1 Zuwã 5

Isazei'wa norĩ hã siptete sina dawi 're ihâimana za'ra mono zé wasu'u

1Ni'wam norĩ hã, Zezu Cristu, Danho'reptui'wa da, 'Re ihâimana u'âsi mono te te ipisutu na te te 're sazei pese za'ra mono wamhã, ta norĩ si te 'Re ihâimana u'âsi mono 'ra, 're hâimana za'ra. Ni'wa hã aibâ hã wama sawi pese za'ra wamhã, taha u'âbâ, wa za duré i'ra norĩ hã wa te 're sawi pese za'ra. 2Taha zarina wa za duré ãne hã waihu'u za'ra ni: 'Re ihâimana u'âsi mono hã wama sawi pese za'ra wamhã, duré isimiroti hã wa te 're 'madâ'â pese za'ra mono wamhã, taha u'âbâ, wa za i'ra na 're iwahâimana za'ra mono hã tô sena 're wasisawi pese za'ra, wasiré isazei'wa norĩ me hã. 3-4Tawamhã 'Re ihâimana u'âsi mono hã wa te wasiwi 're sawi pese za'ra mono wamhã, e niha wa za tawamhã 're wahâimana za'ra. Isimiroti si wa za wa te 're 'madâ'â pese za'ra. E isimiroti hã wama pire za'ra di, wa te 're i'madâ'â pese za'ra mono zéb da hã. Mare di. 'Re ihâimana u'âsi mono 'ra, oto 're wanomro mono wa, wama waihu'u pese za'ra di, wa te tãma ãma 're i'uwaimrami za'ra mono zéb da hã. Tahawa, wanhiptete na wa za 'Re ihâimana u'âsi mono wẽ'õ'wa norĩ da, 're wahâimana za'ra, uburé marĩ iwasédé hã ti'ai ãma 're ihâimana za'ra mono wi. E niha wa za wanhiptete sina ãma 're wahâimana za'ra. Zezusi hã Wanho'reptui'wa na wa te wasina 're i'umnhasi pese za'ra mono zém na wa za wanhiptete sina dawi 're wahâimana za'ra. 5E 'wam norĩ hã te za tawamhã 'Re ihâimana u'âsi mono wẽ'õ'wa norĩ zada hã, siptete sina 're hâimana za'ra. Zezusi hã, 'Re ihâimana u'âsi mono 'ra na te te 're isaze za'ra mono norĩ si, te za sada 're hâimana u'âsi za'ra, 'Re ihâimana u'âsi mono wẽ'õ'wa norĩ zada hã.

Cristu hã a'uwẽ hâiba na dasiré ipoto na tô sena na da te 're iwaihu'u za'ra mono zé wasu'u

6-8Zezu Cristu hã ti'ai u wei morĩ wamhã, a'uwẽ hâiba na ma tô podo. E niha wa za tawamhã wasiwi waihu'u pese za'ra ni, sena na Zezusi hã a'uwẽ hâiba na ipoto na, duré ti'ai ãma a'uwẽ hâiba na 're imorĩ na. Si'ubdatõ iwaihu'uzé hã. Imorĩ'rata na iwaihu'uzé hã ãne: Ti'ai ãma poto wamhã, â na ma podo, tina dub're hawi, dasine. Duré maparane ãma iwaihu'uzéb da hã ãne: Õ hã dâ'â wamhã, iwapru hã ma tô tiwi puru, da te dasiwi iwa'rézéb ãma hã. Taha na wa za wasiwi waihu'u pese za'ra ni, a'uwẽ hâiba na 're imorĩzém na. Duré si'ubdatõ ãma iwaihu'uzéb da hã ãne: 'Re ihâimana u'âsi mono pẽ'ẽzani, tô sena na si te te wama 're i'awaihu'u mono zém na, wa za duré wa te ãma 're waihu'u pese za'ra. Ta hã te sadawa nhipese ãna 're hâimana u'âsi. Tô sena uptabi na si isimiroti hã. Â na ipotozé wasu'u hã, duré dâ'â wa, iwapru tiwi ipu'uzé wasu'u hã, duré 'Re ihâimana u'âsi mono pẽ'ẽzani nhimirowasu'u hã, ã norĩ waihu'uzém na marĩ aimawi na wa te ãma 're waihu'u za'ra mono õ di. Ãhã wasu'u si wa tô upsãtã pese na wasiwi waihu'u pese za'ra ni, Zezusi hã a'uwẽ hâiba na ipotozé wasu'u si. 9Marĩ na tô sena na da te wama 're rowasu'u za'ra mono wamhã, wa za tô wa te ãma 're saze za'ra. Tawamhã 'Re ihâimana u'âsi mono hã marĩ hã te te wama 're awaihu'u mono wamhã, e wa te ãma 're saze za'ra mono õ di za. Da te wama 're irowasu'u za'ra mono zém nhipai u hã, wa za tô wa te ãma 're sazei pese za'ra, simiroti pire uptabi wa, 'Re ihâimana u'âsi mono hã. E niha tawamhã ma tô wama waihu'u za'ra. Zezusi hã tô sena, ti'ra uptabi na ma tô wama waihu'u za'ra. Tahawa, tô sena wa, wa za wa te ãma 're sazei pese za'ra, õne haré. 10Ni'wam norĩ hã, Zezusi, 'Re ihâimana u'âsi mono 'ra hã te te sina 're umnhasi za'ra mono wamhã, ta norĩ si te za tipẽ'ẽ na sena na te te 're waihu'u za'ra, â na ipotozé wasu'u na, duré iwapru, tiwi ipu'uzé wasu'u na. 'Re ihâimana u'âsi mono pẽ'ẽzani te te tãma 're i'awaihu'u mono zéb zarina si, te za sena na te te 're waihu'u za'ra, a'uwẽ hâiba na ipoto na, Zezusi hã. Tane nherẽ, ti'ra na Zezusi te te dama 're iwaihu'u mono zém na, ni'wam norĩ hã 'Re ihâimana u'âsi mono hã te te ãma 're saze za'ra mono õ wamhã, isadawa nhipe hã te te ãma 're sa'ra za'ra, ta norĩ hã. 11E niha 'Re ihâimana u'âsi mono hã, ti'ra te te dama 're iwaihu'u mono zé hã. Ta hã ma tô te te wama 're apisutu, i'ra wazada idâ'âzém na ãma 're iwanomro u'âsi mono zéb da hã. 12Ni'wam norĩ hã 'Re ihâimana u'âsi mono 'ra siré, 'râwi 're nomro mono wamhã, ta norĩ hã te za dâ'â ãna 're hâimana u'âsi za'ra, 'Re ihâimana u'âsi mono 'rata. Tane nherẽ, ni'wam norĩ hã 'Re ihâimana u'âsi mono 'ra siré 're nomro mono õ wamhã, ta norĩ hã i'rata dâ'â ãna 're hâimana u'âsi za'ra mono õ di za.

'Re idanomro u'âsi mono zé, da te dasina 're i'uwaimrami za'ra mono zé wasu'u

13E marĩ da, wa ãne aima rob'ui'éré za'ra wa'wa, 'Re ihâimana u'âsi mono 'ra, asina 're i'umnhasi za'ra wa'aba mono norĩ ma. Aipẽ'ẽ 're, atâ'â ãna 're anomro u'âsi aba mono zém na sena na asina waihu'u pese za'ra wa'aba da, wa ãne aima rob'ui'éré za'ra wa'wa. 14'Re ihâimana u'âsi mono te te wama 're i'awẽ mono zéb uwaibaba si, uburé marĩ na wa te tiwi 're rowaptẽrẽ za'ra mono wamhã, tô sena te za wamreme hã te te 're awapari pese, te te wama ãma 're i'a'uwaimrami mono zéb da hã. Tahawa, wasina wahâtâ'â ãna, wa za 'râwi wapẽ'ẽ 're itẽme 're wasihutu, 'Re ihâimana u'âsi mono u hã. 15Uburé marĩ na wa te tiwi 're irowaptẽrẽ za'ra mono zém na te wa'ãma 're po're pu'u u'âsi, wamreme na. Tô sena na, wa tô ãne na waihu'u za'ra ni. Taha zarina wa duré wasina waihu'u pese za'ra ni, za te te wama ãma 're i'a'uwaimrami mono zém na hã.

16-17Uburé da te 're i'manharĩ wasété za'ra mono zé hã, dawasédé tô, simisutu. Tane nherẽ, ni'wam norĩ hã tiwasédé hã te te 're 'manharĩ za'ra mono nherẽ, 'Re ihâimana u'âsi mono nhimiroti u tiwasété wi oto 're sipizari za'ra mono wamhã, õ hã te te ãma 're ab'madâ'â mono õ di za tô oto. Tawamhã 'Re ihâimana u'âsi mono 'rata 're idanomro u'âsi mono zé hã, tiwi 're simani za'ra mono õ di za tô oto duré.

Tawamhã ni'wam norĩ hã iwasédé te te 're 'manharĩ za'ra mono wamhã, duré iwasété na 're waihu'u za'ra wa'aba mono wamhã, te za ãma 're aimreme zusi aba mo, 'Re ihâimana u'âsi mono ma, ipẽ'ẽ 're, dâ'â ãna 're ihâimana u'âsi za'ra mono zé hã te te tãma 're apisutu mono da oto.

Tane nherẽ, ni'wam norĩ hã tiwasété wi 're isipizari za'ra mono zéb zô, 'Re ihâimana u'âsi mono pẽ'ẽzani te te tãma 're iroti za'ra mono zé hã te te 're wapari za'ra mono õ wamhã, 'Re ihâimana u'âsi mono hã te za iwasédé hã te te ãma 're ab'madâ'â u'âsi. 'Re ihâimana u'âsi mono 'rata 're idanomro u'âsi mono zé hã, tahawa, te te sina 're uwaimrami za'ra mono õ di za. Tiwasété wi 're sipizari za'ra mono õ nherẽ, e niha te za 'Re ihâimana u'âsi mono hã ãma 're siwamri za'ra, te te 're isõ'reptu za'ra mono zéb da hã. Tahawa, ta norĩ ãma hã te ãma aima roti za'ra wa'aba õ di za, ãma 're i'aimreme zusi aba mono zéb da hã.

18Ni'wam norĩ hã 'Re ihâimana u'âsi mono hã ãma 're 'ra za'ra mono wa, isib'a'uwẽ na oto 're nomro wẽ mono wamhã, tiwasédé hã te te oto duré 're i'manharĩ u'âsi za'ra mono da hã mare di za. 'Re ihâimana u'âsi mono 'ra hã, Zezusi hã oto ãma 're sisaprĩ u'âsi za'ra mono wa, tiwasédé hã te te 're 'manharĩ waihu'u za'ra mono õ di za tô oto duré. Tahawa, iwasété uptabi hã te te oto 're upi waihu'u za'ra mono õ di za, Wa'uburé hã. Ãne hã wama waihu'u pese za'ra di oto.

19Ti'ai ãma uburé 'Re ihâimana u'âsi mono wẽ'õ'wa norĩ hã iwasété uptabi zadawa para te 're hâimana za'ra. Wa norĩ si 'Re ihâimana u'âsi mono nhib'a'uwẽ, wa 're wanomro. Ãne hã wama waihu'u pese za'ra di duré.

20Ãne wa tô duré waihu'u za'ra ni. Zezusi hã, 'Re ihâimana u'âsi mono 'ra hã ma tô wei mo, ti'ai u. Ta hã ma tô tinhimiroti na te te 're wa'apawapto, 'Re ihâimana u'âsi mono hã tô sena uptabi hã wa te 're iwaihu'u pese za'ra mono zéb da hã. I'ra ãma, Zezu Cristuhu ãma 're wanomro mono wa, wa duré Imama ãma 're wanomro, tô sena uptabi 're ihâimana mono ãma. Zezusi hã, ta hã uburé Danhib'apito uptabi. Ta hã dapẽ'ẽ 're dadâ'â ãna 're idanomro u'âsi mono zé hã, te te dama 're i'apisutu mono. Ãne na wa tô wasiwi waihu'u pese za'ra ni.

21Ĩ'ra norĩ, ĩma asawi pese za'ra wa'aba norĩ hã, 'Re ihâimana u'âsi mono upana waihu'u pese newa, marĩ na 're idawata za'ra mono norĩ wi, te za 're asi'madâ'â pese za'ra wa'aba mo 'râwi, da'ãma 're sasõmri za'ra wa'aba mono tõ da.

Currently Selected:

1 Zuwã 5: xavBP

Highlight

Copy