ROMA 9

Na Kalou kei Ira na Nona Tamata Digitaki

1Na ka au kaya tiko e dina; au sa nei Karisito ka'u sa sega ni lasu, sa vakadinadinataka mai na noqu lewa e loma ena cakacaka ni Yalo Tabu ni'u sa sega ni lasu. 2Sa ka levu dina na noqu rarawa, ka sega ni oti rawa na mosi ni yaloqu me baleti ira na kai noqu, o ira na tiki ni yagoqu ka noqu dra dina! 3E vinaka cake vei au me a tau vei au na cudru ni Kalou ka'u tawasei tani mai vei Karisito kevaka e rawa ni ra vukei kina. 4Sa i ira na tamata digitaki ni Kalou. Sa okati ira o koya me ra luvena ka a vakaraitaka vei ira na nona i serau lagilagi. E a cakava talega na nona veiyalayalati kei ira, ka solia vei ira na Lawa. Era sa kila talega na sala dodonu ni nona qaravi ka sa nodra talega na vosa ni yalayala.#Lako 4.22 5Sa i ira na nodra kawa na Pateriaki (o ya o ira na nodra qase na Isireli). Ena tikina vakayago sa mai sucu tale ena nodra kawa tamata na Karisito. Ia me vakacaucautaki tikoga na Kalou, o koya sa lewa na ka kecega ka sega ni mudu! Emeni.

6Au sega ni kaya ni sa sega ni yaco na vosa ni yalayala ni Kalou; ka ni ra a sega ni Isireli dina o ira kece na kawa i Isireli. 7Era a sega talega ni luve ni Kalou kece na kawa i Epara-ama, ka ni a kaya na Kalou vei Epara-ama, “Era na okati me ra nomu kawa o ira na kawa i Aisake.”#Vteki 21.12 8E kena i balebale o ya ni o ira na gone era sucu ga mai vakadodonu vakayago, era sega ni luve ni Kalou; ia o ira ga na gone era sucu mai me vaka e yalataka na Kalou, era sa okati me ra nona kawa dina. 9Ni sa vakaoqo na vosa ni yalayala ni Kalou, “Au na lesu tale mai ena gauna vata oqo ena yabaki mai oqo, ka na vakasucuma o Sera e dua na gonetagane.”#Vteki 18.10

10Ia e sega ni o koya walega o ya: ni sa yaco talega na mataqali ka vakaoqo vei Repeka ena nona kunekunetaki rau na luvena tagane mai vua e duabulu na tama, na noda qase o Aisake. 11Ia me rawa ni vakaraitaki kina ni sa digidigi sara ga ni Kalou vakaikoya ka sega ni a veikacivi ena vuku ni cakacaka sa cakava e dua vei rau na gonetagane, 12a sa kaya kina Kalou vei tinadrau: “Ena dau qaravi koya e gone o koya ka qase.” (A sa kaya oqo ni rau se bera ni sucu, ka sega ni se dua vei rau me cakava e dua na ka vinaka se ka ca.)#Vteki 25.23 13Me vaka talega sa volai tu ena i Vola Tabu, “Au sa lomani Jekope, ia ka'u sa cati Iso.”#Mala 1.2,3

14Ia a cava me da qai kaya? Sa sega beka li ni dodonu na Kalou? E sega sara. 15Ni a kaya vei Mosese o koya, “Au na yaloveivosoti ga ki vua au sa yalololoma kina ka'u na yalovinaka vei koya au sa via yalovinaka vua.”#Lako 33.19 16A sa sega kina ni vakatautaki ki na ka sa vinakata se cakava na tamata, ia ena yaloveivosoti ga ni Kalou. 17Ni sa kaya na i Vola Tabu vua na tui Ijipita, “Au sa buli iko ena i naki levu me vakatakilai kina na noqu kaukauwa vei iko, me kilai kina na yacaqu e vuravura taucoko.”#Lako 9.16 (LXX) 18O koya oqo sa yalololoma kina na Kalou kivei koya sa digitaka, ka sa vakayalokaukauwataki ira na tamata sa digitaka o koya me vakayacora vakakina.

Na Cudru kei na Loloma ni Kalou

19Ena dua vei kemuni ena kaya mai vei au, “Ke dina o ya, ena qai rawa vakacava vua na Kalou me beitaka ni cala e dua na tamata? O cei ena rawa ni vorata rawa na lomana?” 20Ia o cei o iko, na wekaqu, mo sauma na vosa ni Kalou? Na kuro qele ena sega ni rawa ni vosa lesu vei koya e buli koya me kaya, “Na cava o buli au kina vakaoqo?”#Aisea 29.16; 45.9 21Ni sa tu vua na dautulikuro na nona dodonu me lewa ga na nona vakayagataka na qele me vaka na ka e vinakata; sa rawa ni bulia e rua na kuro mai na dua ga na i buli qele, ka me cakava e dua na kena e sau dredre se dua ga na kena e sau rawarawa.

22Sa vakakina na Kalou ena ka e sa cakava. Sa vinakata me vakaraitaka na nona cudru, ka vakatakila talega na nona kaukauwa. Ia sa vosoti ira vakadede ga na tamata sa cudruvi ira o koya, o ira sa vakarau vakarusai. 23A sa gadreva talega o koya me vakaraitaka na nona i serau lagilagi cecere, ka sa sovaraka vei keda eda sa nona takete ni yaloveivosoti, kivei keda eda sa vakarautaki me da vakaivotavota ena nona i serau lagilagi. 24Ni sai keda ga na tamata ka sa kaciva o koya, ka sega ni veikacivi walega mai vei ira na Jiu, ia mai vei ira talega na kai matanitu tani. 25Ni sai koya oqo na ka e kaya na i vola i Osea,

“O ira era a sega ni noqu tamata

Au na kacivi ira me ra ‘Noqu Tamata.’

Na matanitu au a sega ni lomana

Au na kaciva me ‘Noqu Daulomani.’#Osea 2.23

26Kei na vanua sara ga sa tukuni kina vei ira, ‘O ni sa sega ni noqu tamata,’

Era na vakatokai kina me ra luve ni Kalou bula.”#Osea 1.10

27Sa kacivaka o Aisea na veika me baleti Isireli: “Kevaka sara mada ga era lewe levu me vaka na mata ni nuku ena matasawa o ira na Isireli, ia ena lewe vica ga vei ira na vo-ni-bula ena vakabulai;#Aisea 10.22,23 (LXX) 28ka ni na vakayacora vakatotolo na Turaga na nona lewa e vuravura taucoko ena lewa matau.” 29Me vaka ga na veika sa tukuna oti o Aisea, “Kevaka me a sega ni vakavoca toka vei keda eso na noda kawa na Turaga na Kalou Kaukauwa, keda sa vakataki Sotoma, ka tautauvata kei Komora.”#Aisea 1.9 (LXX)

Na Masu i Paula me Baleti Isireli

30Sa i koya oqo na lewe ni ka keitou kaya tiko: O ira na kai matanitu tani era a sega ni saga me ra vakadonui, sa vakadonui ira oqo na Kalou ena vuku ni vakabauta. 31Ia o ira na Isireli, era vakasaqara tiko eso na lawa me vakadonui ira kina na Kalou, ka ra sa sega tikoga ni kunea. 32A cava era sega tikoga kina ni kunea? Baleta ni ra vakararavi tikoga ki na nodra sasaga vakai ira ka ra sega ni yavutaka na nodra cakacaka ena vakabauta. Era sa tarabe ena vatu ni veivakatarabetaki, 33e kainaki toka kina ena i Vola Tabu:

“Raica, au sa vakotora toka mai Saioni e dua na vatu,

Ena vakatarabetaki ira na tamata;

E dua na vatu era na tacaqe kina.

Ia o koya ena vakabauta ena sega ni vakamaduataki!”#Aisea 28.16 (LXX)

Currently Selected:

ROMA 9: FNV

Highlight

Copy