1 Zuwã 4

'Re ihâimana u'âsi mono nhimiroti upana, dama rowasu'u nhipese'wa norĩ wasu'u

1Ĩsisãnawã norĩ, ĩma asawi pese za'ra wa'aba norĩ hã, ãté ni'wam norĩ hã te za ãne aima 're siwasu'u za'ra wa'wa: “'Re ihâimana u'âsi mono ma tô Tipẽ'ẽzani hã te te wama 're anhomri. Ipẽ'ẽzani te te wama 're i'awaihu'u mono zéb zarina si, wa tô wa te dama 're sadawa wasu'u za'ra.” Ãne ni'wam norĩ hã aima 're siwasu'u za'ra wa'aba mono nherẽ, isimirowasu'u na 're saze su'u za'ra wa'aba mono õ di za, a'â. Ãhã na hã 'Re ihâimana u'âsi mono zadawa wasu'u uptabi 'wa newa, roti tô senai'õ na te te dama 're iroti za'ra mono norĩ hã ahâ uptabi na te oto 're hâimana za'ra. Daro mono bâ te dawazari 're hâimana za'ra. Tahawa, te za uburé roti hã tô sena zô 're ipibui u'âsi za'ra wa'aba mo, 'Re ihâimana u'âsi mono pẽ'ẽzani hawib zô si. 2E niha te za tawamhã iwaihu'u pese za'ra wa'wa, ni'wam norĩ hã 'Re ihâimana u'âsi mono pẽ'ẽzani ré sena na te te dama 're isadawa wasu'u za'ra mono na hã. Ãté ni'wam norĩ hã te za ãne sena na aima 're siwasu'u za'ra wa'wa, 'râwi tipẽ'ẽ hawim na te te 're irosa'rata za'ra mono hã: “Zezusi hã ta hã Cristu, tô sena Danho'reptui'wa da, 'Re ihâimana u'âsi mono te te ipisudu. Ta hã ti'ai ãma dawazari poto wa, ma tô si'a'uwẽ.” Ãne aima 're siwasu'u za'ra wa'aba mono wamhã, tô sena na te za ãma 're iwaihu'u za'ra wa'aba mo oto, 'Re ihâimana u'âsi mono zadawa wasu'u uptabi 'wa na, duré Ipẽ'ẽzani ré 're ihâimana za'ra mono na zama. 3Tane nherẽ, ni'wam norĩ Zezusi hã Danho'reptui'wa da, ti'ai ãma dawazari isi'a'uwẽ na te te dawi 're udâ za'ra mono wamhã, ta norĩ hã 'Re ihâimana u'âsi mono pẽ'ẽzani ré 're hâimana za'ra mono õ di, tô sena na. Zezusihi zada, 're ihâimana mono nhimirosa'rata zarina si te te 're rosa'rata za'ra, tipẽ'ẽ na hã. Ma tô iwaihu'u siromo za'ra wa'wa, Zezusihi zada, 're ihâimana mono nhimiroti wasété na, za daro mono bâ dasima da te ãma 're iropéi mono na hã. Ãhã na isõwam nherẽ, te isimiroti wasété na 're dahâimana za'ra duré.

4Ĩ'ra norĩ, a norĩ wa'aba si te oto 'Re ihâimana u'âsi mono nhib'a'uwẽ 're aihâimana za'ra wa'aba mo. 'Re ihâimana u'âsi mono zadawa wasu'u uptabi 'wa newa, tô senai'õ na te te dama 're iroti za'ra mono norĩ da, ma tô asiptete sina 're aihâimana za'ra wa'aba mo, asimirosa'rata na. E marĩ wa. Aipẽ'ẽ 're, 're isãmra aba mono hã, Wa'uburé ma tiwaihu'u pese na siptete uptabi wa, ti'ai ãma dawada'uri wasété 'wai ma. 5Ta norĩ hã te 'Re ihâimana u'âsi mono wẽ'õ'wa norĩ me 're hâimana za'ra. Tahawa, te iwẽ'õ'wa norĩ nhimirosa'rata wasété zarina si te te tãma 're rowasu'u za'ra, ta norĩ hã. Taha na si te te tãma 're rowasu'u za'ra mono wamhã, wapari ze ti, isimiroti wasété za'ra hã, 'Re ihâimana u'âsi mono wẽ'õ'wa norĩ ma hã. 6Wa norĩ hã 'Re ihâimana u'âsi mono nhib'a'uwẽ, wa oto 're wanomro. Ni'wam norĩ hã 'Re ihâimana u'âsi mono hâimanazé hã 'râwi te te 're iwaihu'u za'ra mono hã, te ta norĩ si te te 're wawapari za'ra. Tanei õ di, 'Re ihâimana u'âsi mono nhib'a'uwẽ'õ norĩ, 're inomro mono norĩ te te 're wawapari za'ra mono õ di, 'Re ihâimana u'âsi mono wasu'u na hã. Tahawa, ni'wam norĩ hã 'Re ihâimana u'âsi mono wasu'u na te te 're wawapari za'ra mono õ wamhã, wa za wa te wasina 're waihu'u za'ra, Wa'uburé hawi roti tô senai õ zarina 're ihâimana za'ra mono na hã. Duré ni'wam norĩ hã 'Re ihâimana u'âsi mono wasu'u na te te 're wawapari ze za'ra mono wamhã, wa za duré wasina waihu'u za'ra ni, 'Re ihâimana u'âsi mono pẽ'ẽzani hawi roti sena uptabi zarina 're ihâimana za'ra mono na hã.

'Re ihâimana u'âsi mono nhimizawi pese zé wasu'u

7Ĩsisãnawã norĩ, 're idasisawi pese za'ra mono zé hã 'Re ihâimana u'âsi mono te wa, wa za ãma 're wasisawi pese uptabi za'ra. Ni'wam norĩ hã te te 're dazawi pese za'ra mono wamhã, ta norĩ hã 'Re ihâimana u'âsi mono 'ra, te oto 're hâimana za'ra. 'Râwi te duré te te 're waihu'u pese za'ra, 'Re ihâimana u'âsi mono hâimanazé hã. 8'Re ihâimana u'âsi mono hã, simizawi pese uptabi di. Tinhimizawi zarina te uburé marĩ hã te te dama 're ab'manharĩ u'âsi. Tahawa, ni'wam norĩ hã te te 're dazawi pese za'ra mono õ wamhã, 'Re ihâimana u'âsi mono siré 'râwi 're nomro mono õ di, ta norĩ hã. 9'Re ihâimana u'âsi mono hã ma tô tinhimizawi pese zé hã wama waihu'u za'ra. E niha ma tô wama waihu'u za'ra. Ti'ra hã misi nherẽ, ma tô we satõ ti'ai u, taha ãma si rowẽ na 're wanomro u'âsi mono da oto. 10Wa norĩ hã 'Re ihâimana u'âsi mono, wama sawi pese za'ra di. Tane nherẽ, te taha nhipai u te te 're wa'azawi pese uptabi. Tahawa, ma tô ti'ra we satõ ti'ai u, wazada dâ'â da, wazada dâ'â wa, wawasété na te te oto 're wa'ab'madâ'â tõ mono da. Tô sena isimizawi pese zé hã siwaprosi te tãma 're hâimana, danhipai u.

11Ĩsisãnawã norĩ, 'Re ihâimana u'âsi mono hã ãne hã te te 're wa'azawi pese mono wa, wa za wa norĩ zama taha zarina 're wasisawi pese za'ra, isine. 12'Re ihâimana u'âsi mono hã ni'wa titõmo na te te 'madâ'â õ di. Tane nherẽ, 're wasisawi pese za'ra mono wamhã, 'Re ihâimana u'âsi mono hã te za wa'rata 're sãmra u'âsi, 'râwi. Te te 're iwa'azawi pese mono zé hã wa za duré wa te wasina ãma tãma 're uwaimrami u'âsi za'ra. 13E niha wa za wasina waihu'u pese za'ra ni, 'Re ihâimana u'âsi mono ãma si 're iwanomro mono na, duré õhõ si wa'rata 're isãmra u'âsi mono na. 'Re ihâimana u'âsi mono hã ma tô Tipẽ'ẽzani hã te te wama 're anhomri. Taha na wa za wa te wasina 're waihu'u pese za'ra. 14Wamama hã ma tô ti'ra hã we satõ, Danho'reptui'wa da. Ta hã wa tô wa te 're 'madâ'â za'ra, watõmo na. Ãhã na wa oto wa te dama 're wasu'u za'ra, Danho'reptui'wa na, i'ra hã. 15Ni'wam norĩ hã te za ãne te te dama 're wasu'u za'ra: “Zezusi hã 'Re ihâimana u'âsi mono 'ra. Ta hã ma tô 'Re ihâimana u'âsi mono hã we ti'ai u satõ, Danho'reptui'wa da.” Ãne na ni'wam norĩ hã te te dama 're wasu'u za'ra mono wamhã, ta norĩ 'ratap si te 'Re ihâimana u'âsi mono hã 're hâimana, 'râwi. Ta norĩ si te duré 'Re ihâimana u'âsi mono siré hã 're hâimana u'âsi za'ra, 'râwi.

16'Re ihâimana u'âsi mono hã simizawi pese uptabi di. Tane ni'wam norĩ hã te te 're dazawi pese za'ra mono wamhã, ta norĩ si te 'Re ihâimana u'âsi mono ãma 're hâimana za'ra, 'râwi. Ta norĩ 'ratap si te duré 'Re ihâimana u'âsi mono hã 're sãmra, 'râwi. 'Re ihâimana u'âsi mono te te 're iwa'azawi pese mono zé hã wama waihu'u pese za'ra di oto. Taha na wa te wasiwi ãma 're wawã za'ra mono õ di za oto. 17Niwapsi te za Zezusi hã dahâimanazém na da'awaihu'u, za te te da'ãma i'arowairébézéb ãma hã. Tawamhã 're ihâimana wasété za'ra mono norĩ si te za hâ za'ra oto. Cristu hã ti'ai ãma 're morĩ ré, sihâiba zawi ãna te te 're idazawi pese mono ne, ti'ab ré 're wasisawi pese za'ra mono wamhã, tawapsi, wasina wapahi za'ra õ di za, za da'ãma isipo'ozéb ãma hã oto. 'Re ihâimana u'âsi mono te te 're iwa'azawi pese mono zé hã wa te tãma ãma 're uwaimrami u'âsi za'ra mono wa, wa za wasina wapahi ãna isõ'a hã wahâimana za'ra ni. 18Dazawizé dama 're hâimana za'ra mono wamhã, dapahizé hã hâimana õ di. Dazawizé sena uptabi hã te za sisiti sa'ré, dapahizé hã. Tahawa, ni'wam norĩ ma, ipahi 're hâimana za'ra mono wamhã, tama hâimana õ di, sena na isimizawizé hã. Ta norĩ hã pahi u'âsi 're hâimana za'ra mono wa, te za romhâ ré robzei'õ na 're hâimana za'ra ti'ab ré, 'Re ihâimana u'âsi mono hã za da'ãma isipo'ozéb ãma te te da'ahâ za'ra wa, da te 're irobzépata za'ra mono ne.

19'Re ihâimana u'âsi mono hã imorĩ'rata na te te 're wa'azawi pese mono wa, wa duré wa norĩ hã wa te wasiwi 're sawi pese za'ra, asa. Tahawa, wa duré 're wasisawi pese za'ra. 20Ãté ni'wam norĩ hã te za taré ãne dama 're siwasu'u za'ra: “'Re ihâimana u'âsi mono hã wa wa te 're sawi pese za'ra.” Ãne dama 're siwasu'u za'ra mono nherẽ, te te oto 're da'ruiwapari u'âsi za'ra mono wamhã, sadawa nhipese na te ta norĩ hã 're hâimana za'ra. Titõmo na 'râwi te te 're i'madâ'â za'ra mono norĩ hã te te 're sawi pese za'ra mono õ nherẽ, e niha te za tawamhã 'Re ihâimana u'âsi mono hã dahâiba u'âbâ hã te te siwi 're sawi pese, titõmo na te te siwi 're 'madâ'â mono õ nherẽ. Ãne wamhã, tãma sawi waihu'u za'ra õ di, ta norĩ ma hã. 21Zezusi hã ma tô ãne te te wama 're roti za'ra: “Ni'wam norĩ hã 'Re ihâimana u'âsi mono te te siwi 're sawi pese za'ra mono wamhã, taha zarina te za duré te te 're dazawi pese za'ra.” Ãne isimiroti hã, wama za'ra hã.

Currently Selected:

1 Zuwã 4: xavBP

Highlight

Copy