'aba mo, dasi'ruiwapari hã, duré dazadawa nhipe hã, duré dahâimanazé tô senai'õ hã, duré danhimarĩ na danhimi'ruiwapari hã, duré dasima dawasu'u wasédé hã. 2Ai'uté ipoto té hã tina hâiwa'u zô 're i'ru'ru mono ne, te za Wanhib'apito nhimiroti zô si 're irob'ruiwapari za'ra wa'aba mo, ãma 're asiptete za'ra wa'aba mono da, aihâimana wasété hawi asõ'reptuzé hã 'râwi oto asina 're waihu'u za'ra wa'aba mono da. 3Wanhib'apito dama 're isõpru mono zé hã 'râwi asina 're waihu'u za'ra wa'aba mono wa, wa ãne aima waihu'u za'ra wa'wa.
Ẽtẽ na Cristuhu ãma te te ãma isimiré'ézé wasu'u
4Ma'ãpé, Wanhib'apito u asimirosa'rata na si nherẽ, 're aihutu aba mono. Ta hã wẽ nherẽ, ma tô dasiwi wẽ'õ ni, ẽne hã 'ri'wa norĩ te te siwi iwẽ'õ ne. Tane nherẽ, da te dasiwi wẽ'õ nherẽ, 'Re ihâimana u'âsi mono ma, wẽ uptabi di, Wanhib'apito hã. Tãma sawi uptabi di duré. 5Ẽne ahâ nherẽ, 'ri hã da te dasiwi ãma i'ri ne, te za 'Re ihâimana u'âsi mono hã te te aima 're nharĩ za'ra wa'wa, isõrõwa na tãma 're aihâimana u'âsi za'ra wa'aba mono da. E marĩ da. Isõrõwa ãma tãma iromhuri'wa norĩ ne, sasedoti norĩ ne, tãma iromhuri'wa 're aihâimana za'ra wa'aba mono da, duré aihâiba na tãma 're asõprub za'ra wa'aba mono da. Zezu Cristu wazada idâ'âzéb zarina, tãma 're asõprub za'ra wa'aba mono wamhã, Wamama ma hã wẽ di, tãma 're i'asõprub za'ra wa'aba mono zé hã. 6Duréihã iwana ré 'Re ihâimana u'âsi mono, ma tô ẽtẽ na Zezu Cristuhu ãma simiré'é. Ãne te tawamhã taha na tinha:
“Ẽtẽ tõmo wawẽ hã wa tô pisutu, ĩnhorõwa ãma te hiri da, Siã na 'ri nho'õmo nhisi ãma. 'Ri na'rata wẽ'ẽzéb ãma wa za tihi, 'ri hã siptete na sab da. Ẽne hã ĩma wẽ uptabi di. Ĩma sawi uptabi di duré. Taha umnhasi sina 're dahâimana za'ra mono wamhã, iwẽ na za te te dama ãma 're a'uwaimrami u'âsi mono wa, dawi 're robzei'õ za'ra mono õ di za.”
7Ẽtẽ na isisi hã aima sawi uptabi za'ra wa'aba di, Cristu hã, Danho'reptui'wa na asina 're umnhasi za'ra wa'aba mono wa. Da te dasina 're i'umnhasi za'ra mono õ norĩ ãma, ma tô 'ri'wa norĩ ãma simiré'é, 'Re ihâimana u'âsi mono zadawa 'mahârâ'wa hã. Ãne te ta norĩ ãma rowasu'u:
“Ẽtẽ tomhâpâ wẽ, 'ri na'ratazéb da, wẽ uptabi nherẽ, wasété newa, 'ri'wa norĩ te te siwi iwẽ'õ hã te oto tô pire uptabi na hã 're sa'wari u'âsi.”
8Duré ẽtẽ tõmo wawẽ wasu'u amo na rob'ui'éré hã, ãne:
“Ẽne hã te za nasi da'marõpãrĩ za'ra.”
Ẽne te te nasi da'marõpãrĩ za'ra wamhã, dama 're rowẽ za'ra mono õ di za. Tane Cristuhu wasu'uwẽ hã da te 're saze za'ra mono õ wamhã, dama 're rowẽ za'ra mono õ di za, 'Re ihâimana u'âsi mono hã te te siwi 're ida'awẽ'õ mono zéb zarina.
9Tanei õ di, a norĩ wa'wa hã. 'Re ihâimana u'âsi mono, ma tô sima aipisutu za'ra wa'wa, isib'a'uwẽ si oto tãma 're anomro aba mono da. Sasedoti norĩ hã te te sima 're i'apisutu mono ne, te oto a norĩ wa'wa hã uburé Danhib'apito ma romhuri'wa, 're anomro aba mo, õhõ ãma si 're anomro aba mono da, ite da. Ta hã robra hawi ma tô rowa'a u sitẽme asô tihârâ za'ra wa'wa, 're anomro wasété aba mono zém hawi, rowẽ uptabi na si 're anomro aba mono da oto. Taha wasu'u na, tiwaihu'u pese na te te aima ãma 're i'uwaimrami wẽ za'ra wa'aba mono zém na, ma tô sima aipisutu za'ra wa'wa, ãma 're dapo're pu'u u'âsi za'ra wa'aba mono da. 10A norĩ wa'wa hã 'Re ihâimana u'âsi mono nhib'a'uwẽ 're anomro aba mono õ di aré. Ãhã na te oto isib'a'uwẽ tãma 're aihâimana za'ra wa'aba mo. Duré da'ãma 're ipẽ'ẽzé mono zé hã asina 're waihu'u za'ra wa'aba mono õ di aré. Ãhã na ma tô oto asina iwaihu'u za'ra wa'wa, da'ãma 're ipẽ'ẽzé mono zé hã.
Dahâimana wẽ zém na rowasu'u
11Ĩsisãnawã norĩ, ĩma asawi pese za'ra wa'aba norĩ hã, darom nhiti 're idahâimana za'ra mono ne, te 're aihâimana za'ra wa'aba mo, ti'ab ré. Tahawa, marĩ wasété na 'râwi asima 're rosa'rata za'ra wa'aba mono õ di za, asimirosa'rata wasété zarina 're 'manharĩ za'ra wa'aba mono tõ da, aiwasété 'wa hã. 12A norĩ wa'wa hã Wanhib'apito zazei'õ'wa norĩ wazari, te 're aihâimana za'ra wa'aba mo. Tahawa, te za aihâimana wẽ na si dama 're aihâimana za'ra wa'aba mo. Tawamhã aihâimana wasété na, taré da te aima 're nharĩ za'ra wa'aba mono nherẽ, te za da te 're aiwaihu'u za'ra wa'wa, dama 're aihâimana wẽ za'ra wa'aba mono zém na. Tawamhã Cristu hã apâ wei morĩ wapsi, te za 'Re ihâimana u'âsi mono ãma tawata za'ra ni, isimiroti zarina aihâimana wẽ na, dama 're aihâimana za'ra wa'aba mono wa.
13Wanhib'apito nhib'a'uwẽ oto 're anomro aba mono wa, uburé dama ipire norĩ nhimiroti hã te za 're iwapari pese za'ra wa'aba mo. Tahawa, ti'ai ãma danhipai u da'madâ'â'wa nhimiroti hã te za duré 're iwapari pese za'ra wa'aba mo. 14Duré tãma da'madâ'â'wa da, te te 're ida'apisutu mono norĩ nhimiroti zama, te za 're iwapari pese za'ra wa'aba mo. Ihâimana wasété norĩ hã, isadawa para te te 're hâ za'ra mono da, duré ihâimana wẽ norĩ ãma 're wata za'ra mono da, taha da, ma tô ta norĩ hã pisutu za'ra. 15'Re ihâimana u'âsi mono hã ma tô sima aiwẽ za'ra wa'wa, aihâimana wẽ na dama 're aihâimana za'ra wa'aba mono da. E marĩ da. Aihâimana wẽ na dama 're aihâimana za'ra wa'aba mono nherẽ, taré da te aima 're nharĩ wasété za'ra wa'aba mono tõ da. 16Pawa'âbâ ãna dama romhuri'wa norĩ ne, robzei'õ na 're aihâimana za'ra wa'aba mono õ di oto, a norĩ wa'wa hã. Tane nherẽ, Cristuhu ãma rowẽ na 're anomro aba mono nherẽ, ãne taré 'râwi asi'ãma 're rosa'rata za'ra wa'aba mono õ di za: Ĩwasédé te 're 'manharĩ mono nherẽ, rowẽ u'âsi wa za 're ĩhâimana. Ãne taré 'râwi asi'ãma 're rosa'rata za'ra wa'aba mono õ di za. 'Re ihâimana u'âsi mono ma romhuri'wa, 're aihâimana za'ra wa'aba mono wa, te za aihâimana wẽ na 're aihâimana za'ra wa'aba mo. 17Ãne wa, te za dahâiba mono bâ 're idahâiba wazéb za'ra wa'aba mo. Uburé asiré isazei'wa norĩ hã te za 're isawi pese za'ra wa'aba mo. 'Re ihâimana u'âsi mono hã te za duré asima 're ipipa za'ra wa'aba mo, iwaihu'u pese uptabi na. Duré ti'ai ãma danhipai u da'madâ'â'wa hã te za asiwi 're ihâiba wazéb za'ra wa'aba mo.
Pawa'âbâ õ nherẽ, romhuri'wa norĩ hã 're inomro wẽ mono zé wasu'u
18Aiwada'uri zarina aipawa'âbâ ãna dama romhuri'wa norĩ, asib'apito nhimiwada'urizé hã te za 're iwapari pese za'ra wa'aba mo, isimizawi pese norĩ mreme hã, duré isimizawi'õ norĩ mreme zama. 19Taré nherẽ, da te aima 're rob'manharĩ za'ra wa'aba mono wamhã, te za 're irobzépata za'ra wa'aba mo. Ãne wamhã, ari'iwi te za 're aihâimana za'ra wa'aba mo, taha da, te te sima 're aiwẽ za'ra wa'aba mono wa, 'Re ihâimana u'âsi mono hã. Ãne zarina te za te te 're aiwẽsãmri za'ra wa'wa. 20Marĩ hã 're 'manharĩ wasété za'ra wa'aba mono wa, da te 're aihâ za'ra wa'aba mono wamhã, ari'iwi 're aihâimana za'ra wa'aba mono nherẽ, e te za ai'ãma 're dawata za'ra wa'wa. Mare di. Aihâimana wẽ na dama 're aihâimana za'ra wa'aba mono nherẽ, da te aima 're rob'manharĩ za'ra wa'aba mono wamhã, ari'iwi te za 're isépata za'ra wa'aba mo. Tawamhã 'Re ihâimana u'âsi mono si te za te te 're aiwẽsãmri za'ra wa'wa. 21Cristu hã ma tô robzépata, asada za'ra wa'aba. Ta hã ma tô ãne na aima ãma asanho za'ra wa'wa, isirã zarina si ari'iwi 're robzépata za'ra wa'aba mono da hã. Taha da, ma tô sitẽme asô tihârâ za'ra wa'wa, 'Re ihâimana u'âsi mono hã. 22Cristu hã marĩ na tiwasédé te te 'manharĩ õ uptabi di. Duré niwamhã sadawa nhipese na te te inharĩ waihu'u õ. 23Da te tãma 're nharĩ wasété za'ra mono nherẽ, asa te te dama 're nharĩ wasété mono õ di. Duré da te tãma irob'manharĩ wasété mono na te te robzépata nherẽ, te te dama ropipa õ di asa hã. 'Re ihâimana u'âsi mono ma si, ma tô sisõ, taha si dahâimanazéb zarina da'ãma rowairébé'wai wa, te te ãma dama 're a'upai mono õ wa. 24Cristu hã wedepo'o nhonhi'rãmi na dâ'â wamhã, ma tô wawasété wa, wawa'âbâ za'ra, wawasédé hã wa te oto 're 'manharĩ tõ za'ra mono da, wahâimana wẽ na si oto 're wahâimana za'ra mono da. Ihâiba na da te tãma irob'manharĩ wasétézém na, ma tô robzépata za'ẽtẽ. Taha zarina, a norĩ wa'wa hã rowẽ na te oto 're aihâimana za'ra wa'aba mo. 25Rowẽ na 're aihâimana za'ra wa'aba mono õ di aré, pone'ẽrebâ, bâdâdi nhiti 're isipa za'ra mono ne, 're anomro aba mono wa aré. Ãhã na ma tô apâ aipizari za'ra wa'wa, Da'madâ'â wẽ 'wai u, isarina si oto 're anomro aba mono da, rowẽ na.
Currently Selected:
1 Pedru 2: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.
