ROMA 14

Kakua ni Vakalewa na Wekamu

1Ni ciqomi ira ka sa malumalumu na nodra vakabauta, ia mo ni kakua ga#Kolo 2.16 ni veileti vata kaya ena vuku ni nodra rai se vakasama. 2Na nona vakabauta e dua na tamata sa vakatara vua me kania na ka kecega, ia o koya sa malumalumu na nona vakabauta sa kania walega na kakana draunikau. 3O koya sa kania na ka kecega me kakua sara ni vakalewai koya sa kana kakana draunikau walega, ia me kakua talega ni vakalewai koya sa kania na ka kecega o koya sa kania walega na kakana draunikau; ni sa vakadonui koya oti na Kalou. 4O cei o iko mo lewa na nona tamata e dua tani tale? Na nona turaga ga e rawa ni kaya se sa rawata tiko na nona i tavi se segai. Ia ena rawa ni rawata me vaka o ya o koya na nona i tavi, baleta ni sa rawa vua na Turaga me solia vua na kena kaukauwa.

5Eso na tamata sa okata me ra bibi cake eso na siga mai na siga tale eso, ka so tale era okata me ra tautauvata kecega na siga. Ia e ka bibi me da dui vakadeitaka na tamata yadua na noda rai se na veika eda sa nanuma. 6O koya sa nanuma ni sa bibi cake e dua na siga mai na kena vo e sa vakayacora vakakina ena nona doka na Turaga; o koya sa kania na ka kecega sa vakayacora vakakina ena nona doka na Turaga, baleta ni sa vakavinavinakataka na Kalou ena vuku ni kakana. O koya sa bese ni kania eso na ka sa vakayacora vakakina ena nona doka na Turaga, ka ni sa dau vakavinavinaka talega vua na Kalou. 7Ni sa sega ni dua vei keda me bula ena vukuna ga, se dua sa mate ena vukuna ga. 8Kevaka eda sa bula, eda sa bula ga ena vuku ni Turaga; ia kevaka eda sa mate, eda sa mate ga ena vuku ni Turaga. Se da bula se da mate, eda sa nona tikoga na Turaga. 9Ni sa mate na Karisito ka tucake tale ki na bula me yaco rawa kina vua me nodra Turaga era sa bula kei ira era sa mate. 10E qai cava na vuna o sa vakalewa kina na wekamu? Se na cava na vuna o sa beca kina na wekamu? Oi keda kece eda na la'ki tu ena mata ni Kalou me lewai keda o koya.#2Kori 5.10 11Ni sa kaya na i Vola Tabu,

“Me vaka ni'u sa bula tiko, sa kaya na Turaga,

Ena tekiduru e mataqu na tamata kecega,

Ka ra na vakatusa ni'u sa Kalou oi au.”#Aisea 45.23 (LXX)

12Ena ka oqo, eda na dui vakamacalataka kina vua na Kalou na veika kece me baleta na noda dui bula yadua.

Kakua ni Vakavuna na Nona Bale na Wekamu

13O koya oqo, me da sa muduka kina na noda veivakalewai tiko. Ia mo ni qarauna ga mo ni kakua ni cakava e dua na ka me la'ki tarabe se bale kina na wekamuni ki na i valavala ca. 14Na noqu veiwekani veivolekati kei na Turaga ko Jisu sa vakataudeitaka vei au ni sa sega ni dua na kakana sa dukadukali vakaikoya; ia kevaka sa vakabauta e dua na tamata ni sa sega ni savasava e dua na kakana, sa na qai sega ni savasava oqo ki vua. 15Kevaka o sa vakararawataka na tacimu se ganemu ena vuku ni kakana o sa kania, o sa qai sega kina ni vakayacora na i valavala sa yavutaki ena loloma. Kakua ni vakatara na kakana o dau kania me la'ki vakacacana e dua na tamata ka sa mate oti na Karisito ena vukuna! 16Kakua ni vakatara na veika o sa okata ni vinaka me la'ki kainaki ni ca. 17Ni sa sega ni ka-ni-kana se gunu na matanitu ni Kalou, ia sa ka ga ni yalododonu, kei na vakacegu, vata kei na reki ena Yalo Tabu. 18Ia ni ra sa qaravi Karisito vakaoqo na tamata, era sa vakalomavinakataka na Kalou ka ra sa vinakati talega mai vei ira na veiwekani.

19Sa dodonu kina me da sasagataka tikoga na veika e kauta mai na tiko vakacegu kei na veivakaukauwataki. 20Kakua ni vakarusa walega na ka sa cakava na Kalou ena vuku ni kakana. Sa tara me laukana na veimataqali kakana kecega, ia sa cala ga me da kania e dua na ka e vakavuna me la'ki valavala ca kina e dua tani tale. 21Na ka dodonu me da cakava sai koya me da kakua ni kania na lewe ni manumanu, se gunu waini, se cakava e dua na ka ena la'ki vakavuna na nona bale na wekada. 22Mo drau kila vata ga kei na Kalou na ka o vakabauta ena ka oqo; kakua ni vakaraitaka. Sa kalougata na tamata e sega ni beitaki koya na lomana ena gauna e cakava kina na ka e dodonu vua. 23Ia kevaka era sa vakatitiqataka na ka era kania, sa lewa na Kalou me ra cudruvi kevaka era sa kana, baleta ni ra sa sega ni cakava oqo ena dela ni vakabauta. Na ka kecega sa sega ni yavutaki ena vakabauta sa okati me i valavala ca.

Currently Selected:

ROMA 14: FNV

Highlight

Copy