ROMA 7

E Dua na i Vakatautauvata ni Bula Vakawati

1Sa dina sara ni o ni sa na kila vinaka tiko na veika au vakarau tukuna oqo, oi kemuni na veiwekani, baleta ni o ni sa kila kece tu na veika me baleta na lawa. Na lawa e dau vauca na tamata ena gauna ga e se bula tiko kina. 2Sa vakakina na yalewa ni sa vauci koya tu na lawa vua na watina tagane, ena gauna kece e bula voli kina; ia kevaka sa mate na tagane, sa qai galala o koya mai na lawa ka a vauci koya tu vua na watina. 3Ena vakatokai o koya me dautagane kevaka sa la'ki tiko vata tale e dua na tagane ni se bula tikoga na watina. Ia kevaka sa mate na watina, sa qai galala o koya mai na Lawa, ka kevaka e mani taura e dua tale na tagane me watina, sa sega ni qai okati o koya me dautagane. 4O ni sa vaka talega o ya na wekaqu. Me baleta na Lawa, o ni sa mate oti vaka talega kina, me vaka o ni sa tiki ni yago i Karisito; ia sa yaco oqo mo ni taukeni mai vua sa vakaturi cake tale mai na mate, me rawa kina ni da vuataka na vua yaga vua na Kalou. 5Ena gauna eda se bula vakayago voli kina, era sa dau cakacaka tiko e yagoda na veigagadre ca ni yago ni sa vakauqeti ira kina na Lawa, me vuataki kina na vua ni mate. 6Ia oqo eda sa galala mai na Lawa, ka da sa mate ki na veika sa vakabobulataki keda. Sa sega kina ni da veiqaravi ena sala makawa ni lawa sa volai, ia ena sala vou ga ni Yalo Tabu.

Na Lawa kei na i Valavala Ca

7A cava me da qai kaya kina? Sa i valavala ca beka li na Lawa? E segai sara! Ia sai koya ga na Lawa ka sa vakavuna me'u kila kina na i valavala ca. Ni kevaka sa sega ni kaya na Lawa, “Mo kakua ni kocokoco,” ke'u a sega ni kila se na cava na kocokoco.#Lako 20.17; Vrua 5.21 8Ia sa qai vakayagataka na lawa o ya na i valavala ca me vakauqeta kina na veimataqali yalo vakatani kecega e lomaqu. Ni sa sega na Lawa, sa ka mate walega na i valavala ca. 9Au a bula voli tu e liu ni se bera na lawa; ia ni sa yaco mai na i vakaro, a sa bula cake mai vakasauri na i valavala ca 10ka'u sa mate sara yani kina oi au. Ia na i vakaro ka a dodonu me kauta mai na bula sa qai kauta mai vei au na mate. 11Ni sa kaukauwa na ca ena vuku ni vakaro, ka sa vakaisini au kina ka vakamatei au.#Vteki 3.13

12Ia na Lawa vakaikoya sa savasava, kei na i vakaro talega sa savasava, ka dodonu, ka vinaka. 13E kena i balebale li oqo ni mai vakavuna na noqu mate na ka vinaka? E sega sara! Sa vakavuna ga na noqu mate na i valavala ca; sa vakayagataka na ka vinaka me kauta mai kina vei au na mate, me vakaraitaki kina na i valavala ca ena kena roka dina. Ena ka oqo, ena vuku ni vakaro, sa qai vakaraitaki vinaka sara kina na levu ni kena ca na i valavala ca.

Na i Tovo e Rua e Tu Vua na Tamata

14Eda sa kila ni sa ka vakayalo na Lawa, ia oi au, au sa tamata vakayago ga ka a voli au tu na i valavala ca me'u nona bobula. 15Au sa dau sega ni kila na ka au cakava tiko; ka ni veika au vinakata me'u cakava au qai sega ni cakava, ia na veika au sega ni vinakata au sa qai dau cakava tiko.#Kala 5.17 16Ia me vaka ni'u sa dau cakava tiko na veika au sega ni via cakava sa vakaraitaka o ya ni'u sa vakadinata ni vinaka na Lawa. 17Ia sa sega kina ni oi au dina au dau cakava na vei ka oqo, na i valavala ca ga sa tiko e lomaqu. 18Au sa kila kina, ena noqu i tovo vakayago, ni sa sega ni dua na ka vinaka e tu e lomaqu. E dina ga ni dau tu e lomaqu na gagadre me'u cakava na ka vinaka, ia au sa sega ga ni cakava rawa. 19Au sa sega ni vakayacora na veika vinaka ka'u sa gadreva me'u cakava; ia au sa vakayacora tikoga na veika ca ka'u sa bese ni via cakava. 20Ia kevaka au sa vakayacora tikoga na veika au sa bese ni via cakava, e kena i balebale o ya ni sa sega ni oi au sa cakava tiko oqo; ia, na i valavala ca ga sa tiko vei au.

21Au sa qai raica kina ni sa cakacaka tiko na lawa oqo: ni gauna ka'u dau via cakava kina na ka vinaka, sa dau basika ga mai vei au na ka ca. 22Na lomaqu dina se na tamata-e-loma sa taleitaka na lawa ni Kalou. 23Ia au sa raica ni sa duatani na lawa sa cakacaka tiko e yagoqu, na lawa ka sa veisaqasaqa kei na lawa sa vakadonuya na lomaqu. Sa vakavuna oqo me'u bobula ki na lawa ni valavala ca sa cakacaka tiko e yagoqu. 24Na tamata vakaloloma dina oi au! O cei me na sereki au mai na yago oqo ka sa kauti au tikoga ki na mate? 25Ia me vakavinavinakataki ga na Kalou, o koya sa vakayacora oqo ena vuku ni noda Turaga ko Jisu Karisito!

Sa qai vaka tu oqo na noqu bula: au sa bobula ki na lawa ni Kalou ena noqu vakasama vakataki au, ia sa bobula ga ki na lawa ni valavala ca na noqu i tovo vakayago.

Currently Selected:

ROMA 7: FNV

Highlight

Copy